Mosaea 21–24, Vaega 1

Mauaina o Faamoemoega o le Alii mo o Tatou Tofotofoga ma Puapuaga

o se talavou o loo mafaufau loloto, e foliga faanoanoa

E faapefea ona e faamalamalama atu i se tasi le mafuaaga e faataga ai e le Alii i tatou e oo i tofotofoga ma puapuaga? O leMosaea 21–24 o loo faamatala mai ai mea na oo i le nuu o Limae ma le nuu o Alema, o e na fetaiai uma ma luitau faigata. O lenei lesona ua faamoemoe e fesoasoani ia te oe e lagona ai le faateleina o le faalagolago i le Tama Faalelagi ma Iesu Keriso pe a e feagai ma tofotofoga ma puapuaga i lou olaga.

Tauaveina o avega

tagata o loo tauaveina se atofaafafa mamafa

Manatu faapea o ou tofotofoga, avega, ma puapuaga o loo faatusa i maa e tatau ona e tauaveina faaletino i se ato po o se atofaafafa.

• O a nisi o tofotofoga po o avega e ono oo i ai talavou e mafai ona lagona ai le pei o ni maa mamafa i totonu o se atofaafafa?

• O a ni fesili e ono i ai i tagata e uiga i avega o loo latou tauaveina?

Faaalu sina taimi e mafaufau ai e uiga i nisi o tofotofoga ma avega o loo e feagai ai i le taimi nei pe na feagai ma oe i lou olaga. Mafaufau e lisi mea nei i lau api talaaga mo suesuega. Atonu e te manao e faaaofia ai fesili, atugaluga, po o manaoga na e faatusaina i ou tofotofoga ma avega.

A o e suesue i le asō, vaavaai mo upumoni e mafai ona fesoasoani ia te oe e malamalama atili ai pe aisea e faatagaina ai oe e le Alii e oo i nei tofotofoga.

O le nuu o Limae ma le nuu o Alema

I le Mosaea 21–24, tatou te aoao ai e uiga i vaega e lua o tagata o e na feagai ma tofotofoga ma puapuaga tetele. O le vaega muamua sa nonofo i le laueleele o Nifae ma sa taitaia e le atalii o le Tupu o Noa o Limae. O le vaega lona lua sa nonofo i le laueleele o Helama ma sa taitaia e Alema.

atatusi o nofoaga i le Mosaea 21–24

O se aotelega puupuu lenei o mea na tutupu na siomia ai le faatagataotauaina o vaega taitasi:

O le nuu o Limae

Ina ua uma ona teena aoaoga ma lapataiga a Apinati, sa ave faatagataotauaina e sa Lamana i le laueleele o Nifae ia sa Nifae, o e ua taitaia nei e le Tupu o Limae, ma sa manaomia ona totogi lafoga mamafa (tagai Mosaea 19:15). E pei ona valoia e le perofeta o Apinati (tagai Mosaea 12:5), na faamalosia e sa Lamana le nuu o Limae e auauna atu ia i latou ma tauave avega mamafa (tagai Mosaea 21:3).

O le nuu o Alema

Ina ua mavae le maliu o Apinati, sa sosola Alema ma e na mulimuli ia te ia i Vai o Mamona, lea na papatisoina ai i latou (tagai Mosaea 17:1–4; 18:1–14). Sa latou sosola mulimuli ane mo lo latou saogalemu ma fausia se nuu amiotonu i le laueleele o Helama (tagai Mosaea 18:32–34; 23:1–4, 19–20). Na iu ina maua le nuu o Alema ma ave faatagataotaua e sa Lamana (tagai Mosaea 23:25–29, 36–37). O Amulona, o se tasi o faitaulaga amioleaga a Noa, sa tuu atu i ai le pule ia i latou ma amata ai ona sauaina Alema ma lona nuu (tagai Mosaea 24:8–9).

Aisea e faatagaina ai e le Alii ia tofotofoga

Faitau fuaitau o mau nei, ma vaavaai mo aoaoga e mafai ona fesoasoani ia te oe e malamalama ai pe aisea e faataga ai e le Alii i tatou e oo i tofotofoga ma puapuaga. Atonu e te manao e faailoga upu ma fasifuaitau e tulaga ese ia te oe.

• Nuu o Limae: Mosaea 21:5–16

• Nuu o Alema: Mosaea 23:21–24; 24:8–14

aikona, faamaumau

1. Tali fesili nei:

   • O a ni mea e talitutusa ai ma ni eseesega na e vaaia i le va o vaega e lua o tagata ma mea na latou oo i ai?

   • O le a se faamaoniga na e vaaia i nei tala i le alofa ma le popole o le Alii mo tagata?

   • O le a se mea na e aoaoina e uiga i le mafuaaga e faataga ai e le Alii ia tagata e mafatia i tofotofoga ma puapuaga?

O nei tala ua faaalia ai le tele o upumoni e uiga i le mafuaaga e faataga ai e le Alii ia tagata e feagai ma tofotofoga. Faatasi ai ma isi, atonu na e maitauina mea nei:

• E faatagaina i tatou e le Alii ia oo i tofotofoga e fesoasoani ia i tatou ia lotomaualalo ma faalagolago atili ia te Ia (tagai Mosaea 21:5–14).

• O nisi o tofotofoga ma puapuaga e oo mai o se taunuuga o le le usiusitai (tagai Mosaea 21:15).

• O o tatou tofotofoga e mafai ona tatou maua ai avanoa e saili atu ai ma lagonaina le mana o le Alii i o tatou olaga (tagai Mosaea 21:15–16; 24:14).

• E aoai e le Alii Lona nuu ma tofotofoina lo latou onosai ma le faatuatua (tagai Mosaea 23:21).

E toatele tagata e manatu o le aoaiina (tagai Mosaea 23:21) e tutusa lava le uiga ma le faasalaina. Na faamalamalama mai e Elder Lynn G. Robbins o le Fitugafulu, “O le upu aoaiina e sau mai le upu Latina castus, o lona uiga o le ‘ola mama po o le mama,’ ma o le uiga o le aoaiina o le ‘ia faamamaina’ [tagai Merriam-Webster’s Collegiate Dictionary, 11th ed. (2003), “chasten”]” (“O le Faamasino Tonu,” Liahona, Nov. 2016, 97). Mafaufau mo sina taimi pe faapefea ona faamamaina oe e le Alii e ala i ou tofotofoga ma puapuaga.

aikona, faamaumau

2. Tali mai ia le itiiti ma le lua o fesili nei:

   • E mafai faapefea e le malamalama i nei upumoni ona aafia ai le ala e te tali atu ai i ou tofotofoga?

   • O a ni aafiaga na fesoasoani ia te oe e iloa ai faamoemoega o le Alii mo le faatagaina o oe e oo i tofotofoga?

   • O le a se mea ua e aoaoina i le asō e mafai ona fesoasoani e te malamalama atili ai i tofotofoga e te oo i ai?

Tuu i le faitalia: O e Manao e Aoao Atili?

O le a se mea e mafai ona ou faia pe afai ou te lagona e le talafeagai o’u tofotofoga?

Matamata le vitio “The Will of God” (3:02). Mafaufau loloto pe faapefea ona e faaaogaina le aafiaga a Elder Brown i le mea atonu o loo tupu i lou olaga.

Matamata le vitio “Trial of Adversity” (2:40). Mafaufau pe na faapefea e le faatuatuaina o le fuafuaga a le Atua mo ia ona fesoasoani ia Katie e feagai ai ma ona tofotofoga.

Pe mafai ona ou tuputupu ae mai tofotofoga uma o feagai ma a’u?

Na maitauina e Elder Orson F.Whitney (1855–1931) o le Korama a Aposetolo e Toasefululua:

Elder Orson F. Whitney

E leai se tiga tatou te feagai, leai se tofotofoga tatou te oo i ai e maumau. E aogā mo lo tatou aotauina, i le atinaega o na uiga auaumamā e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu, ma agaalofa, ma sili atu ona agavaa e ta’ua o fanau a le Atua … ma e ala mai i faanoanoaga ma mafatiaga, tiga ma puapuaga, tatou te maua ai le aotauina lea ua tatou o mai ai iinei ina ia maua, ma o le a avea atili ai i tatou e pei o lo tatou Tama ma Tina oi le lagi. (Orson F. Whitney, e pei ona ta’ua i le Spencer W. Kimball, Faith Precedes the Miracle [1972], 98)

O le a se mea e mafai ona ou faia e liliu ai a’u avega i ni faamanuiaga?

Matamata le vitio “Tauaveina a Tatou Avega ma le Faamoemoe” (8:46). Mafaufau pe mafai faapefea e avega tatou te tauaveina i le olaga ona avea ma o tatou lelei faaleagaga ma faaletino.

Sa faasoa mai e Peresitene Henry B. Eyring o le Au Peresitene Sili se fautuaga e mafai ona fesoasoani ia i tatou a o tatou feagai ma tofotofoga:

Peresitene Henry B. Eyring

Atonu tou te mafaufau pe aisea e faataga ai e se Atua alofa ma mamana le tofotofoina faaletino o i tatou ia matua faigata. Ona Na te silafia e tatau ona tatou tuputupu ae i le mama ma le malosi faaleagaga ia mafai ai ona nonofo i Lona afioaga i ni aiga e faavavau. Ina ia mafai ona tupu lena mea, ua tuuina mai ia i tatou e le Tama Faalelagi se Faaola ma le mana e filifili ai mo i tatou lava e ala i le faatuatua e tausia Ana poloaiga ma ia salamo ma ia o atu ia te Ia.

Pe a e mafaufau po o le a le tele o le tiga e mafai ona e onosaia lelei, ia manatua o Ia. Sa Ia puapuagatia i mea o loo e puapuagatia ai ina ia Ona silafia le ala e siitia ai oe i luga. Atonu Na te le aveesea le avega, ae Na te tuuina atu ia te oe le malosi, faamafanafanaga, ma le faamoemoe. Na te silafia le ala. Sa Ia inuina le ipu oona. Sa Ia onosaia puapuaga mo tagata uma. (Henry B. Eyring, “Faaosoosoina, Tofotofoina, ma Faaiilaina,” Liahona, Nov. 2020, 97)