Library
Lesson 27: 2 Nephi 5

Lesson 27

2 Nephi 5

Pambungad

Matapos marinig ang babala ng Panginoon, si Nephi at ang mga taong pumanig sa kanya ay humiwalay kina Laman, Lemuel, at sa mga anak na lalaki ni Ismael. Sila ay namuhay nang mabuti at maligaya, samantalang ang mga pumanig kina Laman at Lemuel ay espirituwal na inihiwalay ang kanilang sarili sa Panginoon.

Mga Mungkahi sa Pagtuturo

2 Nephi 5:1–8

Inihiwalay ng Panginoon ang mga tagasunod ni Nephi mula sa mga tagasunod nina Laman at Lemuel

Sabihin sa mga estudyante na isipin ang ilan sa mahihirap na problema at desisyong naranasan nila. Hikayatin silang isaisip ang mga pagsubok na ito habang pinag-aaralan nila kung paano tumugon si Nephi sa mga pagsubok. Ipaalala sa kanila na nang mamatay si Lehi, si Nephi ang naging espirituwal na lider ng pamilya. Ipabasa nang tahimik sa mga estudyante ang 2 Nephi 5:1–4 para malaman ang pagsubok na dinanas ni Nephi.

  • Ayon sa 2 Nephi 5:1, ano ang ginawa ni Nephi para malaman ang solusyon sa problema niya?

  • Kahit matapos ipanalangin ni Nephi na tulungan siya, ano pa rin ang hinangad gawin nina Laman at Lemuel?

Sa pagsagot ng mga estudyante, maaari mong ipaliwanag sa kanila na ang ating mga panalangin ay hindi laging nasasagot kaagad o sa paraang nais natin.

Ipabasa nang malakas sa isang estudyante ang 2 Nephi 5:5–8. Sabihin sa klase na tahimik na sumabay sa pagbasa, at alamin ang ginawa ng Panginoon para tulungan si Nephi at ang kanyang mga tagasunod.

Sabihin sa mga estudyante na ibuod ang mga natutuhan nila mula sa 2 Nephi 5:1–8. Ang isang katotohanang maaari mong bigyang-diin ay ginagabayan ng Panginoon ang matatapat na nananalangin sa Kanya. Kaugnay ng mga talatang ito, itanong ang mga sumusunod:

  • Bakit mahalagang manatiling tapat kahit hindi laging nasasagot ang ating mga panalangin kaagad o sa paraang nais natin?

  • Sa anong mga paraan tayo binibigyan ng mga babala ng Panginoon?

Habang sinasagot ng mga estudyante ang tanong na ito, maaari mong basahin ang sumusunod na pahayag ni Pangulong Boyd K. Packer ng Korum ng Labindalawang Apostol:

“Hindi tayo maliligaw kung hindi natin binalewala ang babala sa una pa lang” (sinipi sa Kenneth Johnson, “Yielding to the Enticings of the Holy Spirit,” Ensign, Nob. 2002, 90).

  • Sa anong mga paraan natin matutularan ang halimbawa ni Nephi kapag dumaranas tayo ng mga pagsubok?

Bilang bahagi ng pagtalakay ng mga estudyante ng 2 Nephi 5:1–8, bigyang-diin na ang paghiwalay ng mga Nephita mula sa mga Lamanita ay dahil sa pagkamuhi nina Laman at Lemuel kay Nephi. Ang paghihiwalay na ito ay nagpatuloy sa paglipas ng daan-daang taon, at sa panahong ito ay itinuro ng mga inapo nina Laman at Lemuel sa kanilang mga anak na mapoot sa mga inapo ni Nephi (tingnan sa Mosias 10:12–17).

2 Nephi 5:9–18, 26–27

Ang mga Nephita ay namuhay nang maligaya

Basahin ninyo ng buong klase ang 2 Nephi 5:27 nang malakas. Maaari mong sabihin sa mga estudyante na markahan ang talatang ito. Isulat sa pisara ang salitang maligaya.

  • Ano sa inyong palagay ang ibig sabihin ng namuhay “nang maligaya”?

Isiping gamitin ang segment na ito mula sa Mga Video ng Aklat ni Mormon kapag itinuro mo ang bahaging ito (tingnan sa Mga Video ng Aklat ni Mormon: Mga Tagubilin sa Seminary Teacher).

Ipabasa nang malakas sa isang estudyante ang sumusunod na pahayag ni Elder Marlin K. Jensen ng Pitumpu:

Elder Marlin K. Jensen

“May ilang di-nababagong alituntunin at katotohanan ang naghahatid ng kaligayahan sa buhay natin. Ang paksang ito ay nakapukaw sa akin sa loob ng maraming taon dahil kahit marami akong pagpapala at may dahilan para maging masaya, paminsan-minsan ay nahihirapan ako at hindi laging madali at likas sa akin ang maging masayahin na tila nadarama ng ibang tao.

“Sa dahilang iyan, isang talata sa Aklat ni Mormon ang nakakuha ng pansin ko ilang taon na ang nakararaan. … Nakapagtatag si Nephi ng isang lipunan na nakasalig sa mga katotohanan ng ebanghelyo; at patungkol sa lipunang iyan sinabi niya, ‘At Ito ay nangyari na, na kami ay namuhay nang maligaya’ (2 Ne. 5:27). Tumimo sa puso ko ang scripture passage na ito. … Inisip ko … ano kaya ang mga sangkap ng tunay na maligayang lipunan at buhay, at sinimulan kong saliksikin ang mga isinulat ni Nephi para sa mga palatandaan. Inaanyayahan ko kayo na gumawa rin ng sarili ninyong pagsasaliksik. Maaaring ito ay maging panghabangbuhay at makabuluhang adhikain. …

“… Ang gayon ding paraan at sangkap ng araw-araw na pamumuhay na naging dahilan para maging maligaya si Nephi at ang kanyang mga tao 560 taon bago isilang si Cristo ay angkop pa rin ngayon” (“Living after the Manner of Happiness,” Ensign, Dis. 2002, 56, 61).

Hikayatin ang mga estudyante na gawin ang paanyaya ni Elder Jensen. Ipabasa sa kanila nang tahimik ang 2 Nephi 5:6, 10–18, 26–27, at alamin ang “mga sangkap ng tunay na maligayang lipunan at buhay.” Maaari mong sabihin na markahan nila ang mga alituntunin na nakaragdag sa kaligayahan ng mga Nephita. Pagkatapos ng ilang minuto, sabihin sa ilang estudyante na isulat sa pisara ang kanilang mga nalaman. (Maaaring kasama sa sagot na kasama ni Nephi at ng kanyang mga tagasunod ang kanilang mga pamilya sa kanilang paglisan [tingnan sa talata 6]; sinunod ang Panginoon [tingnan sa talata 10]; nagsikap na itaguyod ang kanilang sarili [tingnan sa talata 11, 15–17]; dinala ang mga banal na kasulatan [tingnan sa talata 12]; nagtayo ng templo [tingnan sa talata 16]; at sinunod ang mabubuting lider [tingnan sa mga talata 18, 26].)

Anyayahan ang mga estudyante na pumili ng isa o mahigit pang mga alituntunin sa pisara at ibahagi kung paano nakatulong sa kanila ang mga alituntuning ito na “mamuhay nang maligaya.”

Depende sa mga binigyang-diin ng mga estudyante, maaari kang magdagdag ng iba pang mga tanong na tulad ng mga sumusunod:

  • Ayon sa 2 Nephi 5:10–11, 16, anong mga pagpapala ang natanggap ng mga tao dahil sinunod nila ang mga kautusan ng Panginoon? Kailan ninyo nadama na kasama ninyo ang Panginoon? Paano nakadaragdag sa kaligayahan ninyo ang impluwensya ng Panginoon sa inyong buhay?

  • Paano nakatulong ang templo para “mamuhay nang maligaya” ang mga tao”? Paano nagdulot ng mas malaking kaligayahan sa inyo ang templo o sa kakilala ninyo?

  • Paano nakadaragdag sa kaligayahan ang masigasig na paggawa?

Sabihin sa mga estudyante na ibuod ang natutuhan nila tungkol sa paraan kung paano sila mas liligaya. Iba-iba man ang ibahaging mga alituntunin ng iyong mga estudyante, tiyakin na nauunawaan nila na kapag ipinamuhay natin ang ebanghelyo ni Jesucristo, mas liligaya tayo. Maaari mong isulat sa pisara ang alituntuning ito.

Sabihin sa mga estudyante na suriin ang buhay nila at alamin ang gagawin nila upang mas ganap silang mamuhay “nang maligaya.” Hikayatin sila na isulat ang gagawin nila sa kanilang mga scripture study journal o class notebook. Ibahagi ang iyong patoto tungkol sa mga alituntunin at pamamaraan na nagdulot ng kaligayahan sa iyong buhay.

2 Nephi 5:19–25

Ang mga Lamanita ay isinumpa dahil sa kanilang pagsuway

Ipabasa nang tahimik sa mga estudyante ang 2 Nephi 5:19–24, at alamin ang mga pagkakaiba ng pamumuhay ng mga Lamanita at ng pamumuhay ng mga Nephita.

  • Ayon sa 2 Nephi 5:20, ano ang kinahinatnan ng pagsuway ng mga Lamanita?

  • Paano nakatutulong sa inyo ang 2 Nephi 5:21 para maunawaan kung bakit inihiwalay ang mga Lamanita sa Panginoon? (Maaari mong ipaliwanag na ang kiskisan ay isang matigas na bato. Sa pagsasabi na ang mga Lamanita ay “natulad … sa batong kiskisan, binigyang-diin ni Nephi ang katigasan ng mga puso ng mga Lamanita.)

  • Anong babala ang ibinigay ng Panginoon sa mga Nephita na mag-aasawa ng mga Lamanita na hindi tumanggap ng ebanghelyo? (Tingnan sa 2 Nephi 5:23.)

  • Bakit mahalagang iwasan ang pakikipagdeyt at pag-aasawa ng mga taong hindi nakikinig sa Panginoon? Sa palagay ninyo paano maiimpluwensiyahan ng mga taong idinedeyt at pakakasalan ninyo kalaunan ang pagsisikap ninyong ipamuhay ang ebanghelyo? (Makatutulong na ipaalala sa mga kabataan na ipinayo ng Unang Panguluhan, “Makipagdeyt lamang sa may matataas na pamantayan at makatutulong sa inyo na mapanatili ang inyong mga pamantayan” [Para sa Lakas ng mga Kabataan (buklet, 2011), 4].)

  • Ano ang ilang alituntunin na matututuhan natin mula sa 2 Nephi 5:20–24? (Sa pagbabahagi ng mga estudyante ng mga alituntunin, tiyakin na nauunawaan nila na kapag pinatigas ng mga tao ang kanilang puso laban sa Panginoon, inihihiwalay nila ang kanilang sarili mula sa Kanya.)

Bigyang-diin na ang 2 Nephi 5 ay naglalahad ng malaking pagkakaiba ng mga Nephita at mga Lamanita. Maaari nating piliin kung aling halimbawa ang tutularan natin. Hikayatin ang mga estudyante na alalahanin ang ipinasya nilang gawin upang ganap na mamuhay “nang maligaya.” Sabihin sa kanila na naniniwala kang matutularan nila ang halimbawa ng mga Nephita at tunay na magiging maligaya.

Komentaryo at Pinagmulang Impormasyon

2 Nephi 5:5–9. Ihiwalay ang ating sarili mula sa kasamaan

May mga pagkakataon na kailangan talagang pisikal na tumakas mula sa masama, tulad nang ginawa ni Nephi at ng kanyang mga tagasunod. Gayunman, maaaring hindi natin palaging magawa na pisikal na ilayo ang ating sarili sa kasamaan. Ipinaliwanag ni Elder Richard G. Scott ng Korum ng Labindalawang Apostol kung paano natin mapoprotektahan ang ating sarili sa gayong mga sitwasyon:

“Naglaan ng daan ang Diyos para mabuhay sa mundong ito nang hindi nahahawa sa nakapagpapababa ng pagkatao na mga impluwensyang nagkalat dito. Mabubuhay kayo nang matwid, sagana, mabuti, sa pamamagitan ng pagsunod sa plano ng pangangalagang nilikha ng inyong Ama sa Langit: ang Kanyang plano ng kaligayahan. Ito’y nasa mga banal na kasulatan at inspiradong mga pahayag ng Kanyang mga propeta. …

“Iwasan ang kasamaan ng mundo. Dapat ninyong malaman na ang Diyos ang namamahala. Darating ang panahon [na] ganap na mabibigo si Satanas at parurusahan sa kanyang kasamaan. May natatanging plano ang Diyos sa inyong buhay. Ihahayag niya ang mga bahagi ng planong iyon sa inyo habang hinahanap ninyo ito nang may pananampalataya at patuloy na [pagsunod]. Pinalaya kayo ng Kanyang Anak—hindi mula sa mga ibubunga ng inyong mga kilos, kundi upang malayang makapili. Ang walang hanggang layunin ng Diyos ay para sa inyo upang magtagumpay kayo sa buhay na ito. Gaano man kasama ang mundo, matatamo ninyo ang pagpapalang iyon. Hangarin at pakinggan ang personal na patnubay na hatid sa inyo ng Banal na Espiritu. Patuloy na mamuhay nang marapat para matanggap ito. Tulungan ang ibang nadarapa at nalilito, na di tiyak kung anong landas ang tatahakin” (“Paano Mamuhay nang Maayos sa Gitna ng Tumitinding Kasamaan,” Ensign o Liahona, Mayo 2004, 100, 102).

2 Nephi 5:11, 13. “Kami ay labis na umunlad”

Sa 2 Nephi 5:11, 13, inilahad ni Nephi ang pag-unlad ng kanyang mga tao at ang pag-aalaga nila ng maraming kawan ng mga hayop at masaganang pananim. Kadalasan ang pag-unlad ay iniuugnay natin sa mga temporal na bagay na ibinibigay sa atin. Itinuro ni Pangulong Heber J. Grant na ang tunay na pag-unlad ay hindi lamang yaman sa mga materyal na bagay ng mundo:

“Kapag sinabi kong kasaganaan hindi lang pera ang tinutukoy ko. … Sa halip ang itinuturing kong tunay na kasaganaan, na siyang tanging mahalaga sa bawat taong nabubuhay, ay ang paglago sa kaalaman tungkol sa Diyos, at sa patotoo, at sa kapangyarihang ipamuhay ang ebanghelyo at bigyang-inspirasyon ang ating mga pamilya na gayon din ang gawin. Iyon ang tunay na kasaganaan” (Mga Turo ng mga Pangulo ng Simbahan: Heber J. Grant [2002], 137).

2 Nephi 5:10–18, 26–27. “Nang maligaya”

Ipinaliwanag ni Propetang Joseph Smith na may landas na patungo sa kaligayahan: “Kaligayahan ang pakay at layon ng ating pag-iral; at ito ang magiging katapusan nito, kung hahanapin natin ang landas tungo dito; at ang landas na ito ay ang kagandahang-asal, kabutihan, katapatan, kabanalan, at pagsunod sa lahat ng mga kautusan ng Diyos” (History of the Church, 5:134–35).

Itinuro ni Pangulong Gordon B. Hinckley: “Ang kaligayahan ay dulot ng kabutihan. ‘Ang kasamaan ay hindi kailanman kaligayahan.’ (Alma 41:10.) Ang kasalanan ay hindi kailanman kaligayahan. Ang pagkamakasarili ay hindi kailanman kaligayahan. Ang kasakiman ay hindi kailanman kaligayahan. Ang kaligayahan ay nakasalalay sa pagpapamuhay ng mga alituntunin ng ebanghelyo ni Jesucrito” (sa “Fast-Paced Schedule for the Prophet,” Church News, Abr. 20, 1996, 3).

2 Nephi 5:16. “At ako, si Nephi, ay nagtayo ng templo”

Ipinaliwanag ni Elder Marlin K. Jensen ng Pitumpu kung paano humahantong sa kaligayahan ang pagdalo sa templo:

“At isinulat ni Nephi, ‘At ako, si Nephi, ay nagtayo ng templo’ (2 Ne. 5:16). Ang templo ni Nephi ay maaaring may pagkakaiba sa mga templo natin ngayon, ngunit ang pangunahing layunin nito ay malamang na pareho lamang: ituro at ipaalam sa mga anak ng Diyos ang Kanyang plano para sa kanilang kaligayahan at ilaan ang mga ordenansa at tipan na mahalaga sa pagtatamo ng kaligayahang iyan.

“Sa mahigit limang dekada ko nang nabubuhay sa magandang mundong ito, tapat kong masasabi na ang pinakaespirituwal at pinakamasasayang taong nakilala ko ay ang masisigasig pumunta sa templo. May magandang dahilan iyan. Sa loob ng templo inihahayag at muling inihahayag ang kabuuan ng programa ng Diyos para sa atin, bawat paghahayag ay nagbibigay sa atin ng mas malawak na pang-unawa at pangakong mamuhay nang tulad Niya. …

“Ang magandang paraan marahil na malalaman natin kung gaano na tayo nalalapit kay Cristo ay kung ano ang nararamdaman natin tungkol sa templo at sa mga karanasan natin doon. Ang templo ay maitutulad sa kaligayahan at kagalakan. Iyan ang nadama ni Nephi at ng kanyang mga tao” (“Living after the Manner of Happiness,” Ensign, Dis. 2002, 60).

2 Nephi 5:20–25. Ang sumpa sa mga Lamanita

Sa 2 Nephi 5:20–25, makikita natin ang sagot sa apat lamang sa mga itinatanong tungkol sa sumpa na dumating sa mga Lamanita:

1. Ano ang sumpa?

Malinaw na nailahad sa 2 Nephi 5:20 na ang sumpa ay ang “[pagkawalay] mula sa harapan ng Panginoon.” Ang maitim na balat ng mga Lamanita ay hindi ang mismong sumpa.

2. Ano ang sanhi ng sumpa?

Ayon sa 2 Nephi 5:21, isinumpa ang mga Lamanita “dahil sa kanilang kasamaan” at dahil “pinatigas nila ang kanilang mga puso laban sa [Panginoon].” Mula pa sa Pagkahulog ni Adan, ang kasamaan ay laging nagbubunga ng pagkawalay mula sa presensya ng Panginoon (tingnan sa 1 Nephi 2:21; 2 Nephi 4:4; 9:6; Alma 9:13; Eter 10:11).

3. Bakit pinaitim ang balat ng mga Lamanita?

Ito ay marka o tanda na inilagay para sa mga partikular na dahilan. Ipinaliwanag ni Nephi, “Upang hindi sila [mga Lamanita] maging kaakit-akit sa aking mga tao ay itinulot ng Panginoong Diyos na umitim ang kanilang mga balat” (2 Nephi 5:21). Ibinigay ni Alma ang gayon ding paliwanag: “Ang balat ng mga Lamanita ay maiitim … nang sa gayon mapangalagaan ng Panginoong Diyos ang kanyang mga tao, upang hindi sila makihalubilo at maniwala sa mga maling kaugalian” (Alma 3:6, 8). Ang mga paliwanag na ito ay kaugnay ng iba pang mga babala sa banal na kasulatan na ang mga tao ng Panginoon ay hindi dapat magpakasal sa mga hindi naniniwala dahil ang kadalasang bunga ng paggawa nito ay ang paglayo ng mabubuti mula sa Panginoon (tingnan sa Deuteronomio 7:2–4; I Mga Hari 11:4; II Mga Taga Corinto 6:14; D at T 74:5).

4. Ano ang ibinunga ng sumpa?

Dahil sa sumpa—ang mahiwalay mula sa presensya ng Panginoon—ang mga Lamanita ay “naging mga tamad na tao, puno ng kalokohan at katusuhan” (2 Nephi 5:24).

Ang sumpang ito ay mananatili lamang hangga’t masasama ang mga tao. Nang magsisi ang mga Lamanita at ipinasyang ipamuhay ang ebanghelyo, “ang sumpa ng Diyos ay hindi na sila sinundan pa” (Alma 23:18). Ang Aklat ni Mormon ay naglalaman ng maraming halimbawa ng mga Lamanita na nagsisi at tinanggap ang paggabay ng Espiritu ng Panginoon. Nakatala sa aklat ni Helaman ang tungkol sa panahon na mas mabubuti ang mga Lamanita kaysa mga Nephita (tingnan sa Helaman 13:1).