Library
Lesson 40: 2 Nephi 31

Lesson 40

2 Nephi 31

Pambungad

Maraming taon bago isinilang si Jesucristo, tumanggap si Nephi ng paghahayag tungkol sa binyag ng Tagapagligtas. Nang sabihin ni Nephi sa kanyang mga tao ang paghahayag na ito, itinuro niya ang tinawag niya na “doktrina ni Cristo”—na upang makatanggap ng buhay na walang hanggan, dapat tayong manampalataya kay Jesucristo, magsisi ng ating mga kasalanan, magpabinyag, tanggapin ang Espiritu Santo, at magtiis hanggang wakas.

Mga Mungkahi sa Pagtuturo

2 Nephi 31:1–13

Itinuro ni Nephi na sa ating pagpapabinyag, tinutularan natin ang halimbawa ng Tagapagligtas

Simulan ang klase sa pagtatanong sa mga estudyante ng mga sumusunod:

  • Ano ang naaalala ninyo sa inyong binyag? Ano ang nadama ninyo noong binyagan kayo?

Ipaliwanag na sa pagpapabinyag ng mga estudyante, sinunod nila ang huwaran na noon pa man ay bahagi na ng ebanghelyo ni Jesucristo. Ginamit ni Nephi ang isang parirala na tumutukoy sa huwarang ito. Ipahanap sa mga estudyante ang parirala na matatagpuan sa 2 Nephi 31:2 at 2 Nephi 31:21. Matapos nilang matukoy ang pariralang “ang doktrina ni Cristo,” itanong:

  • Anong mga salita o parirala sa 2 Nephi 31:2, 21 ang nagsasaad na mahalaga ang “doktrina ni Cristo”? (Maaaring kabilang sa sagot ang “kailangan kong sabihin hinggil sa,” “walang ibang daan,” at “ang tangi at tunay na doktrina.”)

Idispley ang larawang Bininyagan ni Juan Bautista si Jesus (62133; Aklat ng Sining ng Ebanghelyo [2009], blg. 35). Sabihin sa mga estudyante na basahin nang tahimik ang 2 Nephi 31:5–9 at alamin ang mga parirala na nagpapaliwanag kung bakit nagpabinyag si Jesucristo. (Maaari mong imungkahi na markahan nila ang mga pariralang ito.) Pagkaraan ng ilang minuto, ipabahagi sa mga estudyante ang nalaman nila.

Bininyagan ni Juan Bautista si Jesus

  • Ano sa palagay ninyo ang ibig sabihin ng “ganapin ang lahat ng katwiran”? (Matapos sumagot ang mga estudyante, maaari mong ipaliwanag na ang ibig sabihin nito ay sundin ang mga kautusan. Sinabi ni Pangulong Joseph F. Smith na ang “ganapin ang lahat ng katwiran” ay “sundin ang batas” [sa Conference Report, Abr. 1912, 9].)

Ipabasa nang malakas sa isang estudyante ang 2 Nephi 31:10–12.

  • Paano ipinapaliwanag ng mga talatang ito ang kahalagahan ng binyag? (Itinuro ni Nephi na ang binyag ay utos mula sa Ama sa Langit, na kailangan upang matanggap ang kaloob na Espiritu Santo, at ito ay kailangan sa ating pagsisikap na sundin si Jesucristo.)

Sabihin sa mga estudyante na ibuod ang mga doktrina at alituntunin n natutuhan nila sa 2 Nephi 31:5–12. Sa pagbahagi nila ng kanilang mga ideya, tiyakin na nauunawaan nila ang mga sumusunod na alituntunin:

Nagpakita si Jesucristo ng perpektong halimbawa ng pagsunod na dapat nating tularan.

Dapat nating tularan si Jesucristo, magpabinyag, at tumanggap ng Espiritu Santo.

Kahit walang kasalanan si Jesucristo, siya ay nagpabinyag upang ganapin ang lahat ng katuwiran.

Ipabasa nang malakas sa isang estudyante ang 2 Nephi 31:13. Ituon ang atensyon ng mga estudyante sa mga pariralang “may buong layunin ng puso,” “nang walang pagkukunwari at walang panlilinlang sa harapan ng Diyos,” at “may tunay na hangarin.” Maaari mong imungkahi na markahan nila ang mga pariralang ito.

  • Ano ang kahulugan ng mga pariralang ito sa inyo? (Maaari mong ipaliwanag na lahat ng tatlong pariralang ito ay nagsasaad na kailangang tapat nating pinagsisikapang manampalataya sa Tagapagligtas, magsisi sa ating mga kasalanan, at tularan ang halimbawa ng Tagapagligtas.)

Para matulungan ang mga estudyante na mas maunawaan kung paano nila matutularan ang halimbawa ng Tagapagligtas sa iba’t ibang sitwasyon, itanong ang mga sumusunod:

  • Paano naaangkop ang mga pariralang ito sa mga gawain na tulad ng araw-araw na pag-aaral ng mga banal na kasulatan at pagpunta sa Simbahan?

  • Ano ang pagkakaiba ng “umuusal ng panalangin” at pananalangin “nang may buong layunin ng puso”?

  • Ano ang pagkakaiba ng pagkain ng tinapay ng sakramento at ng pagkain ng tinapay ng sakramento “nang may tunay na hangarin”?

  • Ano ang pagkakaiba ng pagsasabi na pinagsisisihan ninyo ang isang bagay na nagawa ninyo at pagsisisi “nang may buong layunin ng puso”?

2 Nephi 31:14–21

Itinuro ni Nephi na matapos ang binyag, kailangan nating tanggapin ang Espiritu Santo at patuloy na tularan ang halimbawa ng Tagapagligtas

Ipaliwanag na binanggit ni Nephi ang pasukan na nagbubukas patungo sa isang landas. Ipabasa nang malakas sa isang estudyante ang 2 Nephi 31:17–18. Kapag tapos ng magbasa ang estudyante, magdrowing sa pisara ng simpleng larawan na tulad ng nasa ibaba:

pasukan at landas

  • Batay sa 2 Nephi 31:17, ano ang pasukan? (Pagsisisi at binyag. Isulat ang Pagsisisi at Binyag sa ilalim ng pasukan.) Ano ang pagkakatulad ng pagsisisi at binyag sa pasukan?

  • Ayon sa 2 Nephi 31:18, saan patungo ang landas? (Buhay na walang hanggan. Isulat ang Buhay na Walang Hanggan sa dulo ng landas. Maaaring kailangan mong ipaliwanag na ang pariralang “buhay na walang hanggan” ay tumutukoy sa kadakilaan sa kahariang selestiyal.)

  • Itinuro ni Nephi na matapos ang binyag, tatanggapin natin ang kaloob na Espiritu Santo (tingnan sa 2 Nephi 31:13–14). Ayon sa 2 Nephi 31:17–18, ano ang ginagawa ng Espiritu Santo para sa atin? (Tulungan ang mga estudyante na maunawaan na ang Espiritu Santo ay sumasaksi sa Ama at sa Anak at naghahatid ng kapatawaran ng mga kasalanan.)

  • Bakit mahalagang magkaroon tayo ng patotoo sa Ama at sa Anak sa pamamagitan ng Espiritu Santo?

Para matulungan ang mga estudyante na maunawaan ang tungkuling ginagampanan ng Espiritu Santo sa kapatawaran ng mga kasalanan, maaaring kailangan mong ipaliwanag ang pariralang “binyag ng apoy at ng Espiritu Santo” (2 Nephi 31:13–14; tingnan din sa talata 17). Ipabasa sa isang estudyante ang sumusunod na pahayag ni Elder David A. Bednar ng Korum ng Labindalawang Apostol. Sabihin sa klase na pakinggan kung ano ang kahulugan ng mabinyagan sa pamamagitan ng apoy at ng Espiritu Santo.

“Ang pasukan sa pagbibinyag ay patungo sa makipot at makitid na landas. …

“Ipinag-uutos at itinatagubilin sa atin na mabuhay sa paraang mababago ang nahulog nating kalagayan sa pamamagitan ng nagpapabanal na kapangyarihan ng Espiritu Santo. Itinuro ni Pangulong Marion G. Romney na ang binyag ng apoy at ng Espiritu Santo ay ‘pinagbabagong-loob [tayo] mula sa pagiging makamundo tungo sa pagiging esprituwal. Nililinis nito, pinagagaling at ginagawang dalisay ang kaluluwa. … Ang pananampalataya sa Panginoong Jesucristo, pagsisisi, pagbibinyag sa tubig ay mga pasimula lamang at kailangang lahat para dito, ngunit [ang binyag ng apoy] ang katuparan. Upang matanggap ang [binyag na ito ng apoy] ang isang tao ay dapat mahugasan sa kanyang mga kasalanan sa pamamagitan ng nagbabayad-salang dugo ni Jesucristo’ (Learning for the Eternities, comp. George J. Romney [1977], 133; tingnan din sa 3 Nephi 27:19–20).

“Kaya nga, habang tayo ay nagbabagong-loob at nagsisikap na mapasaatin sa tuwina ang Kanyang Espiritu, pinagiging banal tayo ng Espiritu Santo at pinadadalisay ang ating kaluluwa na parang tulad ng pagpapadalisay ng apoy (tingnan sa 2 Nephi 31:13–14, 17). Sa huli tatayo tayo sa harapan ng Diyos na walang bahid–dungis” (“Malilinis na Kamay at Dalisay na Puso,” Ensign o Liahona, Nob. 2007, 81).

  • Ano ang ginagawa sa atin ng “binyag ng apoy” ayon kina Elder Bednar at Pangulong Romney?

  • Anong mga karagdagang pagpapala ang matatanggap natin sa pamamagitan ng impluwensya ng Espiritu Santo?

  • Paano kayo “nagsisikap na mapasa[inyo] sa tuwina ang Kanyang Espiritu”?

  • Kailan ninyo nadamang kumikilos sa buhay ninyo ang Espiritu Santo?

Ipaliwanag na sa 2 Nephi 31:18, ang ibig sabihin ng salitang makipot ay makitid, istrikto, mahigpit, at hindi lumilihis. Ginamit ni Nephi ang salitang ito para ilarawan ang landas na dapat nating tahakin matapos mabinyagan upang matamo ang buhay na walang hanggan. Sabihin sa mga estudyante na tahimik na pag-isipan ang sumusunod na tanong:

  • Ano ang kailangan nating gawin pagkatapos ng binyag para manatili sa landas na patungo sa buhay na walang hanggan?

Habang pinagninilay ng mga estudyante ang tanong na ito, sabihin sa kanila na hanapin ang mga sagot sa 2 Nephi 31:15–16, 19–21. Maaari mong sabihin na markahan nila ang mga salita o parirala na nagpapaliwanag ng dapat nating gawin upang matamo ang buhay na walang hanggan. Pagkatapos ng sapat na oras, sabihin sa ilang estudyante na ibahagi ang minarkahan nila. Habang sumasagot sila, isulat sa pisara ang kanilang mga sagot. Ganito ang dapat na itsura ng ilustrasyon mo:

Eternal Life Steps

Tiyakin na nauunawaan ng mga estudyante na kung mamumuhay tayo ayon sa doktrina ni Cristo, matatamo natin ang buhay na walang hanggan.

Sa pagtatapos ng lesson, ipabasa nang malakas sa isang estudyante ang 2 Nephi 31:20. Sabihin na ang 2 Nephi 31:19–20 ay isang scripture mastery passage. Maaari mong hikayatin ang mga estudyante na markahan ang scripture passage na ito sa paraang madali nila itong mahahanap. Sabihin sa kanila na sagutin ang isa sa mga sumusunod na tanong sa kanilang scripture study journal o class notebook:

  • Ayon sa napag-aralan ninyo sa lesson na ito, ano ang nagbibigay sa inyo ng pag-asa na matatamo ninyo ang buhay na walang hanggan?

  • Paano nakaimpluwensya sa inyong buhay ang tipang ginawa ninyo sa binyag?

scripture mastery iconScripture Mastery—2 Nephi 31:19–20

Ibahagi ang sumusunod na pahayag ni Elder Richard G. Scott ng Korum ng Labindalawang Apostol:

“Malaking tulong ang nagagawa ng pagsasaulo ng mga banal na kasulatan. Ang pagsasaulo ng isang talata ay pagbuo ng bagong pagkakaibigan. Ito’y parang pagkakaroon ng bagong kakilala na makatutulong sa oras ng pangangailangan, makapagbibigay ng inspirasyon at kapanatagan, at pagmumulan ng panghihikayat para sa kinakailangang pagbabago” (“Ang Bisa ng Banal na Kasulatan” Ensign o Liahona, Nob. 2011, 6).

Sa isang poster (o isang pirasong papel), isulat ang naisaulo ko ang 2 Nephi 31:19–20. Ilagay ang poster sa lugar na makikita ito ng mga estudyante. Hikayatin ang mga estudyante na isaulo ang scripture passage na ito nang mag-isa o kasama ang kanilang pamilya. Sabihin sa kanila na lumagda sa poster sa mga susunod na araw kapag naisaulo na nila ang scripture passage. Kung kasama nila ang kanilang pamilya sa pagsasaulo nito, maaari din nilang ilagay ang pangalan ng miyembro ng kanilang pamilya sa poster. Tandaan na iakma ang aktibidad na ito na pagsasaulo sa kakayahan at kalagayan ng indibidwal para magawa ito ng bawat estudyante.

Ibahagi ang iyong patotoo tungkol sa kahalagahan ng pagsasaulo ng banal na kasulatan, tulad ng mababasa sa 2 Nephi 31:19–20, na naglalaman ng salita ng pag-asa.

Paalala: Dahil sa nilalaman at haba ng lesson ngayon, maaari mong gamitin ang aktibidad na ito sa ibang araw, kapag mas marami ang oras ninyo.

Komentaryo at Pinagmulang Impormasyon

2 Nephi 31:2, 21. “Ang doktrina ni Cristo”

Ipinaliwanag ni Elder Jeffrey R. Holland ng Korum ng Labindalawang Apostol:

“Ang ‘doktrina ni Cristo’ na itinuro ni Nephi sa kanyang malawak at pinagsama-samang diskurso ay nakatuon sa pananampalataya sa Panginoong Jesucristo, pagsisisi, binyag sa pamamagitan ng paglulubog, pagtanggap ng kaloob na Espiritu Santo, at pagtitiis hanggang wakas. Hindi layunin ng pahayag na ito na saklawin ang buong plano ng kaligtasan, lahat ng mabubuting katangian ng buhay-Kristiyano, o ang mga gantimpala na naghihintay sa atin sa magkakaibang antas ng kaluwalhatian sa langit. Hindi tinatalakay sa pahayag na ito ang mga katungkulan sa priesthood, ang mga ordenansa sa templo, o maraming iba pang totoong doktrina. Lahat ng ito ay mahalaga, ngunit batay sa paggamit dito sa Aklat ni Mormon, ‘ang doktrina ni Cristo’ ay simple at tuwiran. Ito ay nakatuon lamang sa mga unang alituntunin ng ebanghelyo, kabilang na ang panghihikayat na magtiis, manindigan, magpatuloy. Tunay nga na sa kasimplihan at kalinawan ng ‘doktrina ni Cristo’ makikita ang malaking epekto nito. Alam ni Nephi na magkakagayon. Isinulat niya, ‘Ako ay magsasalita sa inyo nang malinaw, alinsunod sa kalinawan ng aking pagpopropesiya’ [2 Nephi 31:2]” (Christ and the New Covenant: The Messianic Message of the Book of Mormon [1997], 49–50).

2 Nephi 31:13. “Walang pagkukunwari”

Nagsalita si Elder Joseph B. Wirthlin ng Korum ng Labindalawang Apostol tungkol sa pagkilos nang walang pagkukunwari:

“Talaga bang ipinamumuhay natin ang ebanghelyo, o ipinapakita lamang natin na mabuti tayo upang ipalagay ng mga nakapaligid sa atin na tayo ay matapat ngunit, ang totoo, ang mga saloobin at mga lihim na ikinikilos natin ay hindi naaayon sa mga turo ng Panginoon?

“Tayo ba ay ‘may anyo ng kabanalan’ subalit ikinakaila ang “kapangyarihan nito’? [Joseph Smith—Kasaysayan 1:19.]

“Tayo ba ay totoong mabait, o nagkukunwari lang tayong mabait kapag iniisip natin na may nakamasid na iba?

“Nilinaw ng Panginoon na hindi Siya malilinlang ng panlabas na anyo, at binalaan Niya tayo na huwag magkunwari sa Kanya o sa iba. Binalaan Niya tayo na iwasan ang mga taong mapagpanggap, na nagkukunwaring mabait para mapagtakpan ang totoong pagkatao” (“True to the Truth,” Ensign, Mayo 1997, 15–16).

Sa kanyang payo sa mga miyembro na kumilos nang may tunay na hangarin at hindi lamang gawin ito nang walang layunin, sinabi ni Elder Jeffrey R. Holland ng Korum ng Labindalawang Apostol:

“Kasunod ng pinakamahahalagang aral na ito, nabubuksan ang kaluwalhatian na mag-uugnay kay Cristo sa iba’t ibang paraan: pagdarasal at pag-aayuno at pagmumuni-muni sa Kanyang mga layunin, pagnamnam sa mga banal na kasulatan, paglilingkod sa iba. ‘[pagtulong sa] mahihina, [pagtataas ng] mga kamay na nakababa,… [pagpapalakas sa] tuhod na mahihina.’ [D at T 81:5.] Higit sa lahat, pagmamahal na may ‘dalisay na pag-ibig ni Cristo,’ ang kaloob na ‘kailanman ay hindi nagkukulang,’ na ‘binabata ang lahat ng bagay, naniniwala sa lahat ng bagay, umaasa sa lahat ng bagay, [at] nagtitiis sa lahat ng bagay.’ [Tingnan sa Moroni 7:45–47.] Di magtatagal, nang may gayong uri ng pagmamahal, malalaman natin na maraming daan sa buhay na ito patungo sa Panginoon at tuwing aabutin natin Siya, kahit kaunti, natutuklasan natin na sabik Niyang sinisikap na abutin tayo. …

“Ang hangad ko ngayon ay para sa ating lahat … na magkaroon ng mas personal na karanasan sa halimbawa ng Tagapagligtas. Kung minsan di-tahasan ang hangad nating magpakabuti, nakatuon tayo sa mga programa o kasaysayan o karanasan ng iba. Mahalaga ang mga iyon pero hindi kasinghalaga ng personal na karanasan, tunay na pagkadisipulo, at lakas na nagmumula sa sariling karanasan sa kadakilaan ng Kanyang haplos” (“Mga Sirang Bagay na Aayusin,” Ensign o Liahona, Mayo 2006, 70).

2 Nephi 31:13, 17–18. “Tanggapin ang Espiritu Santo.”

Itinuro ni Elder David A. Bednar:

“Ang ordenansa ng pagkumpirma sa bagong miyembro ng Simbahan at paggawad ng kaloob na Espiritu Santo ay kapwa simple at malalim. Ipinapatong ng mga karapat-dapat na maytaglay ng Melchizedek Priesthood ang kanilang mga kamay sa ulunan ng isang tao at sinasambit ang kanyang pangalan. Pagkatapos, sa awtoridad ng banal na priesthood at sa pangalan ng Tagapagligtas, ang tao ay kinukumpirmang miyembro ng Ang Simbahan ni Jesucristo ng mga Banal sa mga Huling Araw, at sinasambit ang mahalagang mga salitang ito: ‘Tanggapin ang Espiritu Santo.’

“Maaari nating makaligtaan ang kahalagahan nito dahil sa kasimplehan ng ordenansang ito. Ang apat na salitang ito—‘Tanggapin ang Espiritu Santo’—ay hindi isang pahayag na walang kaakibat na paggawa; bagkus, kinapapalooban ito ng isang utos sa priesthood—isang makapangyarihang payo na kumilos at hindi lamang pinakikilos (tingnan sa 2 Nephi 2:26). Hindi nagkakaroon ng impluwensya ang Espiritu Santo sa ating buhay dahil lamang sa mga kamay na ipinatong sa ating ulunan at sa apat na mahalagang salitang iyon na sinambit. Sa pagtanggap natin sa ordenansang ito, tinatanggap ng bawat isa sa atin ang isang sagrado at patuloy na responsibilidad na maghangad, humiling, gumawa, at mamuhay nang karapat-dapat para tunay nating ‘tanggapin ang Espiritu Santo’ at ang kasama nitong mga espirituwal na kaloob. …

“Ang pagdarasal, pag-aaral, pagtitipon, pagsamba, paglilingkod, at pagsunod ay hindi magkakabukod at magkakahiwalay na gawain sa mahabang listahan ng mga ipinagagawa ng ebanghelyo. Bagkus, bawat isa sa mabubuting gawing ito ay mahalagang bahagi ng napakahalagang espirituwal na hangaring sundin ang utos na tanggapin ang Espiritu Santo. Ang mga utos ng Diyos at inspiradong payo ng mga lider ng Simbahan na sinusunod natin ay nakatuon lalo na sa pagtatamo ng patnubay ng Espiritu. Ang mahalaga, lahat ng turo at aktibidad ng ebanghelyo ay nakasentro sa paglapit kay Cristo at pagtanggap ng Espiritu Santo sa ating buhay” (“Tanggapin ang Espiritu Santo,” Ensign o Liahona, Nob. 2010, 95, 97).

Ang sumusunod na pahayag ay naglalaman ng ilan sa mga pagpapalang matatanggap natin kapag karapat-dapat tayo na makasama ang Espiritu Santo:

“Gagabayan kayo [ng Espiritu Santo] sa inyong mga pasiya at poprotektahan kayo sa pisikal at espirituwal na panganib. …

“Siya ang Mang-aaliw (Juan 14:26). … Ang mga bulong ng Espiritu ay nagpapawala ng inyong mga takot, nagbabawas sa pagbagabag ng mga problema sa inyong buhay, at inaaliw kayo sa oras ng dalamhati. Ang Espiritu Santo ay maaari kayong ‘puspusin ng pag-asa at ganap na pag-ibig’ at siyang ‘magtuturo sa [inyo] ng mga mapayapang bagay ng kaharian’ (Moroni 8:26; D at T 36:2). …

“Kabilang sa ganap na pagtatamasa ng kaloob na Espiritu Santo ang pagtanggap ng paghahayag at kaaliwan, paglilingkod at pagpapala sa iba sa pamamagitan ng mga espirituwal na kaloob, at pinababanal mula sa kasalanan at pinagigindapat para sa kadakilaan sa kahariang selestiyal” (Tapat sa Pananampalataya: Isang Sanggunian sa Ebanghelyo [2006], 27–28).

2 Nephi 31:15–16. “Magtiis hanggang wakas”

Ang pariralang “magtiis hanggang wakas” ay madalas gamitin para ipahiwatig na kailangang matiyagang pagtiisan ang mga paghihirap sa buong buhay natin. Ipinaliwanag ni Elder Joseph B. Wirthlin na ang magtiis hanggang wakas ay nangangahulugan din na magpatuloy sa katapatan kay Cristo:

“Ang pagtitiis hanggang wakas ay doktrina ng pagpapatuloy sa landas na patungo sa buhay na walang hanggan matapos pasukin ng isang tao ang landas na yaon sa pamamagitan ng pananampalataya, pagsisisi, pagpapabinyag at pagtanggap sa Espiritu Santo. Ang pagtitiis hanggang wakas ay nangangailangan ng buong puso natin, o tulad ng itinuro ni propetang Amaleki sa Aklat ni Mormon, dapat tayong ‘lumapit sa kanya, at ialay ang [ating] buong kaluluwa bilang handog sa kanya, at magpatuloy sa pag-aayuno at pananalangin, at magtiis hanggang wakas; at yamang buhay ang Panginoon [tayo] ay maliligtas.’ [Omni 1:26.]

“Ang pagtitiis hanggang wakas ay nangangahulugan na naitatag natin ang ating buhay sa mga doktrina ng ebanghelyo, sinusunod ang mga pamantayan ng Simbahan, mapagpakumbabang naglilingkod sa ating kapwa, namumuhay ng gaya ng kay Cristo, at tinutupad ang ating mga tipan. Yaong mga nakapagtiis ay matatag, tapat, mapagkumbaba, laging nagpapakahusay, at hindi mapagkunwari. Ang patotoo nila ay hindi ayon sa pagtanggap ng lipunan—ito’y ayon sa katotohanan, kaalaman, karanasan, at sa Espiritu” (“Magpatuloy,” Ensign o Liahona, Nob. 2004, 101).

2 Nephi 31–33. Ang Espiritu Santo

Kabilang sa mga huling itinuro ni Nephi sa Aklat ni Mormon ang maraming katotohanan tungkol sa Espiritu Santo. Halimbawa:

  1. Ang Espiritu Santo ay nagbibigay ng kakayahan sa inyo na makapagsalita sa “wika ng mga anghel” (tingnan sa 2 Nephi 31:13).

  2. Ang kapatawaran ng mga kasalanan ay dumarating sa pamamagitan ng kapangyarihan ng Espiritu Santo (tingnan sa 2 Nephi 31:17).

  3. Ang Espiritu Santo ay sumasaksi sa Ama at sa Anak (tingnan sa 2 Nephi 31:18).

  4. Ang Espiritu Santo ay magbibigay-alam sa inyo ng lahat ng bagay na nararapat ninyong gawin (tingnan sa 2 Nephi 32:5).

  5. Ang Espiritu Santo ay nagtuturo sa mga tao na manalangin (tingnan sa 2 Nephi 32:8).

  6. Kapag ang isang tao ay nagsasalita sa pamamagitan ng kapangyarihan ng Espiritu Santo, ang kapangyarihan ng Espiritu Santo ang nagdadala nito sa puso ng mga anak ng tao (tingnan sa 2 Nephi 33:1).