Lesson 1

Ang Responsibilidad ng Estudyante

Pambungad

Ang layunin ng lesson na ito ay tulungan ang mga estudyante na magawa ang kanilang responsibilidad sa pag-aaral ng ebanghelyo. Iniisip minsan ng mga estudyante na ang responsibilidad nila na matuto ay nakasalalay lamang sa kanilang mga titser. Itinuro ni Pangulong Henry B. Eyring ng Unang Panguluhan ang pangangailangan na hangarin kapwa ng estudyante at titser ang paggabay ng Espiritu Santo:

“Ang mga problema at mga tukso na naranasan ng ating mga estudyante sa nakalipas lamang na limang taon ay napakadaling lutasin kung ihahambing sa mga nakikita natin ngayon, at sa mas mahihirap na panahong darating. Nadama ko … na hindi magiging sapat ang mga ginawa natin noon at ginagawa ngayon. Kailangan natin ng mas malakas na kapangyarihan para tulungan ang mga estudyante na mas maisapuso at maipamuhay ang ebanghelyo. …

“Kailangan ninyong mapatnubayan lagi ng Espiritu para makapagturo nang may kapangyarihan, at hindi magtatagumpay ang inyong mga estudyante sa aspetong espirituwal kung hindi mapapasakanila ang Espiritu” (“The Spirit Must Be Our Constant Companion” [mensahe para sa mga CES religious educator, Peb. 7, 2003], 1, si.lds.org).

Kapag nagtuturo ka sa pamamagitan ng kapangyarihan ng Espiritu Santo at tinutulungan mo ang mga estudyante na matututo gamit ang kapangyarihan ding iyon, matutulungan mo silang magbagong-loob o magbalik-loob sa ipinanumbalik na ebanghelyo ni Jesucristo. Maaaring kailangan mong balikan nang madalas ang mga alituntuning itinuro sa lesson na ito upang maipaalala sa mga estudyante ang kanilang mga responsibilidad sa klase.

Mga Mungkahi sa Pagtuturo

Responsibilidad ng bawat isa na matuto sa pamamagitan ng pag-aaral at pananampalataya

Papuntahin ang isang estudyante sa harap ng klase. Ipaliwanag na gusto mong tulungan ang estudyanteng ito na magkaroon ng mas malakas na pangangatawan. Pagkatapos ay papuntahin ang isa pang estudyante sa harap at sabihin sa estudyanteng ito na magpush-up nang limang beses.

Matapos mag-push-up ang pangalawang estudyante, itanong sa unang estudyante:

• Napalakas ka ba ng mga push-up na iyon?

Itanong sa klase:

• Paano maihahalintulad ang halimbawa ng pag-ehersisyo ng katawan sa inyong responsibilidad na mag-aral ng ebanghelyo? Sino ang responsable sa inyong pag-aaral ng ebanghelyo?

Ipabasa nang malakas sa isang estudyante ang Doktrina at mga Tipan 88:118.

• Ano sa palagay ninyo ang ibig sabihin ng “maghangad na matuto … sa pamamagitan ng pag-aaral at gayon din sa pamamagitan ng pananampalataya”? (Maaaring kailangan mong ipaliwanag na kailangang pagsikapan ng bawat isa ang matuto sa pamamagitan ng pag-aaral at pananampalataya.)

Mga scripture study journal o class notebook

Ang scripture study journal o class notebook ay maaaring isang bound journal, isang notebook, o mga pahinang naka-binder. Maisusulat ng mga estudyante sa scripture study journal ang mahahalagang bagay at mga impresyon sa oras ng lesson, sa kanilang mga personal na pag-aaral, at sa iba pang mga miting sa Simbahan. Kapag isinulat at inorganisa nila ang kanilang mga ideya at mga impresyon, magiging handa silang makibahagi sa klase, mas mauunawaan nila ang ebanghelyo, at tatanggap sila ng personal na paghahayag.

Elder David A. Bednar

Ipinaliwanag ni Elder David A. Bednar ng Korum ng Labindalawang Apostol ang ibig sabihin ng matuto sa pamamagitan ng pananampalataya. Hikayatin ang mga estudyante na isulat ang pahayag na ito (maaaring sa kanilang mga scripture study journal o class notebook) para mabalik-balikan nila ito sa buong taon:

“Ang matuto sa pamamagitan ng pananampalataya ay nangangailangan ng espirituwal, mental, at pisikal na pagsisikap at hindi lamang basta pakikinig at walang gagawin. … Kailangang manampalataya ng estudyante at kumilos upang matamo ang kaalaman para sa kanyang sarili” (“Seek Learning by Faith” [mensahe para sa mga CES religious educator, Peb. 3, 2006], 3, si.lds.org).

Personal na pag-aaral ng mga banal na kasulatan araw-araw

Ipaliwanag na ang personal na pag-aaral ng mga banal na kasulatan araw-araw ay mahalagang bahagi ng paghahangad na matuto sa pamamagitan ng pag-aaral at pananampalataya.

Ipabasa nang malakas sa isang estudyante ang Helaman 3:29–30.

• Ano sa palagay ninyo ang kaibhan ng kaswal na pagbabasa ng mga banal na kasulatan sa “[pag]yakap sa salita ng Diyos”?

• Ayon sa mga talata na binasa natin, anong mga pagpapala ang darating kapag niyakap natin ang salita ng Diyos?

• Ano pang mga pagpapala ang dumarating kapag nag-aaral tayo ng mga banal na kasulatan araw-araw?

• Kailan kayo nakatanggap ng mga pagpapala dahil sa pag-aaral ninyo ng mga banal na kasulatan?

Sa pagsagot ng mga estudyante sa mga tanong na ito, tiyakin na nauunawaan nila na ang araw-araw na pagbabasa ng mga banal na kasulatan ay nakapagpapalakas ng ating patotoo, nag-aanyaya sa Banal na Espiritu sa ating mga buhay, at tumutulong sa atin na matutuhan ang ebanghelyo.

Sabihin sa mga estudyante na sagutan ang isa sa mga sumusunod na tanong sa kanilang scripture study journal:

• Paano ninyo mas mapagbubuti ang pag-aaral ninyo ng Aklat ni Mormon?

• Paano nakaimpluwensya ang pagbabasa ng Aklat ni Mormon sa inyong nadarama tungkol kay Jesucristo?

Sabihin sa mga estudyante na magtakda ng mithiin na pag-aralan araw-araw ang Aklat ni Mormon ngayong taon. Sabihin sa kanila na magtakda ng mithiin na basahin ang buong Aklat ni Mormon ngayong taon sa seminary. Maaari mong imungkahi sa kanila na isulat ang mga mithiing ito sa kanilang scripture study journal. Ipaalala sa kanila na makatutulong ang mga mithiing ito sa pagtapos ng mga kailangang gawin sa Tungkulin sa Diyos at Pansariling Pag-unlad.

Pag-aaral ng mga banal na kasulatan araw-araw

Itinuro ni Elder Dallin H. Oaks ng Korum ng Labindalawang Apostol:

“Iniaayon tayo ng pagbabasa ng banal na kasulatan sa Espiritu ng Panginoon. … Dahil naniniwala tayo na makatutulong sa atin ang pagbabasa ng mga banal na kasulatan para makatanggap tayo ng paghahayag, hinihikayat tayong paulit-ulit na basahin ang mga banal na kasulatan. Sa pamamagitan nito, mahahayag sa atin ang nais ng Ama sa Langit na malaman at magawa natin sa ating mga personal na buhay ngayon. Iyan ang isang dahilan kung bakit naniniwala ang mga Banal sa mga Huling Araw sa araw-araw na pag-aaral ng mga banal na kasulatan” (“Scripture Reading and Revelation,” Ensign, Ene. 1995, 8).

Matuto sa pamamagitan ng Espiritu

Kopyahin ang sumusunod na diagram sa pisara. Huwag munang kopyahin ang mga salita sa diagram. Isusulat mo ang mga ito habang nagtatalakayan.

Triangle Diagram

Ipabasa nang malakas sa isang estudyante ang Doktrina at mga Tipan 50:17–18.

• Ayon sa mga talatang ito, ano ang iniuutos ng Panginoon sa titser ng ebanghelyo? (Mangaral ng katotohanan sa pamamagitan ng kapangyarihan ng Espiritu.)

Isulat ang Espiritu Santo at Titser sa diagram, tulad ng nasa itaas. Ibahagi ang iyong mga kaisipan tungkol sa paghingi ng patnubay ng Espiritu Santo sa iyong pagtuturo. Tulungan ang mga estudyante na malaman na sa iyong paghahanda at pagtuturo, matapat kang nagsisikap na magabayan ng Espiritu.

Sabihin sa mga estudyante na maglagay ng bookmark sa Doktrina at mga Tipan 50 (dahil babalikan nila ang bahaging ito mamaya). Ipabasa nang malakas sa isang estudyante ang 2 Nephi 33:1.

• Ano ang ginagawa ng Espiritu Santo para sa estudyante kapag itinuturo sa kanila ang ebanghelyo?

Ipaliwanag na upang matutuhan ang ebanghelyo sa paraan ng Panginoon, kailangan nating tanggapin ang responsibilidad na matuto sa pamamagitan ng kapangyarihan ng Espiritu Santo. Ipabasa nang tahimik sa mga estudyante ang Doktrina at mga Tipan 50:19–21.

• Ano ang dapat nating isulat sa kanang sulok sa may ibaba ng tatsulok? (Isulat ang Estudyante.)

• Ano sa palagay ninyo ang kahulugan ng tanggapin ang katotohanan sa pamamagitan ng Espiritu?

Maaari kang magturo ng ilang alituntunin tungkol sa pagkilala ng impluwensya ng Espiritu Santo. Tulungan ang mga estudyante na maunawaan na kadalasan ay tahimik na nangungusap sa atin ang Espiritu, sa pamamagitan ng ating puso at isipan (tingnan sa 1 Nephi 17:45; D at T 8:2–3). Hatid rin ng Espiritu Santo ang pagmamahal, kagalakan, kapayapaan, pagtitiis, pagiging maamo, kabaitan, pananampalataya, at pag-asa (tingnan sa Mga Taga Galacia 5:22–23; D at T 11:12).

• Ano ang magagawa ninyo sa seminary para maihanda ang inyong sarili na matuto sa pamamagitan ng Espiritu?

Bilang bahagi ng talakayang ito, tulungan ang mga estudyante na maunawaan na ang isang mahalagang paraan para matuto sa pamamagitan ng Espiritu ay maging handa sa pagbabahagi ng ating mga patotoo sa isa’t isa. Basahin ang sumusunod na pahayag ni Elder Richard G. Scott ng Korum ng Labindalawang Apostol:

Elder Richard G. Scott

“Kapag ipinahayag ng mga estudyante ang mga katotohanan, [ang mga katotohanang ito] ay pinagtitibay sa kanilang mga kaluluwa at pinalalakas ang kanilang sariling patotoo” (“To Understand and Live Truth” [mensahe para sa mga CES religious educator, Peb. 4, 2005], 3, si.lds.org).

Ipaalala sa mga estudyante na naglalaman ang mga programang Tungkulin sa Diyos at Pansariling Pag-unlad ng mga mungkahi na magbahagi ng mga katotohanan ng ebanghelyo sa iba. Hikayatin sila na ibahagi ang kanilang mga karanasan sa seminary, sa mga korum o klase, at sa mga pakikipag-usap sa kanilang mga kapamilya at kaibigan. Bigyang-diin na kapag nagsikap silang ipaliwanag, ibahagi, at patotohanan ang mga katotohanan ng ebanghelyo, pag-iibayuhin ng Diyos ang kanilang kakayahan na talakayin ang ebanghelyo sa iba.

Tukuying muli ang diagram sa pisara. Ipabasa nang malakas sa isang estudyante ang Doktrina at mga Tipan 50:14, 22.

• Paano ibinubuod ng mga talatang ito ang gawain ng Espiritu Santo, ang responsibilidad ng titser, at ng estudyante sa pag-aaral ng ebanghelyo? (Maaaring kailangan mong ipaliwanag na ang Espiritu Santo, na tinatawag ding Espiritu at Mang-aaliw sa scripture passage na ito, ang nagtuturo ng katotohanan. Kailangang magturo ang titser sa pamamagitan ng kapangyarihan ng Espiritu, at kailangang matuto ang estudyante sa pamamagitan din ng kapangyarihang iyon.)

• Ano ang nangyayari kapag natututo ang estudyante sa pamamagitan ng Espiritu at nagtuturo ang titser sa pamamagitan ng Espiritu? (Maaaring kailangan mong ipaliwanag na ang ibig sabihin ng pinagtitibay ay pinatatatag, pinalalakas, pinaliliwanag o pinauunlad.)

Sa Aklat ni Mormon, sina Enos at Alma ay mga halimbawa ng mga tao na natuto sa pamamagitan ng Espiritu. Ipabasa nang tahimik sa mga estudyante ang Enos 1:4–10 at Alma 5:45–47. (Maaari mong isulat sa pisara ang mga scripture reference na ito.) Pagkatapos ay itanong:

• Ano ang ginawa ni Enos (o ni Alma) para matuto sa pamamagitan ng Espiritu?

• Ano ang ginawa ng Espiritu para kay Enos (o kay Alma)?

Ipabasa nang malakas sa isang estudyante ang sumusunod na pahayag ni Elder Bednar:

“Dapat palagi nating tatandaan na ang Espiritu Santo ay ang guro na, sa pamamagitan ng angkop na paanyaya, ay makapapasok sa puso ng mag-aaral” (“Seek Learning by Faith,” 4).

• Paano maiaangkop ang mga napag-aralan na natin ngayon sa responsibilidad ng bawat isa bilang mga estudyante ng klaseng ito? (Sa pagsagot ng mga estudyante, tiyakin na nauunawaan nila na kapag binuksan natin ang ating mga puso at humingi sa Diyos nang may pananampalataya, tutulungan tayo ng Espiritu Santo na maunawaan ang mga katotohanan ng ebanghelyo.)

Para matulungan ang mga estudyante na makaisip ng mga paraan para matulungan ang isa’t isa na matuto sa pamamagitan ng Espiritu, itanong:

• Anu-ano ang maaari nating gawin na tutulong na maanyayahan ang Espiritu sa ating klase? (Maaaring kabilang sa mga posibleng sagot ang pag-awit ng pambungad na himno, pagdadala ng mga banal na kasulatan sa klase at paggamit nito araw-araw, pagiging handang sagutin ang mga tanong at magbahagi ng mga karanasan, pagdarasal para sa isa’t isa, at paghiling ng patnubay ng Espiritu Santo.)

Para matulungan ang mga estudyante na maunawaan na maaaring makaapekto rin sa buong klase ang mga di-mabuting gawain, itanong:

• Anong uri ng pag-uugali o asal ang makapagpapaalis sa Espiritu sa seminary class?

Sabihin sa mga estudyante na pag-isipan ang kahalagahan ng Espiritu Santo bilang kanilang guro.

• Kailan ninyo naranasan na tinuruan kayo ng Espiritu?

Tapusin ang lesson sa paghikayat sa mga estudyante na matuto sa pamamagitan ng pag-aaral at pananampalataya sa kanilang pag-aaral ng Aklat ni Mormon ngayong taon sa seminary. Maaari mong patuloy na hikayatin ang mga estudyante sa buong taon na patuloy na gawin ito.

Komentaryo at Pinagmulang Impormasyon

Pag-aaral ng mga banal na kasulatan araw-araw

“Pinapayuhan tayo ng mga propeta sa mga huling araw na pag-aralan ang mga banal na kasulatan araw-araw, nang mag-isa at kasama ang ating pamilya. Hinihikayat nila tayo, tulad ng paghihikayat ni Nephi sa kanyang mga kapatid, na itulad ang mga banal na kasulatan sa atin, naghahanap ng mga paraan para maipamuhay natin ngayon ang mga sagradong salaysay (tingnan sa 1 Nephi 19:23–24). Hinihikayat nila tayong ‘saliksikin … ang mga kasulatan’ (Juan 5:39) at ‘magpakabusog … sa mga salita ni Cristo’ (2 Nephi 32:3).

“Makikinabang kayo nang malaki sa pagsunod sa payong ito. Araw-araw, tumutulong sa inyo ang makabuluhang pag-aaral ng mga banal na kasulatan na maging handang dinggin ang mga bulong ng Espiritu Santo. Pinalalakas nito ang inyong pananampalataya, pinatitibay kayo laban sa tukso, at tinutulungan kayong mapalapit sa inyong Ama sa Langit at sa Pinakamamahal Niyang Anak.

“Gumawa ng plano para sa sarili ninyong pag-aaral ng mga banal na kasulatan. Isiping magtakda ng oras bawat araw sa pag-aaral ng mga banal na kasulatan. Sa oras na iyon, magbasang mabuti, na nakikinig sa mga panghihikayat ng Espiritu. Hilingin sa inyong Ama sa Langit na tulungan kayong malaman ang gusto Niyang matutuhan at gawin ninyo.

“Patuloy na basahin ang mga banal na kasulatan, lalo na ang Aklat ni Mormon, habang kayo’y nabubuhay. Muli at muli kayong makatutuklas ng mahahalagang bagay sa mga banal na kasulatan, [nakakakita] ng bagong kahulugan at pakinabang habang pinag-aaralan ninyo ang mga ito sa iba’t ibang yugto ng inyong buhay” (Tapat sa Pananampalataya: Isang Sanggunian sa Ebanghelyo [2006], “Mga Banal na Kasulatan,” 78–79).

Sinabi ni Pangulong Henry B. Eyring ng Unang Panguluhan:

“Kung magiging karaniwan o kaswal lang ang pag-aaral natin ng mga banal na kasulatan, magiging kaswal din ang ating mga panalangin.

“Bagama’t palagi tayong nananalangin, ang mga panalangin natin ay magiging lalong paulit-ulit, walang kabuluhan, at walang tunay na hangarin. Hindi mailalapit ang ating mga puso sa isang Diyos na hindi natin kilala, at ang mga banal na kasulatan at ang mga salita ng mga buhay na propeta ang tumutulong sa atin na makilala Siya” (“Prayer,” Ensign, Nob. 2001, 17).

2 Nephi 33:1. Pagbubukas ng ating mga puso sa Espiritu Santo

Bilang bahagi ng inyong talakayan ng 2 Nephi 33:1, maaari ninyong basahin ang sumusunod na pahayag ni Elder David A. Bednar ng Korum ng Labindalawang Apostol:

“Itinuro sa atin ni Nephi, ‘Kapag ang isang tao ay nagsasalita sa pamamagitan ng kapangyarihan ng Espiritu Santo, ang kapangyarihan ng Espiritu Santo ang nagdadala [ng mensahe] sa puso ng mga anak ng tao’ (2 Nephi 33:1). Pansinin kung paano dinadala ng kapangyarihan ng Espiritu ang mensahe sa puso at hindi nangangahulugang sa loob ng puso. Ang isang guro ay maaaring magpaliwanag, magpatunay, manghikayat, at magpatotoo, at magagawa ito na may labis na espirituwal na lakas at bisa. Gayunman, sa huli, maisasapuso lamang ang nilalaman ng isang mensahe at ang patotoo ng Espiritu Santo kung pahihintulutan ito ng nakikinig. …

“Ang mag-aaral na pinipiling kumilos nang naaayon sa mga tamang alituntunin ay binubuksan ang kanyang puso para sa Espiritu Santo—at inaanyayahan ang Kanyang pagtuturo at pagpapatotoo, at pagpapatunay” (“Seek Learning by Faith” [mensahe para sa mga CES religious educator, Peb. 3, 2006], 1, 3, si.lds.org).

Mga Karagdagang Ideya sa Pagtuturo

Magpaliwanag, magbahagi, at magpatotoo

Ituro na kapag ipinapaliwanag natin ang mga doktrina at alituntunin, ibinabahagi ang mahahalagang karanasan, at nagpapatotoo sa mga banal na katotohanan, ipinapakita natin ang ating kahandaang matuto sa pamamagitan ng Espiritu. Kapag natututo tayo sa pamamagitan ng Espiritu, lalo tayong nakakaunawa, nag-iibayo ang ating kakayahang magturo ng ebanghelyo, at lumalakas ang ating patotoo at ang patotoo ng iba.

• Sa inyong palagay, bakit mahalagang ipaliwanag, ibahagi, at patotohanan ang mga katotohanan ng ebanghelyo sa loob at labas ng klase?

• Kailan kayo nagpaliwanag, nagbahagi, o nagpatotoo sa isang katotohanan ng ebanghelyo sa isang kaibigan o kapamilya?

D at T 50:21–22. Matuto sa pamamagitan ng Espiritu

Para mapaganda pa ang talakayan ng mga estudyante ng Doktrina at mga Tipan 50:21–22, maaari kang gumawa ng kopya ng sumusunod na pahayag para sa bawat estudyante. Sabihin sa mga estudyante na magsalitan sa pagbasa ng mga bahagi ng pahayag na ito habang tahimik na sumusunod sa pagbasa ang ibang estudyante. Sabihin sa mga estudyante na pakinggan ang mga dahilan kung bakit mas espirituwal na napalalakas ang ilang indibiduwal kaysa sa iba sa pagdalo sa mga miting sa Simbahan. Ipinaliwanag ni Brother A. Roger Merrill, dating Sunday School general president, kung ano ang ibig sabihin ng matuto sa pamamagitan ng Banal na Espiritu:

“Madalas tayong magtuon ng pansin, na nararapat lamang, sa kahalagahan ng pagtuturo sa pamamagitan ng Espiritu. Ngunit kailangan nating tandaan na pantay, kung hindi man higit, ang kahalagahang ibinigay ng Panginoon sa pagtanggap sa pamamagitan ng Espiritu. (Tingnan sa D at T 50:17–22.) …

Sa ating mga miting sa Simbahan, sa ating personal na pag-aaral ng mga banal na kasulatan at pag-aaral na kasama ang ating pamilya, at kahit ngayon habang nakikinig tayo sa mga propeta at apostol ng Panginoon, ilan sa atin ang makatatanggap nang higit kaysa iba. Bakit? Natutuhan ko na ang mga tunay na tumatanggap ay gumagawa ng kahit tatlong bagay na maaaring hindi [ginagawa] ng iba.

“Una, sila ay nagsasaliksik. Nabubuhay tayo sa mundong nakatuon sa paglilibang, isang mundo ng mga manonood. Hindi natin alam na pumupunta pala tayo sa Conference o sa Simbahan na may ugaling, ‘Narito ako; ngayon pasiglahin ninyo ako.’ Hindi aktibo ang ating espiritu.

“Kapag nakatuon ang ating isipan sa paghahanap at pagtanggap ng Espiritu, hindi natin masyadong iniisip kung [mapananatili] ba ng guro o tagapagsalita ang ating pansin at mas iniisip natin ang pagtutuon ng ating pansin sa Espiritu. Tandaan, ang tanggapin ay isang pandiwa. Ito’y isang alituntunin ng pagkilos. Mahalagang pahiwatig ito ng pananampalataya.

“Pangalawa, ang mga tumatanggap ay nakadarama. Bagama’t ang paghahayag ay dumarating sa puso at isipan, madalas itong nadarama. Hangga’t hindi tayo natututong makinig sa mga espirituwal na pakiramdam na ito, karaniwa’y hindi natin mahihiwatigan ang Espiritu. …

“Pangatlo, ang mga tumatanggap sa pamamagitan ng Espiritu ay gustong kumilos. Tulad ng tagubilin ng propetang si Moroni, upang matanggap ang patotoo ng Aklat ni Mormon, kailangan tayong magtanong ‘na may tunay na layunin’ (Moroni 10:4). Nagtuturo ang Espiritu kapag tapat ang layunin nating kumilos ayon sa natutuhan natin” (“Pagtanggap sa Pamamagitan ng Espiritu,” Ensign o Liahona, Nob. 2006, 93–94).

• Ayon kay Brother Merrill, bakit mas natututo ang ilang tao kaysa sa iba kapag tinuturuan sila ng ebanghelyo?

• Ano ang tatlong mahalagang bagay na ibinahagi ni Brother Merrill tungkol sa pagkatuto sa pamamagitan ng Espiritu? (Isulat ang mga sagot sa pisara.)

1 Nephi 15. Mga kahihinatnan kapag hindi natuto sa pamamagitan ng Espiritu

Para tulungan ang mga estudyante na makita ang isang halimbawa sa banal na kasulatan kung paano nakahahadlang sa ating kakayahang matuto sa pamamagitan ng Espiritu ang pagpapatigas ng ating mga puso, ipabuklat sa kanila ang 1 Nephi 15. Ipaliwanag na naunawaan ni Nephi ang pagkakaugnay ng titser, estudyante, at ng Espiritu Santo. Nakatala sa 1 Nephi 15 ang pag-uusap ni Nephi at ng kanyang mga kapatid pagkatapos silang turuan ng kanilang amang si Lehi ng mga ipinahayag ng Panginoon sa kanya. Sabihin sa mga estudyante na basahin ang 1 Nephi 15:2–3, 7–11.

• Ano ang dahilan ng pagtatalo nina Laman at Lemuel?

• Bakit hindi naunawaan nina Laman at Lemuel ang mga sinabi ng kanilang ama? (Pinatigas nila ang kanilang mga puso, hindi sila nagsikap na mag-aral sa pamamagitan ng Espiritu, at hindi sila nagtanong sa Panginoon.)

Maaari mong bigyang-diin na sa 1 Nephi 15:11, ipinaalala ni Nephi kina Laman at Lemuel ang ilang mga bagay na ginawa sana nila para makatanggap ng paghahayag. Nagawa ni Nephi ang bawat isa sa mga dapat gawin at pag-uugali na binanggit niya. Hindi niya pinatigas ang kanyang puso, nagtanong siya sa Panginoon nang may pananampalataya, naniwala siya na makatatanggap siya ng mga sagot mula sa Panginoon, at masigasig niyang sinunod ang mga kautusan.