Lēsoni 53
Mōsaia 3
Talateú
ʻI he hoko atu ʻe he Tuʻi ko Penisimaní ʻene lea ki hono kakaí, naʻá ne ʻoatu e ngaahi lea naʻe lea ʻaki ʻe ha ʻāngelo kiate ia ʻo kau ki he ngāue ʻa Sīsū Kalaisí. Naʻe fakamoʻoniʻi ʻe he Tuʻi ko Penisimaní ʻoku makatuʻunga ʻi he tui kia Sīsū Kalaisi mo e fakatomalá, ʻa e lava ʻa kinautolu ne faiangahalá ke maʻu ʻa e fakamoʻuí. Naʻá ne toe akoʻi foki ʻe lava ʻe ha taha kuó ne talangofua ki he ngaahi fakahinohino ʻa e Laumālie Māʻoniʻoní ʻo “liʻaki ʻa e tangata fakakakanó kae hoko ko ha tangata māʻoniʻoni,” (Mōsaia 3:19) tuʻunga ʻi he Fakalelei ʻa Sīsū Kalaisí.
Ngaahi Fokotuʻu ki hono Akoʻí
Fakatokangaʻi ange: Kapau naʻá ke poupouʻi ʻa e kau akó ʻi he ngaahi lēsoni kimuʻá ke nau ako maʻuloto mo fakaʻaongaʻi ʻa e Mōsaia 2:17, fakakaukau ke ʻoange ha faingamālie he ʻahó ni ke nau fakamatalaʻi ai e ngaahi meʻa ne nau aʻusiá. Tokanga ke ʻoua naʻa mou fakamoleki ha taimi lahi ʻi he fakamanatu ko ʻení. Tuku ha taimi feʻunga ke aleaʻi ai ʻa e ngaahi tokāteline mo e ngaahi tefitoʻi moʻoni ʻi he Mōsaia 3.
Mōsaia 3:1–10
Ko hono fakahoko atu ʻe he Tuʻi ko Penisimaní ha ngaahi lea ʻa ha ʻāngelo fekauʻaki mo e Fakalelei ʻa Sīsū Kalaisí
Fakaʻaliʻali ha ngeʻesi ipu sioʻata mo ha meʻa ʻaiʻanga vai. Fakaafeʻi ha taha ako ke ne fakatātaaʻi ʻa e lahi te ne lava ʻo ʻutu ki he loto ipu sioʻatá maʻa ha taha, ʻokú ne fie maʻú pē ke ʻahiʻahiʻi e vaí. Hili iá, pea ʻai ʻa e taha akó ke ne fakatātaaʻi ʻa e lahi ʻo e vai te ne lingi maʻa ha taha ʻoku loto ke inu ʻo fiu. Kole ki he kau akó ke nau fakakaukau loto ki he fehuʻi ko ʻení:
-
Kapau ʻoku fakafofongaʻi ʻe he vaí ʻa e fiefiá, ko e hā ha lahi te ke fie maʻu ke ʻi hoʻo loto ipu sioʻatá?
Fakamatalaʻi ange ki he kau akó ʻe tokoniʻi kinautolu ʻe he akonaki ʻi he Mōsaia 3 ke nau ʻilo e founga te nau lava ai ʻo fonu fiefiá.
Fakaafeʻi ha tokotaha ako ke ne lau leʻo lahi ʻa e Mōsaia 3:2–5. Kole ki he kalasí ke nau talaatu ʻa e feituʻu naʻe maʻu mei ai e pōpoaki ʻa e Tuʻi ko Penisimaní ʻi he Mōsaia 3.
Fakamamafaʻi ange ʻoku ʻi he Mōsaia 3 hano talaki ʻe ha ʻāngelo ha “ongoongo fakafiefia ʻo e fiefia lahi” (Mōsaia 3:3). Fakaafeʻi ha niʻihi ʻo e kau akó ke nau taufetongi ʻi hono lau leʻo lahi ʻo e Mōsaia 3:5–10. Kole ki he kalasí ke nau kumi ha ngaahi foʻi lea pe ngaahi kupuʻi lea ʻe tokoni ke nau fakahoungaʻi lahi ange ai ʻa e misiona ʻo Sīsū Kalaisí. Mahalo te ke fie fokotuʻu ange ke nau fakaʻilongaʻi ʻa e ngaahi foʻi lea mo e ngaahi kupuʻi lea ko ʻení. Fakaafeʻi ha kau ako tokosiʻi ke nau fakamatalaʻi ʻa e ngaahi foʻi lea mo e ngaahi kupuʻi lea ne nau maʻú.
-
Ko e hā e meʻa ʻoku tokoni atu e Mōsaia 3:7 ke mahino kiate koe fekauʻaki mo e misiona ʻo e Fakamoʻuí?
-
ʻOkú ke pehē ko e hā ne pehē ai ʻe he ʻāngeló ʻe ʻomi ʻe he pōpoaki ko ʻení ha fiefia lahí?
Fakaafeʻi ʻa e kau akó ke nau hiki ha fakamatala nounou sētesi pē taha ʻo e Mōsaia 3:5–10 ʻi heʻenau tohinoa ki he ako folofolá pe pepa akó. Hili haʻanau maʻu ha taimi feʻunga ke tohi aí, fakaafeʻi hanau tokosiʻi ke nau vahevahe ʻa e meʻa ne nau hikí. ʻOku totonu ke fakahaaʻi ʻe he ngaahi fakamatala nounou ʻa e kau akó hono mahino ʻo e akonaki ʻa e ʻāngeló naʻe faingataʻaʻia ʻa Sīsū Kalaisi koeʻuhí ke lava ʻo fakamoʻui kitautolu mei heʻetau ngaahi angahalá.
Te ke lava ʻo toe muimuiʻi e tali ʻa e kau akó ʻaki e fehuʻi ko ʻení:
-
Ko e hā hoʻo ongo ʻi he taimi ʻokú ke fakakaukau ai ki he meʻa naʻe fai ʻe he Fakamoʻuí maʻaú?
Ke tokoni ki he kau akó ʻi hono fakaloloto ʻo ʻenau mahino ki he faingataʻaʻia ʻa e Fakamoʻuí, vahevahe ange ʻa e fakamatala ko ʻeni ne fai ʻe ʻEletā Sēmisi E. Talamesi ʻo e Kōlomu ʻo e Kau ʻAposetolo ʻe Toko Hongofulu Mā Uá:
“ʻOku taʻe maaʻusia ʻe he ʻatamai fakamatelié ʻa e mamahi ʻa Kalaisi ʻi he ngoué, ʻi hono haʻahaʻá mo e tupuʻangá. … Naʻe fefaʻuhi mo toʻe koeʻuhí ko ha faʻahinga kavenga he ʻikai lava ʻe ha taha kuo moʻui he māmaní ʻo fakakaukau ʻe malava. Naʻe ʻikai ko ha mamahi fakaesino, pe mamahi fakaeloto ʻataʻatā pē naʻá Ne faingataʻaʻia ai ʻi he fakamamahi lahi peheé, ʻo tafe ai ʻa e taʻataʻá mei he ava kotoa ʻo e kilí; ka ko ha mamahi fakalaumālie ʻo e lotó, ko e ʻOtuá pē taha naʻá Ne lava ke fouá. … ʻI he feituʻulaʻa ko ia ʻo e mamahí, naʻe aʻusia ai ʻe Kalaisi peá Ne ikunaʻi ʻa e ngaahi mamahi fakalilifu kotoa naʻe lava ʻe Sētane, “ko e pilinisi ʻo e māmani ko ʻení,” ʻo fakahokó. … Naʻe toʻo ʻe he Fakamoʻuí kiate Ia, ʻi ha faʻahinga founga moʻoni mo fakamamahi neongo ʻoku ʻikai mahino ki he tangatá, ʻa e kavenga ʻo e ngaahi angahala ʻa e faʻahinga ʻo e tangatá meia ʻĀtama ʻo aʻu ki he ngataʻanga ʻo e māmaní” (Jesus the Christ, 3rd ed. [1916], 613).
Mōsaia 3:11–27
ʻOku fakamoʻoni ʻa e Tuʻi ko Penisimaní ʻoku tuʻunga ʻi he Fakalelei ʻa Sīsū Kalaisí ʻa ʻetau lava ʻo liʻaki ʻa e tangata fakakakanó kae hoko ko e kakai māʻoniʻoní
Talaange ki he kau akó naʻe vahevahe ʻe he Tuʻi ko Penisimaní ʻa efakamatalaʻi ʻe he ʻāngeló ʻo e ngaahi kulupu kehekehe ʻo e kakaí pea mo e anga ʻo ʻene ʻaonga ʻo e Fakalelei ʻa Sīsū Kalaisí ki he kulupú takitaha. Hiki e ngaahi fehuʻi ko ʻení he palakipoé: Kole ki he kau akó ke nau lau fakalongolongo pē ʻa e Mōsaia 3:11–13, 16, ʻo kumi ʻa e tali ki he ngaahi fehuʻi ko ʻení:
ʻOku fakaʻaongaʻi fēfē ʻa e Fakaleleí:
Kiate kinautolu kuo mate taʻe ʻilo ki he ongoongoleleí?
Kiate kinautolu ʻoku angatuʻu ki he ʻOtuá mo faiangahala ʻi he ʻiloʻilo pau?
Ki he fānau ʻoku mate teʻeki ke nau aʻu ki he taʻu ʻoku ala fakamāuʻi ai kinautolú?
Ka hili pē ha taimi feʻunga, pea kole ki he kau akó ke nau vahevahe ʻenau tali ki he ngaahi fehuʻí. (Koeʻuhí ke tokoniʻi ke nau lava ʻo tali ʻa e ʻuluaki fehuʻí, te ke lava ʻo ʻai ke nau lau ʻa e Tokāteline mo e Ngaahi Fuakava 137:7–10. Pea koeʻuhí ke tokoniʻi kinautolu ʻi he fehuʻi hono tolú, te ke lava ʻo ʻai ke nau lau ʻa e Molonai 8:8, 17 mo e Tokāteline mo e Ngaahi Fuakava 29:46–47.)
Lau ʻa e fakamatala ko ʻeni naʻe fai ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ʻaonga ʻo e Fakaleleí ki he fānau kotoa ʻa e Tamai Hēvaní:
“ʻOku tau … lau ʻoku ‘totongi foki ʻe hono taʻataʻá ki he ngaahi angahala ʻanautolu … kuo nau mate ʻi he taʻeʻiloʻi ʻa e finangalo ʻo e ʻOtuá ʻo kau kiate kinautolú, pea kuo nau fai angahala taʻeʻilo’ (Mōsaia 3:11). Ko e meimei meʻa tatau pē, ‘ʻkuo totongi ʻe he taʻataʻa ʻo Kalaisí ki he [fānau īkí]’ (Mōsaia 3:16). Ko e akonaki ko ia ʻoku maʻá e tokotaha kotoa pē ʻa e toetuʻú mo e mālohi fakamaʻa ʻo e Fakaleleí, ʻoku tuʻu fehangahangai ia mo e pehē ʻoku fakahaofi ʻe he ʻaloʻofa ʻa e ʻOtuá ha niʻihi tokosiʻi pē kuo filí. ʻOku fakataumuʻa ʻa ʻEne ʻaloʻofá maʻá e taha kotoa. ʻOku fakalahi ʻe he ngaahi akonaki ko ʻeni ʻo e Tohi ʻa Molomoná ʻa e mahino ʻoku tau maʻu ki he ʻofa ʻa e ʻOtuá mo hono ʻaonga fakakātoa ʻo ʻEne Fakaleleí ki he kakai he feituʻu kotoa pē” (“All Men Everywhere,” Ensign pe Liahona, May 2006, 77).
-
Ko e hā ha tefitoʻi moʻoni ʻoku tau ako mei he Mōsaia 3:12 fekauʻaki mo e founga ʻo e kaunga ʻa e Fakaleleí kiate kitautolú? (ʻE fakamoʻui kitautolu mei heʻetau ngaahi angahalá ʻi heʻetau tui kia Sīsū Kalaisi mo fakatomalá.)
-
Fakatatau mo e veesi ko ʻení, ko e hā ʻe hoko kiate kinautolu ʻoku nau fili ke ʻoua te nau tui kia Sīsū Kalaisi mo fakatomalá?
Fakamahino ange ko e Mōsaia 3:19 ko ha potufolofola fakataukei folofola ia. Mahalo te ke fie poupouʻi ʻa e kau akó ke nau fakaʻilongaʻi ʻa e potufolofola ko ʻení ʻi ha founga makehe koeʻuhí ke nau lava ʻo maʻu ngofua. Toe taki foki mo ʻenau tokangá ʻi he Mōsaia 3:19 ki hono fakaʻaongaʻi ʻe he ʻāngeló ʻo e foʻi lea “tangata fakakakanó.” Koeʻuhí ke tokoni ke mahino ki he kau akó ʻa e kupuʻi lea ko ʻení, lau ange ʻa e fakamatala ko ʻení mei he Fakahinohino ki he Ngaahi Folofolá:
Ko e tangata fakakakanó “ko ha taha ia ʻoku fili ke puleʻi ia ʻe he ngaahi holi, uʻa, mo e ngaahi ongo ʻo e kakanó kae ʻikai ʻe he ngaahi fakahinohino ʻa e Laumālie Māʻoniʻoní. ʻE mahino ki he taha peheé ʻa e ngaahi meʻa fakaekakanó kae ʻikai ko e ngaahi meʻa fakalaumālié. ʻOku fakakakano pe fakamatelie ʻa e kakai kotoa pē, koʻeuhí ko e hinga ʻa ʻĀtama mo ʻIví. Kuo pau ke fanauʻi foʻou ʻa e tokotaha kotoa pē ʻi he Fakalelei ʻa Sīsū Kalaisí” (Guide to the Scriptures, “Natural Man,” scriptures.lds.org).
Hiki e ngaahi fehuʻi ko ʻení he palakipoé. ʻAi ʻa e kau akó ke nau kumi e tali ki he ngaahi fehuʻi ko ʻení ʻi heʻenau fakatotolo fakalongolongo ʻi he Mōsaia 3:19.
Naʻe fakamatalaʻi fēfē ʻe he ʻāngeló e fekauʻaki ʻa e tangata fakakakanó mo e ʻOtuá?
Fakatatau mo e veesi ko ʻení, ʻe founga fēfē haʻatau lava ʻo liʻaki ʻa e tangata fakakakanó?
Fakamahino ange ʻoku tuʻunga ʻi he Fakalelei ʻa Sīsū Kalaisí, hano fai ʻe ha taha ha meʻa ʻo lahi ange kae ʻikai ko e taʻofi pē ʻene hoko ko e “tangata fakakakanó.” ʻOku hoko ia ko e “taha māʻoniʻoni.” Makehe mei hono fakamoʻui kitautolu mei he ʻetau ngaahi angahalá, ʻoku toe liliu kitautolu ʻe he Fakamoʻuí ke tau hoko ko ha kakai lelei ange ʻi ha toe tuʻunga te tau ala fai ʻiate kitautolu pē. ʻOkú ne tokoniʻi ke tau hoko ʻo tatau ange mo Ia. Ke tokoni ke mahino ki he kau akó ʻa e tokāteline ko ʻení, lau ʻa e fakamatala ko ʻeni naʻe fai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:
“ʻOku fakatou fie maʻu ʻa e nima maʻá mo e loto [maʻá] kae lava ʻo ʻalu hake ki he moʻunga ʻo [e ʻEikí] pea tuʻu ʻi Hono potu māʻoniʻoní [vakai, Saame24:3–4].
“[Tuku ke u] fokotuʻu atu ʻoku fakamaʻa ʻa e nimá ʻi hono siʻaki ʻo e tangata fakakaekanó mo ikunaʻi ʻa e angahalá mo e tākiekina kovi ʻi heʻetau moʻuí ʻo fakafou ʻi he Fakalelei ʻa e Fakamoʻuí. ʻOku fakamaʻa ʻa e lotó ʻi heʻetau maʻu Hono ivi ke fakamālohia kitautolu ke fai leleí pea hoko ʻo lelei angé, ka he ʻikai maʻa ai ʻa e nimá ia mo e lotó. Neongo ʻene mahuʻinga ʻa ʻetau ngaahi holi ʻoku tāú mo e ngaahi ngāue leleí. Ko e Fakalelei ʻa Sīsū Kalaisí ʻokú ne fakatou ʻomi ʻa e mālohi ki he fakamaʻá mo e mālohi ʻo e huhuʻí ʻa ia ʻoku tokoni ke tau ikunaʻi ai ʻa e angahalá pea ko ha mālohi fakamāʻoniʻoniʻi mo fakamālohia ia ʻe tokoni ke tau hoko ai ko ha kakai lelei ange ʻo ʻikai koeʻuhí ko haʻatau fakafalala ki hotau ivi pē ʻotautolú. Ko e Fakalelei taʻengatá ʻoku fakataumuʻa ia ki he angahalá mo e māʻoniʻoni kotoa ʻoku ʻiate kitautolú” (“Nima Maʻa mo ha Loto Māʻoniʻoni,” Ensign pe Liahona, Nōvema 2007, 82).
Ke tokoni ki hono fakamatala nounou ʻe he kau akó ʻa e ngaahi tokāteline ne nau ako mei he Mōsaia 3:19ʻeke ange:
-
Ko e hā ha ngaahi moʻoni ʻo e ongoongoleleí ʻokú ke maʻu ʻi he Mōsaia 3:19?
ʻE lava ke hiki mai ʻe he kau akó ha ngaahi tokāteline mei he vēsí, kau ai ʻeni:
Ko e tangata fakakakanó ko e fili ia ki he ʻOtuá.
ʻOku tau liʻaki ʻa e tangata fakakakanó ʻi heʻetau talangofua ki he ngaahi oʻi ʻa e Laumālie Māʻoniʻoní.
Te tau lava ʻo liʻaki ʻa e tangata fakakakanó pea hoko ko ha tangata māʻoniʻoni tuʻunga ʻi he Fakalelei ʻa Kalaisí.
Fakaafeʻi ʻa e kau akó ke nau tali ha taha ʻo e ngaahi fehuʻi ko ʻení ʻi heʻenau tohinoa ki he ako folofolá. (Mahalo te ke fie hiki ʻa e ngaahi fehuʻi ko ʻení ʻi he palakipoé ʻi he teʻeki kamata ʻa e kalasí, teuteu ha ngaahi laʻi pepa tufa kuo ʻi ai ʻa e ngaahi fehuʻí pe lau māmālie ʻa e ngaahi fehuʻí ke lava ʻa e kau akó ʻo hiki kinautolu ʻi he ʻenau tohinoa ki he ako folofolá.)
-
Ko e hā te ke ala fai ke ke talangofua kakato ange ai “ki he ngaahi oʻi ʻa e Laumālie Māʻoniʻoní”? Ko e hā te ke fai ʻi he uike ka hokó ke ke lelei ange ai ʻi he tafaʻaki ko ʻeni hoʻo moʻuí?
-
Ko e hā ha faʻahinga ʻulungaanga ʻo ha kiʻi tamasiʻi ʻoku lisi ʻi he Mōsaia 3:19 ʻokú ke fie maʻu taha ke fakatupulaki? Ko e hā te ke fai ʻi he uike ka hokó ke tokoni ʻi hoʻo fakatupulaki ʻo e ʻulungaanga ko iá?
Lau ange kiate kinautolu ʻa e Mōsaia 3:23–26 ke tokoni ki he kau akó ke nau maʻu ha loto houngaʻia lahi ange ii he Fakalelei ʻa e Fakamoʻuí. Fakamatalaʻi ange ʻoku ʻuhinga ʻa e kupuʻi lea “ipu ʻo e houhau ʻo e ʻOtuá” ʻi he veesi 26 ki he faingataʻaʻia ʻe aʻusia ʻe kinautolu ʻoku nau faiangahala ʻi he loto moʻoni pea ʻikai ke fakatomalá. Kole ki ha toko taha ako ke ne lau ʻa e Tokāteline mo e Ngaahi Fuakava 19:16–19. Kole ki he kau akó ke nau fakaongoongo ki he foʻi lea ko e ipú ʻi he veesi 18.
-
Ko e hā kuo fai ʻe Sīsū Kalaisi koeʻuhí ke ʻoua naʻa tau inu ʻi he “ipu ʻo e houhau ʻo e ʻOtuá”? (Naʻá Ne inu ʻa e ipú ʻe Ia tonu pē, ʻo toʻo ai kiate Ia ʻa e tautea ʻo ʻetau ngaahi angahalá. Kapau te tau fakatomala moʻoni, he ʻikai ke tau fuesia ʻa e tauteá.)
Fakaʻosi ʻaki haʻo fai ange hoʻo fakamoʻoni ki he ngaahi moʻoni naʻe aleaʻi ʻi he lēsoni ko ʻení.
Fakataukei Folofola—Mōsaia 3:19
Ke tokoni ʻi hono ako maʻuloto ʻe he kau akó ʻo e Mōsaia 3:19. Kole ange ke nau lau leʻo lahi ʻa e Mōsaia 3:19, vahevahe kinautolu ke nau tauhoa, fakafoʻi lea, ʻo taufetongi ʻi he foʻi lea kotoa pē mo honau hoá. Kole ange ke nau toutou fai ʻa e kiʻi ngāue ko ʻení. Te ke lava ʻo fulifulihi e ʻekitivitī ko ʻení ʻaki haʻo ʻai ke lau ha foʻi lea ʻe ua pe tolu ʻe he hoá pea toki fetongi.
ʻE tokoni hano toutou fai ʻo e ʻekitivitī ko ʻení ke maheni ange ai ʻa e kau akó mo e kakano ʻo e vēsí pea ʻe faingofua ange ai ke nau ako maʻuloto ʻo e vēsí kotoa. Fakatukupaaʻi kinautolu ke nau fakakakato ʻenau ako maʻuloto ʻo e Mōsaia 3:19 ʻiate kinautolu pē.
Fakatokangaʻi ange: Koeʻuhí ko e natula mo e lōloa ʻo e lēsoni ko ʻení, mahalo te mou fie maʻu ke ngāue ʻaki ʻa e ʻekitivitī fakataukei folofolá ʻi ha ʻaho kehe, ʻi hano maʻu hamou taimi feʻunga.
Ngaahi Fakamatala Fakamahino mo e Puipuituʻá
Mōsaia 3:5–11. Ako fekauʻaki mo e Fakalelei ʻa Sīsū Kalaisí
Naʻe akoʻi ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku totonu ke tau feinga ke mahino ʻa e meʻa kotoa pē te tau lavá fekauʻaki mo e Fakalelei ʻa Sīsū Kalaisí:
“ʻOku ʻikai ha taha ʻiate kitautolu te ne lava ke fakahoungaʻi kakato ʻi he matelié ʻa e ngaahi lelei ʻo e Fakaleleí.
“ʻOku ʻi ai ha fie maʻu vivili ke tau fakamālohia ʻa ʻetau mahino ki he Fakalelei ʻa Sīsū Kalaisí kae lava ke hoko ia ko ha fakavaʻe mālohi ke langa ai ʻetau moʻuí. ʻI he fakaʻau ke siʻi ange ʻa e ngaahi tuʻunga fakavaʻe ʻo e moʻuí ʻo hangē ko hono liʻaki ʻo e fakaʻapaʻapá, angamaʻá, mo e moʻui maʻá ʻi he feinga ke fakafiemālieʻi e holí, ʻe ʻomi leva ʻe he ʻetau mahino mo e tui ki he Fakalelei ʻa Sīsū Kalaisí [ʻa e] mālohi mo e ivi ʻoku fie maʻu ki he lavameʻa ʻo e moʻuí. Te ne ʻomi foki ha loto falala ʻi he taimi ʻo e ʻahiʻahí pea mo e nongá ʻi he taimi ʻo e faingataʻá.
“ʻOku ou poupouʻi mālohi atu ke ke fokotuʻu ha palani ako fakatāutaha ke toe mahino mo ke houngaʻia ange ai ʻi he taʻe-hano tatau, taʻengata pea mo e ola taʻe-fakangatangata ʻo hono fakahoko haohaoa ʻe Sīsū Kalaisi ʻa Hono uiuiʻi fakalangi ko hotau Fakamoʻui mo e Huhuʻí. ʻE fakamālohia ʻe he fakalaulauloto fakamātoato ʻo e folofolá, fakataha mo e fekumi mo e lotu fakamātoató ʻa hoʻomou mahino mo e tui ki Heʻene Fakaleleí. Ko ha founga mālohi ʻe taha ke ako kia Sīsū Kalaisi mo ʻEne Fakaleleí, ko e ʻalu maʻu pē ki he temipalé” (“ʻOkú Ne Moʻui! Ke Lāngilangiʻia Hono Huafá!” Ensign pe Liahona, Mē 2010, 77).
Mōsaia 3:19. Ko e sākalamēnití mo e hoko ko ha Tangata Māʻoniʻoní
Naʻe fakamatalaʻi ʻe ʻEletā Kuenitini L Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ko e fehokotakiʻanga ʻo e sākalamēnití mo ʻetau ngāué ke hoko ko ha “tangata māʻoniʻoni ʻi he fakalelei ʻa Kalaisi ko e ʻEikí” (Mōsaia 3:19):
“Ko e houalotu sākalamēnití ko e fakatahaʻanga toputapu mo māʻoniʻoni taha ia ʻi he Siasí. Hili ʻEne toetuʻú, naʻe toe fai ʻe he Fakamoʻuí ʻa e sākalamēnití ʻi he kau Nīfaí. Kapau ʻoku tau hoko ko ʻEne kau ākonga mo e kāingalotu faivelenga ʻo Hono Siasí, kuo pau ke tau manatuʻi mo fakaʻapaʻapaʻi e sākalamēnití. ʻOku tau lava ai ʻo fakahaaʻi ʻi he loto mafesifesi mo e laumālie fakatomala [ʻa ʻetau lotofiemālie] ke muimui ʻi he Fakamoʻuí, ke fakatomala, pea hoko ko ha ʻo fou ʻi he Fakalelei ʻa Kalaisí” (“ʻOku Tau Muimui ʻia Sīsū Kalaisí,” Ensign pe Liahona, Mē 2010, 84).