Lesson 54

Mosias 4

Pambungad

Naantig sa mga itinuro ni Haring Benjamin, ang mga tao ay nagsisi at tumanggap ng kapatawaran sa kanilang mga kasalanan. Sila ay “napuspos ng kagalakan” at nagkaroon ng “katahimikan ng budhi” (Mosias 4:3). Patuloy silang tinuruan ni Haring Benjamin at tinulungan silang maunawaan kung ano ang dapat nilang gawin upang “[manatili] ang kapatawaran ng [kanilang] mga kasalanan” (Mosias 4:12). Sa paggawa nito, inihalintulad niya sila sa mga pulubi na umaasa sa Diyos para sa kaligtasan. Nagbabala rin siya sa kanila tungkol sa panganib ng pagpapabaya sa pagbabantay ng kanilang isipan, mga salita, at mga gawa.

Mga Mungkahi sa Pagtuturo

Mosias 4:1–8

Ang mga tao ni Haring Benjamin ay nakatanggap ng kapatawaran para sa kanilang mga kasalanan at napuspos ng kagalakan at kapayapaan

Sabihin sa mga estudyante na pag-isipan ang sumusunod na tanong:

• Paano natin malalaman na napatawad na tayo sa ating mga kasalanan?

Basahin ang sumusunod na pahayag ni Pangulong Harold B. Lee:

Pangulong Harold B. Lee

“Kung dumating ang panahon na nagawa mo na ang lahat ng makakaya mo para mapagsisihan ang kasalanan mo, sino ka man, saan ka man naroon, at kung nakapagbayad-pinsala at nakapagsauli ka na sa abot ng iyong makakaya; kung ito man ay isang bagay na makakaapekto sa katayuan mo sa Simbahan at nakausap mo na ang tamang mga awtoridad, nanaisin mo ang nagbibigay-katiyakang sagot na iyon kung tinanggap ka ng Panginoon o hindi. Sa iyong taimtim na pagninilay, kung hahangarin mo at matatagpuan ang kapayapaan ng budhi, dahil diyan ay malalaman mo na tinanggap na ng Panginoon ang iyong pagsisisi” (“Stand Ye in Holy Places,” Ensign, Hulyo 1973, 122).

Ipaalala sa mga estudyante na ibinahagi ni Haring Benjamin ang mga salita ng isang anghel tungkol sa paraan kung paano makatatanggap ng kapatawaran sa mga kasalanan. Maaari mong ipaalala sa kanila lalo na ang mga salita ng anghel tungkol sa likas na tao na kaaway ng Diyos at tungkol sa mga mangyayari sa mga taong namatay na hindi nagsisi ng kanilang mga kasalanan (tingnan sa Mosias 3:19, 23–27).

Sabihin sa mga estudyante na basahin nang tahimik ang Mosias 4:1–2 at hanapin ang mga pariralang nagpapakita ng itinugon ng mga tao ni Haring Benjamin sa mga salita ng anghel. Sabihin sa ilang estudyante na ibahagi ang mga pariralang nahanap nila. Kung kailangan ng mga estudyante ng tulong para maunawaan ang pariralang “makamundong kalagayan,” ipaliwanag na ang salitang makamundo ay kasalungat ng espirituwal. Tumutukoy ito sa mga pisikal na naisin natin sa halip na sa espirituwal na hangarin natin na mas mapalapit sa Panginoon. Sabihin sa mga estudyante na basahin ang Alma 41:11 at pagkatapos ay ipaliwanag ang pariralang “makamundong kalagayan” sa sarili nilang salita. Para matulungan ang mga estudyante na maunawaan ang pariralang “higit na mababa kaysa sa alabok ng lupa,” ipabasa sa kanila ang Helaman 12:4–8. Pagkatapos ay sabihin sa kanila na ipaliwanag sa sarili nilang salita kung paano mailalarawan ang isang taong hindi sumusunod sa payo ng Panginoon bilang taong higit na mababa kaysa sa alabok ng lupa. Tiyakin na nauunawaan nila na hindi itinuturing ng Ama sa langit ang Kanyang mga anak na higit na mas mababa kaysa sa alabok ng lupa.

Ipaliwanag na kapag natanto ng mga tao ang kanilang kasamaan, nagsisisi sila na ipinahahayag ang kanilang pananampalataya kay Jesucristo at sa Kanyang Pagbabayad-sala. Ipabasa nang malakas sa isang estudyante ang Mosias 4:3. Sabihin sa klase na pagtuunan ng pansin kung paano nalaman ng mga tao na napatawad sila sa kanilang mga kasalanan.

• Ayon sa Mosias 4:3, ano ang nadama ng mga taong napatawad ng Panginoon?

• Ang mga tao ay nakatanggap ng kapatawaran sa kanilang mga kasalanan dahil sa “labis na pananampalataya nila kay Jesucristo.” Ano ang mga ginawa nila na nagpapakita ng kanilang pananampalataya? (Tingnan sa Mosias 4:1–2.)

• Sa inyong sariling mga salita, ano ang matututuhan natin mula sa Mosias 4:1–3 tungkol sa pagtanggap ng kapatawaran sa ating mga kasalanan? (Ang isang posibleng sagot ay kapag sumampalataya tayo kay Jesucristo at taos-pusong nagsisi, tatanggap tayo ng kapatawaran sa ating mga kasalanan. Maaari mong sabihin sa mga estudyante na markahan ang mahahalagang salita at parirala sa Mosias 4:1–3 na nagbibigy-diin sa alituntuning ito.)

Basahin ang sumusunod na pahayag ni Elder Neil L. Andersen ng Korum ng Labindalawang Apostol, na nagsasabi ng dapat nating gawin para makatanggap ng kapatawaran sa ating mga kasalanan:

Elder Neil L. Andersen

“Kapag taos[-puso] nating ipinagtapat ang ating mga kasalanan, ibinalik ang kaya nating ibalik sa taong nasaktan, at tinalikuran ang ating mga kasalanan sa pamamagitan ng pagsunod sa mga utos, nasa proseso tayo ng pagtanggap ng kapatawaran. Sa paglipas ng panahon, madarama nating nababawasan ang hapis ng ating kalumbayan, [inaalis] ‘ang pagkakasala sa ating mga puso’ (Alma 24:10) at nagkakaroon tayo ng ‘katahimikan ng budhi’ (Mosias 4:3).

“Para sa mga tunay na nagsisisi ngunit tila hindi nakadarama ng kapanatagan: patuloy na sundin ang mga kautusan. Nangangako ako sa inyo, mapapanatag kayo sa takdang panahon ng Panginoon. Nangangailangan din ng panahon ang paghilom” (“Magsisi … Upang Mapagaling Ko Kayo,” Ensign o Liahona, Nob. 2009, 42).

Sabihin sa mga estudyante na isulat sa kanilang scripture study journal o notebook ang natutuhan nila tungkol sa pagsisisi nang talakayin nila ang Mosias 4:1–3. Sabihin din sa kanila na isulat kung paano nila magagamit ang kanilang pananampalataya kay Jesucristo kapag humihingi sila ng kapatawaran sa kanilang mga kasalanan.

Ipaliwanag na matapos makitang nagsisisi ang mga tao, ipinaalala sa kanila ni Haring Benjamin ang pag-asa nila sa Panginoon. Sabihin sa ilang estudyante na magsalitan sa pagbasa nang malakas ng Mosias 4:4–8. Sabihin sa klase na alamin ang nais ni Haring Benjamin na maunawaan ng kanyang mga tao pagkatapos nilang makatanggap ng kapatawaran sa kanilang mga kasalanan.

• Ayon sa mga talatang ito, ano ang tanging “mga hinihingi kung paano [tayo] ay maliligtas”?

Matapos sagutin ng mga estudyante ang tanong na ito, sabihin sa kanila na basahing muli nang tahimik ang Mosias 4:4–8 at hanapin ang mga pariralang naglalarawan sa mga tao na nakatanggap ng kaligtasan. Maaari mong imungkahi na markahan nila ang mga pariralang ito. Maaari mong itanong ang mga sumusunod:

• Ano sa palagay ninyo ang ibig sabihin ng “[maging] masigasig sa pagsunod sa mga kautusan [ng Panginoon]”?

• Ano ang ilang gawa na nagpapakita na ang isang tao ay “[n]agbibigay ng pagtitiwala niya sa Panginoon”?

• Sa anong mga paraan ninyo nakita ang “kabutihan ng Diyos” at ang Kanyang “di mapapantayang kapangyarihan”?

Ituro na ang pagsisisi at pagsunod ay nangangailangan ng ating matinding paggawa at pagsisikap. Gayunman, sa kabila ng lahat ng pagsisikap natin, hindi natin kailanman matatanggap ang kapatawaran sa ating mga kasalanan at ang kaloob na kaligtasan kung wala ang Pagbabayad-sala ni Jesucristo.

Mosias 4:9–30

Itinuro ni Haring Benjamin kung paano mapananatili ang kapatawaran ng mga kasalanan

Isulat sa pisara ang mapanatili ang kapatawaran ng ating mga kasalanan. Sabihin sa mga estudyante na matapos matanggap ng mga tao ang kapatawaran ng kanilang mga kasalanan, itinuro sa kanila ni Haring Benjamin kung paano mapananatili ang malinis at dalisay na kalagayang iyon.

• Bakit mahalaga ring malaman ito ng bawat isa sa atin?

Sabihin sa mga estudyante na basahin nang tahimik ang Mosias 4:9–11 at alamin kung ano ang dapat nating gawin para mapanatili ang kapatawaran ng ating mga kasalanan. Pagkatapos ng sapat na oras, sabihin sa mga estudyante na ibahagi ang nalaman nila. Maaari mong isulat sa pisara ang kanilang mga sagot. Maaaring kabilang sa mga sagot ang kailangang maalaala natin ang kadakilaan ng Diyos, magpakumbaba ng ating sarili, manalangin araw-araw, at manatiling matatag sa pananampalataya.

Maaaring itanong ang mga sumusunod para matulungan ang mga estudyante na mas mapalalim ang kanilang pag-unawa at maipamuhay ang kanilang nabasa:

• Itinuro ni Haring Benjamin na dapat tayong “maniwala sa Diyos” (Mosias 4:9). Binanggit din ni Haring Benjamin ang tungkol sa pagtikim sa pag-ibig ng Diyos at palaging pag-alaala sa “kadakilaan ng Diyos” (Mosias 4:11). Anong mga karanasan ang nakatulong sa inyo na malaman na buhay at makapangyarihan ang Diyos at mahal Niya kayo?

• Paano nakakaimpluwensya sa atin ang pag-alaala sa kapangyarihan, kabutihan, at pagmamahal ng Diyos sa ating kagustuhang sundin Siya?

Basahin nang malakas ang Mosias 4:12 sa mga estudyante. Sabihin sa kanila na tukuyin sa talatang ito ang mga pagpapalang dumating sa mga taong gumawa ng mga itinuro sa Mosias 4:5–11.

Ipaliwanag na ang Mosias 4:13–16 ay naglalaman ng paglalarawan ni Haring Benjamin sa mga taong napanatili ang kapatawaran ng kanilang mga kasalanan. Hatiin ang klase sa tatlong grupo. Sabihin sa unang grupo na basahin ang Mosias 4:13, sa pangalawang grupo naman ay ang Mosias 4:14–15, at sa pangatlong grupo ang Mosias 4:16. Sabihin sa bawat estudyante na basahin ang naka-assign na talata o mga talata sa kanila at tukuyin ang mga ugali at mga katangiang inilarawan ni Haring Benjamin na taglay ng mga taong nagsisikap na mapanatili ang kapatawaran ng kanilang mga kasalanan.

Pagkatapos ng sapat na oras, sabihin sa mga estudyante na ibahagi ang natukoy nila. Kapag nagawa na nila ito, bigyang-diin ang katotohanan na kung tayo ay magpapakumbaba ng ating sarili sa harapan ng Diyos at magsisikap na magkaroon ng mga katangian ni Cristo, mapapanatili natin ang kapatawaran ng ating mga kasalanan. Tulungan ang mga estudyante na maipamuhay ang kanilang natutuhan sa pamamagitan ng pagtatanong ng isa o lahat ng mga sumusunod kapag nabanggit ang bawat ugali o katangian:

• Sa inyong palagay, bakit makatutulong ang ugali (o katangian) na ito sa pagpapanatili ng kapatawaran ng ating mga kasalanan?

• Kailan kayo nakakita ng ganitong mga halimbawa ng ugali (o katangian)?

Gumamit si Haring Benjamin ng isang matinding analohiya na makatutulong sa mga estudyante na pahalagahan ang mga pagpapalang natanggap nila mula sa Panginoon at mahikayat silang magkaroon ng mga katangiang napag-aralan nila sa Mosias 4:13–16. Ipabasa nang tahimik sa mga estudyante ang Mosias 4:16–23.

• Ayon kay Haring Benjamin, paanong lahat tayo ay mga pulubi?

• Paano makatutulong sa atin ang pagkaunawang ito na maging mas mahabagin sa ibang tao?

• Para sa mga hindi makapagbigay sa mga pulubi, o para sa mga kakaunti ang maibibigay, anong payo ang ibinigay ni Haring Benjamin sa Mosias 4:24–26?

• Sa Simbahan ngayon, paano nakatutulong sa atin ang pagbibigay ng mga handog-ayuno para masunod ang payo sa Mosias 4:26? Paano maaaring makibahagi ang mga kabataan sa mga handog-ayuno? (Maaaring kabilang sa mga sagot ang makapag-aayuno sila, makapagbibigay ang ilan sa kanila ng mga handog-ayuno, at kinakalap ng mga mayhawak ng Aaronic Priesthood sa ilang dako ng mundo ang mga handog-ayuno mula sa mga miyembro ng ward o branch.)

Ituro na sa lahat ng mabubuting bagay na ipinagagawa sa atin, maaaring kung minsan ay mahirap na mabalanse ang ating buhay. Ipabasa nang malakas sa isang estudyante ang Mosias 4:27.

• Ano sa palagay ninyo ang ibig sabihin ng gawin ang lahat ng bagay nang may “karunungan at kaayusan”?

• Paano makatutulong ang payo na ito sa inyo?

Ipabasa nang malakas sa isang estudyante ang Mosias 4:29–30. Ituro na ang Mosias 4:30 ay isang scripture mastery passage. Maaari mong hikayatin ang mga estudyante na markahan ang scripture mastery passage na ito sa paraang madali nila itong mahahanap.

• Paano nagkakaugnay ang ating isipan, mga salita, at mga gawa,? Ano ang magagawa natin para mabantayan ang ating sarili? Paano natin matutulungan ang isa’t isa?

Ang Mosias 4:30 ay isang scripture mastery passage. Tingnan ang ideya sa pagtuturo sa katapusan ng lesson para matulungan ang mga estudyante sa pag-unawa at pagsasaulo ng scripture passage na ito.

Bigyan ang mga estudyante ng ilang minuto na maisulat sa kanilang scripture study journal kung paano makatutulong sa kanila ang mga alituntunin sa Mosias 4:9–30 habang sinisikap nilang mapanatili ang kapatawaran ng kanilang mga kasalanan. Patotohanan ang pagmamahal ng Panginoon para sa bawat isa sa kanila at ang hangarin Niya para sa kanila na magsisi at panatilihin ang kapatawaran ng kanilang mga kasalanan.

Pagsulat ng mga impresyon

Hinikayat ni Elder Richard G. Scott ng Korum ng Labindalawang Apostol ang mga estudyante na isulat ang mga impresyong natatanggap nila: “Magkaroon ng kasanayan na matuto sa nakita ninyo at lalo na sa mga ipinadama sa inyo ng Espiritu Santo. … Isulat sa talaang maiingatan ninyo ang mahahalagang bagay na natutuhan ninyo mula sa Espiritu. Makikita ninyo na kapag isinulat ninyo ang mahahalagang impresyon, madalas na mas marami pa ang darating” (“To Acquire Knowledge and the Strength to Use It Wisely,” Ensign, Hunyo 2002, 32).

Scripture Mastery—Mosias 4:30

Upang matulungan ang mga estudyante na malaman ang pagkakaugnay ng isipan, mga salita, at mga gawa, na nakasaad sa Mosias 4:30, basahin ang sumusunod na pahayag ni Pangulong Ezra Taft Benson:

“Maging malinis ang kaisipan. Ang mga taong malinis ang kaisipan ay hindi gumagawa ng maruruming gawain. Hindi lamang ninyo pananagutan sa harap ng Diyos ang inyong mga kinikilos kundi pati na rin ang pagpigil sa inyong pag-iisip. Kaya’t mamuhay sa paraang hindi kayo mamumula sa hiya kung ipalabas sa screen sa inyong simbahan ang inyong mga iniisip at ginagawa. Totoo pa rin ang lumang kasabihan na ang iniisip ninyo ang ginagawa ninyo, ang ginagawa ninyo ang kinauugalian ninyo, ang kinauugalian ninyo ang nagiging pagkatao ninyo, at ang pagkatao ninyo ang nagtatakda ng inyong walang-hanggang tadhana. ‘Kung ano ang iniisip [ng tao] sa loob niya, ay gayon siya’” (sa Conference Report, Okt. 1964, 60; binanggit ang Mga Kawikaan 23:7).

Ipaliwanag na ang liwanag at kadiliman ay hindi maaaring sabay na naroroon sa iisang lugar. Dadaigin ng liwanag ang kadiliman. Halimbawa, ang mga angkop na musika, nagpapasiglang mga imahe, makabuluhang mga aktibidad, at malinis na kaisipan at mga salita ay mag-aanyaya ng Espiritu sa ating buhay at mag-aalis ng maruruming kaisipan mula sa ating isipan. Tulungan ang mga estudyante na maunawaan na madaraig nila ang kadiliman sa pamamagitan ng pagpuno ng liwanag sa kanilang buhay.

• Ano ang maaari nating gawin upang mapanatili nating malinis ang ating isipan, mga salita, at mga gawa?

Hikayatin ang mga estudyante na gumawa ng mga partikular na plano para mapuno ng liwanag ang kanilang buhay. Maaari mong ipasulat ang mga plano nila sa kanilang scripture study journal.

Mga Karagdagang Ideya sa Pagtuturo

Mosias 4:16–26. Pangangalaga sa mga nangangailangan—isang katangian ng mga disipulo ni Jesucristo

Sa konteksto ng pagkakaroon ng katangiang tulad ng kay Cristo na nabanggit sa Mosias 4, sabihin sa mga estudyante na isipin ang mga karanasan nila sa pagtulong sa mga nangangailangan. Maaari mong imungkahi na isipin ang mga ginawa nilang paglilingkod. Maaari mong sabihin sa mga mayhawak ng Aaronic Priesthood na isipin ang pagsisikap nila na tipunin ang mga handog-ayuno.

• Sa inyong palagay, bakit ang pangangalaga sa mga maralita at nangangailangan ay bahagi ng pagiging disipulo ni Jesucristo?

• Paano nakatulong ang paglilingkod ninyo sa mga nangangailangan para mas mapalapit kay Jesucristo?

Basahin ang sumusunod na pahayag ni Bishop H. David Burton, Presiding Bishop ng Simbahan:

“Ang layunin, mga pangako, at mga alituntuning nagpapatibay sa ating pangangalaga sa maralita at nangangailangan ay higit pa sa hangganan ng mortalidad. Ang sagradong gawaing ito ay hindi lamang para makinabang at mapagpala ang mga nagdurusa o nangangailangan. Bilang mga anak ng Diyos, hindi natin mamanahin ang kaganapan ng buhay na walang hanggan kung hindi natin lubos na pangangalagaan ang isa’t isa habang narito tayo sa mundo. Natututo tayo ng mga selestiyal na alituntunin ng pagsasakripisyo at paglalaan kapag nagsakripisyo tayo at naglingkod sa iba” (“Ang Nagpapabanal na Gawaing Pangkapakanan,” Ensign o Liahona, Mayo 2011, 81–82).

Mosias 4:30. Bantayan ang inyong mga isipan, mga salita, at mga gawa

Para matulungan ang mga estudyante na masunod ang payo sa Mosias 4:30 na bantayan ang kanilang isipan, basahin ang sumusunod na analohiya at payo ni Pangulong Boyd K. Packer ng Korum ng Labindalawang Apostol:

“Habang natututuhan ninyong pigilin ang inyong mga kaisipan, mapagtatagumpayan ninyo ang mga ugali, kahit na ang mga pag-uugaling nakapagpapababa ng pagkatao. Magkakaroon kayo ng tapang, malulupig ang takot, at magiging maligaya ang inyong buhay. Sa paglaki ko … sinabihan [ako] na ang mga kaisipan ay kailangang pigilin, ngunit walang nagsabi sa akin kung paano. Pinag-isipan ko ito sa mga nagdaang taon at nagpasiya akong ang isipan ay tulad ng isang entablado. Sa bawat paggising, ang telon ay nakataas. Palaging may nagaganap na pagtatanghal sa entabladong iyon. Maaaring ito ay isang katatawanan, isang trahedya, kawili-wili o nakababagot, mabuti o masama; ngunit palaging may palabas sa entablado ng inyong isipan.

“Napansin ba ninyo na ang mumunting nakapanlilinlang na mga kaisipan ay maaaring pumasok sa tagong panig ng entablado at agawin ang inyong pansin sa kalagitnaan ng halos alinmang pagtatanghal at hindi naman ninyo sinasadyang gawin ito? … Kung pahihintulutan ninyong magpatuloy ang mga ito, lilisanin ng lahat ng mabubuting kaisipan ang entablado. … Ano ang gagawin ninyo sa ganoong sandali, kapag ang entablado ng inyong isipan ay pinatatakbo ng mumunting kademonyohan ng maruming kaisipan … ? Kung mapupuno ninyo ang inyong isip ng malilinis at kapaki-pakinabang na kaisipan, hindi magkakaroon ng puwang para sa mapilit na kademonyohang ito, at aalis ang mga ito.”

Nagmungkahi si Pangulong Packer ng isang paraan para maalis ang maruruming kaisipan sa ating isipan:

“Pumili ng paboritong himno o awit, … awiting may mga salitang nagpapasigla at tugtuging may pagpipitagan, na nagbibigay sa inyo ng damdaming katulad ng inspirayon. Maraming magagandang awit na mapagpipilian. [Hingin] ang patnubay ng Espiritu sa inyong pagpili. Masusi ninyong pag-isipan ang awit. Isaulo ito. Kahit wala kayong alam sa musika, maaari kayong mag-isip sa pamamagitan ng isang karaniwang awit. Ngayon ay gamitin itong daluyan ng inyong kaisipan. Gawin itong daluyan sa oras ng biglaang pangangailangan.

“Sa tuwing may makikita kayong umaaligid na masasamang tauhan na pumapasok sa entablado ng inyong isipan, patugtugin ninyo ang CD na ito, tulad ng dati. Babaguhin nito ang inyong buong kalooban.

“Sapagkat ang tugtugin ay nagpapasigla at malinis, ang mas mababaw na kaisipan ay buong kahihiyang maglalaho nang dahan-dahan. Sapagkat yamang ang mabuti, sa pamamagitan ng pagpili, ay hindi makikisama sa marumi, ang masama ay hindi makatatagal sa kinaroroonan ng liwanag. Sa tamang panahon ay matatagpuan ninyo ang inyong sarili na hinihimig ang tugtugin sa inyong kalooban, nang halos kusa, upang itaboy ang hindi karapat-dapat na mga kaisipan” (“Karapat-dapat na Tugtugin, mga Karapat-dapat na Kaisipan,” Liahona, Abr. 2008, 31–32, 35).

Hikayatin ang mga estudyante na gumawa ng isang plano na magtataboy sa masasamang kaisipan na pumapasok sa kanilang isipan. Maaaring kabilang sa mga plano nila ang maraming ideya, tulad ng pag-iisip ng isang himno o awit sa Primary, pagbigkas ng isang talata, o pagsasaisip sa Tagapagligtas. Anyayahan ang ilang estudyante na ibahagi ang kanilang mga plano. Hikayatin ang mga estudyante na gawin ang kanilang mga plano.