Doktrinal nga Kahanas: 1 Nephi 3:7

“Ako Moadto ug Mobuhat sa mga Butang Nga ang Ginoo Nagsugo.”

Sa miaging leksiyon, imong nakat-onan nga ang Ginoo kanunay nga nag-andam og paagi alang kanato aron matuman ang unsay Iyang gisugo nga atong buhaton. Kini nga leksiyon makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan alang sa 1 Nephi 3:7, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo.

Pagkat-on sa pagpasabot sa doktrina ug mga baroganan. Ang mga estudyante mopalambo sa ilang panabot samtang sila mopasabot sa ebanghelyo sa usag usa. Pagmugna og palibot diin ang mga estudyante komportable nga mopaambit sa ilang panabot sa mga kamatuoran sa ebanghelyo ngadto sa uban.

Pagpangandam sa estudyante: Dapita ang mga estudyante sa paghunahuna og mga kasinatian nga nasinati nila o sa mga minahal nga nagpakita nga ang Ginoo nag-andam og paagi aron matuman ang Iyang gipangayo ngare kanato.

Mga Posibleng Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “1 Nephi 3,” nga mao ang pangkontekstong leksiyon para sa tudling sa doktrinal nga kahanas sa 1 Nephi 3:7. Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug Isag-ulo

Gamita ang bisan unsang epektibong paagi aron matabangan ang mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan sa 1 Nephi 3:7 ug sa pagpasabot sa mga kamatuoran nga makita niini nga tudling.

Ang mosunod nga mga kalihokan mga sugyot kon unsaon sa pagbuhat niini.

Usa ka katuyoan sa doktrinal nga kahanas mao ang pagtugot kanimo sa pagpraktis sa pagpasabot sa mga kamatuoran sa ebanghelyo ni Jesukristo sa imong kaugalingong mga pulong. Adunay dili maihap nga mga paagi nga makapanalangin ka sa mga kinabuhi niadtong anaa sa imong palibot samtang imong mas sabton ug bansayon ang pagpasabot sa doktrina sa Manluluwas nga makita sa Iyang mga kasulatan.

Basaha ang 1 Nephi 3:7 ug ipamubo [summarize] kon unsa ang gitudlo niini sa imong kaugalingong mga pulong.

Dapita ang matag estudyante sa pagpaambit sa ilang pagpamubo [summary] ngadto sa usa ka partner.

Sulayi paghunahuna og sitwasyon diin ang mga kamatuoran nga gitudlo niini nga bersikulo makatabang sa usa ka tawo. Dayon tubaga ang mosunod nga mga pangutana:

Human mahatagan og panahon ang mga estudyante sa pag-andam sa ilang mga tubag sa mosunod nga mga pangutana, ikonsiderar ang pagdapit kanila sa pagpasabot sa ilang mga tubag ngadto sa usa ka partner aron ang matag estudyante adunay kahigayonan sa pagpahayag sa iyang mga hunahuna sa pagsulti.

• Unsa nga mga kamatuoran gikan niini nga bersikulo ang imong ipaambit sa usa ka tawo sa sitwasyon nga imong gihunahuna? Ngano?

• Unsa ang lain-laing mga paagi nga lagmit ang Dios nag-andam og paagi aron matuman nato ang unsay Iyang gipangayo?

• Unsa nga mga kasinatian ang imong mapaambit aron sa paghulagway sa kamatuoran nga ang Dios nag-andam og paagi aron matuman nato ang bisan unsa nga Iyang ipabuhat kanato?

Kon ang mga estudyante nibuhat sa pagpangandam sa estudyante nga kalihokan, ikonsiderar ang pagdapit og mga boluntaryo aron sa pagpaambit sa ilang mga kasinatian ngadto sa klase.

Aron matabangan ang mga estudyante sa pagsag-ulo sa mahinungdanong hugpong sa mga pulong sa kasulatan ug sa pakisayran, ikonsiderar ang pagpakita sa hulagway ni Nephi nga nakig-istorya sa iyang amahan gikan sa sinugdanan sa leksiyon. Dapita ang mga estudyante sa pagtan-aw sa hulagway samtang nagbalik-balik pagsulti sa, “‘Ako moadto ug mobuhat sa mga butang nga ang Ginoo nagsugo’—1 Nephi 3:7,” sa makadaghang mga higayon kutob sa ilang mahimo sulod sa usa ka minuto.

Dayon, aron matabangan ang mga estudyante nga mas mopasalig sa pagmemorya niini nga tudling sa doktrinal nga kahanas, ikonsiderar ang paghunong sa makausa o kaduha kon adunay natural nga paghunong sa leksiyon aron mapakita pag-usab ang hulagway ug dapita ang mga estudyante sa pagsulti pag-usab sa pakisayran ug sa mahinungdanong hugpong sa mga pulong sa kasulatan.

Pagbansay sa paggamit

Kitang tanan mag-atubang og lisod nga mga sitwasyon ug hangyoon sa Dios sa pagbuhat og malisod nga mga butang sa atong mga kinabuhi. Ang paggamit sa mga baroganan sa pag-angkon og espirituhanong kahibalo makatabang nimo sa paglig-on sa imong hugot nga pagtuo ngadto kang Jesukristo samtang imong giatubang kini nga mga sitwasyon.

Imbis mogamit sa mosunod nga mga senaryo, ang mga estudyante mahimong motutok sa usa ka butang nga gisugo sa Ginoo nga may piho nga kalabotan sa ilang mga kinabuhi. Mahimong may nailhan sila sa “1 Nephi 3” nga leksiyon. Kon kini nga kausaban himoon, ikonsiderar ang pagtugot sa mga estudyante sa pagbuhat nga magtinagsa, sanglit ang pipila sa mga butang nga ilang gipili nga pagatutokan mahimong personal ra kaayo.

Basaha ang mosunod nga mga senaryo ug pagpili og usa nga ganahan nimong tutokan alang sa sunod nga kalihokan.

1. Si Sarah nahigugma sa Ginoo ug gusto nga moserbisyo sa Iyang Simbahan. Pero, bag-o lang siyang nakadawat og buluhaton sa Simbahan nga gibati niya nga dili kuwalipikado sa pagtuman. Gidawat niya ang buluhaton apan nagpanuko sa pagpadayon niini.

   Ikonsiderar ang pagsal-ot og bisan unsa nga sugo ngadto sa mosunod nga senaryo nga ang mga estudyante labing maka-relate. Pipila ka mga ehemplo mao ang pagpuasa, pagbayad sa ikapulo, pagtuman sa calling sa Simbahan, o pagkamatinuoron.

2. Gipakaubos ni Rosa ang iyang kaugalingon tungod kay nanlimbasog siya sa pagtuman sa usa ka sugo. Siya nakasunod sa sugo usahay apan wala nabuhat nga makanunayon.

Kon gamiton ang gisugyot nga mga senaryo, ikonsiderar ang paghangyo sa mga estudyante sa pagporma og grupo nga tinagtulo kauban niadtong mipili sa susamang senaryo. I-assign ang matag sakop sa grupo sa pagtuon sa usa sa mosunod nga mga baroganan sa pag-angkon og espirituhanong kahibalo ug sa pagtubag sa mga pangutana niana nga seksiyon. Human sa igong panahon, dapita sila nga mo-report unsay ilang nakat-onan ngadto sa ilang grupo.

Mahimong makatabang ang pagpakita o pag-imprinta og mga kopya sa mosunod nga mga seksiyon aron makita sa mga estudyante samtang sila magtuon.

Lihokon inubanan sa hugot nga pagtuo

Basaha ang mga parapo 5–7 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

• Sa unsang paagi kaha nga ang pamahayag ni Elder Holland sa parapo 6 makatabang kang Sarah o Rosa?

• Kon si Sarah o Rosa dili dayon makatuman sa unsay gipangayo sa Dios, sa unsang paagi nga ang mga kamatuoran mahitungod sa Langitnong Amahan sa parapo 7 makatabang?

• Kon aduna kay mga hunahuna nga susama kang Sarah o Rosa, unsay nakatabang o makatabang nimo sa pagpadayon uban sa hugot nga pagtuo kang Jesukristo?

Susiha ang mga konsepto ug mga pangutana inubanan sa mahangtorong panglantaw

Basaha ang parapo 8 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas. Ikonsiderar ang pagmarka og labing minos duha ka hugpong sa mga pulong o mga ideya nga sa imong hunahuna makatabang ni Sarah o Rosa.

• Unsaon sa matag hugpong sa mga pulong nga imong gipili pagtabang kang Sarah o Rosa?

• Unsa ang imong nahibaloan mahitungod sa Langitnong Amahan ug giunsa Niya pagdala sa Iyang mga anak nga mahimong makatabang?

• Sa unsang paagi nga ang pagtan-aw sa sitwasyon sa kinatibuk-an sa plano sa kaluwasan makatabang?

Tinguhaa ang dugang nga panabot pinaagi sa balaanong gitudlo nga mga tinubdan

Basaha ang parapo 11 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

• Asa nimo tambagan si Sarah o si Rosa sa pagpangita sa mga kamatuoran nga makatabang kaniya?

Paggahin og pipila ka minuto sa pagpangita sa balaanong gitudlo nga mga tinubdan alang sa mga kamatuoran nga imong gibati nga magamit sa sitwasyon. Usa ka tinubdan nga mahimo nimong mapili mao ang lista sa mga tudling sa doktrinal nga kahanas makita sa kataposan sa Mahinungdanon nga Dokumento sa Doktrinal nga Kahanas. Ikonsiderar ang pagbasa sa mahinungdanong hugpong sa mga pulong sa kasulatan sa mga tudling sa Basahon ni Mormon, nga mangita niadtong mahimong makatabang. Seguradoha nga iapil ang 1 Nephi 3:7 isip usa sa imohang tinubdan.

• Unsa ang imong nakit-an nga lagmit imong mapaambit?

• Giunsa sa mga kamatuoran nga imong nakit-an pagkahimo og kalahian sa imong kinabuhi?

Ikonsiderar ang paglakaw palibot sa kwarto ug pagtabang sa mga estudyante nga dili segurado unsaon pagpangita sa mga tudling sa kasulatan o mga pamahayag sa mga lider sa Simbahan. Imbes nga hatagan sila og magamit nga pakisayran sa kasulatan o pamahayag, ikonsiderar ang pagpakita ngadto kanila kon unsaon sa pagpangita sa unsay ilang gipangita.

Rebyo sa doktrinal nga kahanas

Atol sa umaabot nga leksiyon, paggahin og dili molapas sa tulo ngadto sa lima ka minuto sa pagrebyo sa pakisayran ug sa mahinungdanon nga hugpong sa mga pulong sa kasulatan alang sa 1 Nephi 3:7. Usa ka paagi sa pagrebyo mao ang pagpakita sa samang hulagway ni Nephi nga gigamit niini nga leksiyon aron masuta kon ang mga estudyante nakahinumdom pa ba sa mahinungdanong hugpong sa mga pulong sa kasulatan ug sa pakisayran. Mahimo kini sa daklit sa sinugdanan o sa kataposan sa matag mosunod nga pipila ka mga leksiyon.

Unang 12 ka Tudling sa Doktrinal nga Kahanas ug Mahinungdanon nga Hugpong sa mga Pulong

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanong Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanong Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanong Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanong Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanong Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanong Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanong Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanong Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanong Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanong Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanong Hugpong sa mga Pulong sa Kasulatan “[Isalikway] ang … kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanong Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanong Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

© 2024 by Intellectual Reserve, Inc. All rights reserved.