2 Nephi 6; 10

Ang Pagpundok sa Israel

Daghang mga panagna diha sa mga kasulatan naghisgot sa mga panghitabo sa ulahing mga adlaw, o sa mga adlaw nga atong gipuy-an karon. Ang igsoon ni Nephi nga si Jacob mipaambit og mga panagna mahitungod sa atong panahon ug sa pagpundok sa Israel nga makatabang kanato nga makasabot sa atong tahas sa buhat sa Ginoo sa ulahing mga adlaw. Kini nga leksiyon makatabang kanimo nga mobati og mas dakong tinguha sa pag-apil uban sa Ginoo sa pagpundok sa Israel sa ulahing mga adlaw.

Pagmugna og usa ka aktibo nga palibot sa pagkat-on. Usahay, tingali angayan nga dugangan ang partisipasyon ug pagpunting sa estudyante pinaagi sa pisikal nga kalihokan. Ikonsiderar ang pagtabang sa mga estudyante nga makaapil pinaagi sa paglihok. Sama pananglit, ang mga estudyante mahimong mag-ilis og lingkoranan, magsulat sa pisara, mobarog aron mobasa og kasulatan, o mag-drama og istorya sa kasulatan, ug uban pa.

Pagpangandam sa estudyante: Dapita ang mga estudyante sa pagtambong nga andam sa pagpaambit og mga kasinatian nga ilang nasinati sa pag-apil sa pagpundok sa Israel.

Mga Posibleng Kalihokan sa Pagkat-on

Importante nga mga butang nga nahitabo

Ikonsiderar ang pagpakita sa mosunod nga mga pamahayag ni Presidente Russell M. Nelson sa tagsa-tagsa, mohunong sa makadiyot aron ang mga estudyante makahunahuna sa matag pamahayag sa dili pa mopadayon sa sunod.

Ang mosunod nga mga kinutlo gikan sa mensahe nga gipaambit ni Presidente Russell M. Nelson. Samtang magbasa ka niini, paghunahuna og pipila ka mga hilisgotanan nga tingali gipasabot ni Presidente Nelson.

• “Walay laing panghitabo dinhi sa kalibotan karon nga mas importante. … Walay lain nga dunay mas dakong sangpotanan. Walay lain gayod” (Russell M. Nelson ug Wendy W. Nelson, “Paglaom sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org).

• “Kini … kinahanglang importante kaayo kaninyo” (Russell M. Nelson, “Paglaom sa Israel”).

• “Kini mao ang misyon diin gipadala kamo dinhi sa yuta” (Russell M. Nelson, “Paglaom sa Israel”).

• Unsa ang pipila sa mga hilisgotanan sa imong hunahuna ang mahimong gipasabot ni Presidente Nelson niini nga mga pamahayag?

Tingali nahibaloan nimo nga si Presidente Nelson nagpasabot sa pagpundok sa Israel. Tan-awa ang “Paglaom sa Israel” gikan sa time code 39:36–40:05, anaa sa ChurchofJesusChrist.org, o basaha ang mosunod aron makita ang kompleto nga pamahayag ni Presidente Nelson.

Akong minahal nga talagsaong kabatan-onan, gipadala kamo sa yuta niining tukma nga panahon, ang labing importanteng panahon sa kasaysayan sa kalibotan, aron motabang sa pagpundok sa Israel. Walay laing panghitabo dinhi sa kalibotan karon nga mas importante kay sa niana. Walay lain nga dunay mas dakong sangpotanan. Walay lain gayod.

Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta. (Russell M. Nelson ug Wendy W. Nelson, “Paglaom sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org)

• Unsa nga mga hunahuna o mga pagbati ang aduna ka mahitungod sa pamahayag ni Presidente Nelson?

• Unsa nga mga pangutana ang aduna ka mahitungod sa pagpundok sa Israel?

Ikonsiderar ang imong mga hunahuna ug mga pagbati mahitungod sa pag-apil sa pagpundok sa Israel, nga naglakip sa pagsangyaw sa ebanghelyo niadtong ania sa yuta karon ug sa paghimo sa kasaysayan sa pamilya [family history] ug sa buhat sa templo alang niadtong nangamatay na aron ang tanan adunay oportunidad sa pagduol sa Langitnong Amahan ug ni Jesukristo. Unsa ka importante kini nga buhat diha kanimo? Samtang magtuon ka karong adlawa, pangitaa ang mga pagtulun-an nga makatabang sa pagdugang sa imong kaandam ug abilidad sa pag-apil uban sa Ginoo sa pagpundok sa Israel.

Si Jacob nagtudlo sa pagpundok sa Israel

Gidapit ni Nephi ang iyang igsoon nga si Jacob sa pagpaambit og importante nga panagna gikan sa propeta sa Daang Tugon nga si Isaias mahitungod sa ulahing mga adlaw nga pagpundok sa Israel (tan-awa sa 2 Nephi 6:4–7).

Aron makatabang sa pag-andam sa mga estudyante sa pagsabot sa mga bersikulo nga ilang basahon, ikonsiderar ang pagpakita ug pagbasa sa mosunod nga mga kahulogan ug usa o daghang mga hulagway nga naghulagway sa sumbanan o bandila.

• Mga Hentil: Ingon nga gigamit sa mga kasulatan, ang mga Hentil adunay daghan nga mga kahulogan. Sa panagna ni Isaias (tan-awa sa 2 Nephi 6:5–7), usa sa mga kahulogan sa pulong nga mga Hentil mahimong nagpasabot sa mga tawo nga dili kaliwat sa Israel (Tan-awa sa Giya ngadto sa mga Kasulatan, “Mga Hentil,” scriptures.ChurchofJesusChrist.org).

• Bandila: “Usa ka bandila o sumbanan diin ang mga katawhan magpundok sa usa ka hiniusa nga tuyo o ilhanan ” (Giya ngadto sa mga Kasulatan, “Bandila,” scriptures.ChurchofJesusChrist.org).

Uban niini nga mga kahulogan sa hunahuna, basaha ang 2 Nephi 6:5–7. Ilista diha sa imong journal sa pagtuon ang mga detalye sa panagna ni Isaias nga ingon og mahinungdanon.

Kon gikinahanglan, tabangi ang mga estudyante sa pag-ila sa importante nga mga detalye gikan sa panagna ni Isaias, sama sa:

• Ang Dios mopatindog og usa ka bandila.

• Ang mga Hentil modala sa mga anak nga mga lalaki ug anak nga mga babaye sa Israel diha sa ilang mga bukton ug pas-anon diha sa ilang mga abaga.

• Ang Hentil nga mga hari ug mga rayna mahimong mga inahan ug mga amahan nga tigmatuto.

• Unsang mga detalye ang imong nakit-an gikan sa panagna ni Isaias nga ingon og mahinungdanon?

• Unsa pa nga mga pangutana ang aduna ka bahin niini nga panagna?

Silang duha ni Nephi ug Jacob nagdetalye niini nga panagna diha sa ilang mga sinulat. Pagtinguha og dugang nga panabot mahitungod sa panagna ni Isaias pinaagi sa pagbasa og bisan usa sa mosunod nga mga hugpong sa mga bersikulo. Mahimong makatabang usab ang pag-cross-reference o pagsumpay niini nga mga bersikulo ngadto sa 2 Nephi 6:5–7.

Ikonsiderar ang pagbahin sa mga estudyante ngadto sa gagmay nga mga grupo, nga ang katunga sa mga grupo nagtuon sa mga pulong ni Nephi ug ang katunga nagtuon sa mga pulong ni Jacob. Dayon dapita ang mga estudyante sa pagreport sa unsay ilang nakat-onan gikan sa mga bersikulo nga ilang gitun-an.

• 1 Nephi 22:6–12 (mga pulong ni Nephi)

• 2 Nephi 10:3–10 (mga pulong ni Jacob)

• Unsa ang gitudlo ni Nephi o Jacob niini nga mga bersikulo nga mas nakatabang nimo nga makasabot sa 2 Nephi 6:5–7? Unsa nga dugang nga mga panabot ang imong naangkon?

Ang mosunod nga tulo ka mga pangutana gituyo aron sa pagtabang sa mga estudyante nga mas makasabot sa mga bersikulo nga ilang gibasa. Kon nakasabot na sila pag-ayo sa tudling, mahimo kang molat-ang sa ikaupat ug ikalimang mga pangutana sa ubos.

• Unsa sa imong hunahuna ang “kahibulongan nga buhat” nga mahitabo sa kataposang mga adlaw nga “mahimo nga mahinungdanon ang bili” ngadto sa daghang mga tawo (1 Nephi 22:8)? Kon ang mga estudyante nagkinahanglan og tabang sa pagsabot kon unsa ang kahibulongan nga buhat, mahimo nimo silang itudlo sa footnote o ipasabot nga kini nagpasabot sa pagpahiuli sa ebanghelyo.

• Sumala sa 1 Nephi 22:12, unsay mahibaloan sa katawhan sa nagkatibulaag nga Israel samtang sila nagkatigom?

• Unsa ang tahas sa mga nasod sa mga Hentil sa ulahing mga adlaw nga pagpundok sa Israel (tan-awa sa 1 Nephi 22:8–9; 2 Nephi 10:8–9)?

• Unsa ang natabang niini nga mga pagtulun-an kanimo nga makasabot mahitungod ni Jesukristo ug sa Iyang gibati sa tanang tawo?

• Unsa ang natabang niini kanimo nga makasabot sa tahas nga imong gidala sa pagtabang sa pagpundok sa Israel?

Usa ka kamatuoran nga atong makat-onan gikan sa panagna ni Isaias ug sa pamahayag ni Presidente Nelson sa sayo pa sa leksiyon mao nga isip mga miyembro sa gipahiuli nga Simbahan sa Manluluwas, kita adunay responsibilidad sa pag-apil uban sa Ginoo sa ulahing mga adlaw nga pagpundok sa Israel.

• Unsa ang natabang niini nga kamatuoran kanimo nga makasabot kon unsay gibati sa Ginoo bahin kanimo?

• Unsa ang imong nahibaloan mahitungod sa Manluluwas nga nagdugang sa imong tinguha nga mopundok ngadto Kaniya? Sa unsang paagi nga ang pagpaambit niini sa uban makadugang sa ilang tinguha nga mopundok ngadto sa Manluluwas?

Paghimo og plano sa pagtabang sa Ginoo sa pagpundok sa Israel

Gihulagway ni Presidente Nelson kon unsay atong mahimo sa pagtabang sa pagpundok sa Israel:

Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel. (Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–93)

• Uban sa pamahayag ni Presidente Nelson diha sa hunahuna, unsa ang pipila ka piho nga mga butang nga imong mahimo aron makaapil uban sa Ginoo sa pagtabang sa uban nga moduol ngadto Kaniya?

• Unsa nga mga kasinatian ang imong nasinati sa pagtabang sa uban nga mopundok o mas mopaduol ngadto sa Langitnong Amahan ug ni Jesukristo?

Hunahunaa kon sa unsang paagi ka mas makaapil pa gayod uban sa Ginoo sa pagpundok sa Israel.

Kon adunay panahon, ikonsiderar ang pagpaambit og usa o daghan pa sa mosunod nga mga kapanguhaan aron matabangan ang mga estudyante sa paghunahuna og piho nga mga ideya.

1. Si Presidente Russell M. Nelson mipaambit og mga ideya nga gisugyot sa kabatan-onan sa Simbahan kon sa unsang paagi sila makatabang sa pagpundok sa Israel. Tan-awa ang “Paglaom sa Israel” gikan sa timecode 40:29–43:38, anaa sa ChurchofJesusChrist.org.

2. Bisitaha ang share.churchofjesuschrist.org.

Paghimo og plano nga pagalihokon alang sa unsay imong mahimo sa pagdapit sa uban sa pagpundok ngadto sa Manluluwas o sa laing pagkasulti sa pagduol ngadto kang Kristo pinaagi sa paghimo ug pagtuman sa mga pakigsaad uban Kaniya. Seguroha nga ilakip ang piho nga mga lakang nga imong mahimo. Makatabang kini kanimo sa paglihok nga may hugot nga pagtuo. Usa ka paagi nga tingale mahimo nimo kini mao ang pagkompleto sa mosunod nga mga kapahayag:

• Sa kataposan sa adlaw, ako

• Ang nahabilin niining semanaha, akong

Komentaryo ug Background nga Impormasyon

Sa unsang paagi nga ang panagna ni Isaias sa 2 Nephi 6:6–7 kasamtangang natuman?

Isip kabahin sa katumanan niini nga panagna, ang ebanghelyo gipahiuli sa Estados Unidos, usa ka hentil nga nasod (tan-awa sa Doktrina ug mga Pakigsaad 109:60). Ang gipahiuli nga Simbahan mao ang “bandila ngadto sa mga katawhan” sa Ginoo (2 Nephi 6:6),diin ang mga tawo gikan sa tanan nga mga nasod magkatigom sa kataposan nga mga adlaw (tan-awa sa 1 Nephi 22:11–12; Isaias 2:2–3; 11:12).

Asa pa ko makakat-on pa og dugang mahitungod sa pagpundok sa Israel?

Unsa kaha kon mosulay ko sa pagpundok sa Israel pinaagi sa pagdapit og usa ka tawo sa pagbuhat og usa ka butang apan ilang gisalikway ang akong pagdapit?

Si Elder Dieter F. Uchtdorf sa Korum sa Napulog Duha ka Apostoles mipahayag:

Sabta nga dili inyong trabaho ang pagkabig sa mga tawo. Mao kana ang tahas sa Espiritu Santo. Inyong tahas ang pagpakigbahin kon unsa ang anaa sa inyong kasingkasing ug ang pagpuyo sumala sa inyong gituohan.

Busa dili mo kinahanglang maluya kon ang tawo dili dayon modawat sa mensahe sa ebanghelyo. Dili kini usa ka personal nga kapakyasan.

Tali ra kana sa indibidwal ug sa Langitnong Amahan.

Ang inyo mao ang paghigugma sa Dios ug sa inyong silingan, Iyang mga anak. (Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 17)

Dugang nga mga Kalihokan sa Pagkat-on

Bandila ngadto sa mga nasod.

Ang mga estudyante mahimong makabenepisyo gikan sa pagkat-on og dugang mahitungod sa mga panagna nga may kalabotan sa gipahiuli nga ebanghelyo sa Manluluwas isip usa ka bandila, o sumbanan, ngadto sa kalibotan. Aron sa pagtabang niini, ikonsiderar ang pagbasa sa pipila o sa tanan sa mosunod nga mga kasulatan diha sa klase: Isaias 5:26; 11:12; 2 Nephi 29:2; Doktrina ug mga Pakigsaad 45:9; 64:41–43; 113:5–6.

Mahimo usab nimong basahon ug hisgotan ang asoy ni Brigham Young ug sa ubang unang mga lider sa Simbahan nga nagpataas sa bandila diha sa Ensign Peak sa wala madugay human sa pag-abot ngadto sa Walog sa Salt Lake (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 2, Walay Dili Balaan nga Kamot, 1846–1893 [2020], 67–68).

Kita dili maulaw.

Ikonsiderar ang pagdapit sa mga estudyante sa paghunahuna sa dihang aduna silay nagkalain-laing mga pagbati mahitungod sa pagkamiyembro sa Simbahan, sama sa kasadya, kalipay, kabalaka, o bisan kaulaw. Dapita ang mga estudyante sa pagbasa sa 2 Nephi 6:7, 12–13, nga mangita sa unsay gitudlo sa Ginoo mahitungod sa unsay bation sa Iyang mga anak kon sila maghulat Kaniya uban sa hugot nga pagtuo. Mahimong kantahon sa mga estudyante ang kanta sa primary nga “Ang Simbahan ni Jesukristo” (Songbook sa mga Bata, 48) ug maghunahuna og mga kamatuoran sa ebanghelyo nga makatabang kanila nga magmasaligon sa pagsunod sa Ginoo ug magmatinud-anong magpaabot sa Iyang pagbalik.