Mosiah 9–10

“Diha sa Gahom sa Ginoo”

Posible ba nga magtutok kita pag-ayo sa usa ka butang nga gusto nato nga maghimo kita og mga desisyon nga walay paghunahuna sa posible nga mga sangpotanan? Si Zeniff nakatutok pag-ayo sa pagbalik ngadto sa yuta sa Nephi ug sa pagtukod pag-usab sa mga siyudad didto nga siya wala magtagad sa pagkonsiderar sa pipila ka negatibo nga mga sangpotanan nga mahimong moabot gikan sa iyang desisyon. Human makasinati sa pipila ka mga sangpotanan, si Zeniff ug ang iyang mga katawhan midangop ngadto sa Ginoo diha sa hugot nga pagtuo. Kini nga leksiyon makatabang nimo sa pag-ila kon sa unsang paagi ka makadawat og kalig-on gikan sa Ginoo samtang ikaw mag-ampo ug magpadayon uban sa hugot nga pagtuo.

Pagtabang sa mga estudyante nga makaila sa Espiritu Santo.Pahinumdomi ang mga estudyante nga ang Espiritu Santo mosilsil sa ilang mga hunahuna sa kamahinungdanon sa usa ka doktrina o baroganan sa ebanghelyo. Ang Espiritu Santo makadasig usab kanila og tinguha sa pagsunod sa ebanghelyo ug sa mga ideya kon unsaon nila sa pagbuhat sa ingon.

Pagpangandam sa estudyante: Dapita ang mga estudyante sa pagpangita og pasabot sa pulong nga hilabihan ka madasigon. Dasiga sila sa pagtambong nga andam sa pagpaambit kon unsa man usahay ang hilabihan nga makapadasig sa mga tin-edyer ug ang mga hagit nga mahimong moresulta.

Mga Posibleng Kalihokan sa Pagkat-on

Eklipse sa adlaw

Ipakita ang mosunod nga pangutana ug hulagway. Sa laing paagi, mahimo nimong sugdan ang klase pinaagi sa pamahayag sa ubos ni Elder Gary E. Stevenson ug dayon ipangutana ang duha ka mosunod nga mga pangutana.

• Ang adlaw 400 ka pilo-piloon sa gidak-on sa buwan, busa sa unsang paagi ang buwan mo-eklipse, o makababag, sa kahayag ug kainit sa adlaw ingon sa gipakita sa mosunod nga hulagway?

Kon ang mga estudyante wala mahibalo sa tubag, ipasabot ang mosunod:

Tungod kay ang buwan mas duol sa yuta kay sa adlaw, kini mopatim-aw nga susama sa gidak-on sa adlaw ug makababag sa kahayag niini. Bisan ang usa ka butang nga ingon ka gamay sa imong kumagko mahimong makababag sa imong pagtan-aw sa adlaw kon imong gikuptan kini nga duol sa imong mata.

Ikonsiderar ang pagdapit sa mga estudyante nga ipaduol ang ilang kumagko sa ilang mata aron matabonan ang ilang panan-aw sa mas dako nga butang.

Si Elder Gary E. Stevenson sa Korum sa Napulog Duha ka Apostoles mipasabot kon sa unsang paagi ang eklipse sa adlaw mahimong usa ka analohiya sa atong mga espirituhanong kinabuhi. Tan-awa ang “Espiritwal nga Eklipse” (15:12), makita sa https://www.churchofjesuschrist.org/study/general-conference/2017/10/spiritual-eclipse?lang=ceb ChurchofJesusChrist.org, gikan sa time code 1:01 hangtod sa 3:53, o basaha ang mosunod nga pamahayag.

Sa samang paagi nga ang gamay kaayo nga buwan makasalipod sa matahom nga adlaw, nagpalong sa kahayag ug kainit nini, usa ka espiritwal nga eklipse mahitabo kon motugot kita sa gagmay ug makasamok nga mga babag—kadtong atong giatubang sa atong inadlaw nga mga kinabuhi—nga maduol og maayo nga kini nagsalipod sa gidak-on, kasiga, ug kainit sa kahayag ni Jesukristo ug sa Iyang ebanghelyo. (Gary E. Stevenson, “Espiritwal nga Eklipse,” Liahona, Nob. 2017, 45)

• Unsa ang pipila sa gagmay nga mga butang nga usahay atong gitutokan nga mahimong makatabon sa atong pagtutok kang Jesukristo ug sa Iyang ebanghelyo?

• Unsa nga mga hagit o negatibo nga mga sangpotanan ang mahimong moabot gikan sa pagtutok pag-ayo niining gagmay nga mga butang?

Hunahunaa kon unsa kaha ang imong gitutokan nga mahimong makatabon sa imong panan-aw ni Jesukristo ug sa Iyang ebanghelyo. Samtang magtuon ka, pangitaa ang mga kamatuoran nga makatabang nimo sa pagbag-o sa imong pagtutok sa Ginoo aron malikayan ang “espirituwal nga eklipse.”

Ang Pagkahilahiban ka madasigon ni Zeniff

Sa miaging leksiyon, imong nakat-onan nga si Zeniff nangulo sa usa ka grupo sa mga tawo gikan sa yuta sa Zarahemla balik ngadto sa yuta sa Nephi.

Si Zeniff adunay dakong tinguha nga makapanunod niini nga yuta, apan ang iyang pagtutok misangpot sa mga problema alang kaniya ug sa iyang katawhan.

Basaha ang Mosiah 9:1–3, 6, 10–15 (tan-awa usab ang Mosiah 7:21), mangita kon sa unsang paagi ang pagtutok [focus] ni Zeniff ug sa iyang katawhan midala ngadto sa negatibo nga mga sangpotanan. Timan-i nga ang hilabihan ka madasigon nagpasabot sa sobrang kahinam sa paglampos o pagbaton og usa ka butang.

• Unsa ang pipila sa mga sangpotanan sa hilabihan ka madasigon ug pagkahinay sa paghinumdom sa Ginoo?

Kon gikinahanglan, pangutana sa mga estudyante sama sa “Sumala sa Mosiah 9:3, unsa nga mga kasakit ang giatubang ni Zeniff ug sa iyang katawhan? Ngano man?”

Usa ka kamatuoran nga atong makat-onan mao nga ang hilabihan ka madasigon ug pagkahinay sa paghinumdom sa Ginoo mahimong mosangpot sa negatibong mga sangpotanan.

• Unsa ang pipila ka mga paagi nga kita mahimong hilabihan ka madasigon ug dugay mahinumdom sa Ginoo karon?

• Unsa nga negatibong mga sangpotanan ang mahimo natong atubangon?

Pagdangop sa Ginoo

Si Zeniff ug ang iyang mga katawhan nagpuyo nga malinawon sulod sa mga katuigan sa wala pa ang hari sa mga Lamanite mitinguha sa pagpatuman sa iyang plano sa pagdala kanila ngadto sa pagkaulipon. Basaha ang mosunod nga mga tudling aron makita kon sa unsang paagi si Zeniff ug ang iyang mga katawhan midangop ngadto sa Ginoo sa dihang ang mga Lamanite miabot aron sa pagbuntog kanila.

Ipakita ang mosunod nga mga tudling ug mga pangutana. Ikonsiderar ang pagpares sa mga estudyante o pagbutang diha sa gagmay nga mga grupo sa pagbasa sa mga tudling ug paghisgot sa mga pangutana sa dili pa ipapaambit sa pipila ka estudyante ang ilang mga ideya ngadto sa klase.

• Mosiah 9:14–19

• Mosiah 10:1–2, 6, 10–11, 19–20

• Unsa ang gibuhat sa mga tawo aron ibutang ang ilang pagsalig sa Ginoo? Unsa ang mga resulta?

• Unsa nga mga kamatuoran ang atong makat-onan gikan niini nga istorya?

Usa ka kamatuoran nga atong makat-onan gikan niini nga asoy mao nga kon kita mag-ampo ug magpadayon uban sa hugot nga pagtuo, atong maatubang ang atong mga hagit diha sa kusog sa Ginoo.

• Unsa na ang imong nahibaloan mahitungod sa Langitnong Amahan ug ni Jesukristo nga naghatag kanimo og pagsalig sa pagbutang sa imong pagsalig diha Kanila pinaagi sa pag-ampo ug pagpadayon uban sa hugot nga pagtuo?

• Unsa ang imong gibati sa pagkahibalo nga ang Langitnong Amahan ug si Jesukristo motabang gihapon kanato sa atong mga hagit bisan og kita nakahimo og mga sayop?

• Unsa ang mga ehemplo sa imong kinabuhi, sa mga kinabuhi sa uban, o sa mga kasulatan nga naghulagway niini nga kamatuoran?

ChurchofJesusChrist.orgBasaha ang mahitungod sa Manluluwas nga nagpakita niini nga baroganan diha sa Lucas 22:39–45.

Mga kamatuoran nga gipuy-an sa tinuod nga kinabuhi

Ipakita ang mosunod nga senaryo o dapita ang mga estudyante sa paghimo og susama nga sitwasyon.

Handurawa nga ang usa ka batan-ong babaye nagduhaduha sa iyang pagpamatuod. Kon siya maghunahuna og balik sa iyang kinabuhi, siya nakaamgo nga siya nakatutok pag-ayo sa pagkuha og maayo nga mga grado ug sa pag-andam alang sa iyang kaugmaon nga tingali wala niya maamumahi ang iyang pagpamatuod ingon nga angay unta, ug karon siya tinud-anay nga nagduhaduha kon ang Simbahan tinuod ba.

Hatagi ang mga estudyante og igong panahon sa pagpamalandong sa mosunod nga mga pangutana. Ikonsiderar ang paghisgot sa ilang mga tubag o pagdapit sa mga estudyante nga i-role play ang senaryo, nga ang usa ka estudyante mao ang batan-ong babaye ug ang laing usa mao ang higala kinsa naningkamot sa pagtabang. Dapita ang mga estudyante sa pagkonsiderar kon sa unsang paagi nga ang ilang mga tubag magamit ngadto kanila sa personal.

Mahimong makatabang ang pagpangutana og follow-up nga mga pangutana sama sa “Ngano nga kana nga kausaban sa imong mga pag-ampo makahimo og kalainan?” o “Unsa kaha ang kalahian sa imong kinabuhi sa usa ka bulan o tuig gikan karon kon imong sundon kadtong puno sa hugot nga pagtuo nga mga buhat?”

• Sa unsang paagi siya mahimong “[m]angamuyo sa hilabihan ngadto sa Ginoo” (Mosiah 9:17)? Unsaon nimo paghulagway kini nga matang sa pag-ampo?

• Sa unsa kaha nga paagi siya mosalig sa Ginoo ug mopadayon diha sa hugot nga pagtuo kang Jesukristo human nga nangamuyo sa hilabihan ngadto sa Ginoo?

• Unsa pa ang mahimo nimong irekomendar nga buhaton niining batan-ong babaye? Ngano man?

Komentaryo ug Background nga Impormasyon

Ngano nga importante kaayo ang pagpadayon diha sa hugot nga pagtuo?

Si Elder David A. Bednar sa Korum sa Napulog Duha ka Apostoles mitudlo:

Ang mga panalangin nagkinahanglan og paningkamot sa dili pa kini nato madawat, ug ang pag-ampo, isip “matang sa trabaho, … maoy gitudlo nga paagi nga maangkon ang labing taas sa tanang mga panalangin” [Bible Dictionary, “Pag-ampo”]. Kita magpadayon ug molahutay sa gipahinungod nga trabaho sa pag-ampo human kita moingon og “amen,” pinaagi sa pagbuhat sa mga butang nga atong gisulti ngadto sa Langitnong Amahan. (David A. Bednar, “Pangayo pinaagi sa Hugot nga Pagtuo,” Liahona, Mayo 2008, 95)

Si Presidente Gordon B. Hinckley (1910–2008) midasig usab:

Luhod ug pangayo og mga panalangin sa Ginoo; dayon barog ug buhata ang unsay gihangyo kaninyo nga buhaton. Dayon isalig kini sa Ginoo. (Gordon B. Hinckley, “To the Women of the Church,” Liahona, Nob. 2003, 114)

Unsa ang ehemplo sa pagtu-aw ngadto sa Ginoo ug paglihok uban sa hugot nga pagtuo karon nga panahona?

Dugang nga mga Kalihokan sa Pagkat-on

Alternatibong pagtutok sa leksiyon

Isulat ang mga pulong nga pagbati nga nasayop o nasakitan, nasuko (o naglagot), ug nagdumot diha sa pisara. Dapita ang mga estudyante sa pagpaambit kon sa unsang paagi kini nga mga emosyon mahimong may kalabotan ug sa unsang paagi ang usa mahimong mosangpot sa lain. Dapita sila sa pagbasa sa Mosiah 10:11–18, mangita kon sa unsang paagi kini nga mga emosyon nakaapekto sa mga Lamanite. Hangyoa ang mga estudyante sa pag-ila sa mga baroganan. Ang ubang mga ehemplo mao ang pagtutok sa nakitang mga sayop mahimong modala kanato sa pagdumot sa uban, pagbaliwala sa Dios, ug pagsinati sa dili maayong mga sangpotanan.Ang pagkasuko ug pagpadayong pagbaton sa kalagot makapugong sa mga indibidwal ug sa ilang mga anak sa pagkaila sa Ginoo ug sa Iyang gahom.

Dapita ang mga estudyante sa pagpaambit nganong importante ang pagsabot niini nga mga baroganan, unsay kalabotan niini sa ilang kinabuhi, ug sa unsang paagi makatabang ang Manluluwas kon atong bation kini nga mga emosyon.

Itandi ug pangitai og kalainan ang mga Nephite ug mga Lamanite

Ikonsiderar ang pagpakita sa mosunod nga tsart. Dapita ang mga estudyante sa pagpaambit sa mga pagkaparehas ug mga kalainan tali sa mga buhat sa katawhan ni Zeniff ug sa mga buhat sa mga Lamanite ug sa mga sangpotanan sa duha. Dapita sila sa pagpaambit kon unsay gitudlo niini nga mga tudling mahitungod sa Ginoo ug ang bisan unsang mga baroganan nga ilang nakita nga gihulagway.

Zeniff ug ang iyang mga katawhan	Ang mga Lamanite
Zeniff ug ang iyang mga katawhan Mosiah 9:14–19; 10:1–2, 7, 9–10	Ang mga Lamanite Mosiah 9:12; 10:11, 19–20