Alma 36–38

Kinatibuk-ang Pagpasabot

Timan-i: Karong semanaha sa seminary maglakip sa mga leksiyon sa Alma 39.

Sa Alma 36–39, gitambagan ni Alma ang iyang mga anak nga lalaki nga sila si Helaman, Shiblon, ug Corianton. Iyang giasoy ang iyang kasinatian sa pagkakita og usa ka anghel, pagbati sa kasakit sa iyang mga sala, ug pagkaplag og kaluwasan pinaagi ni Jesukristo. Siya mitudlo nga ang Ginoo sa kasagaran mogamit og gagmay ug yano nga mga butang sa pagbuhat og dagkong mga butang, sama sa pagtugot sa mga kasulatan sa pagtudlo “sa agianan nga [kita] kinahanglan mopanaw” diha sa atong mga kinabuhi(Alma 37:40). Iyang gitambagan ang iyang mga anak nga lalaki sa pagsunod sa mga sugo sa Dios. Mahigugmaon niyang gitambagan ang iyang anak nga lalaki nga si Corianton sa pagbiya ug paghinulsol sa iyang mga sala, lakip na ang usa ka paglapas sa balaod sa kaputli.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 36

Katuyoan sa leksiyon: Kini nga leksiyon gituyo aron matabangan ang mga estudyante nga mobalik ngadto ni Jesukristo diha sa hugot nga pagtuo ug mobati sa kalipay sa Iyang kaluwasan.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin og ehemplo sa usa ka tawo kinsa nakakaplag og kalinaw diha ni Kristo human sa pag-antos sa makadiyot. Unsay nakatabang niini nga tawo nga makakaplag og kalinaw?

• Hulagway nga ipakita: Usa ka hulagway ni Alma nga Batan-on ug sa anghel

• Sugyot sa pagtudlo pinaagi sa videoconference: Samtang magbansay ang mga estudyante sa pagmarka sa mga pulong ug mga hugpong sa mga pulong sa nagkadaiyang mga paagi, mahimo nimong dapiton kadtong naggamit og digital nga mga kasulatan sa pagpakigbahin sa ilang screen aron ipakita ang epektibong mga paagi nga ilang nakaplagan sa pagmarka sa ilang mga kasulatan.

Alma 37

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagbansay og hugot nga pagtuo kang Jesukristo samtang sila nagtuon sa Iyang pulong diha sa mga kasulatan.

• Pagpangandam sa estudyante: Dasiga ang mga estudyante samtang naghimo sila og inadlaw nga pagtuon sa kasulatan sa pagpamalandong sa mga panalangin nga gidala niini sa ilang mga kinabuhi, ilabi na kon sa unsang paagi kini nakatabang kanila nga maduol ngadto kang Kristo.

• Mga hulagway nga ipakita: Mga hulagway sa gagmay ug yano nga mga butang, sama sa sepilyo, sa usa ka mensahe sa text, sa pag-ehersisyo, o sa yanong pagbuhat og pagserbisyo; usa ka hulagway ni Lehi ug sa Liahona

• Bidyo: “Si Alma Nagtambag sa Iyang Anak nga mga Lalaki” (17:05; tan-awa gikan sa time code 3:15 hangtod sa 5:05)

• Sugyot sa pagtudlo pinaagi sa videoconference: Sa pagsugod sa leksiyon, ikonsiderar ang pagpakita sa mga estudyante og usa o duha ka ehemplo sa gagmay ug yano nga mga butang nga makahimo og dakong kalainan sa atong mga kinabuhi. Dayon hatagi ang mga estudyante og 30 segundos sa pagpangita og laing ehemplo diha sa ilang panimalay ug ipadala kini aron ipakita sa klase.

Alma 37–38

Katuyoan sa leksiyon: Kini nga leksiyon makatabang sa mga estudyante nga makat-on nga ang pagpuyo sa mga sugo karon makapanalangin kanila sa tibuok nilang kinabuhi.

• Pagpangandam sa estudyante: Dapita ang mga estudyante sa pagbasa o pagsag-ulo sa Alma 37:35 ug sa pagtambong sa klase nga andam sa pagpakigbahin kon nganong sa ilang hunahuna importante ang “pagkat-on diha sa [ilang] kabatan-on sa paghupot sa mga sugo sa Dios.”

• Hulagway nga ipakita: Usa ka hulagway sa usa ka batan-ong kahoy

• Bidyo: “Barogan ang Atong mga Saad ug mga Pagkigsaad” (14:39; tan-awa gikan sa time code 7:29 hangtod sa 8:35)

• Sugyot sa pagtudlo pinaagi sa videoconference: Sa higayon nga ang mga estudyante motubag sa pangutana mahitungod sa labing maayo nga tambag nga ilang nadawat gikan sa usa ka ginikanan o lider sa Simbahan, ikonsiderar ang pagdapit kanila sa pag-post sa tambag diha sa chat. Kini magtugot kanila sa pagrebyo sa mga komento sa usag-usa. Mahimo dayon nimo silang dapiton sa pagpakigbahin kon kang kinsa sila nakadawat sa tambag ug sa unsang paagi kini nakapanalangin kanila.

Alma 39

Katuyoan sa leksiyon: Kini nga leksiyon makatabang sa mga estudyante nga makasabot sa kabug-at sa sekswal nga sala ug unsaon sa pagbatok sa tentasyon sa paglapas sa balaod sa kaputli.

• Pagpangandam sa estudyante: Dapita ang mga estudyante sa paghunahuna mahitungod sa unsay ilang nahibaloan bahin sa balaod sa kaputli, unsay ilang gibati mahitungod niini, ug bisan unsa nga mga pangutana nga tingali aduna sila.

• Sugyot sa pagtudlo pinaagi sa videoconference: Ipagamit sa mga estudyante ang chat feature aron sa pagbinayloay og ideya [brainstorm] sa mga paagi nga ang kabatan-onan karon makapugong sa kaugalingon ug makabuntog sa tentasyon. Mahimo usab nimong ikonsiderar ang paggamit sa usa ka mobile app nga nagtugot sa mga estudyante nga mopakigbahin sa ilang mga hunahuna nga dili mailhan.

Doktrinal nga Kahanas: Alma 39:9

Katuyoan sa leksiyon: Kini nga leksiyon makatabang sa mga estudyante sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa Alma 39:9, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

• Pagpangandam sa estudyante: Dapita ang mga estudyante sa pagsugod sa pagsag-ulo sa mahinungdanon nga hugpong sa mga pulong sa kasulatan sa Alma 39:9. Mahimo usab nimo silang dasigon sa pagsulay sa pagsag-ulo sa tibuok bersikulo.

• Sugyot sa pagtudlo pinaagi sa videoconference: Alang sa kalihokan sa pagbansay sa paggamit, ikonsiderar ang pag-grupo sa mga estudyante diha sa mga breakout room aron ilang mahisgotan kon unsaon pagtabang si Ivan. I-post ang mosunod nga mga pangutana diha sa chat: “Sama sa unsa kaha alang kang Ivan ang pagsusi sa iyang sitwasyon uban sa mahangtorong panglantaw? Unsa ang pipila ka mga ehemplo sa balaanong gitudlo nga mga tinubdan nga makatabang ni Ivan? Unsa ang mahimo ni Ivan aron molihok inubanan ang hugot nga pagtuo ug ‘dili na [magsunod] sa mga tinguha nga daotan sa [iyang] mga mata’ (Alma 39:9)?” Ikonsiderar ang pagbisita sa matag breakout room kon mahimo. Kon gikinahanglan, ikonsiderar ang pag-post diha sa chat og bisan unsang dugang nga mga pangutana nga gilista diha sa leksiyon nga mahimong makatabang sa mga estudyante.