“3 Nīfai 18:1–14: ʻʻI he Fakamanatu Kiate Au,’” Tohi ʻa Molomoná – Tohi Lēsoni ʻa e Faiakó (2024)
“3 Nīfai 18:1–14,” Tohi ʻa Molomoná – Tohi Lēsoni ʻa e Faiakó
3 Nīfai 18:1–14
“ʻI he Fakamanatu Kiate Au”
ʻOku tau maʻu maʻu pē ha ngaahi faingamālie ke maʻu ʻa e sākalamēnití. Naʻe akoʻi ʻe Sīsū ʻi he 3 Nīfai 18, ʻa e founga ʻe lava ai ʻe he sākalamēnití ʻo tāpuakiʻi ʻetau moʻuí mo fakahinohinoʻi ʻa e founga hono fakahoko ʻo e ouau ko ʻení. ʻE lava ke tokoni ʻa e lēsoni ko ʻení ke ke maʻu ha ngaahi aʻusia mahuʻingamālie ʻi hoʻo manatu ki he Fakamoʻuí lolotonga hoʻo maʻu ʻa e sākalamēnití.
Ko hono tokoniʻi ʻo e kau akó ke nau mahuʻingaʻia ʻi he ngaahi moʻoni ʻo e ongoongoleleí. Mahalo ʻe faingataʻa ki ha kau ako ʻe niʻihi ke ʻiloʻi ʻa e founga ʻoku fekauʻaki ai ʻa e ongoongoleleí mo ʻenau moʻui fakaʻahó. Fekumi ʻi he faʻa lotu ki ha ngaahi founga ke tokoni ki he kau akó ke nau ongoʻi ʻoku ʻuhingamālie mo ʻaonga ʻa e meʻa ʻoku nau akó ki honau ngaahi tūkunga fakatāutahá, ngaahi fehuʻí, mo e ngaahi fiemaʻú.
Teuteu ʻa e tokotaha akó: Fakaafeʻi ʻa e kau akó ke fakalaulauloto ki he mahuʻinga ʻo ʻenau ngaahi aʻusia ʻi he sākalamēnití. Poupouʻi ʻa e kau akó ke fakalaulauloto ki he meʻa te nau lava ʻo fai ke fakatupulaki ʻenau ngaahi ʻausiá.
Ngaahi ʻEkitivitī Ako ʻOku Ala Fakahokó
Ko ha vā fetuʻutaki mālohi
ʻE ala tokoni ʻa e fakakaukau ko ʻení ki he kau akó ke nau fakakaukau ki he meʻa ʻoku langa ai ʻa e ngaahi vā fetuʻutaki ʻoku mālohí. ʻE lava ke tokoni ʻa e founga fakakaukau ko ʻení ki he kau akó ke nau fakakaukau ki honau vā fetuʻutaki mo e Fakamoʻuí pea fekumi ki ha ngaahi founga ke ʻunu ofi ange ai kiate Ia. Ko ha founga ʻe taha ke fakahoko ai ʻení ko e sākalamēnití.
Fakakaukau ki ha kakai ʻokú ke ongoʻi vāofi moʻoni mo maʻu ha vā fetuʻutaki mālohi mo kinautolu.
-
Ko e hā ha meʻa kuó ke fai pe kuo nau fai ke fakamālohia ai ʻa e ngaahi vā fetuʻutaki ko iá?
Fakakaukau leva he taimí ni ki he founga ʻokú ke ongoʻi vāofi ai mo e Fakamoʻuí.
-
ʻOkú ke pehē ko e hā ha meʻa ʻe ala tokoni atu ke fakamālohia ho vā fetuʻutaki mo e Fakamoʻuí?
ʻI hoʻo ako he ʻaho ní, fakaafeʻi ʻa e Laumālie Māʻoniʻoní ke ne akoʻi koe ʻi he founga ke ke ofi ange ai ki he Fakamoʻuí mo fakamālohia ho vā fetuʻutaki mo Iá.
Ko e fakahoko ʻe Sīsū Kalaisi ʻa e sākalamēnití
Naʻe fonu ʻa e Fakamoʻuí ʻi he manavaʻofa ki he kakaí ʻi Heʻene ʻafioʻi ʻenau holi ke Ne nofo ʻo kiʻi fuofuoloa ange mo kinautolú (vakai, 3 Nīfai 17:1–6). Hili hono tāpuakiʻi ʻo e fānaú, mahakí mo e faingataʻaʻiá, naʻe tofa ʻe he Fakamoʻuí ha founga maʻá e kakaí ke ʻiate kinautolu maʻu ai pē ʻa Hono Laumālié.
Lau ‘a e 3 Nīfai 18:1–11, pea kumi ʻa e meʻa naʻe fakahoko ʻe he Fakamoʻuí.
Mahalo te ke fiemaʻu ke lau ʻe ha kulupu ʻe taha ʻo e kau akó ʻa e 3 Nīfai 18:1–7 pea lau ʻe ha kulupu ʻe taha ʻa e 3 Nīfai 18:8–11. Fakaafeʻi ʻa e kau akó ke fakakaukau ki ha ngaahi fehuʻi ʻoku nau maʻu fekauʻaki mo e ʻuhinga ʻo e ngaahi veesi ne nau laú pe ko e ouau ʻo e sākalamēnití. Kapau ʻe fiemaʻu, te ke lava ʻo maʻu ha fakamatala ʻaonga ʻi he Ngaahi Tefito ʻo e Ongoongoleleí,“Sākalamēnití,” topics.ChurchofJesusChrist.org.
Fakakaukau ke huluʻi ʻa e foʻi vitiō “ʻOku Fakafeʻiloaki ʻe Sīsū Kalaisi ʻa e Sākalamēnití,” ʻoku maʻu ʻi he ChurchofJesusChrist.org, mei he taimi 0:12 ki he 6:12 hili hono lau ʻe he kau akó ʻa e ngaahi vēsí pe ʻi heʻenau muimui ki aí. ʻE lava ke tokoni ʻa e ngaahi fehuʻi ko ʻení ʻi ha fealēleaʻaki hili ʻa e vitioó: Ko e hā e meʻa ʻoku makehe kiate koé? ʻOkú ke pehē ko e hā e meʻa naʻe ongoʻi ʻe he kakaí ʻi heʻenau maʻu ʻa e sākalamēnití? Ko e hā hono ʻuhingá? ʻOkú ke pehē naʻe mei kehe fēfē hoʻo aʻusiá kapau naʻe tāpuakiʻi ʻe he Fakamoʻuí ʻa e sākalamēnití pea tufa atu ia kiate koe?
-
Ko e hā naʻá ke ʻilo fekauʻaki mo e sākalamēnití mei he ngaahi akonaki ʻa e Fakamoʻuí?
-
Ko e hā ʻoku talaʻofa mai ʻe he Fakamoʻuí ʻi he ongo lotu sākalamēnití kapau te tau manatu maʻu ai pē kiate Ia?
Mahalo te ke fakakaukau ke fakaʻilongaʻi ʻa e tefitoʻi moʻoni ʻi he 3 Nīfai 18:7, 11 ko e taimi ʻoku tau maʻu ai ʻa e sākalamēnití pea manatu maʻu ai pē ki he Fakamoʻuí, te tau maʻu ʻa Hono Laumālié.
ʻI he taimi ʻoku folofola mai ai ʻa Sīsū Kalaisi ke tau maʻu Hono Laumālié ʻiate kitautolú, ko ʻEne ʻuhingá ki he meʻafoaki ʻo e Laumālie Māʻoniʻoní.
-
Ko e hā ha ngaahi founga te tau lava ai ʻo manatu maʻu pē ki he Fakamoʻuí ʻi heʻetau moʻui fakaʻahó? ʻE tokoniʻi fēfē kitautolu ʻe he manatu maʻu pē ki he Fakamoʻuí ke tau maʻu ʻa e Laumālie Māʻoniʻoní?
-
ʻE tāpuekina fēfē hoʻo moʻuí he taimí ni ʻi hoʻo maʻu ʻa e Laumālie Māʻoniʻoní?
Ko ʻetau aʻusia ʻi he sākalamēnití
Fakakaukau ke hiki ʻa e ngaahi meʻa fakasaveá ni ʻi he palakipoé pe ʻi ha ʻū laʻipepa kehekehe. ʻE lava ke tali ʻe he kau akó ʻa e saveá ʻi heʻenau tohinoá; he ʻikai vahevahe ʻenau ngaahi talí.
Fakakaukau ki he founga ʻe lava ke fakamālohia ai ho vā fetuʻutaki mo e Fakamoʻuí kapau naʻá ke maʻu ha ngaahi aʻusia mahuʻingamālie ange ʻi hono maʻu ʻo e sākalamēnití. Tali ʻa e fakamatala takitaha ʻaki ʻa e “maʻu ai pē,” “taimi ʻe niʻihi,” “tātātaha,” pe “ʻikai ʻaupito.”
-
ʻOku ou tuku ha taimi kimuʻa he lotú ke teuteu ki he sākalamēnití.
-
Lolotonga ʻa e sākalamēnití, ʻoku ou feinga ke manatuʻi ʻa Sīsū Kalaisi.
-
ʻOku tākiekina ʻe he meʻa ne u aʻusia ʻi he sākalamēnití ʻa ʻeku fakafōtunga he lolotonga ʻo e uiké.
ʻE lava ke tokoni ʻa e ʻekitivitī ko ʻení ki he toʻu tupú ke nau fokotuʻu ha ngaahi founga mahuʻinga ke manatuʻi ai ʻa Kalaisi lolotonga ʻa e sākalamēnití. Fakakaukau ke faʻu ʻa e saati ko ʻení ʻi he palakipoé pea fakaafeʻi ʻa e kau akó ke nau tohi ai ʻa e ngaahi talí. Mahalo kuo ʻosi maʻu ʻe ha kau ako ʻe niʻihi ha ngaahi fakakaukau ki he meʻa ʻokú ne tokoniʻi kinautolu ke nau manatu ki he Fakamoʻuí. Kole ki he kau akó ke vahevahe ʻa e meʻa kuo nau ʻosi fakahoko ke tokoni ke fakatupu ha ngaahi fakakaukaú.
ʻE lava foki ke fakakakato ʻe he kau akó ha saati fakataautaha ange ʻi heʻenau tohinoa akó. Te nau lava ʻo faitaaʻi ʻenau sātí ʻi heʻene ʻosí ko ha fakamanatu ʻi he taimi hoko te nau maʻu ai ʻa e sākalamēnití.
Ko ha aʻusia mahuʻingamālie ange ʻi he sākalamēnití
-
Ko e hā ha meʻa ʻoku ou loto ke manatuʻi fekauʻaki mo Sīsū Kalaisí?
Fakakaukau ki he ngaahi meʻa ko ʻení:
-
Ko e meʻa naʻá Ne mamahi aí
-
Ko e meʻa kuó Ne fai maʻaku pe niʻihi kehe ʻoku ou ʻiló
-
-
Te u lava fēfē ʻo teuteu ki he sākalamēnití?
-
Ko e hā te u lava ʻo fakahoko lolotonga e sākalamēnití ke u manatu kia Sīsū Kalaisí?
Ko e ngaahi talaʻofa ʻo hono maʻu ʻo e sākalamēnití
Lau ʻa e 3 Nīfai 18:12–14, pea kumi ʻa e meʻa naʻe talaʻofa ʻe he Fakamoʻuí kiate kinautolu ʻoku nau manatu kiate Ia mo maʻu ʻa e sākalamēnití.
-
ʻOkú ke pehē ʻoku ʻuhinga ki he hā ke langa ʻi he maka ʻo e Fakamoʻuí?
Kapau ʻoku fiemaʻu tokoni ʻa e kau akó ke mahino ʻa e ʻuhinga ʻo e langa ʻi he maka ʻo e Fakamoʻuí, te ke lava ʻo fakamatalaʻi ange ʻoku ʻuhinga ia ʻoku tau fakahoko mo tauhi ʻa e ngaahi fuakava mo Iá, feinga ke muimui ki Heʻene sīpingá, pea ko hono olá ke fiefia ʻi he ngaahi tāpuaki ʻo ʻEne ʻaloʻofá mo e mālohí.
-
ʻE tokoni fēfē hono maʻu ʻo e sākalamēnití ke tau langa ʻi he maka ʻo e Fakamoʻuí?
-
Ko e hā ha meʻa te ke lava ʻo fai ke mahuʻingamālie ange ai hono maʻu ʻo e sākalamēnití ʻi he uike takitaha?
Fakamoʻoni ki he founga ʻe lava ke tokoniʻi ai kitautolu ʻe he sākalamēnití ke langa ʻetau moʻuí ʻi he maka ʻo e Fakamoʻuí. Fakakaukau ke vahevahe ha meʻa ʻokú ke fai ke ʻai ʻa e sākalamēnití ke mahuʻingamālie kiate koé. Kole ki he kau akó ke nau fakalaulauloto pea vahevahe ʻa e ngaahi tāpuaki te nau ala maʻu kapau te nau manatu ki he Fakamoʻuí lolotonga ʻenau teuteu ki he sākalamēnití mo e lolotonga ʻenau maʻu ʻa e sākalamēnití.