Mormon 3

“Kamong Tanan Kinahanglan Mobarog sa Atubangan sa Hukmanan ni Kristo,”

Nakahunahuna ka na ba sukad kon unsa kaha mahisama ang Kataposang Paghukom? Sa dihang si Mormon nagitan-aw sa pagkadaotan sa iyang mga katawhan, siya mitudlo mahitungod kon kinsa ang mohukom kanato ug sa unsang paagi kita pagahukman niini nga Kataposang Paghukom. Kini nga leksiyon makatabang sa pag-andam kanimo sa pagbarog nga may pagsalig ug kalipay sa atubangan ni Jesukristo sa Kataposang Paghukom.

Pagdapit sa mga estudyante sa pagpangutana. Samtang makakita ka og mga hilisgotan sa mga kasulatan nga natural nga adunay mga pangutana ang mga estudyante, pangita og mga oportunidad sa pagtugot kanila sa pagpahayag niadto nga mga pangutana diha sa klase. Dapita sila sa pagpangita og mga tubag sa tibuok leksiyon ug sa ilang kaugalingon nga pagtuon.

Pagpangandam sa estudyante: Dapita ang mga estudyante nga motambong nga andam sa pagpakigbahin og mga pangutana nga aduna sila mahitungod sa Kataposang Paghukom. Ikonsiderar ang paggamit og dili magpaila nga botohan aron sa pagtugot sa mga estudyante sa pagpadala sa ilang mga pangutana sa wala pa ang klase. Ang ilang mga pangutana mahimong mogiya kanimo sa pag-andam og leksiyon aron matubag ang ilang mga panginahanglanon.

Mga Posibleng Kalihokan sa Pagkat-on

Ang kataposang eksaminasyon

Ang tuyo sa mosunod nga kalihokan mao ang pagtabang sa mga estudyante sa pag-ila sa kamahinungdanon sa pagkaandam alang sa Kataposang Paghukom.

Sa dili pa magsugod ang klase, ikonsiderar ang pag-andam ug ang pagpakita og mga instruksiyon nga daw nagpakita nga adunay usa ka surpresa nga kataposang eksaminasyon o pagsukod atol sa klase karon. Dayon, sa pagsugod sa klase, ikonsiderar ang pagpangutana sa mga estudyante sa pipila ka malisod nga mga pangutana sama sa mosunod:

1. Pila ka mga bersikulo ang anaa sa Basahon ni Mormon?

2. Pila ka higayon nga si Kristo gihisgotan sa usa sa Iyang mga ngalan o mga ulohan sa Basahon ni Mormon?

3. Pila ka mga Lamanite ang nakabig pinaagi sa pagtulun-an ni Nephi ug Lehi sa Helaman 5?

Hunahunaa kon makatubag ka ba niini nga mga pangutana sa tukma nga paagi nga walay pagpangandam.

• Unsa kaha ang imong mga pagbati mahitungod sa pasulit kon ang imong magtutudlo misulti kanimo daan mahitungod niini ug mihatag kanimo og giya sa pagtuon nga gidisenyo aron sa pag-andam kanimo alang niini?

• Bisan og dili kita hangyoon sa pagpakigbahin og sinalagma nga mga kamatuoran gikan sa mga kasulatan sa Kataposang Paghukom, sa unsa nga mga paagi nga ang Kataposang Paghukom ikatandi ngadto sa usa ka pasulit nga ato unyang kuhaon usa ka adlaw? Sa unsa nga mga paagi nga kini lahi kay sa pagkuha og usa ka akademiko nga pasulit?

Usa ka paagi nga tingale ang mga estudyante motubag sa miaging pangutana mao ang paghatag og gibug-aton nga ang paghukom mahimong mas mahitungod sa unsa kita nahimo kay sa unsay atong nahibaloan. Dapita ang mga estudyante sa pagpamalandong sa hilom kon unsay ilang pagbati mahitungod sa Kataposang Paghukom. Ang mosunod nga parapo mahimong gamiton aron sa pagtabang sa paggiya sa ilang mga hunahuna.

Pamalandongi kon paminaw nimo unsa ka kaandam alang sa Kataposang Paghukom. Kahibalo ka ba kon unsaon pagpangandam alang niini? Nganong gusto nimo nga mahimong andam alang niini?

Ang Langitnong Amahan ug si Jesukristo naghigugma kanimo ug mihatag sa mga kasulatan aron sa pagtabang kanimo nga mahibalo ug mangandam alang sa adlaw nga ikaw “mobarog sa atubangan sa hukmanan ni Kristo” (Mormon 3:20). Samtang magtuon ka, pangitaa ang mga kamatuoran nga makatabang kanimo nga maandam sa pagbarog nga may pagsalig ug kalipay sa atubangan ni Jesukristo sa Kataposang Paghukom.

Si Mormon mitudlo mahitungod sa Kataposang Paghukom

Si Mormon nahigugma sa mga Nephite ug nangulo kanila sa pagpakig-away sa daghang mga higayon. Siya mihangyo ngadto kanila sa paghinulsol sa ilang pagkadaotan ug modangop ngadto sa Manluluwas. Bisan pa niana, sila misalikway sa Ginoo ug nanghambog sa ilang kaugalingon nga kusog, nanumpa sa sagrado nga mga panumpa nga sila gitudloan nga dili gayod gamiton, busa si Mormon mibalibad sa pagpangulo kanila sa makadiyot (tan-awa sa Mormon 3:10–16). Siya dayon mitudlo mahitungod sa Kataposang Paghukom nga ang tanang katawhan moatubang.

Ikonsiderar ang pagpakita o sa laing paagi sa paghatag sa mga estudyante sa mosunod nga tsart ug dapita sila sa pagkompleto niini uban sa usa ka kauban o sa gagmay nga grupo.

Sa wala nga bahin sa imong tsart, paghimo og lista sa mga pangutana nga aduna ka mahitungod sa Kataposang Paghukom sama sa gihatag nga mga pananglitan.

Mga pangutana nga aduna ako mahitungod sa Kataposang Paghukom	Mga tubag, mga panglantaw, ug mga impresyon nga akong nadawat
Mga pangutana nga aduna ako mahitungod sa Kataposang Paghukom Kinsay mohukom kanako?	Mga tubag, mga panglantaw, ug mga impresyon nga akong nadawat
Mga pangutana nga aduna ako mahitungod sa Kataposang Paghukom Kanus-a ako pagahukman?	Mga tubag, mga panglantaw, ug mga impresyon nga akong nadawat

Human malista sa matag pares o grupo ang ilang mga pangutana, dapita sila sa pagpakigbahin sa ilang mga pangutana ngadto sa laing pares o grupo. Ikonsiderar ang pagdapit sa mga estudyante sa paglista sa pipila sa ilang mga pangutana diha sa pisara aron gamiton unya sa leksiyon.

Basaha ang mga pulong ni Mormon diha sa Mormon 3:18–22; 6:17–22 aron sa pagpangita og mga tubag sa mga pangutana nga imong nalista. Ilista ang mga panabot nga imong nakit-an sa tuo nga kolum sa imong tsart, lakip ang pakisayran sa kasulatan diin imong nakit-an ang matag panabot.

Ang hukmanan ni Kristo

Usa ka kamatuoran nga atong makat-onan gikan niini nga mga tudling mao nga kitang tanan mobarog sa atubangan sa hukmanan ni Kristo aron pagahukman sa atong mga buhat, maayo man kini o daotan. Ikonsiderar ang pagmarka sa mga pulong nga nagtudlo niini nga kamatuoran diha sa Mormon 3:20.

• Ngano kaha nga makapahupay ang pagkahibalo nga ang Manluluwas mao ang atong Maghuhukom? (Irekord ang imong tubag diha sa tuo nga kolum sa imong tsart).

Alang sa tabang sa pagtubag sa miaging pangutana, mahimo nimong basahon ang Alma 7:11–13, mangita kon unsa ang nasinati sa Manluluwas nga nagtugot Kaniya nga hingpit nga makasabot kanato sa Paghukom. Mahimo usab nimong paminawon ang usa ka pamahayag gikan ni Presidente Dallin H. Oaks sa Unang Kapangulohan diha sa “Ang Dako nga Laraw” gikan sa time code 14:06 hangtod sa 14:51 nga anaa sa ChurchofJesusChrist.org.

Ikonsiderar ang pagpabilin sa mga estudyante nga managpares o sa gagmay nga mga grupo alang sa mosunod nga kalihokan ug sa paghatag sa matag grupo og usa sa mga kapanguhaan nga tun-an.

Mahimong aduna pa kay mga pangutana ug mga kabalaka mahitungod sa Kataposang Paghukom. Pangita og dugang nga mga tubag ug mga panabot gamit ang mga kapanguhaan sa ubos o uban pang balaan nga mga tinubdan. Ilista ang mga panabot nga imong nadiskobrehan sa tuo nga kolum sa imong tsart.

• Giya ngadto sa mga Kasulatan ubos sa entry nga “Paghukom, Ang Kataposan nga”

• Topical Guide entry ubos sa “Judgment, the Last

• Mosiah 3:10; 3 Nephi 27:13–20

• Doktrina ug mga Pakigsaad 45:3–5; 58:42–43; 137:9

Usa ka miyembro sa matag grupo mahimong dapiton sa pagpakigbahin og mga panabot gikan sa mga tinubdan nga gitun-an sa grupo aron ang tibuok klase makakat-on gikan sa matag usa sa mga kapanguhaan.

Kon ang mga estudyante adunay mga pangutana mahitungod kon kinsa ang maapil sa atong paghukom, ikonsiderar ang pagpakigbahin sa mga pakisayran sa kasulatan diha sa unang seksiyon sa seksiyon sa Komentaryo ug Background nga Impormasyon.

Mahimo usab nga tinguhaon nimo ang pagpaminaw sa ubang mga pagtulun-an gikan ni Presidente Oaks mahitungod sa Kataposan nga Paghukom diha sa “Balaanong Gugma diha sa Plano sa Amahan” gikan sa time code 1:44 hangtod sa 3:32, o “Malimpyo pinaagi sa Paghinulsol” gikan sa time code 8:09 hangtod sa 12:03, nga parehong anaa sa ChurchofJesusChrist.org.

Idirekta ang atensiyon sa mga estudyante ngadto sa mga pangutana nga nalista diha sa pisara bag-ohay lang. Ikonsiderar ang paghatag og marker sa pipila ka mga estudyante aron isulat ang mga tubag nga ilang nakit-an tapad sa tukma nga mga pangutana. Dayon ipahatag sa mga estudyante ang mga marker ngadto sa uban aron sa pagbuhat sa susama. Balika hangtod ang tanang andam nga mga estudyante mosulat og usa ka butang nga ilang nakit-an. Dayon, dapita ang mga estudyante sa pagpakigbahin sa ilang mga tubag sa mosunod nga mga pangutana:

• Unsa nga mga kamatuoran mahitungod sa Langitnong Amahan, ni Jesukristo, sa paghinulsol, ug sa Kataposang Paghukom ang imong ipakigbahin ngadto sa usa ka tawo nga gikulbaan mahitungod sa Kataposang Paghukom? Ngano man?

Tingali adunay mga pamahayag diha sa seksiyon sa Komentaryo ug Background nga Impormasyon nga makatabang sa mga estudyante sa pagtubag sa miaging pangutana.

Pagsalig sa Adlaw sa Paghukom

Dapita ang mga estudyante sa hilom nga pagpamalandong sa mosunod:

Paghunahuna mahitungod sa unsay imong gibati atol niini nga pagtuon. Gibati ba nimo ang labaw o ang dili kaayo kamasaligon ug kamalipayon mahitungod sa Kataposang Paghukom kay sa imong gibati sa wala pa kini nga leksiyon? Nganong ingon niana man ang imong gibati? Unsa ang pag-aghat sa Espiritu Santo nga imong buhaton?

Sa imong journal sa pagtuon, paghimo og mas tinuyo nga plano sa pagsugod sa pagpangandam alang sa Kataposang Paghukom. Pamalandong ug pagdesisyon og usa ka aksiyon nga imong mabuhat aron matabangan ka nga mobati og dugang nga pagsalig ug kalipay samtang nangandam ka sa pagbarog sa atubangan ni Kristo. Sama pananglit, kada adlaw, ang sinsero nga paghinulsol usa ka gamhanan nga paagi sa pagkaplag og “kalipay ug kalinaw sa hunahuna.” (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67.) Pasalig mobuhat sa imong plano.

Komentaryo ug Background nga Impormasyon

Mormon 3:17–22. Kinsa ang maapil sa atong paghukom?

Ang mga kasulatan nagtudlo nga adunay labing menos lima ka mga tinubdan nga mahimong kabahin sa atong paghukom:

1. Atong kaugalingon (tan-awa sa Alma 41:3–7)

2. Mga Kasulatan (tan-awa sa 2 Nephi 25:18; 29:11; 33:14; 3 Nephi 27:25–26)

3. Ang Apostoles (tan-awa sa Mateo 19:27–30; 1 Nephi 12:9; 3 Nephi 27:27; Mormon 3:18; Doktrina ug mga Pakigsaad 29:12)

4. Jesukristo (tan-awa sa Juan 5:22; 2 Nephi 9:41; 3 Nephi 27:14)

Si Elder Bruce R. McConkie (1915–85) sa Korum sa Napulog Duha ka Apostoles mipasabot sa tahas sa Manluluwas isip Maghuhukom.

Adunay usa ka tibuok hierarchy sa mga maghuhukom kinsa, ubos ni Kristo, mohukom sa matarong. Siya lamang ang magpagawas sa mga sugo sa silot alang sa mga daotan. (Bruce R. McConkie, The Millennial Messiah: The Second Coming of the Son of Man [1982], 520)

Unsa may basehan sa paghukom kanato?

Si Presidente Dallin H. Oaks sa Unang Kapangulohan mipasabot:

Ang Kataposang Paghukom dili lamang usa ka pagtimbang-timbang sa kinatibuk-ang sumada sa maayo ug daotan nga mga buhat—kon unsa ang atong nabuhat. Kini usa ka pag-ila sa kataposan nga epekto sa atong mga buhat ug mga hunahuna—kon unsa kita nahimo. Dili paigo ni bisan kinsa nga mokuyog lang sa panon kon unsay nahitabo. Ang mga sugo, mga ordinansa, ug mga pakigsaad sa ebanghelyo dili usa ka lista sa mga deposito nga gikinahanglang ideposito ngadto sa langitnong account. Ang ebanghelyo ni Jesukristo usa ka plano nga nagpakita kanato kon unsaon nga mahimong unsay gusto sa atong Langitnong Amahan nga kita mamahimo. (Dallin H. Oaks, “The Challenge to Become,” Liahona, Nob. 2000, 32)

Sa unsang paagi ang paghinulsol makaandam kanato alang sa Kataposang Paghukom?

Si Presidente Russell M. Nelson mitudlo:

Ang atong kinatas-ang paninguha sa kinabuhi mao ang pag-andam nga mohimamat sa atong Tiglalang. Ato kining buhaton pinaagi sa pagpaningkamot kada adlaw nga mas mahisama sa atong Manluluwas, si Jesukristo. Ug buhaton nato kana samtang maghinulsol kita kada adlaw ug modawat sa Iyang makalimpyo, makaayo, ug makapalig-on nga gahom. (Russell M. Nelson, “Pangbukas nga Mensahe,” Liahona, Mayo 2020, 6)

Dugang nga mga Kalihokan sa Pagkat-on

Alternatibo nga pagsugod sa leksiyon

Ikonsiderar ang pagdapit sa mga estudyante sa paghanduraw sa Kataposang Paghukom ug ang pag-atubang sa Manluluwas. Hangyoa sila sa pagrekord sa mga hunahuna ug mga pagbati nga tingali aduna sila niini nga sitwasyon. Dapita sila sa pagtuon niini nga leksiyon, mangita sa mga kamatuoran nga makatabang kanila nga atubangon kini nga kasinatian nga adunay mas dakong pagsalig ug kalipay.

Mormon 2:10–15. “Pagkaguol sa atubangan sa Ginoo”

Kon ang mga estudyante makabenepisyo gikan sa pagtuon sa kalainan tali sa kasubo nga mosangpot sa paghinulsol ug sa kasubo nga dili mosangpot sa paghinulsol, ikonsiderar ang pagdapit kanila sa pagbasa sa Mormon 2:10–15, mangita kon unsay naghatag ni Mormon og paglaom alang sa kaugmaon sa iyang katawhan ug unsay hinungdan sa pagbalik sa iyang kasubo.

Tabangi ang mga estudyante sa pagdiskobre sa kamatuoran niini nga tudling nga ang kasubo nga mosangpot sa sinsero nga paghinulsol makatabang kanato sa pagkab-ot sa kaluoy ug pagkamainantoson ni Jesukristo.

Dapita ang mga estudyante sa paghisgot kon sa unsang paagi ang usa ka tin-edyer nga dili malipayon sa mga pagpili nga iyang nahimo mahimong modangop sa Manluluwas alang sa kahupayan.

Mormon 3:9–15. Ang pagpanghambog sa atong kaugalingong kusog maoy hinungdan nga mawad-an kita sa kusog sa Dios

Hangyoa ang mga estudyante sa pagpakigbahin kon sa unsang paagi ang pagkamasaligon lahi kay sa pagpanghambog ug kon nganong importante ang kalainan.

Hangyoa sila sa pagtuon sa Mormon 3:9–15 ug sa pagpangita sa mga sangpotanan sa mga Nephite nga nanghambog sa ilang kaugalingong kusog.

Mahimo dayong siksikon sa mga estudyante ang Giya ngadto sa mga Kasulatan ubos sa “Garbo.” Mahimo silang mangita og dugang nga mga ehemplo kon sa unsang paagi kita mawad-an sa kusog gikan sa Dios kon kita manghambog sa atong kaugalingong kusog.

Dapita ang mga estudyante sa paglista og pipila ka Kristohanong mga hiyas nga makatabang kanato nga malikayan ang pagpanghambog. Mahimong magsulat ang mga estudyante og sulat ngadto sa ilang umaabot nga mga kaugalingon, nga mopakigbahin kon unsay ilang nakat-onan ug gibati nga makatabang kanila nga malikayan ang pagsalig ug pagpanghambog sa ilang kaugalingong kusog.

Paghanduraw sa Paghukom

Human sa pagtuon sa Mormon 3, ikonsiderar ang pagdapit sa mga estudyante sa paghanduraw nga anaa sa Paghukom uban sa Langitnong Amahan ug ni Jesukristo. Basaha ang Doktrina ug mga Pakigsaad 45:3 ug pahinumdomi sila sa tahas sa Manluluwas isip ilang manlalaban. Hangyoa sila sa paghanduraw sa Manluluwas nga namulong sa mga pulong diha sa Doktrina ug mga Pakigsaad 45:4–5. Kang kinsa gidapit sa Manluluwas ang Langitnoing Amahan sa pagtan-aw? Ngano man?

Hangyoa sila sa pagpakigbahin kon sa unsang paagi ang paghanduraw niini nga mga bersikulo naghatag kanila og pagsalig alang sa Paghukom ug ngano.