Alma 31–35

Ol Man blong Soram

Mekem fet blong olgeta stap gro long Jisas Kraes

Wan grup blong ol Man blong Nifae we oli singaotem olgeta ol Man blong Soram oli no stap kipim ol komanmen blong God. Hemia i mekem profet Alma i harem nogud. Hem i save se bes wei blong helpem olgeta i blong tijim olgeta long ol toktok blong God. Hem wetem Amulek mo ol narawan oli go blong tijim olgeta.

Alma 31:2–11

Ol man blong Soram oli save God, be oli jenisim ol tijing blong hem. Olgeta oli wosip long ol aedol. Olgeta oli ting se oli moa gud bitim ol nara pipol. Oli mekem nogud fasin long olgeta we oli nogat mane.

Alma 31:1, 8–12, 24–25; 32:2–3

Ol man blong Soram oli bildim wan hae ples blong stanap long hem long medel blong ol jos blong olgeta. Wan afta wan oli stanap long hem mo oli prea. Bae oli prea be oli yusum semmak toktok evri taem. Long prea ia, oli talem se God i nogat bodi mo Jisas Kraes i no ril. Oli talem se olgeta nomo oli ol pipol we God bae i sevem olgeta.

Alma 31:12–23

Alma i lavem ol Man blong Soram mo wantem olgeta blong folem God mo Jisas. Hem i bin prea mo askem God blong helpem hem mo ol narawan we oli kam wetem hem blong tijim ol Man blong Soram. Alma wetem olgeta we oli folem hem oli fulap wetem Tabu Spirit. Oli go mo tij wetem paoa blong God.

Alma 31:24–38; 32:1

Sam long Ol Man blong Soram oli harem nogud. Oli no letem olgeta oli go insaed long ol jos from oli nogat ol naes klos. Oli wantem wosip long God be oli no save olsem wanem sapos oli no letem olgeta i go insaed long ol jos. Plante oli askem Alma wanem oli sud mekem. Alma i tijim olgeta se God i harem ol prea blong nomata wea ples oli stap long hem.

Alma 32:2–12; 33:2–11

Alma i talem se God i wantem ol pipol blong Hem blong oli gat fet. Hem i komperem ol tijing blong God olsem wan sid. Sapos ol pipol oli planem ol tijing blong God insaed long ol hat blong olgeta, sid ia bae gro mo bae oli save se ol tijing blong God oli tru. Hem i se oli nidim blong gat strong tingting ia nomo blong biliv mo stat blong putum fet blong olgeta long aksen.

Alma 32:12–43

Amulek i tijim ol pipol abaot plan blong God blong ol pikinini blong Hem. Hem i talem long olgeta se tru long Jisas bae oli save fogivim ol sin blong olgeta. Hem i tijim olgeta blong prea long God mo talem se God bae i helpem mo protektem olgeta.

Alma 34

Plante long Ol Man blong Soram we oli pua oli biliv long wanem Alma mo Amulek i tijim. Be ol lida blong Ol Man blong Soram oli kros. Oli ronemaot olgeta we oli biliv long taon ia.

Alma 35:1–6

Olgeta we oli biliv oli go mo stap wetem ol Antae-Nifae-Lihae. Ol Antae-Nifae-Lihae oli givhan long olgeta, o givim seves long olgeta, taem oli givim ol kakae, ol klos mo graon.

Alma 35:9