Hileman 6–11

Nifae we i Profet

Blong kasem bigfala paoa ia long Lod

Wan grup we oli singaotem Gadianton ol manblong stil we oli rul long Sarahemla. Oli promes blong helpem wanwan long olgeta blong mekem ol rabis samting. Oli stil mo mekem nogud long ol pipol blong karem mane mo paoa. Plante long ol pipol oli joenem ol man blong stil ia. Oli wantem blong kam rij.

Hileman 6:15–24, 38–39; 7:4–5

Profet Nifae i stap long Sarahemla. Nifae i prea long God from hem i harem nogud se ol pipol oli no wantem folem ol komanmen blong God. Nifae i askem ol pipol blong tingbaot evri samting we God i mekem blong olgeta. Be plante pipol oli no wantem lisin. Oli laekem moa mane mo paoa bitim blong stap obei long God.

Hileman 7:1–22

Nifae i bin wonem ol pipol abaot ol man blong stil. Hem i talem se oli nid blong sakem sin. Plante long ol jaj blong Ol Man Blong Nifae oli joenem ol man blong stil. Oli kros long Nifae mo talem se hem i stap giaman. Oli wantem ol pipol blong oli kros long Nifae tu.

Hileman 7:22–29; 8:1–7

Nifae i talem se God i talem long ol profet blong Hem plante samting. Nifae i talem se ol profet oli tijim abaot Jisas Kraes we bae i kambak. Hem i talem se ol profet oli wonem ol pipol se Jerusalem bae oli prapa spolem gud sapos oli no sakem sin. Hem i helpem olgeta tingbaot se Jerusalem oli bin prapa spolem gud.

Hileman 8:11–25

Long nekis dei, ol jaj oli askem kwestin long Nifae blong trikim hem. Nifae i talem long olgeta se i gat ivel i stap long medel blong olgeta. Sam pipol oli bilivim Nifae mo save se hem i wan profet.

Hileman 9:19–41

Ol narawan oli no bin biliv. Evriwan oli raorao mo afta oli wanwan. Nifae i tingting long wanem we Lod i tijim long hem. Hem i harem nogud from ol nogud fasin blong olgeta.

Hileman 10:1-3

Lod i toktok long Nifae. Hem hapi se Nifae i stap tijim ol pipol blong Hem. From Nifae i stap obei, Lod i givim long hem wan spesel paoa ova long ol samting blong wol mo long heven. Lod i save se Nifae bae i yusum paoa ia blong helpem ol pipol oli sakem sin.

Hileman 10:3–12

Lod i talem long Nifae blong gobak long ol pipol mo talem long olgeta blong sakem sin. Nifae i go wantaem. Be ol pipol oli bin kros long hem mo oli no wantem lisin long hem.

Hileman 10:11–15

Oli traem blong putum Nifae long prisen. Be Spirit blong God i helpem Nifae blong hem i ronwe.

Hileman 10:15–17

Nifae i gohed blong tijim toktok blong God. Ol pipol long we oli no wantem lisin long hem. Afta oli stat blong raorao mo faet wetem olgeta bakegen. Ol man blong stil oli mekem ol faet i go moa wos. I no longtaem nomo, i gat wo long evri bigtaon. Plante pipol oli kasem kil o oli ded. Nifae i harem nogud. Hem i no wantem ol pipol blong oli kilim ded olgeta long wo ia.

Hileman 10:17–18; 11:1–4

Nifae i askem God blong i mekem ples bae i drae mo nogat kakae mekem se bae ol pipol bae oli tingbaot Lod mo bae oli sakem sin. I nogat ren blong plante yia. Graon i drae, mo ol kakae oli no gro. Ol pipol oli hanggri. Oli stop blong faet mo stat blong tingbaot Lod. Ol pipol oli sakem sin mo oli karemaot ol stil man ia.

Hileman 11:3–7, 9–10

Ol pipol oli askem Nifae blong prea long Lod. Nifae i luk se ,oli sakem sin mo ol man blong stil oli nomo gat. Hem i askem Lod blong i sendem ren. Lod i ansarem prea blong Nifae. Ren i kam, mo ol kakae oli stat blong gro. Ol pipol oli talem tangkyu long God. Oli save se Nifae i wan profet mo i gat bigfala paoa blong God.

Hileman 11:8–18