Hileman 13–16

Profet we i Samuel

Tijing abaot taem we Jisas i bin bon i kam long wol mo taem we Hem i ded

Wan profet blong Ol Man Leman we nem blong hem Samuel i go blong tijim Ol Man blong Nifae long Sarahemla. Hem i tijim abaot fasin blong sakem sin. Ol man blong Nifae oli no wantem lisin mo oli sakemaot hem long bigtaon blong olgeta.

Hileman 13:1–2

Samuel i stap rere blong gobak long ol pipol blong hem. Be Lod i talem long hem blong gobak mo tijim ol Man blong Nifae

Hileman 13:2–3

Lod i talem long Samuel se bae Hem i talem long hem wanem blong talem. Samuel i bin obei long Lod. Hem i gobak long Sarahemla. Ol man blong Nifae oli no wantem letem hem i kam insaed long bigtaon blong olgeta.

Hileman 13:3–4

Samuel i klaem i go antap long wol blong bigtaon. Hem i talem ol samting we Lod i putum long hat blong hem. Hem i givim woning long ol pipol se bae oli prapa spolem gud olgeta from oli stap mekem ol rabis fasin. Hem i talem se fasin blong sakem sin nomo mo fet long Jisas Kraes bae i save sevem olgeta. Hem i talem se Jisas, Pikinini Boe blong God, bae i bon i kam long wol long faef yia taem.

Hileman 13:4–11; 14:2, 8, 12–18

Samuel i talem long olgeta se bae i gat ol saen long taem we bae Jisas i bon i kam long wol. Hem i talem long ol pipol blong lukaotem ol saen ia. Wan saen hem i we bae i gat naet be ples bae i no tudak. Ol narafala saen hem i bae i gat wan niu sta mo bae plante naes samting i kamaot long skae.

Hileman 14:3–7

Samuel i wantem ol pipol blong gat fet long Jisas. Hem i talem se bae Jisas i ded mo bae i girap bakegen mekem se evri man oli save sev sapos oli sakem sin blong olgeta.

Hileman 14:8, 12–18

Samuel i talem se bae i gat ol saen long taem we bae Jisas i ded. Pipol bae oli no save luk san, mun o ol sta. Bae i nogat laet blong tri dei.

Hileman 14:20, 27

Bae i gat tanda mo laetning. Ol etkwek bae i kam, ol bigtaon bae oli prapa smasem gud.

Hileman 14:21–27

Sam pipol oli biliv long Samuel, be plante long Ol Man blong Nifae oli kros long hem. Oli sakem ol ol ston mo oli sutum hem wetem ol aro. Lod i protektem Samuel taem hem i stanap antap long wol. Nogat wan long ol ston mo ol aro i fas long hem.

Hileman 16:1–2

Taem we nogat wan i save kasem Samuel, plante moa pipol oli biliv long toktok blong hem. Be plante long ol pipol oli stap kros yet long hem. Oli traem blong tekem Samuel mo fasem hem. Samuel i ronwe mo i gobak long haos blong hem. Hem i gohed blong tijim ol pipol blong hem.

Hileman 16:3, 6–8

Ol Man blong Nifae we oli biliv long Samuel oli sakem sin mo kasem baptaes tru long profet Nifae. Oli bilif long Jisas mo oli stap lukaotem ol saen long taem we bae Jisas i bon olsem we Samuel i bin talem long olgeta.

Hileman 16:1, 3–5; 3 Nifae 1:8