Samuela te peropheta

Ha’api’i nō ni’a i te fānaura’a ’e te pohe o Iesu

’Ua tīahi te ’āti Nephi ia Samuela i rāpae i te ’oire

’Ua haere te hō’ē peropheta ’āti Lamana ’o Samuela te i’oa e ha’api’i i te mau ’āti Nephi i Zarahemela. ’Ua ha’api’i ’oia te tātarahapa. ’Aita te mau ’āti Nephi i fa’aro’o ’e ’ua tā’ue iāna i rāpae i te ’oire.

Helamana 13:1–2

’Ua fātata Samuela i te ho’i fa’ahou i tōna mau ta’ata ra. ’Ua parau rā te Fatu iāna ’ia ho’i fa’ahou e ha’api’i i te mau ’āti Nephi.

Helamana 13:2–3

Samuela e ti’a ra i rāpae i te ’oire ’e tē hi’o ra i te ’oire

’Ua parau te Fatu ia Samuela ē, e parau ’oia iāna i te mea e parau. ’Ua ha’apa’o Samuela i te parau a te Fatu. ’Ua ho’i ’oia i Zarahemela. E’ita rā te mau ’āti Nephi e vaiiho iāna ’ia tomo i roto i te ’oire.

Helamana 13:3–4

Samuela e ti’a ra i ni’a i te patu o te ’oire ’e tē a’o ra i te tahi pupu ta’ata rahi

’Ua pa’i’uma Samuela i ni’a i te patu o te ’oire. ’Ua parau ’oia i te mau mea tā te Fatu i tu’u i roto i tōna ’ā’au. ’Ua fa’aara ’oia i te mau ta’ata ē, e ha’amouhia rātou nō te mea tē rave nei rātou i te mau ’ohipa ’ī’ino. ’Ua parau ’oia ē, ’o te tātarahapa ana’e ’e te fa’aro’o ia Iesu Mesia te nehenehe e fa’aora ia rātou. ’Ua parau ’oia ē, e fānauhia Iesu, te Tamaiti a te Atua, i roto e pae matahiti.

Helamana 13:4–11 ; 14:2, 8, 12–18

Samuela e ti’a ra i ni’a i te patu o te ’oire ’e tē paraparau nei, ’e i pīha’i iho iāna te hō’ē hōho’a nō Iesu ’aiū, nō Maria ’e nō Iosepha

’Ua parau Samuela, tē vai ra te mau tāpa’o nō te fānaura’a ’o Iesu. ’Ua parau ’oia i te mau ta’ata ’ia ara i te mau tāpa’o. Hō’ē o te mau tāpa’o, ’o te hō’ē ïa pō ma te pōiri ’ore. ’E te tahi atu mau tāpa’o, ’o te hō’ē ïa feti’a ’āpī ’e e rave rahi mea fa’ahiahia e fā mai i ni’a i te ra’i.

Helamana 14:3–7

Samuela e a’o ra, ’e i pīha’i iho iāna te hō’ē hōho’a nō te Fa’aora tei ti’afa’ahou i rāpae i tōna mēnema e paraparau ra ia Maria Magedalena

’Ua hina’aro Samuela ’ia roa’a i te mau ta’ata te fa’aro’o ia Iesu. ’Ua parau ’oia e pohe Iesu ’e e ti’afa’ahou mai, ’ia ti’a i te mau ta’ata ato’a ’ia fa’aorahia, mai te mea e tātarahapa rātou.

Helamana 14:8, 12–18

Samuela e a’o ra, ’e i muri iāna te hō’ē hōho’a nō te hō’ē ’oire pōiri

’Ua parau Samuela, tē vai ra te mau tāpa’o nō te pohera’a o Iesu. E’ita te mau ta’ata e ’ite i te mahana, te ’āva’e ’aore rā te mau feti’a. ’Aita e māramarama nō te maorora’a e toru mahana.

Helamana 14:20, 27

Samuela e a’o ra, ’e hō’ē hōho’a i pīha’i iho iāna nō te hō’ē ’oire e pa’apa’a ra tei haruhia e te uira

E tupu te hāruru pātiri ’e te mau uira. E tupu te mau ’aueuera’a fenua, ’e e rave rahi ’oire e ha’amouhia.

Helamana 14:21–27

Samuela e ti’a ra i ni’a i te patu o te ’oire, ’e tē tāmata ra te hō’ē pupu ta’ata riri i raro mai i te te’a iāna ’e i te tāora iāna i te ’ōfa’i, ’aita rā hō’ē mea i tano i ni’a ia Samuela

’Ua ti’aturi vetahi mau ta’ata ia Samuela, e rave rahi rā ’āti Nephi tei riri rahi iāna. ’Ua tāora rātou i te ’ōfa’i ’e ’ua te’a iāna. ’Ua pāruru te Fatu ia Samuela ’a ti’a ai ’oia i ni’a i te patu. ’Aita hō’ē a’e ’ōfa’i ’e te mau te’a i tano i ni’a iāna.

Helamana 16:1–2

vetahi mau ta’ata e pure ra ’e tē ha’ape’ape’a ra, vetahi ’ua riri roa, ’e ’ua haere ’ē atu Samuela

Nō te mea ’aita hō’ē a’e ta’ata e nehenehe e tāparahi ia Samuela, ’ua rahi atu ā te ta’ata tei ti’aturi i tāna mau parau. ’Ua riri rā te rahira’a o te ta’ata. ’Ua tāmata rātou i te haru ia Samuela ’e e tā’amu’amu iāna. ’Ua horo ’ē Samuela ’e ’ua ho’i i te fare. ’Ua tāmau noa ’oia i te ha’api’i i tōna mau ta’ata.

Helamana 16:3, 6–8

hō’ē peropheta ’o Nephi te i’oa e paraparau ra i te mau ta’ata i pīha’i iho i te ’ānavai

’Ua tātarahapa te mau ’āti Nephi tei ti’aturi ia Samuela ’e ’ua bāpetizohia rātou e te peropheta Nephi. ’Ua ti’aturi rātou ia Iesu ’e tē moemoe ra i te mau tāpa’o nō te fānaura’a o Iesu mai tā Samuela i parau ia rātou.

Helamana 16:1, 3–5 ; 3 Nephi 1:8