« ព្រះយេស៊ូវយាងមកជួបប្រជាជន » ដំណើររឿងព្រះគម្ពីរមរមន ( ឆ្នាំ២០២៣ )
ព្រះយេស៊ូវយាងមកជួបប្រជាជន
ការជួយមនុស្សម្នាក់ៗឲ្យជឿលើទ្រង់
មនុស្សជាច្រើននឹងមិនស្តាប់ព្យាការីរបស់ព្រះទេ ។ ប៉ុន្តែមនុស្សមួយចំនួនជឿលើអ្វីដែលព្យាការីបានបង្រៀន ។ ពួកអ្នកជឿទាំងនេះរង់ចាំទីសម្គាល់អំពីការសុគតរបស់ព្រះយេស៊ូវគ្រីស្ទ ។
បន្ទាប់ពីព្រះយេស៊ូវបានសុគតនៅក្នុងទីក្រុងយេរូសាឡិម ទីសម្គាល់ទាំងឡាយបានចាប់ផ្តើម ។ នៅអាមេរិកមានព្យុះ រញ្ជួយដី និងអគ្គីភ័យរយៈពេលបីម៉ោង ។ ទីក្រុងត្រូវបានបំផ្លាញ ហើយមនុស្សជាច្រើនបានស្លាប់ ។ បន្ទាប់មកមានភាពងងឹតទាំងស្រុងអស់បីថ្ងៃ ។
ភាពងងឹតនោះគឺខ្លាំងណាស់រហូតដល់ប្រជាជនមិនអាចមើលឃើញព្រះអាទិត្យ ព្រះច័ន្ទ ឬផ្កាយឡើយ ។ ពួកគេមិនអាចសូម្បីតែដុតភ្លើង ឬទៀន ។
មនុស្សជាច្រើនដែលនៅមានជីវិតមានការសោកសៅ និងភ័យខ្លាចយ៉ាងខ្លាំង ។ ពួកគេយំ និងមានអារម្មណ៍សោកស្តាយដែលពួកគេមិនបានប្រែចិត្តឆាប់ជាងនេះ ។
ភ្លាមៗនោះ ពួកគេបានឮសំឡេងមួយ ។ នោះគឺព្រះយេស៊ូវកំពុងមានបន្ទូលទៅកាន់ពួកគេ ។ ទ្រង់បានសន្យាថា នឹងព្យាបាលមនុស្សគ្រប់គ្នាដែលបានប្រែចិត្ត ។ ព្រះយេស៊ូវបានប្រាប់ពួកគេថា ទ្រង់បានសុគត ហើយបានមានព្រះជន្មរស់ឡើងវិញ ដើម្បីជួយមនុស្សទាំងអស់ ។ ប្រជាជនមានការភ្ញាក់ផ្អើលខ្លាំងណាស់ ហើយពួកគេឈប់យំ ។ មានភាពស្ងប់ស្ងាត់នៅក្នុងដែនដីអស់រយៈពេលជាច្រើនម៉ោង ។
ព្រះយេស៊ូវបានមានព្រះបន្ទូលម្ដងទៀត ។ ទ្រង់បានប្រាប់ប្រជាជនថា ទ្រង់នឹងជួយពួកគេ ប្រសិនបើពួកគេជ្រើសរើសធ្វើតាមទ្រង់ ។ ភាពងងឹតបានបាត់ទៅ ហើយផែនដីក៏ឈប់រញ្ជួយ ។ ប្រជាជនបានសប្បាយរីករាយ និងសរសើរតម្កើងព្រះយេស៊ូវ ។
ប្រហែលមួយឆ្នាំក្រោយមក មនុស្សជាច្រើនបានមកព្រះវិហារបរិសុទ្ធនៅដែនដីបរិបូរណ៍ ។ ពួកគេបាននិយាយអំពីព្រះយេស៊ូវ និងទីសម្គាល់នៃការសុគតរបស់ទ្រង់ ។ នៅពេលដែលពួកគេនិយាយគ្នា ពួកគេបានឮសំឡេងស្ងប់ស្ងាត់ពីស្ថានសួគ៌ ។ ដំបូង ពួកគេមិនអាចយល់សំឡេងនោះបានទេ ។ បន្ទាប់មក ពួកគេបានឮសំឡេងនោះម្តងទៀត ។
នៅពេលពួកគេបានឮសំឡេងជាលើកទីបី ពួកគេបានសម្លឹងមើលទៅស្ថានសួគ៌ ។ នោះគឺព្រះវរបិតាសួគ៌មានព្រះបន្ទូល ។ ទ្រង់បានប្រាប់ប្រជាជនឲ្យមើល និងស្តាប់ដល់ព្រះរាជបុត្រារបស់ទ្រង់ ។ ក្រោយមក ប្រជាជនបានឃើញបុរសម្នាក់ស្លៀកព្រះពស្ដ្រពណ៌សចុះមកពីស្ថានសួគ៌ ។
បុរសនោះឈរក្នុងចំណោមប្រជាជន ហើយបានមានព្រះបន្ទូលថា « យើងគឺជាព្រះយេស៊ូវគ្រីស្ទ » ។ ប្រជាជនបានដួលទៅលើដី ។ ព្រះយេស៊ូវបានប្រាប់ពួកគេ ថាទ្រង់បានរងទុក្ខ និងសុគតសម្រាប់មនុស្សគ្រប់គ្នា ។ ទ្រង់បានអញ្ជើញប្រជាជនឲ្យមកប៉ះស្នាមនៅព្រះហស្ដ ព្រះបាទា និងចំហៀងទ្រង់ ដើម្បីឲ្យពួកគេអាចដឹងថា ទ្រង់គឺជាព្រះអង្គសង្គ្រោះនៃពិភពលោក ។
ប្រជាជនបានមកកាន់ព្រះយេស៊ូវម្ដងម្នាក់ៗ ។ ពួកគេបានឃើញដោយភ្នែករបស់ពួកគេផ្ទាល់ និងបានប៉ះស្នាមនៅព្រះហស្ដទ្រង់ ព្រះបាទាទ្រង់ និងចំហៀងទ្រង់ដោយដៃរបស់ពួកគេផ្ទាល់ ។ ពួកគេទាំងអស់គ្នាបានដឹងថា ទ្រង់គឺជាព្រះអង្គដែលពួកព្យាការីបាននិយាយថានឹងយាងមក ។ ពួកគេបានដឹងថា ទ្រង់គឺជាព្រះអង្គសង្រ្គោះនៃពិភពលោក ។ ប្រជាជនបានក្រាបចុះនៅនឹងព្រះបាទារបស់ព្រះយេស៊ូវ ហើយថ្វាយបង្គំទ្រង់ ។