Sa Vosa Vakalougatataki ira na Gone o Jisu

Vakaraitaka na Nona loloma vei ira

Sa tucake tu o Jisu Karisito ena ikabakaba ni valetabu ka vosa vua e dua na ilawalawa tamata

A vakavulica o Jisu Karisito vei ira na tamata e vuqa na ka. E raica ni ra gadreva e dua na gauna me ra vakasamataka na veika era sa vulica. A kerei ira mera lesu i vale ka masu vua na Tamada Vakalomalagi me ra kila na veika sa vakavulica vei ira o Koya. Sa qai yalataka o Jisu ni na sikovi ira tale ena siga ka tarava.

3 Nifai 17:1–4

E matadredredre o Jisu Karisito ka laveta cake na Ligana

Era tagi na tamata baleta ni ra vinakata me tiko vakabalavu o Jisu. E lomani ira na tamata o Jisu. E raica rawa ni kaukauwa sara na nodra vakabauta. A kerei ira o Koya me ra kauta mai Vua e dua ga sa rawa e tauvimate se rarawa ena sala cava ga. E vinakata me vakabulai ira yadua.

3 Nifai 17:5–8

A vukea o Jisu Karisito e dua na gone e tauvimate, ka ra tiko voleka ena matadredredre eso tale na gone

Era lako mai Vua na tamata kei ira na lewe ni nodra matavuvale kei na itokani era tauvimate. A vakabulai ira yadua o Jisu. Era sa marau sara vakalevu. Era tekiduru ka reguca na yavana.

3 Nifai 17:9–10

A vosa o Jisu Karisito vua e dua na gone, ka ra soqoni wavokiti Jisu yani na tamata kei ira na luvedra

Sa qai kerea vei ira mera kauti ira mai Vua na luvedra lalai. Era kauti ira mai na luvedra na tamata ka vakadaberi ira e ra ka wavoliti Jisu.

3 Nifai 17:11–12

E tekiduru ka masu o Jisu Karisito, ka ra tekiduru wavoliti Koya na gone kei ira na uabula ka masu

Ni ra sa tiko vata kece kei Koya na gone, a kerei ira na tamata o Jisu me ra tekiduru ena qele. A qai tekiduru talega. A sa qai masu vua na Tamada Vakalomalagi. A tukuna na veika veivakurabuitaki ka sega ni rawa ni volai na Nona vosa. Era sa vakasinaiti na tamata ena reki.

3 Nifai 17:13–18

E matadredredre o Jisu Karisito, ka tiri mai Matana e dua na wainimata

A tukuna o Jisu vei ira na tamata ni ra sa vakalougatataki ena vuku ni nodra vakabauti Koya. Sa vakila vakalevu o Jisu na marau ka sa tekivu tagi.

3 Nifai 17:19–21

Sa mokota o Jisu Karisito e dua na gone, ka ra matadredredre na vo ni gone era tu voleka.

Sa qai vakalougatataki ira yadua na gone o Jisu. A masulaki ira yadua vua na Tamada Vakalomalagi. Sa qai kerei ira na tamata me ra raici ira na luvedra.

3 Nifai 17:21–23

A vosa vei ira na gone o Jisu Karisito, ka ra lako sobu mai lomalagi na agilosi ka soqoni wavokiti ira vata na gone

Era lako mai lomalagi na agilosi ka soqoni vata yani vei ira na gone. Ni ra sa vakalougatataki ira na gone na agilosi, a vakavolivoliti ira na rarama vakalomalagi. Ena dua tale na siga, a sotavi ira na gone o Jisu qai vakalougatataki ira tale. A vakalougatataki ira talega na gone me ra vosa rawa. Era vosa sara mada ga na gonelalai. Era vakavulica na gone na veika veivakurabuitaki vei ira na nodra itubutubu.

3 Nifai 17: 23–25; 26:14, 16