Tē ha’amaita’i nei Iesu i te mau tamari’i

« Tē ha’amaita’i nei Iesu i te mau tamari’i », Te mau ’ā’amu o te Buka a Moromona (2023)

2:47

Tē ha’amaita’i nei Iesu i te mau tamari’i

Fa’a’ite i tōna here nō rātou

Iesu Mesia e ti’a ra i ni’a i te mau ta’ahira’a o te hiero ’e e paraparau ra i te hō’ē pupu ta’ata

Iesu Mesia e ha’api’i ra i te mau ta’ata e rave rahi mea. ’Ua ’ite ’oia ē e hina’aro rātou i te taime nō te feruri i te mau mea tā rātou i ’apo mai. ’Ua ani ’oia ia rātou ’ia ho’i i te fare ’e ’ia pure i te Metua i te ao ra, ’ia māramarama rātou i te mau mea tāna i ha’api’i ia rātou. I muri iho ’ua parau fafau Iesu e fārerei fa’ahou ’oia ia rātou i te mahana nō muri mai.

3 Nephi 17:1–4

Iesu Mesia mata ’ata’ata ’e ’ua ’āfa’i i tōna rima i ni’a

’Ua ’oto te mau ta’ata nō te mea ’ua hina’aro rātou ’ia fa’aea maoro mai ā Iesu. ’Ua here Iesu i te mau ta’ata. ’Ua ti’a iāna ’ia ’ite ē e mea pūai roa tō rātou fa’aro’o. ’Ua ani ’oia ia rātou ’ia ’āfa’i mai iāna ra te feiā ma’i ato’a ’aore rā te māuiui nei noa atu te huru. ’Ua hina’aro ’oia e fa’aora ia rātou tāta’itahi.

3 Nephi 17:5–8

Iesu Mesia e tauturu ra i te hō’ē tamari’i ma’i, ’e tei pīha’i iho mai te tahi atu mau tamari’i ’e te mata ’ata’ata.

’Ua haere mai te mau ta’ata iāna ra ’e te mau melo ma’i o tō rātou ’utuāfare ’e tō rātou mau hoa ma’i. ’Ua fa’aora Iesu ia rātou tāta’itahi. ’Ua ’oa’oa roa rātou. ’Ua tūturi rātou ’e ’ua ’āpā i tōna ’āvae.

3 Nephi 17:9–10

Iesu Mesia e paraparau ra i te hō’ē tamari’i, ’e te mau ta’ata tei putuputu mai ’ati a’e ia Iesu ’e tā rātou mau tamari’i

’Ua ani Iesu ia rātou ’ia ’āfa’i mai i tā rātou mau tamari’i ri’i iāna ra. ’Ua ’āfa’i mai te mau ta’ata i tā rātou mau tamari’i ’e ’ua tu’u ia rātou i ni’a i te repo ’ati a’e ia Iesu.

3 Nephi 17:11–12

Iesu Mesia e tūturi ra ’e e pure ra, ’e ’ua tūturi te mau tamari’i ’e te feiā pa’ari ’ati a’e iāna ’e ’ua pure

I muri a’e i tō te mau tamari’i ato’a taera’a i reira i pīha’i iho iāna, ’ua ani Iesu i te mau ta’ata ’ia tūturi i ni’a i te repo. ’Ua tūturi ato’a ’oia. I muri iho ’ua pure ’oia i te Metua i te ao ra. ’Ua parau ’oia i te mau mea fa’ahiahia mau roa e’ita e ti’a ’ia pāpa’ihia tāna mau parau. ’Ua ’ī te mau ta’ata i te ’oa’oa.

3 Nephi 17:13–18

Iesu Mesia mata ’ata’ata, ’e ’ua tahe te hō’ē pape iti mai tōna mata

’Ua parau Iesu i te mau ta’ata ē ’ua ha’amaita’ihia rātou nō tō rātou fa’aro’o iāna. ’Ua putapū Iesu i te ’oa’oa rahi ē, ’ua ha’amata ’oia i te ta’i.

3 Nephi 17:19–21

Iesu Mesia e tauahi ra i te hō’ē tamari’i, ’e tei pīha’i noa mai te tahi atu mau tamari’i ’e te mata ’ata’ata

I muri iho ’ua ha’amaita’i Iesu hō’ē hō’ē i te tamari’i. ’Ua pure ’oia i te Metua i te ao ra nō rātou tāta’itahi. I muri iho ’ua ani ’oia i te mau ta’ata ’ia hi’o i tā rātou mau tamari’i.

3 Nephi 17:21–23

Iesu Mesia e paraparau ra i te mau tamari’i, ’e ’ua pou mai te mau melahi nā te ra’i mai ’e ’ua putuputu ’ati a’e te mau tamari’i

’Ua pou mai te mau melahi nā te ra’i mai ’e ’ua putuputu ’ati a’e te mau tamari’i. ’A ha’amaita’i ai te mau melahi i te mau tamari’i, ’ua ha’a’ati te māramarama o te ra’i ia rātou. I te tahi atu mahana, ’ua fārerei Iesu ’e ’ua ha’amaita’i fa’ahou i te mau tamari’i. ’Ua ha’amaita’i ato’a ’oia i te mau tamari’i ’ia ti’a ia rātou ’ia paraparau. ’Ua paraparau ato’a te mau ’aiū. ’Ua ha’api’i te mau tamari’i i te mau mea fa’ahiahia mau i tō rātou mau metua.

3 Nephi 17:23–25 ; 26:14, 16