Momon we i Profet

Stap raetem Buk blong Momon

plante pipol i mekem ol tul blong faet, mo Momon olsem wan pikinini mo mama blong hem tufala i stanap kolosap long tebol we i fulap long ol naef blong faet

Momon i wan Man blong Nifae we oli bilif long Jisas Kraes. Hem i groap long wan taem we plante pipol oli no stap obei long ol komanmen blong God. Ol pipol oli stil mo kilim ded wanwan long olgeta from mane mo paoa. I gat plante wo.

3 Nifae 5:12–13; 4 Nifae 1:27–49; Momon 1:1–3, 15, 18–19

Amaron i toktok long Momon mo mama blong hem taem oli stap pulumaot ol kaekae we i rere finis, mo plante oli stap wok kolosap long plantesen

Taem Momon i gat 10 yia, wan man we nem blong hem Amaron i kam luk hem. Amaron i lukaotem ol rekod blong histri blong ol Man blong Nifae. Amaron i trastem Momon mo talem long hem se ol rekod ia oli haedem long wan hil. Amaron i talem se taem we Momon bae i gat 24 yia, bae i raetemdaon wanem hem i luk abaot ol pipol blong olgeta mo ademap i go long ol rekod ia.

4 Nifae 1:47–49; Momon 1:2–4

yangfala Momon i prea long bus we i fulap long ol tri, mo laet i stap raon long hem

Taem Momon i stap gro i kam antap, hem i tingbaot wanem Amaron i askem hem blong mekem. Taem Momon i gat 15 yia, Lod i bin visitim hem. Momon lanem abaot lav blong Jisas.

Momon 1:5, 15

yangfala Momon i werem klos blong faet mo i wajem wan ami blong Ol Man blong Nifae

Nomata se Momon i yang,hem i strong. Ol Man blong Nifae oli jusum hem blong lidim ol ami blong olgeta. Momon i lavem ol pipol blong hem wetem ful hat blong hem. Hem i wantem olgeta blong obei God mo stap hapi.

Momon 2:1–2, 12, 15, 19; 3:12

adalt Momon i harem nogud mo i prea, mo graon we faea i kakae i stap long bakgraon.

Momon i traem blong helpem ol pipol blong hem. Hem i prea from olgeta dei afta dei. Ol pipol ia oli save se oli stap mekem samting i no stret, be oli no wantem blong sakem sin. Oli nomo gat paoa blong God blong helpem olgeta. From se oli nogat fet, ol merikel oli stop blong hapen. Oli gohed blong faet, mo plante long olgeta oli ded. Momon i harem nogud.

Momon 1:13–14, 16–19; 2:23–27; 3:1–12; 4:5, 9–12; 5:1–7

Momon i raet long mo i putum gud ol metol plet ia

Taem we Momon kolosap i gat 24 yia, hem i go antap long hil long ples we oli haedem ol rekod ia long hem. Hem i stat blong raetem ol stori mo ol tijing blong ol pipol blong hem long ol metol plet ia. God i bin helpem hem blong save wanem blong raetem. Momon i wok long ol rekod ia blong plante yia. Tedei, rekod ia oli singaotem Buk blong Momon.

Ol Toktok blong Momon 1:3–9; Momon 1:3–4; 2:17–18

Momon, waef blong hem, mo oli pikinini blong hem oli travel

Afta plante yia blong wo, Ol Man blong Leman oli kilim ded kolosap haf blong Ol Man blong Nifae. Momon i save se bae ol pipol blong hem bae no long taem bae oli nomo gat. Hem i no hapi from se ol pipol ia oli no wantem sakem sin mo askem help long God. Be hem i prea long God blong i protektem ol plet ia. Hem i save se ol plet ia bae oli sef i stap from ol toktok blong God i stap long hem.

Ol Toktok blong Momon 1:11; Momon 5:11; 6:6, 16–22

Momon olsem wan olfala man i givim long boe blong hem ol metol plet ia.

Momon i wantem ol pipol blong bilif long Jisas. Hem i hop se long fiuja bae plante pipol oli ridim buk ia. Hem i wantem tumas speseli ol famli blong Ol Man blong Leman blong oli ridim wan dei. Sapos oli ridim, bae oli lanem abaot Jisas. Bifo Momon i ded, hem i bin givim ol buk i go long boe blong hem Moronae blong ol rekod ia i stap sef.

Ol Toktok blong Momon1:1–2; Momon 3:17–22; 5:8–24; 6:6; 7; 8:1