Ita 1–4; 6

Jared mo Famli blong Hem

Wan wokbaot we Lod i lidim

Jared mo famli blong hem i stap long Babel taosen yia bifo Jisas Kraes i bon i kam long wol ia. Olgeta i bin obei long Lod. Be plante man long Babel oli no wantem obei long Lod. Ol pipol ia oli stat blong bildim wan taoa blong go kasem heven. Lod i bin jenisim lanwis blong ol pipol mekem se oli no save andastanem olgeta.

Jenesis 11:4–9; Ita 1:33

Jared i gat wan brata. Lod i trastem brata blong Jared. Jared i askem brata blong hem blong prea long Lod blong askem help. Long prea blong hem, brata blong Jared i askem Lod blong no jenisim lanwis blong ol famli mo ol fren blong hem. Long wei ia bae oli save andastanem olgeta.

Ita 1:33–36

Lod i gat lav mo i kaen. Hem i no jenisim lanwis blong famli blong Jared mo ol fren blong olgeta. Afta, Lod i talem long brata blong Jared se hem i rere long wan spesel graon blong olgeta. Lod i talem se bae Hem i lidim olgeta i go long graon ia.

Ita 1:35–42

Jared mo brata blong hem oli karem kam tugeta ol famli mo ol fren blong olgeta. Oli karem kam tugeta ol animol mo evri kaen sid. Oli livim biaen ol hom blong olgeta mo travel long waelples. Lod i lidim olgeta taem hem i toktok long wan fom blong klaod.

Ita 1:40–43; 2:1–6

Afta we oli travel long wan longfala rod, oli kasem wan solwota. Oli stap kolosap long solwota blong fo yia. Brata blong Jared,longtaem i no bin prea long God.

Ita 2:13–14

Lod i bin talem long brata blong Jared blong i prea bakegen. Brata blong Jared i sakem sin mo i prea long Lod. Lod i fogivim hem.

Ita 2:14–15

Lod i tijim brata blong Jared blong bildim ol sip we oli singaotem ol baj. Ol famli blong olgeta i save go insaed long ol baj ia mo sel krosem solwota blong kasem graon blong promes.

Ita 2:15–17

Brata blong Jared mo famli blong hem i bildim ol baj ia. Hem i luk se i nogat laet insaed long ol baj ia. Hem i askem Lod sapos bae oli travel long ol baj ia long tudak. Lod i talem long brata blong Jared blong tingting long wan wei blong oli save gat laet.

Ita 2:16–19, 22–25

Brata blong Jared i mekem 16 smol ston we oli klia gud. Hem i askem Lod blong i tajem ol 16 smol ston ia mo mekem olgeta i saen. Nao Lod i putumaot han blong Hem mo tajem wanwan long ol ston ia wetem fingga blong Hem. Brata blong Jared i save luk fingga blong Lod. Hem i sek se Lod i gat bodi semmak long hem.

Ita 3:1–8

Lod i bin talem long brata blong Jared blong gat bigfala fet. Mo afta, Lod i soemaot Spirit bodi blong Hemwan long brata blong Jared. Lod i talem “Mi Mi Jisas Kraes.” Hem i talem se Hem nao oli jusum Hem blong i kam Sevya. Hem i tijim brata blong Jared plante samting.

Ita 3:9–20, 25–27

Brata blong Jared i gobak long famli mo ol fren blong hem. Hem i raetem daon wanem hem i lanem taem hem i stap wetem Lod. Hem i putum ol ston ia insaed long ol baj ia. Naoia oli gat laet long rod blong olgeta.

Ita 4:1; 6:2–3

Ol famli oli go insaed long ol baj ia mo krosem solwota. Oli trastem Lod blong lukaotem gud olgeta. I gat fulap hariken mo wef. Samtaem, wota i kavremap gud ol baj ia. Be oli prea, mo Lod i karem bak olgeta i kambak antap long wota bakegen. Oli singsing ol singsing, blong talem tangkyu long Lod.

Ita 6:4–10

I tekem olgeta kolosap wan yia, blong oli kasem graon we Lod i bin promes long olgeta. Oli krae wetem glad mo talem tangkyu long Hem.

Ita 6:11–12