Pene 21
Te ’āti Amaliki
E ta’ata māramarama ’e te ’ino o Amaliki tei hina’aro ’ia riro ’ei ari’i nō te ’āti Nephi. E mea rahi tōna mau ta’ata pe’e.
’Aita te ’āti Nephi parau-ti’a i hina’aro ’ia riro mai Amaliki ’ei ari’i nō rātou. ’Ua ’ite rātou tē hina’aro nei ’oia e ha’amou i te ’Ēkālesia a te Atua.
’Ua ha’aputuputu te ’āti Nephi nā roto i te mau pupu rau nō te fa’aoti e riro ānei Amaliki ’ei ari’i. ’Ua mā’iti te rahira’a o te mau ta’ata ’ia pāto’i ia Amaliki, ’e ’aita ’oia i riro ’ei ari’i.
’Ua riri Amaliki ’e tōna mau ta’ata pe’e. ’Ua fa’aru’e rātou i te ’āti Nephi, ’ua rave ia Amaliki ’ei ari’i nō rātou, ’e ’ua pi’i ia rātou iho te ’āti Amaliki. ’Ua fa’aue Amaliki e ’aro i te ’āti Nephi.
’Ua fa’aineine te ’āti Nephi parau-ti’a nō te pāruru ia rātou ma te mau fana ’e te mau te’a, te ’o’e ’e te tahi atu mau mauiha’a.
’Ua aro te ’āti Amaliki, ’e te ’āti Nephi arata’ihia e Alama ’e ha’apūaihia e te Atua, ’ua taparahi pohe e rave rahi o rātou. ’Ua horo ’ē ’atu te toe’a o te ’āti Amaliki.
’Ua tono Alama i te mau hi’o nō te hi’o i te ’āti Amaliki. ’Ua ’ite te mau hi’o ia rātou i te ’āmuira’a atu i te nu’u rahi o te ’āti Lamana ’e ’ua ’aro i te ’āti Nephi e ora ra i pīha’i iho ia Zarahemela.
’Ua pure te ’āti Nephi, ’e ’ua tauturu fa’ahou mai te Atua ia rātou. ’Ua taparahi pohe rātou e rave rahi mau faehau nō te nu’u ’āti Lamana-’āti Amaliki
’Ua ’aro Alama ’e o Amaliki ma te ’o’e. ’Ua pure Alama ’ia pāruruhia tōna ora, ’e ’ua hōro’a te Atua i te pūai iāna nō te taparahi pohe ia Amaliki.
Te ’āti Nephi e tīahī ra i te ’āti Lamana ’e te ’āti Amaliki i roto i te medebara. E rave rahi ta’ata pepe tei pohe ’e ’ua ’amuhia e te mau animara ’ōviri.
Mai te ’āti Lamana, ’ua tāpa’o te ’āti Amaliki ia rātou i te ū ’ute’ute, ’o tei fa’ati’a i te parau tohu. ’Ua fa’ata’a ’ē te ’āti Amaliki iā rātou i te mau ha’amaita’ira’a o te ’evanelia.