Mataupu 52

Eteru 11–15

Folasaga

A o otootoina e Moronae faamaumauga mulimuli o sa Iareto, na ia tavavaeina ia faamatalaga o talafaasolopito. Na ia faaaofia ai le tele o tala o le nuu o sa Iareto i le teenaina o savali o le faatuatua a ō latou perofeta. Na ia vaaia foi lea lava vaaiga e tasi i lona lava nuu, o sa Nifae, a o ia talai atu ma lona tama le talalelei. I le iloaina o lena tulaga lava e tasi o le a tupu i o tatou aso, na ia faaaofia ai aoaoga a Eteru e uiga i le faatuatua faapea ai ma le tele o ana foi aoaoga.

A o faitauina ma talanoaina e tamaiti le Eteru 11–15, e mafai ona latou aoaoina le auala e faaaoga ai aoaoga a Eteru ma Moronae i o latou olaga. E mafai ona e fesoasoani ia i latou ia iloa o le faatuatua ia Keriso o le a fesoasoani ia i latou e ola i ni olaga mausali o le tuuto i le Atua. E tatau foi i lau vasega ona malamalama o le faatuatua ia Keriso e taitai atu ai i vavega ma faaaliga ma fesoasoani ai ia i tatou e liliu vaivaiga i le malosi.

O Nisi o Aoaoga Faavae ma Mataupu Faavae

O le faatuatua ma le faamoemoe e taulaina o tatou agaga ma tatou mautinoa ai ma le mausali (tagai i le Eteru 12:1–4).
O le faatuatua maoae e tupu ai vavega (tagai i le Eteru 12:5–22).
E liliu e le Alii o tatou vaivaiga i le malosi a o tatou faamaulalo i tatou lava ma maua le faatuatua ia te Ia (tagai i le Eteru 12:23–41).
O le a fausia le Ierusalema Fou i Amerika (tagai i le Eteru 13:2–12).

Fautuaga mo le Aoaoga

Eteru 11–12. Folasaga i Autu o Lesona

Tofi se tamaitiiti a o lumanai le lesona e saunia se faatinoga e faavae i le folasaga o le mataupu 52 i le tusi lesona a tagata o le vasega ma le faamatalaga mo le Eteru 11 o loo i le itulau 396 i le tusi lesona a tagata o le vasega. Fai atu i le tamaitiiti e folasia mai lenei faamatalaga i le amataga o le vasega.

Aumai se pepa o fatu laau i le vasega. Fai atu i tamaiti pe latou te manatuaina o ai le perofeta o le Tusi a Mamona na faaaogaina se fatu e fai ma lesona faatino e aoao atu ai se mataupu faavae faaleagaga. Pe a toe manatuaina e tamaiti o Alema lea na faaaogaina se fatu e aoao atu ai e uiga i le afioga a le Atua ma le faatuatua (tagai i le mataupu 30 i lenei tusi lesona), fai atu i ai e tomanatu i le faauigaga e Alema o le faatuatua (tagai i le Alema 32:21 ). Valaaulia tamaiti e saili mo fautuaga i le Eteru 12 lea e mafai ona fesoasoani ia i latou e faateleina ai le faatuatua.

Eteru 12:1–4. O Le Faatuatua ma le Faamoemoe e Taulaina o Tatou Agaga ma Tatou Mautinoa ai ma le Mausali

Ata

taula

Faaali atu se ata o se taula (pe tusi foi se taula i luga o le laupapa). Fai atu i tamaiti e faamatala mai le faamoemoega o se taula. Faatonu i latou e sue i le Eteru 12:4.

O le a le mea ua faailoa mai e lenei fuaiupu o loo fai ma “taula i agaga o tagata”?
Aisea tatou te manaomia ai se taula i o tatou agaga?

Faamalamalama atu o fuaiupu 3–4 o loo faailoa mai ai taunuuga o le faatuatua. Faaali atu le siata lenei i luga o le laupapa, ae faaavanoa pea pusa i le itu taumatau o aū. Fai atu i tamaiti e faauma le siata e faavae i luga o mataupu faavae na latou maua i fuaiupu 3–4. O tali e mafai ona maua o loo faaalia i lalo ifo.

Faatuatua e taitai atu ai i le

Salamo

Faataunuuga o mea uma

Faamoemoe

Galuega lelei

Vivii atu i le Atua

Fai atu i tamaiti pe faapefea e le faatuatua ona taitai atu mataupu faavae taitasi po o faatinoga ia ua lisiina i le itu taumatau o aū. Talanoaina puupuu autu taitasi.

E faapefea ona tuu atu ia te oe e le faatuatua ia Keriso le faamoemoe ma taula ai lou agaga?

Eteru 12:5–22. O Le Faatuatua Maoae e Tupu ai Vavega

Valaaulia se tamaitiiti e faitau le Eteru 12:6 .

Tusi i luga o le laupapa le O le a le tofotofoga o le faatuatua? Valaaulia se tamaitiiti se toatasi pe toalua e faasoa mai ni faataitaiga pupuu o tofotofoga o le faatuatua na la’ua oo i ai pe na oo i ai se tasi la te iloaina.

Fai atu i tamaiti e faalogo i saunoaga lenei ma faailoa mai mataupu faavae e fesootai ma tofotofoga o le faatuatua. O le saunoaga a Peresitene James E. Faust o loo maua foi i le companion DVD A.

“E leai ma se tagata e mafai ona mauaina le faaolataga e aunoa ma se tofotofoga maeaea o le faatuatua ma le usiusitai i mataupu faavae o upumoni e faavavau ia ua leva ona faavaeina mai lava i le amataga mo le faaolataga ma le faaeaga o le tagata” (Joseph Fielding Smith, Answers to Gospel Questions, comp. Joseph Fielding Smith Jr., 5 vols. [1957–66], 4:150).

“E tatau ona oo atu mea uma i se afi a le tunu auro, ma o mea lē aoga ma le lē taua i o tatou olaga e mafai ona liusuavaia e pei o le otaota ma pupula ai ma le atoatoa ma le malosi lo tatou faatuatua. E foliga mai o loo i ai se fuataga atoa o le tiga, faanoanoa, ma e masani lava o le loto nutimomoia mo tagata uma, e aofia ai i latou o loo saili atu ma le naunautai e fai le mea tonu ma le faamaoni. Ae o le vaega lenei o le faamamaina ina ia faamasani ai ma le Atua” (James E. Faust, i le Lipoti ole Konafesi, Ape. 1997, 85; po o le Liahona, Iul. 1997, 63).

Faamalamalama atu o nisi taimi e oo mai se tofotofoga o lo tatou faatuatua i foliga o faafitauli; peitai, e le na o le pau lea o le auala e tofotofoina ai lo tatou faatuatua. Fai atu i se tamaitiiti e faitau le saunoaga a Elder Richard G. Scott o loo i le itulau 397 i le tusi lesona a tagata o le vasega. O loo maua foi lenei saunoaga i le companion DVD B.

Na faapefea ona faauigaina e Elder Scott se tofotofoga o le faatuatua?

O loo faasino le Eteru 12:6–22 i tala o tusitusiga paia o faamanuiaga na maua e tagata a o latou onosaia tofotofoga o lo latou faatuatua. Fai le siata lenei i luga o le laupapa:

O ai o loo ta’ua?	Na faapefea ona latou faatinoina le faatuatua?	O a faamanuiaga na latou mauaina?

Vaevae taitoalua le vasega po o ni vaega laiti. Faatonu vaega taitoalua po o vaega e kopi le siata i luga o se fasipepa. Fai atu i ai e faitau le Eteru 12:6–22, tusi tali i fesili i le siata.

Pe a maea le taimi na tuu atu i tamaiti e faamaea ai le gaoioiga, tuu atu ia i latou e mafaufau i faamanuiaga ua ta’ua i le fuaiupu 19.

E mafai faapefea e lenei faamanuiaga ona avea ma se faatusa o mea o le a oo uma i ai e faamaoni i le iuga?
O a ni auala e saunia ai i tatou e faamanuiaga ia e tafe mai le faatuatua e ulu atu ai i le afioaga o le Alii?

Faamalamalama atu na faasoa mai e le Aposetolo o Peteru ni malamalamaaga taua e uiga i tofotofoga o lo tatou faatuatua. Valaaulia tamaiti e faailoa mai malamalamaaga a o faitau e se tamaitiiti le 1 Peteru 4:12–13.

Na fai mai Peteru e le tatau ona tatou mafaufau o se mea e ofo ai pe a oo mai tofotofoga. E mafai faapefea e lenei mataupu faavae ona fesoasoani ia i tatou e onosaia tofotofoga? (Atonu e te manao e faasino atu e faapea e sili atu ona tatou onosaia lelei tofotofoga pe a tatou iloaina o ni vaega na o le olaga.)

Faasoa atu lau molimau e uiga i le tausia e le Alii o Ana folafolaga ma tauia i tatou pe a tatou onosaia tofotofoga o lo tatou faatuatua.

Eteru 12:23–41. E Liliu e le Alii o Tatou Vaivaiga i le Malosi a o Tatou Faamaulalo i Tatou Lava ma Maua le Faatuatua ia te Ia

Valaaulia se tamaitiiti e sau i luma o le vasega ma fai ni faamalositino [push-ups] se sefulu.

O le a le mea e tupu pe afai e faaauau pea ona fai soo e [igoa o le tamaitiiti] lenei faamalositino?
Aisea e malolosi atili ai maso e ala i le faamalositino?
O a nisi o faamalositino faaleagaga e tutusa ma faamalositino faaletino?

Faamalamalama atu ua fesoasoani le Eteru 12 ia i tatou ia malamalama i le auala e mafai ai ona faatoilaloina vaivaiga faaletino i le malosi o le Alii. Valaaulia tamaiti e sailiili le Eteru 12:23–25, saili mo le vaivaiga na iloa e Moronae i faamaumauga na ia tuufaatasia. Fai i tamaiti e faasoa mai mea na latou maua.

Fai i se tamaitiiti e faitau le Eteru 12:27 . O loo i ai i lenei fuaiupu le folafolaga o le a lava le alofa tunoa o le Alii e fesoasoani ai ia i tatou e faatoilaloina o tatou vaivaiga (atonu e te manao e faasino atu i le faamatalaga mo le Eteru 12:27 o loo i itulau 399–400 i le tusi lesona a tagata o le vasega). Tuu atu i tamaiti e faitau le leoa le Eteru 12:26–28, saili mo uiga e tatau ona tatou maua ina ia mafai ai ona lava le alofa tunoa o le Alii e “faia [ai] mea vaivai ma mea malolosi ia te i [tatou].” Atonu e te manao e fautua atu i tamaiti e faailoga nei uiga i a latou tusitusiga paia. E mafai ona aofia i a latou lisi le lotomaualalo, agamalu, faatuatua, faamoemoe, ma le alofa moni.

E faapefea e nei uiga ona fesoasoani ia i tatou e atiina ae le malosi faaleagaga?
E faapefea e nei uiga ona fesootai ma le o mai ia Keriso?
E mafai faapefea e le malosi faaleagaga lea e maua mai le alofa tunoa o Keriso ona totogi vaivaiga faaletino?

Faamatala ina ua uma ona faalogo Moronae i upu a le Alii i fuaiupu 26–28, na “faamafanafanaina” o ia (Eteru 12:29) ma na ia faailoa mai lana molimau o le Alii. Valaaulia tamaiti e faitau le Eteru 12:29–36, saili mo tautinoga o molimau. Uunaia i latou e saili mo faamatalaga ia e amata i le “ua ou iloa” po o le “ua ou manatua.”

O a upumoni na molimau mai ai Moronae?
O faapefea e lau molimau o nei upumoni ona faatosinaina lou olaga?

Faitau le Eteru 12:37 faatasi ma le vasega.

E tusa ai ma lenei fuaiupu, o le a le faamanuiaga o le a maua e Moronae ona na ia vaaia lona vaivaiga?
Mafaufau i sou vaivaiga o i ai. E mafai faapefea e lou faalagolago i le Alii ona fesoasoani ia te oe e liliu lenei vaivaiga i se puna o le malosi faaleagaga?

Valaaulia se tamaitiiti e faitau le Eteru 12:38–41.

E faapefea ona faatosinaina oe ia iloa o nei aoaoga e sau sa’o mai le Alii?
O a mafuaaga ua tuu mai e Moronae mo i tatou e “saili ia Iesu”?

Valaaulia tamaiti e faasoa mai auala na latou maua ai le malosi a o latou o mai i le Faaola.

Eteru 13:2–12. O Le A Fausia le Ierusalema Fou i Amerika

Tusi se ata faigofie i luga o le laupapa e pei o le ata o loo i lalo ifo, ae aua le tuua i ai le upu Fou ma le Tuai.

Ierusalema Fou

Ierusalema Tuai

Faamalamalama atu o lenei ata ua faatusa i le lalolagi. Fai atu i tamaiti pe na latou faalogo muamua i Ierusalema e lua. Afai na latou faalogo i ai, fai atu pe o fea o le a i ai nei aai. Faamalamalama atu o loo faaalia mai le Eteru 13:2–12 le tulaga faale-tagatavaai o Eteru. I nei fuaiupu, na toe faamatalaina ai e Moronae valoaga a Eteru o le Ierusalema Fou ma le Ierusalema Tuai. Faaopoopo atu le upu Fou ma le Tuai i le ata.

Faatonu le afa o le vasega e faitau le Eteru 13:2–12, saili mo valoaga a Eteru e uiga i le Ierusalema tuai. Faatonu le isi afa o le vasega e faitau fuaiupu lava ia e tasi, saili mo valoaga a Eteru e uiga i le Ierusalema Fou. Fai atu i vaega taitasi e fai se tusiupu e tusi i lalo mea ua latou aoaoina. A maea le taimi na tuu atu i le vasega, valaaulia tusiupu taitasi e lisi mai valoaga i luga o le laupapa i lalo o le “Ierusalema Tuai” po o le “Ierusalema Fou.”

E mafai ona i ai i le laupapa ua faamaeaina ia faamatalaga nei:

Ierusalema Tuai

O le a faaumatiaina (tagai i le fuaiupu 5).
O le a toe fausia e avea ma nuu paia o le Alii (tagai i le fuaiupu 5).
O le a fausia mo le aiga o Isaraelu (tagai i le fuaiupu 5).
O le a faamamaina i latou e nonofo ai e ala i le Togiola a Iesu Keriso (tagai i le fuaiupu 11).
O suli na faataapeapeina o e na nonofo muamua i Ierusalema o le a faapotopotoina (tagai i le fuaiupu 11).
O e nonofo ai o le a maua le faataunuuga o le feagaiga na osia e le Atua ma Aperaamo (tagai i le fuaiupu 11).

Ierusalema Fou

O le a fausia i Amerika (tagai i fuaiupu 2–3, 6, 8).
O le a alu ifo mai le lagi (tagai i le fuaiupu 3).
O le a avea ma afioaga paia o le Alii (tagai i le fuaiupu 3).
O le a fausia mo e totoe o le fanauga a Iosefa (tagai i le fuaiupu 6).
O le a pei lava o le Ierusalema tuai (tagai i le fuaiupu 8).
O le a faamamaina i latou e nonofo ai e ala i le Togiola a Iesu Keriso (tagai i le fuaiupu 10).

Mo le aitema 3 i lalo o le “Ierusalema Tuai,” atonu e te manao e faasino atu o le upu mo i le Eteru 13:5 o lona uiga “mo le faaaogaina po o le manuia o.” Mo le aitema 2 i lalo o le “Ierusalema Fou,” atonu e te manao e faasino atu o le valoaga i le Eteru 13:3 o le a faataunuuina se vaega pe a toe foi mai le nuu o Enoka i le lalolagi ma tuufaatasia ma le Ierusalema Fou (tagai foi i le Mose 7:13–21, 62–64).

Fai atu i tamaiti pe o a faamanauiaga o le Ierusalema Fou ua avanoa mo i tatou i le taimi nei, i soo se mea o tatou nonofo ai. Fesoasoani i tamaiti ia iloa o le tele o lo tatou tautino atu o i tatou lava i le ola amiotonu, o le tele foi lena ona tatou maua o le filemu ma le fiafia. E mafai ona e faasoaina atu le Mataupu Faavae ma Feagaiga 59:23 ma i latou.

Valaaulia tamaiti e tautino atu i latou lava i le ola amiotonu i aso taitasi. Faasoa atu lau molimau e uiga i faamanuiaga e oo mai i lenei olaga ma le olaga a sau ona o se taunuuga o le ola amiotonu.

Eteru 14–15. O Le Mutaaga o le Malo o sa Iareto

Fai atu pe i ai se isi o tamaiti e mafai ona aoteleina le faatafunaga o sa Iareto e pei ona faamaumauina i le Eteru 14–15. Afai e le mafai e se tamaitiiti ona faia, ia aotele otooto nei mataupu e oe lava ia pe fai atu i se tamaitiiti e faitau le ulutala mataupu.

Tusi mau faasino nei i luga o le laupapa, ma valaaulia tamaiti e faitau i ai ma faailoga mea na taitai atu ai sa Iareto i le faatafunaga.

Na faapefea ona pulea e Satani loto o nei tagata?
O a ni lesona e mafai ona tatou aoaoina mai le faatafunaga o sa Iareto?