Talateú

Siʻi kau faiako ʻinisititiuti,

ʻI he lea ʻa ʻEletā Kalake G. Kilipeti ʻi he fakamafola ʻo e ako ngāue fakataʻu ʻa e S&I, naʻá ne pehē ai, “ʻI he hokohoko atu ʻemau ngāue ʻaki e ngaahi kalasi alēleá ke hiki hake e mahuʻinga mo e haʻu ki he ʻinisititiutí, naʻá ku tuku atu ai ha fakaafe ki heʻemau kau ngāue ʻi he ʻinisititiutí ke nau kumi ha ngaahi faingamālie ke nau fokotuʻu ha ngaahi kalasi alēlea ke tukutaha ʻi he ngaahi fakamamafa fakaepalōfita kuo mau [fokotuʻutuʻú]. ʻOku ou poupou atu ke mou tokanga makehe ki he ngaahi akonaki ʻa Palesiteni Nalesoní, mo ha fakamamafa ʻi heʻene pōpōaki ko e, “Ngaahi Fili ki he Taʻengatá” (Clark G. Gilbert, “ʻEiki ke ke Folofola Mai; he ʻOku Ongoʻi ʻe Hoʻo Tamaioʻeikí” [fakamafola ʻo e ako fakataʻu ʻa e S&I, 26 Sānuali 2024], Gospel Library).

Hangē ko ia ʻoku mou meaʻí, ko e lea ʻa Palesiteni Lāsolo M. Nalesoni ʻi he fakamafola fakaemāmani lahi ʻi Mē 2022 ʻoku ui ko e “Ngaahi Fili ki he Taʻengatá” ʻoku fakataumuʻa ia ki he kakai lalahi kei talavoú pea ʻokú ne fakafofongaʻi moʻoni ʻa e leʻo ʻo e ʻEikí kiate kinautolu ʻi hotau kuongá (vakai, Tokāteline mo e Ngaahi Fuakava 68:4). ʻI hoʻomou hoko ko e kau faiako ʻinisititiutí, ʻoku mou maʻu ai ʻa e monūʻia mo e faingamālie makehe ke tokoni ke fakamālohia ʻa e pōpoaki ʻa e palōfita ʻa e ʻEikí. Kātaki ʻo fakakaukau mo fai ha ngāue makehe ke ʻoange ha aʻusia fakaako ʻe lava ke mahino, ongoʻi, mo fakaʻaongaʻi ai ʻe he kakai lalahi kei talavoú ʻa e ngaahi akonaki ʻo e lea ʻa Palesiteni Nalesoni ko e “Ngaahi Fili ki he Taʻengatá.” ʻE lava ke tokoni ʻa e naunau ʻoku ʻoatu hení ʻi hoʻomou ngaahi ngāué.

ʻOku kau ʻi he naunau ko ʻení ha lēsoni ʻe ua ʻe lava ke fakaʻaongaʻi ke ʻoatu ai ha aʻusia fakaako ʻi he ako ngāué ʻoku fakatefito ʻi he lea ʻa Palesiteni Nalesoní. ʻOku ʻikai fakataumuʻa ia ke mou akoʻi fakapatonu ʻa e ongo lēsoni ko ʻení. Ka ʻoku hoko ʻa e ongo lēsoni ko ʻení ko ha maʻuʻanga tokoni ia ʻi hoʻomou teuteu ha aʻusia fakaako maʻa hoʻomou kau akó. Ongoʻi tauʻatāina ke liliu ia ʻo fakatatau mo hono ueʻi fakalaumālie kimoutolú. ʻI he kamataʻanga ʻo e ngaahi palani ʻo e lēsoní, te mou fakatokangaʻi ha fakamatala ʻo e ngaahi ola ʻo e akó. ʻI hoʻomou palani homou ngaahi ʻekitivitī ako ki he ako ngāué, manatuʻi ʻa e ngaahi ola ko ʻení pea feinga ke palani ha ngaahi ʻekitivitī ako ʻe tokoni ki he kau akó ke nau aʻusia ʻa e ngaahi ola ko ʻení. ʻOku ʻi ai e ʻamanaki ʻe lava ke fakahoko ʻa e ako ngāué ni ʻi ha fakataha ʻe ua pe tolu, ʻo makatuʻunga ʻi he lōloa ʻo e fakataha takitaha.

ʻI hoʻomou teuteu homou ako ngāué, manatuʻi hotau fatongia ke ʻoange ha ngaahi aʻusia ʻoku fakatefito ʻia Kalaisi, fakatefito ʻi he folofolá, fakatefito ʻi he tokotaha akó pea mo ʻai ʻa e ueʻi mo e fakamoʻoni ʻo e Laumālie Māʻoniʻoní ke hoko ko e tefitoʻi moʻoni ʻokú ne fakahinohinoʻi ʻa e ngaahi aʻusia fakafaiakó mo fakaakó (vakai, Chad H Webb, “Kau Talafekau ʻo e Ongoongo Leleí” [fakamafola ako fakataʻu ʻa e S&I, 27 Sānuali 2023], Gospel Library). Feinga foki ke fakahoko ʻa e ngaahi tefitoʻi moʻoni ʻo e faiako ʻaki ʻa e ʻulungaanga faka-Kalaisí ʻoku maʻu ʻi he Ko e Faiako ʻi he Founga ʻa e Fakamoʻuí.

ʻOku mau ʻamanaki atu ki he ngaahi aʻusia fakaʻofoʻofa ʻe maʻu ʻe hoʻomou kau akó ʻi heʻenau keinanga ʻi he folofola ʻa Kalaisí ʻo hangē ko ia ne akoʻi ʻe Palesiteni Nalesoni ʻi he lea mahuʻinga ko ʻení. Fakamālō atu ʻi hoʻomou tuí mo e fakamoʻoní pea mo hoʻomou ngaahi ngāue kotoa pē ke tāpuekina ʻa e kakai lalahi kei talavou ʻoku mou tokoniʻí.