Vei Kemudrau Na Noqu iTokani Dauveiqaravi, mai vei Linda Curley Christensen kei Michael T. Malm

14 ni Feperueri

Na Cava na Matabete?

Vunau kei na Veiyalayalati 12–13; Josefa Simici—Ai Tukutuku 1:66–75

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. Na itaviqaravi cava so eda sa qai vakayacora walega oqo? Era a maucokona li? Na cava a lako vinaka, kei na sala cava eda rawa ni vakavinakataka kina?

• Noda itavi se icolacola. O cei e gadreva tu na noda veiqaravi? E rawa vakacava ni da vukei ira?

• Noda bula. Na takete cava so eda sa cakacakataka tiko vakayadua? Na cava so e sotavi eda rawa ni wasea? Na veivakalougatataki cava so eda sa ciqoma?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ni ko wilika na ka e baleta na vakalesui mai ni Matabete i Eroni ena Vunau kei na Veiyalayalati 13, tovolea mo wili curuma na matadra o ira o vakavulica. Era kila deivaki tu li na kaukauwa ni matabete ena nodra bula? E sa vukei iko vakacava ni ciqoma na kaukauwa ni iVakabula na cakacaka vakalotu ni matabete eso vaka na papitaiso kei na sakaramede? Vakasamataka na veika sa sotavi o rawa ni wasea. Me vakarautaki iko ni vakavulica na matabete, navuca ni vulica na ivolanikalou e vakaturi tiko ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale kei na “Matabete” ena iDusidusi ki na iVolanikalou (scriptures.ChurchofJesusChrist.org).

Sa vukei keda na ivolanikalou ni kila vakamatata na sala e vakalougatataka kina na noda bula na matabete.

Vulica Vata

Me tekivutaki e dua na veivosaki ni matabete, o na via sureta na lewe ni kuoramu se kalasi me ra wasea na ka era kila tu me baleta na vakalesui mai ni Matabete i Eroni, oka kina na ka era sa wilika ena macawa oqo ena Vunau kei na Veiyalayalati 13 kei na Josefa Simici—Ai Tukutuku 1:66–75. Sa rawa talega ni o vakaraitaka e dua na yaloyalo e vakatakila na vakalesui mai ni Matabete i Eroni (vaka na Gospel Art Book [2009], naba 93) ka sureta na lewe ni kuoramu se kalasi me ra wasea na ka era kila me baleta na veika oqo. Cava na vuna eda vakavinavinakataka kina ni sa vakalesui mai na matabete? Na veitaviqaravi oqo sa rawa ni vukei ira o vakavulica ni kila vakavinaka cake na vatuka ni matabete kei na sala eda sa vakalougatataki mai kina.

• Era na vakamacalataka vakacava na lewe ni kuoramu se kalasi na vatuka ni matabete kivua e dua ka se sega taumada ni rogoca? Me vukei ira, sa rawa ni o vola ena papa eso na taro ena tiko vei ira na tamata me baleta na matabete, vaka na Na cava na matabete? E dau ciqoma vakacava e dua na tamata na matabete? Na ivakarau cava sa dodonu me vakayacora e dua na tauri matabete? Na cava era dau cakava na matabete? Sureti ira o vakavulica ni vakaraica na isaunitaro eso ena vakayagataki ni ivolanikalou kei na ivurevure tale eso e kune ena “iVurevure Veitokoni Eso” ka vola na nodra isaunitaro ena papa. O na via kerei ira ni wasea na veivakalougatataki esa yaco mai ki na nodra bula ena vuku ni matabete. O rawa talega ni vakaraitaka ka veivosakitaka na vidio “How the Priesthood Works” (ChurchofJesusChrist.org; raica talega Dale G. Renlund, “Na Matabete kei na Kaukauwa ni Veisorovaki ni iVakabula,” Liaona, Nove. 2017, 64–67).

• Kevaka o vakavulici ira na tauri Matabete i Eroni, sa rawa ni yaga vei ira na railesuvi ni tukutuku i Baraca Douglas D. Holmes “Me ra Kila na Matabete i Eroni Yadua” (Liaona, May 2018, 50–53). Sa rawa ni o lesia na lewe ni kuoramu yadua me railesuva na matai ni vica na parakaravu ni tukutuku se dua vei ira na vo ni va na wase. Sureta na tamata yadua me vakaraica e dua na ka e nanuma sa gadrevi mera kila deivaki na tauri Matabete i Eroni. Solia vua na gauna me wasea na ka esa vulica ka vakamacalataka na vuna a digitaka kina na ivakavuvuli oya.

• Kevaka o vakavulici ira na goneyalewa, sa rawa ni o wasea na itukutuku i Peresitedi Russell M. Nelson “iYau Talei Vakayalo,” e a vagolei vei ira (Liaona, Nove. 2019, 76–79). Sa rawa ni o kerea na lewe ni kalasi me ra vakasaqara na nona itukutuku ni vakaraici e dua na ka era rawa ni cakava me vakataucokotaki kina na “dreti ni kaukauwa ni iVakabula” ena nodrau bula (tabana e 77). Na cava e vakavulica o Peresitedi Nelson ena sala eda rawa ni rawata kina na kaukauwa ni matabete? E rawa vakacava ni vakalougatataki keda na kaukauwa ni matabete? Vakauqeti ira na goneyalewa ni navuca na sala era na cakacakataka kina na veisureti oqo mai vei Peresitedi Nelson: “Au sa vakamasuti kemuni mo ni vulica ena yalomasumasu na dina taucoko o ni rawa ni raica me baleta na kaukauwa ni matabete” (tabana e 79).

Cakacaka ena Vakabauta

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na nodra dui veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Vunau kei na Veiyalayalati 84:17–22; 107:1–5 (Na matabete sai koya na kaukauwa kei na dodonu ni lewa ni Kalou)

• Iperiu 5:4; Yavu ni Vakabauta 1:5 (Na Kalou sa kacivi ira na tauri matabete ka vakatikori mai na dua ka tu vua na dodonu ni lewa)

• Vunau kei na Veiyalayalati 121:34–46 (Ena cakacaka walega na kaukauwa kei na dodonu ni lewa ni matabete ena ivakavuvuli ni buladodonu)

• Maciu 3:1–6; 28:16–19; Joni 15:16; Vunau kei na Veiyalayalati 12:3–4 (Era vunautaka na kosipeli na turaga kei na marama bula kilikili)

• Cakacaka 3:1–8; Jemesa 5:14–15 (Era soli veivakalougatataki na tauri matabete me vakabulai kina na tauvimate kei na vakaleqai)

• 3 Nifai 11:21–22; 18:1–5; Vunau kei na Veiyalayalati 107:20 (Era qarava na cakacaka vakalotu eso na tauri matabete)

• Vunau kei na Veiyalayalati 65:2; 107:18–21 (Era vukea na cicivaki ni Lotu na tauri matabete)

• “Matabete i Eroni,” “Matabete i Melikiseteki,” “matabete,” ena Tudei ena Vakabauta (2004), 3–4, 101–2, 124–28

Veivakavulici ena iVakarau ni iVakabula

A vakavulici ira na Nona tisaipeli na iVakabula mera goleva na ivolanikalou ena isau ni taro eso ka ciqoma na kaukauwa vakayalo. O rawa vakacava ni vakauqeti ira o vakavulica ni goleva na ivolanikalou mera raica kina na isau ni nodra vakatataro kei na bolebole? (Raica na Veivakavulici ena iVakarau ni iVakabula [2016], 30.)