Sa’ eeb’een laa’ex, ex wech moosil,xb’aan li xLinda Curley Christensen ut laj Michael T. Malm

14 febrero

K’a’ru li tijonelil?

Tzol’leb’ ut Sumwank 12–13; Jose Smith—Resilal 1:66–75

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ruheb’ li k’anjel ak xqab’aanu sa’ komonil? Ma chaab’il x’el? K’a’ru li chaab’il x’el, ut k’a’ru li naru xchaab’ilob’resinkil?

• Li k’a’ru teneb’anb’il sa’ qab’een. Ani naraj ru li qatenq’? Chan ru taqatenq’aheb’?

• Sa’ li qayu’am. K’a’ruheb’ li meta xqak’ojob’ qajunes qib’? Ma wan k’a’ru xqak’ul li naru xyeeb’al resil? K’a’ru li osob’tesink ak xqak’ul?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq nakawil resil lix k’ojob’ankil wi’chik li Tijonelil re Aaron sa’ Tzol’leb’ ut Sumwank 13, k’oxla chan raj ru te’xk’ul li saaj li aatin a’an. Ma neke’xtaw ru lix wankilal li tijonelil sa’ xyu’ameb’? Chan ru naq li kub’iha’, li loq’laj wa’ak, ut xkomoneb’ chik li k’ojob’anb’il k’anjel sa’ li tijonelil ak xate’xtenq’a chixk’ulb’al lix wankilal li Kolonel? K’oxla k’a’ru ak xak’ul sa’ laa yu’am li naru taaye resil. Re xkawresinkil aawib’ chi k’utuk chirix li tijonelil, naru taawileb’ li raqal re loq’laj hu sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, jo’ ajwi’ “Tijonelil sa’ li K’utul Raqal reheb’ li Loq’laj Hu.

Eb’ li loq’laj hu nokohe’xtenq’a chixtawb’al ru chan ru nokorosob’tesi li tijonelil.

Tzolok sa’ komonil

Re aatinak chirix li tijonelil, naru taapatz’ reheb’ li saaj naq te’xwotz k’a’ru neke’xnaw chirix lix k’ojob’ankil wi’chik li Tijonelil re Aaron, jo’ ajwi’ li xe’xtzol chiru li xamaan a’in sa’ Tzol’leb’ ut Sumwank 13 ut Jose Smith—Resilal 1:66–75. Naru ajwi’ taak’ut xjalam-uuch lix k’ojob’ankil wi’chik li Tijonelil re Aaron (chanchan Hu reheb’ li Jalam-uuch re li Evangelio [2009], 93) ut taapatz’ reheb’ li saaj naq te’xwotz k’a’ru neke’xnaw chirix a’an. K’a’ut naq naqab’antioxi lix k’ojob’ankil wi’chik li tijonelil? Xb’aanunkil a’in naru tixtenq’aheb’ li saaj chixtawb’al ru k’a’ru li tijonelil ut chan ru nokorosob’tesi.

• Chan ru te’xch’olob’ li saaj k’a’ru li tijonelil chiru li ani maajun wa xrab’i resil? Re xtenq’ankileb’, naru taatz’iib’a chiru li pizarron li k’a’ru maare taapatz’manq chirix li tijonelil: K’a’ru li tijonelil? Chan ru nak’ulman li tijonelil? Chan raj ru xna’leb’ li ani wan sa’ li tijonelil? K’a’ru nab’aanuman sa’ li tijonelil? Patz’ reheb’ li saaj naq te’xsik’ xsumenkileb’ li patz’om a’in sa’eb’ li loq’laj hu ut sa’ “Xkomon chik li tenq’,” ut naq te’xtz’iib’a lix sumenkil chiru li pizarron. Naru taapatz’ reheb’ naq te’xye chan ru ak xe’usilaak sa’ xyu’am xb’aan li tijonelil. Chi’ilmanq ajwi’ Dale G. Renlund, “Li tijonelil ut lix wankil aj tojol-ix li Kolonel,” Jolomil ch’utub’aj-ib’ re octubre 2017).

• Wi nakatzoleb’ aj Tijonelil re Aaron, maare us naq te’ril li raatin li Hermano Douglas D. Holmes “Li k’a’ru tento te’xtaw ru chixjunileb’ li neke’k’amok re li Tijonelil re Aaron,” (Jolomil ch’utub’aj-ib’ re abril 2018). Naru taapatz’ reheb’ li saaj naq te’ril xtiklajik li aatin, malaj jalan chik xtasalil li aatin. Patz’ reheb’ naq te’xsik’ jun na’leb’ li te’xye naq chixjunileb’ aj k’amol re li Tijonelil re Aaron tento te’xtaw ru. Kanab’eb’ chixch’olob’ankil li na’leb’ ut k’a’ut naq xe’xsik’ ru

• Wi nakatzoleb’ li saaj ixq, naru taawotz li raatin li Awa’b’ej Russell M. Nelson “Li musiq’ejil b’ihomal,” li kixye reheb’ li ixq (Jolomil ch’utub’aj-ib’ re octubre 2019). Naru taapatz’ reheb’ naq te’ril li raatin re xtawb’al k’a’ru li naru te’xb’aanu re “roksinkil lix wankil li Kolonel” sa’ xyu’ameb’. K’a’ru kixye li Awa’b’ej Nelson chirix roksinkil lix wankilal li tijonelil sa’ li qayu’am? Chan ru naq too’osob’tesiiq xb’aan lix wankilal li tijonelil? Tenq’aheb’ li saaj ixq chixk’oxlankil k’a’ru te’xb’aanu re xb’aanunkil li kixye li Awa’b’ej Nelson: “Nin’elajin eere naq teetzol rik’in tijok chixjunileb’ li yaal naru teetaw chirix lix wankilal li tijonelil.”

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’ li neke’raj xjayalinkil sa’ xyu’ameb’? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Tzol’leb’ ut Sumwank 84:17–22; 107:1–5 (Li tijonelil, a’an lix wankilal li Dios)

• Hebreos 5:4; Eb’ lix Raqalil li Paab’aal 1:5 (B’oqb’ileb’ li neke’k’amok re li tijonelil xb’aan li Dios, ut k’ojob’anb’ileb’ xb’aan li ani k’eeb’il xwankil)

• Tzol’leb’ ut Sumwank 121:34–46 (Lix wankilal li tijonelil nak’anjelak ka’ajwi’ rik’in li na’leb’ re tiikilal)

• Mateo 3:1–6; 28:16–19; Jwan 15:16; Tzol’leb’ ut Sumwank 12:3–4 (Eb’ li winq ut li ixq tiikeb’ xch’ool neke’xjultika li evangelio)

• Hechos 3:1–8; Santiago 5:14–15 (Eb’ li neke’k’amok re li tijonelil neke’rosob’tesiheb’ li yaj ut li tawasinb’ileb’)

• 3 Nefi 11:21–22; 18:1–5; Tzol’leb’ ut Sumwank 107:20 (Eb’ li neke’k’amok re li tijonelil neke’xk’anjela li k’ojob’anb’il k’anjel)

• Tzol’leb’ ut Sumwank 65:2; 107:18–21 (Eb’ li neke’k’amok re li tijonelil neke’tenq’an sa’ xjolominkil li Iglees)

• “Sacerdocio Aarónico,” “Sacerdocio de Melquisedec,” “Sacerdocio,” sa’ Leales a la Fe (2004), 3–4, 101–2, 124–28

Li k’utuk jo’ li Kolonel

Li Kolonel kixk’ut chiruheb’ lix tzolom naq te’rileb’ li loq’laj hu re re naq te’xtaw xsumenkileb’ lix patz’om ut te’xk’ul musiq’ejil kawilal. Chan ru taatenq’aheb’ li saaj chirilb’aleb’ li loq’laj hu re naq te’xtaw xsumenkileb’ lix patz’om ut lix ch’a’ajkilal? (Chi’ilmanq Li k’utuk jo’ li Kolonel [2016], 30.)