Li Kristo sa’ Getsemani, xb’aan laj Heinrich Hofmann

28 marzo

K’a’ut naq aajel ru choq’ we lix tojb’al rix li maak xb’aan li Jesukristo?

Tzolʼlebʼ ut Sumwank 29

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ru naru taqab’aanu re xjunajinkileb’ li saaj? K’a’ruheb’ li meta taqaj xk’ojob’ankil sa’ komonil?

• Li k’a’ru teneb’anb’il sa’ qab’een. K’a’ru yooko chixb’aanunkil re xwotzb’al li evangelio? Ma wan ani sa’ qayanq li naru tixseraq’i junaq na’leb’ li xk’ul chaq sa’ xb’aanunkil li k’anjel re li santil ochoch ut re li qaxe’ qatoon?

• Sa’ li qayu’am. B’ar ak xqil li ruq’ li Qaawa’ sa’ li qayu’am? K’a’ru xwaklesi qach’ool naq xqatzoleb’ li loq’laj hu chiru li xamaan a’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li Awa’b’ej Ezra Taft Benson kixye: “Jun winq ink’a’ narataw tzekank toj reetal naq yoo xtz’okajik, jo’kan ut naq ink’a’ narataw kole’k xb’aan li Kristo toj reetal naq naxnaw k’a’ut naq naraj ru li Kristo. Maa’ani naxnaw chi tz’aqal k’a’ut naq naraj ru li Kristo toj reetal naq naxtaw ru ut naxpaab’ li T’ane’k ut li k’eeb’il sa’ xb’eeneb’ chixjunil li winq xb’aan” (“El Libro de Mormón y Doctrina y Convenios,” Liahona, enero 2005, 8–12). Sa’ xtzolb’al Tzol’leb’ ut Sumwank 29 chiru li xamaan a’in, maare xak’e reetal li kixye li Kolonel chirix li T’ane’k ut chan ru naq tojb’il qix chiru. Chan ru xak’ul lix nawom aach’ool chirix li Jesukristo jo’ aj Kolol aawe ut aj Tojol aawix? K’oxla chan ru te’jale’q li saaj xb’aan xkawob’resinkil lix nawom xch’ool chirix li Jesukristo. Naq nakakawresi li tzolok, naru taawil “El albedrío y la caída de Adán y Eva,” “La Expiación de Jesucristo,” ut “La misión divina de Jesucristo” sa’ li ch’ol 3 re Predicad Mi Evangelio ([2019], 49–52, 60–61).

Li Kolonel kixtoj qix chiru li T’ane’k, jo’kan naq naru taqak’ul xsahil qach’ool.

Tzolok sa’ komonil

Re xtikib’ankil li aatinak, naru taapatz’ reheb’ li saaj naq te’xtz’iib’a chiru pizarron k’a’ru li neke’xnaw chirix lix t’anik laj Adan ut li xEva. K’a’ru neke’xtzol chirix li T’ane’k sa’ Tzol’leb’ ut Sumwank 29:36–50? K’a’ru toj na’ux sa’ li ruchich’och’ anajwan xb’aan li T’ane’k? Xb’aanunkil a’in tixtenq’aheb’ li saaj chixtawb’al ru chan ru naq lix tojb’al rix li maak xb’aan li Jesukristo nokoxtenq’a chi numtaak sa’ xb’een chixjunil li na’uxman xb’aan li T’ane’k.

• Re xtawb’al ru lix t’anik laj Adan ut li xEva, maare li saaj te’ril “Caída” sa’ Leales a la Fe (36–39) malaj “El albedrío y la caída de Adán y Eva” sa’ li ch’ol 3 re Predicad Mi Evangelio (49–50). Patz’ reheb’ naq te’xk’oxla naq jun li ramiiw tixpatz’, “K’a’ut naq aajel ru li Jesukristo choq’ we?” Patz’ reheb’ naq sa’ ka’kab’il te’xyal xsumenkil li patz’om a’an rik’in li na’leb’ xe’xtaw.

• Chan ru taatenq’aheb’ li saaj chixtzolb’al sa’eb’ li loq’laj hu k’a’ut naq aajel ru lix tojb’al rix li maak xb’aan li Jesukristo? Naru taatz’iib’a chiru li pizarron wiib’ oxib’ li raqal re loq’laj hu sa’ “Xkomon chik li tenq’,” ut taatz’iib’a lix ch’olob’ankileb’ li raqal a’an chiru kok’ hu. K’eheb’ li kok’ hu reheb’ li saaj chi junjunqal. Patz’ reheb’ naq te’rileb’ li raqal li wankeb’ chiru li pizarron, ut naq te’xtaw kok’ hu li naxk’am rib’ rik’in. (Wankeb’ li kok’ hu li neke’xk’am rib’ rik’in wiib’ oxib’ li raqal.) Patz’ reheb’ li saaj naq te’xyaab’asi li raqal li naxk’am rib’ rik’ineb’ li kok’ hu, ut naq te’xye k’a’ru xe’xtzol chirix lix tojb’al rix li maak xb’aan li Kolonel ut k’a’ut naq aajel ru.

• Patz’ reheb’ li saaj naq te’xsumeheb’ li patz’om a’in sa’ xk’a’uxleb’: Chan ru naq osob’tesinb’ilin xb’aan lix tojb’al rix li maak xb’aan li Jesukristo? K’a’ru naraj li Kolonel naq tinjal re naq tink’ul xkomoneb’ chik li osob’tesink xb’aan lix tojb’al rix li maak? Toja’ naq taapatz’ reheb’ naq te’aatinaq sa’ komonil chirix li xb’een patz’om. Naru te’ril “La Expiación de Jesucristo” ut “La misión divina de Jesucristo” sa’ li ch’ol 3 re Predicad Mi Evangelio (51–52, 60–61) ut eb’ li video sa’ “Xkomon chik li tenq’.” Patz’ reheb’ naq te’xwotz k’a’ru xe’xtzol.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Tzol’leb’ ut Sumwank 19:16–19 (Li Jesukristo kixtoj xtz’aq li qamaak re naq ink’a’ taqak’ul rahilal wi taqajal qak’a’uxl)

• 2 Nefi 9:6–16; Alma 42:6–9 (Li Jesukristo nokoxkol chiru li kamk ut li xb’alb’a)

• 2 Nefi 2:5–10; Helaman 14:15–17 (Junes xb’aan li Jesukristo naq naru toosutq’iiq rik’in li Dios)

• Mosiah 3:7; Alma 7:11–13 (Rik’in naq li Kristo kixk’ul sa’ xb’een li qach’a’ajkilal ut li qamaak, a’an naxnaw qatenq’ankil)

• Moises 5:10–12 (Xb’aan naq li Kolonel kixtoj qix chiru li T’ane’k, naru taqak’ul xsahil qach’ool)

• Walter F. González, “Lix toch’om li Kolonel,” Jolomil ch’utub’aj-ib’ re octubre 2019

• “Merced, justicia y amor”, “Por qué necesitamos un Salvador”, “La Expiación nos habilita”, (eb’ li video) ChurchofJesusChrist.org

Li k’utuk jo’ li Kolonel

Li Kolonel kitijok chirixeb’ lix tzolom ut kik’anjelak chiruheb’ rajlal. Kiwan rik’ineb’ ut kixk’ut xrahom choq’ reheb’. K’a’ru naru taab’aanu re xb’aanunkil ajwi’ a’an choq’ reheb’ laa tzolom? (Chi’ilmanq Li k’utuk jo’ li Kolonel [2016], 6.)