Li Jesus naxch’aj roqeb’ li apostol, xb’aan laj Del Parson

25 abril

Chan ru tink’anjelaq chiruheb’ li was wiitz’in jo’ kixb’aanu li Kristo?

Tzolʼlebʼ ut Sumwank 41–44

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Aniheb’ li ak’ sa’ qateep, ut chan ru taqak’eheb’ chireek’a naq k’ulb’ileb’ qab’aan? K’a’ru yooko chixb’aanunkil re naq chaab’ilaq li ch’utam choq’ qe?

• Li k’a’ru teneb’anb’il sa’ qab’een. K’a’ru li k’anjel teneb’anb’il sa’ qab’een jo’ saaj winq malaj ixq? Chan ru naru taqab’aanu li k’anjel a’an chi chaab’il?

• Sa’ li qayu’am. K’a’ru yooko chixb’aanunkil re wank jo’ li Jesukristo ut re xk’ulb’al lix wankil sa’ li qayu’am? K’a’ru yooko chixb’aanunkil re xtenq’ankil li qajunkab’al chi chalk rik’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq li Qaawa’ kixtaqlaheb’ laj santil paab’anel chixch’utub’ankil rib’ aran Kirtland, Ohio, ke’wan naab’al li ke’xkanab’ li rochoch ut xkoheb’ aran. A’b’an li rajom a’in maawa’ yal xjalb’al xna’ajeb’—a’an xjalb’al aj b’an wi’ xyu’ameb’. Maare li saaj xe’ril Tzol’leb’ ut Sumwank 41–44 chiru li xamaan a’in ut xe’xtzol chirix lix xikikeb’ laj santil paab’anel toj sa’ Kirtland ut chirix ajwi’ li chaq’rab’ kixk’utb’esi li Qaawa’ chiruheb’ aran. Li Qaawa’ kiraj naq te’wanq laj santil paab’anel sa’ junajil rik’in xraab’al ut xtenq’ankil rib’ chirib’ileb’ rib’ (chi’ilmanq Tzol’leb’ ut Suwmank 42:30–31, 38–39, 45; 44:6). Ma wan li ak xak’ul sa’ laa yu’am li naru taaye resil re naq taatenq’aheb’ li saaj chireek’ankil naq nim xwankil li k’anjelak jo’ li Kristo?

Re taakawresi aawib’ chi k’utuk chirix li k’anjelak jo’ li Kristo, naru taawil “K’anjelak chiru li qas qiitz’in sa’ Choq’ re Xkawilaleb’ li Saaj ([2011], 32–33) ut li raatin li Awa’b’ej Russell M. Nelson “Xkab’ li xnimal ru taqlahom” (Jolomil ch’utub’aj-ib’ re octubre 2019).

Naru took’anjelaq chiru li qas qiitz’in jo’ kixb’aanu li Kolonel.

Tzolok sa’ komonil

Re aatinak chirix li k’anjelak jo’ li Kristo, naru taatz’iib’a chiru li pizarron “Wank sa’ komonil rik’in rahok” (Tzol’leb’ ut Sumwank 42:45). Patz’ reheb’ li saaj naq te’ril Tzol’leb’ ut Sumwank 42:30–31, 38–39, 45; 44:6 ut te’xye chan ru kiraj li Qaawa’ naq laj santil paab’anel te’xtenq’a rib’ chirib’ileb’ rib’. K’a’ru naru taqab’aanu, chi sa’ ut chirix li qochoch, re k’anjelak chiruheb’ li neke’raj tenq’aak sa’ tib’elej, sa’ xk’a’uxlej, malaj sa’ musiq’ej. Naru xb’aanunkil a’in re xtenq’ankileb’ li saaj chi k’anjelak chiruheb’ li ras riitz’in jo’ li Kristo.

• Re xtenq’ankileb’ li saaj chixk’eeb’al reetal li k’anjel kixb’aanu li Kolonel, naru taapatz’ reheb’ naq te’ril jun seraq’ sa’ loq’laj hu chirix li Jesukristo naq kik’anjelak chiru li ras riitz’in (chi’ilmanq “Xkomon chik li tenq’ ”). Naru te’xye chi k’osb’il ru k’a’ru kixb’aanu li Kolonel re k’anjelak chiru ras riitz’in. K’a’ru neke’xk’ut li seraq’ a’in chirix li k’anjelak jo’ kixb’aanu li Kolonel? Chan ru naq jalan li tenq’ank naxb’aanu li Kolonel chiru jalaneb’ chik li tenq’? Maare li saaj naru te’xye resil k’a’ru xe’xk’ul naq xe’xyal xq’e chi k’anjelak jo’ li Kolonel, malaj naq ani chik xk’anjelak chi jo’kan chiruheb’.

• Maare us raj choq’ reheb’ li saaj naq te’ril li k’a’ru kixye li Kolonel ut eb’ lix profeet chirix li k’anjelak chiru qas qiitz’in. A’ineb’ junjunq li raqal naru te’ril: Mateo 25:31–46; Lukas 10:25–37; Jwan 13:34–35; Santiago 1:27; Mosiah 2:17; 18:8–10. Ye reheb’ naq te’xtz’iib’a li k’a’ru neke’xtzol, ut naq te’xwotz li neke’xk’oxla chirix a’an. Toja’ naq te’xk’oxla chan ru te’k’anjelaq chiruheb’ li ras riitz’in jo’ kixb’aanu li Kristo. (Naru te’xtaw xna’leb’ naq te’rileb’ li video sa’ “Xkomon chik li tenq’ ” malaj te’roksi JustServe.org.)

• Re xtenq’ankileb’ li saaj chirilb’aleb’ li ras riitz’in, naru teeril sa’ komonil li raatin li Awa’b’ej Bonnie H. Cordon “Wulak chi wank jo’ jun aj ilol karneer” (Jolomil ch’utub’aj-ib’ re octubre 2018). Naru taatikib’ a’an rik’in xk’utb’al wiib’ oxib’ xjalam-uuch li Kolonel naq yoo chi k’anjelak chiruheb’ li ras riitz’in (Li Awa’b’ej Cordon kixk’ut junjunq sa’ li raatin). K’a’ru neke’xk’ut li jalam-uuch a’in chirix rilb’aleb’ li qas qiitz’in jo’ naxb’aanu li Kristo? Naru taapatz’ reheb’ li saaj naq sa’ ka’kab’il te’ril jun xraqal li raatin li Hermana Cordon, ut naq te’xwotz li xe’xtzol chirix li k’anjelak jo’ li Kolonel. Naru ajwi’ te’xye resil li na’leb’ neke’xtzol naq yookeb’ chi tz’aqonk sa’ rilb’aleb’ li ras riitz’in.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’ li neke’raj xjayalinkil sa’ xyu’ameb’? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Mateo 14:13–21; Jwan 9:1–11; 13:4–5, 12–17; 1 Nefi 11:31; 3 Nefi 17:5–10 (Li Jesukristo kik’anjelak chiru li ras riitz’in)

• Joy D. Jones, “Sa’ xk’ab’a’ a’an,” Jolomil ch’utub’aj-ib’ re octubre 2018

• “Si nos olvidamos de nosotros mismos,” “Jóvenes en acción,” “Oportunidades para hacer el bien” (eb’ li video), ChurchofJesusChrist.org

Li k’utuk jo’ li Kolonel

Sa’ lix k’anjel sa’ ruchich’och’, li Jesukristo kik’anjelak chiruheb’ li ras riitz’in ut kixtenq’aheb’. Chi jo’kan ajwi’ neke’xb’aanu lix tzolom li Kristo (chi’ilmanq Jwan 13:35). Ke’ reetal jo’q’e naru taab’oqeb’ chixyeeb’al resil chan ru xe’k’anjelak chiruheb’ li ras riitz’in, ut k’a’ru xwaklesi xch’ooleb’ chixb’aanunkil. (Chi’ilmanq Li k’utuk jo’ li Kolonel [2016], 4–5.)