9 mayo

Chan ru tinrosob’tesi li Santil Musiq’ej wulaj wulaj?

Tzol’leb’ ut Sumwank 46–48

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Ani taaraj ru qatenq’ ut qatij? K’a’ru naru taqab’aanu re xtenq’ankil? Ani raj taqab’oq sa’ jun ch’ina k’anjel qik’in?

• Li k’a’ru teneb’anb’il sa’ qab’een. K’a’ru lee k’anjel ak xechoy xb’aanunkil? K’a’ru k’anjel toj tento teeb’aanu? Chan ru ak xqab’oqeb’ jalan chi chalk rik’in li Kristo, ut chan ru toj taqab’oqeb’ jalan chik?

• Sa’ li qayu’am. K’a’ru toje’ xqanumsi li xkawob’resi lix nawom qach’ool? K’a’ru yooko chixk’ulb’al sa’ li qayu’am, ut chan ru taqatenq’a qib’ chiqib’il qib’?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naab’aleb’ li komon sa’ xtiklajik li Iglees ak xe’ril resil sa’ loq’laj hu naq li Santil Musiq’ej naxk’utb’esi rib’ (chi’ilmanq Hechos 2:1–4; 13:52; 1 Korintios 12:4–11; 3 Nefi 19). Naq eb’ li saaj xe’ril Tzol’leb’ ut Sumwank 46–48 chiru li xamaan a’in, maare xe’xtzol naq li Qaawa’ kiraj xtzolb’aleb’ laj santil paab’anel a’an chirixeb’ li osob’tesink taaruuq tixk’e li Santil Musiq’ej sa’ xyu’ameb’. K’a’ru ak xak’ul sa’ laa yu’am li naxk’ut chawu chan ru nakatrosob’tesi li Santil Musiq’ej? Chan ru naq li Santil Musiq’ej tixtenq’aheb’ li saaj sa’ xyu’ameb’?

Re xkawresinkil aawib’ chixtenq’ankileb’ li saaj re naq te’raj xsik’b’al lix wankil li Santil Musiq’ej, naru taawil “Las funciones del Espíritu Santo” sa’ Leales a la Fe ([2004], 72–73) ut li raatin li Elder Gary E. Stevenson “Chan ru natenq’an aawe li Santil Musiq’ej?” (Jolomil ch’utub’aj-ib’ re abril 2017).

Li Santil Musiq’ej naru tooxtenq’a chixtawb’al ru ut chixk’utb’al li evangelio.

Tzolok sa’ komonil

Wan resileb’ naab’al li musiq’ejil maatan sa’eb’ li loq’laj hu. Chan ru taatenq’aheb’ li saaj chixpaab’ankil naq neke’ru chi k’utb’esimank li maatan a’in sa’ li qayu’am? Naru taapatz’ reheb’ naq te’xtz’iib’a jun musiq’ejil maatan chiru li pizarron li yeeb’il resil sa’ Tzol’leb’ ut Sumwank 46:7–33, ut naq te’xye resil lix k’utb’esinkil li maatan a’an sa’ xyu’ameb’ malaj sa’ xyu’am ani chik li neke’xnaw ru.

Rochb’eeneb’ li musiq’ejil maatan, wankeb’ ajwi’ naab’al chik li osob’tesink naxk’e li Santil Musiq’ej. Naru xb’aanunkil a’in re xtenq’ankileb’ li saaj chixtawb’al ru li na’leb’ a’an.

• Wan naq naqak’oxla naq ka’ajwi’ na’ajman li Santil Musiq’ej choq’ re li k’a’ru nim sa’ qayu’am. Chan ru taatenq’aheb’ li saaj chixk’eeb’al reetal naq wan naab’al chik naru tixb’aanu li Santil Musiq’ej choq’ reheb’? Naru taak’eheb’ sa’ kok’ ch’uut, ut taapatz’ reheb’ naq te’ril wiib’ oxib’ li raqal re loq’laj hu sa’ “Xkomon chik li tenq’.” Chirix a’an naru te’xye resil k’a’ru li xe’xtzol. Patz’ reheb’ naq te’xtz’iib’a chan ru li Santil Musiq’ej naru taarosob’tesi lix yu’ameb’ wulaj wulaj. Naq yookeb’ chixwotzb’al li xe’xtz’iib’a, naru te’xye li k’a’ru tento te’xb’aanu re naq taawanq rik’ineb’ li Santil Musiq’ej rajlal kutan.

• Re xtenq’ankileb’ chixtawb’al ru chan ru li Musiq’ej tixtenq’aheb’, naru taatz’iib’aheb’ li patz’om a’in chiru li pizarron: K’a’ru naqanaw chirix li Santil Musiq’ej? Chan ru naru tooxtenq’a li Santil Musiq’ej? Toja’ naq naru te’xsik’ xsumenkil a’an sa’ li raatin li Elder Gary E. Stevenson “ Chan ru natenq’an aawe li Santil Musiq’ej?” (Jolomil ch’utub’aj-ib’ re abril 2017). Naru ajwi’ te’xsik’ xsumenkil sa’ Las funciones del Espíritu Santo” sa’ Leales a la Fe (72–73). Wi ta us raj, naru taaye resil chan ru ak xk’utb’esiman xwankil li Santil Musiq’ej sa’ laa yu’am laa’at, ut li saaj naru te’xye chan ru ak xk’utb’esiman sa’ xyu’ameb’ a’an.

• Eb’ li saaj naru te’ril “La revelación personal” malaj “Aprender a reconocer las impresiones del Espíritu” sa’ li ch’ol 4 re Predicad Mi Evangelio ([2019], 91–92, 99–100). Toja’ naq naru te’xk’oxla naq misioneereb’ ut naq yookeb’ chixtzolb’al li ani maajun wa rab’ihom resil chan ru naq li Santil Musiq’ej narosob’tesi li qayu’am. K’a’ raj ru te’xye re?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Jwan 14:16–27 (Li Santil Musiq’ej naru tooxtzol ut tixjultika qe chixjunil)

• Jwan 15:26; Tzol’leb’ ut Sumwank 42:17; Moises 1:24 (Li Santil Musiq’ej naxch’olob’ xyaalal li Yuwa’b’ej ut li K’ajolb’ej)

• Romanos 8:16 (Li Musiq’ej naxch’olob’ xyaalal naq laa’o li ralal xk’ajol li Dios)

• 2 Nefi 32:5; Tzol’leb’ ut Sumwank 18:18 (Li Santil Musiq’ej tixk’ut chiqu k’a’ru li tento taqab’aanu)

• 3 Nefi 27:20 (Li Santil Musiq’ej nokoxsantob’resi)

• Moroni 8:26 (Li Santil Musiq’ej nokoxnujob’resi rik’in li yo’onink ut li rahok)

• Moroni 10:5 (Li Santil Musiq’ej naxk’ut li yaal chiqu)

Li k’utuk jo’ li Kolonel

Li Kolonel kixyeheb’ li seraq’, li jaljookil ru aatin, ut li esilal chi moko ch’a’ajeb’ ta re naq eb’ lix tzolom taaruuq te’xtaw ru. K’a’ru ak xak’ul laa’at sa’ laa yu’am li naru taaye resil reheb’ li saaj re naq te’xtaw ru lix k’anjel li Santil Musiq’ej ut re naq te’raj xk’ulb’al ajwi’ a’an? (Chi’ilmanq Li k’utuk jo’ li Kolonel [2016], 22.)