Li Qaawa’ Jesukristo, xb’aan laj del Parson

27 junio

Chan ru tinkawresi wib’ sa’ lin saajil re naq jo’ na’b’ej malaj yuwa’b’ej tink’e li Kristo jo’ xch’oolil lin junkab’al?

Tzol’leb’ ut Sumwank 67–70

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Aniheb’ li ak’ sa’ qateep, ut chan ru taqak’eheb’ chireek’a naq k’ulb’ileb’ qab’aan? K’a’ru yooko chixb’aanunkil re naq chaab’ilaq li ch’utam choq’ qe?

• Li k’a’ru teneb’anb’il sa’ qab’een. K’a’ru li k’anjel teneb’anb’il sa’ qab’een jo’ saaj winq malaj ixq? Chan ru naru taqab’aanu li k’anjel a’an chi chaab’il?

• Sa’ li qayu’am. K’a’ru yooko chixb’aanunkil re wank jo’ li Jesukristo ut re xk’ulb’al lix wankil sa’ li qayu’am? K’a’ru yooko chixb’aanunkil re xtenq’ankil li qajunkab’al chi chalk rik’in li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Tzol’leb’ ut Sumwank 68 naxk’e li na’leb’ choq’ reheb’ li na’b’ej yuwa’b’ej, li anchal moko reheb’ ta li saaj (che’ilmanq li raqal 25–28). A’b’anan, li na’leb’ a’an naru te’wanq xwankil sa’ yu’ameb’ li saaj anajwan jo’ ajwi’ naq te’wanq jo’ na’b’ej yuwa’b’ej. Li k’a’ru jwal nim xwankil sa’ xkawresinkileb’ rib’ chixk’eeb’al li Kristo jo’ xch’oolil lix junkab’al, a’an naq “te’b’eeq chi tiik chiru li Qaawa’ ” anajwan (raqal 28).

K’a’ruheb’ li osob’tesink li ak xek’ul sa’ lee junkab’al xb’aan naq xetaaqe li raatin li Kolonel? Chan ru naq li saaj te’xtenq’a lix junkab’al chixk’eb’aal li Kristo jo’ xch’oolil li rochocheb’? Re xkawresinkil li tzolok, naru taawil li raatin li Awa’b’ej Henry B. Eyring “Jun ochoch b’ar wi’ nawan lix Musiq’ li Qaawa’ ” (Jolomil ch’utub’aj-ib’ re abril 2019) ut “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org).

Taanimanq li rahok sa’ li qajunkab’al wi taqak’e li Kristo jo’ xch’oolil.

Tzolok sa’ komonil

Re xtenq’ankileb’ li saaj chixk’eeb’al reetal chan ru te’k’anjelaq li na’leb’ sa’ Tzol’leb’ ut Sumwank 68:25–28 choq’ reheb’, naru taapatz’ reheb’ naq te’xtz’iib’a k’a’ru te’raj sa’ xjunkab’al jo’ na’b’ej malaj yuwa’b’ej. Naru taapatz’ reheb’ naq te’xwotz li xe’xtz’iib’a, wi neke’raj. Toja’ naq te’ril Tzol’leb’ ut Sumwank 68:25–28 re te’xtaw li na’leb’ li naru tixtenq’aheb’ chixk’ojob’ankil li tiikilal sa’ xjunkab’al anajwan jo’ ajwi’ naq wankeb’ jo’ na’b’ej yuwa’b’ej. Naru xb’aanunkil a’in re xtenq’ankileb’ chixnawb’al chan ru te’xk’e li Kristo jo’ xch’oolil lix junkab’aleb’.

• Sa’ li xwuq raqal re “Li Junkab’al: Jun Jek’inb’il Aatin choq’ re li Ruchich’och’ ” natawman li na’leb’ li naru tixtenq’aheb’ li saaj chixjayalinkil lix junkab’aleb’ rik’in li Kolonel. Patz’ reheb’ naq te’ril li raqal a’an, ut naq te’xtaw li na’leb’ li taak’amoq chaq re li sahil ch’oolejil sa’ li junkab’al. Naru taatz’iib’a li na’leb’ a’an chiru li pizarron, ut taapatz’ reheb’ li saaj naq te’xye k’a’ut naq a’an tixk’e xsahil xch’ool li junkab’al. Maare eb’ li saaj te’raj xyeeb’al chan ru xe’rileb’ chi k’anjelak li na’leb’ a’an sa’ lix junkab’aleb’ a’an, malaj sa’ jalan chik li junkab’al. Patz’ reheb’ naq te’xk’oxla chan ru te’xyu’ami jun reheb’ li na’leb’ a’an anajwan. Ye reheb’ naq naru te’xk’e li Jesukristo jo’ xch’oolil lix yu’ameb’, maak’a’ naxye chan ru lix junkab’aleb’.

• Eb’ li saaj naru te’aatinaq chirix li k’a’ru naxk’e li Kolonel jo’ xch’oolil li qajunkab’al, jo’ ajwi’ li k’a’ru naxram jo’ xch’oolil. Naru taapatz’ reheb’ naq te’ril jun raqal sa’ li raatin li Awa’b’ej Henry B. Eyring “ Jun ochoch b’ar wi’ nawan lix Musiq’ li Qaawa’” (Jolomil ch’utub’aj-ib’ re abril 2019), ut naq te’xtaw li na’leb’ li naru toohe’xtenq’a chixk’eeb’al li Kristo jo’ xch’oolil li qajunkab’al. Patz’ reheb’ naq te’xwotz li xe’xtzol, ut naq te’xsik’ ru jun na’leb’ te’xb’aanu chiru li xamaan chal re, re xjayalinkil lix junkab’aleb’ rik’in li Kristo ut li raatin.

• Naru taapatz’ re jun saaj malaj wiib’ oxib’ naq te’xb’icha malaj te’ril li raatinul jun li b’ich chirix li junkab’al, maare “Li ochoch chanchan choxa” (Eb’ li B’ich, 191) malaj “Wan rahok arin” (B’ichleb’aal choq’ reheb’ li Kok’al, 102). Lix komoneb’ chik li saaj naru te’ab’inq re naq te’xk’e reetal k’a’ru li naxk’ut li b’ich chirix li sahil ch’oolejil sa’ li junkab’al. Patz’ reheb’ naq te’xye resil jo’q’e xe’saho’ xch’ool xb’aan naq xe’xk’ul malaj xe’xk’e li rahok sa’ xjunkab’al.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Mosiah 4:14–16; Tzol’leb’ ut Sumwank 88:119; 121:41–46 (Chan ru xk’ojob’ankil li tiikilal sa’ li junkab’al)

• “¿Qué puedo hacer para ayudar a reducir la tensión en mi familia?” re jun Cara a Cara rik’in li Elder Rasband, li Hermana Oscarson, ut li Hermano Owen (ch’utam choq’ reheb’ li saaj sa’ chixjunil li ruchich’och’, 20 enero, 2016), “Dos hermanos diferentes,” “Por cosas pequeñas” (eb’ li video) ChurchofJesusChrist.org

Li k’utuk jo’ li Kolonel

Li Kolonel kixk’ut xrahom naq kik’anjelak chiruheb’ li ras riitz’in. Ke’jale’ xch’ooleb’ ut xyu’ameb’ li kristiaan xb’aan li usilal kixb’aanu. Jo’ jolominel, chan ru taab’aanu ajwi’ a’an? Chan ru taatenq’aheb’ li saaj chirajb’al k’anjelak jo’ li Kristo chiru lix junkab’aleb’?