11 julio

K’a’ru nink’ul sa’ lin yu’am xb’aan naq ninnaw chirix li k’uub’anb’il na’leb’ re li kolb’a-ib’?

Tzolʼlebʼ ut Sumwank 76

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Ani taaraj ru qatenq’ ut qatij? K’a’ru naru taqab’aanu re xtenq’ankil? Ani raj taqab’oq sa’ jun ch’ina k’anjel qik’in?

• Li k’a’ru teneb’anb’il sa’ qab’een. K’a’ru lee k’anjel ak xechoy xb’aanunkil? K’a’ru k’anjel toj tento teeb’aanu? Chan ru ak xqab’oqeb’ jalan chi chalk rik’in li Kristo, ut chan ru toj taqab’oqeb’ jalan chik?

• Sa’ li qayu’am. K’a’ru toje’ xqanumsi li xkawob’resi lix nawom qach’ool? K’a’ru yooko chixk’ulb’al sa’ li qayu’am, ut chan ru taqatenq’a qib’ chiqib’il qib’?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li qaChoxahil Yuwa’ kixk’uub’ chan ru toowanq jo’ a’an ut chan ru taqak’ul li osob’tesink re li junelik q’e kutan. A’an naraj naq chixjunileb’ li ralal xk’ajol te’xnaw k’a’ru kixk’uub’, jo’kan naq ak kixk’utb’esi chiruheb’ lix profeet chalen chaq xtiklajik. Naq eb’ li saaj xe’ril Tzol’leb’ ut Sumwank 76 chiru li xamaan a’in, xe’xtzol k’a’ru kixk’utb’esi li Dios chiru laj Jose Smith ut laj Sidney Rigdon, a’an lix k’anjel li Kolonel ut li loq’alil naru taqak’ul sa’ li yu’am chalel. Wi tiikaqo chi paab’ank, naru taatz’aqloq qe qu b’antiox re lix tojb’al rix li maak xb’aan li Jesukristo, naru taqak’ul xtz’aqalil xsahil qach’ool, ut naru toowanq rik’in li Dios chi junelik.

Chan ru nakawil laa yu’am xb’aan naq nakanaw chirix lix k’uub’anb’il na’leb’ li qaChoxahil Yuwa’? Chan ru taatenq’aheb’ li saaj chixk’eeb’al reetal naq jwal usilanb’ilo xb’aan xnawb’al chirix li k’uub’anb’il na’leb’ re li kolb’a-ib’? Re xkawresinkil li tzolok, naru taawil “Plan de salvación” sa’ Leales a la Fe ([2004], 143–146) malaj li raatin li Elder Dieter F. Uchtdorf “Laa nimla b’eenik” (Jolomil ch’utub’aj-ib’ re octubre 2019).

Xtzolb’al li k’uub’anb’il na’leb’ re li kolb’a-ib’ naxk’ut k’a’ru aj-e li qayu’am ut b’ar naxik.

Tzolok sa’ komonil

Re aatinak rik’ineb’ li saaj chirix li k’uub’anb’il na’leb’ re li kolb’a-ib’, naru taapatz’ re jun reheb’ naq tixtz’iib’aheb’ li aatin a’in, rochb’eeneb’ li raqal a’in: Tzol’leb’ ut Sumwank 76: Li yu’am naq maji’ nokoyo’la (eb’ li raqal 22–27), Li yu’am a’in (eb’ li raqal 40–43), ut Li yu’am chirix naq nokokam (eb’ li raqal 50–53, 59–62). Kanab’eb’ li saaj chirilb’aleb’ li raqal re te’xtaw k’a’ru lix k’anjel li Kolonel sa’ lix k’uub’anb’il na’leb’ li qaChoxahil Yuwa’. Patz’ reheb’ naq te’xtz’iib’a rub’eleb’ li aatin a’an li na’leb’ xe’xtaw. Naru xb’aanunkil a’in re xtenq’ankileb’ chixk’eeb’al reetal naq jwal usilanb’ileb’ xb’aan lix k’uub’anb’il na’leb’ li qaChoxahil Yuwa’.

• Xtzolb’aleb’ lix k’ab’a’ lix k’uub’anb’il na’leb’ li qaChoxahil Yuwa’ naru tixtenq’aheb’ li saaj chixtawb’al ru xkomon chik chirix. Naru te’rileb’ li raqal re loq’laj hu sa’ li xb’een tasal re “Xkomon chik li tenq’,” ut te’xtz’iib’aheb’ xk’ab’a’ lix k’uub’anb’il na’leb’ li Dios. K’a’ru neke’xk’ut li k’ab’a’ej a’in chirix li k’uub’anb’il na’leb’? Chan ru naxk’e xsahil qach’ool anajwan ut sa’ li junelik q’e kutan? K’a’ru neke’xk’ut li loq’laj hu chiqu chirix lix k’anjel li Kolonel sa’ li k’uub’anb’il na’leb’? Naru taak’ut li video “Los corazones de los hombres están desfalleciendo” (ChurchofJesusChrist.org), ut taapatz’ reheb’ li saaj naq te’aatinaq chirix jo’q’e xe’raj xb’antioxinkil lix k’uub’anb’il na’leb’ li qaChoxahil Yuwa’.

• Naru taapatz’ reheb’ li saaj naq te’xye chan raj ru te’xsume junaq li ramiiw naq tixye li patz’om a’in: B’ar koochal chaq? K’a’ut naq wanko arin? B’ar tooxik chirix li yu’am a’in? Patz’ reheb’ naq te’roksi li na’leb’ li wan sa’ “Plan de salvación” sa’ Leales a la Fe (115–17), ut sa’ “Xkomon chik li tenq’ ” re te’xkawresi lix sumenkileb’ li patz’om. Chan ru ak xqak’ul qametz’ew xb’aan xnawb’al lix sumenkileb’ li patz’om a’in?

• Eb’ li saaj jwal neke’xtaw wi’chik ru li evangelio naq yookeb’ chixch’olob’ankil. Patz’ reheb’ li saaj naq te’wulaq sa’ li tzoleb’aal chi kawresinb’ileb’ re xwotzb’al li k’a’ru neke’xnaw chirix li k’uub’anb’il na’leb’ re li kolb’a-ib’. Naru te’roksi li aatin sa’ “El Plan de Salvación” sa’ li ch’ol 3 re Predicad Mi Evangelio ([2019], 47–54). K’a’ut naq li qanawom chirix li k’uub’anb’il na’leb’ re li kolb’a-ib’ naxjal li qayu’am?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• 2 Nefi 11:5; Alma 12:30; 34:9; 41:2; 42:8, 13–15; Moises 6:59–62 (Eb’ lix k’ab’a’ lix k’uub’anb’il na’leb’ li qaChoxahil Yuwa’)

• Tzol’leb’ ut Sumwank 38:1–3; 138:53–56; Moises 4:1–4; Abraham 3:21–24 (Li yu’am naq maji’ nokoyo’la)

• 2 Nefi 2:19–21, 25; Alma 5:15–16; 34:32; Abraham 3:25–26 (Li yu’am a’in)

• Jwan 14:1–2; Alma 11:42–45; Tzol’leb’ ut Sumwank 76:39–43, 89–93 (Li yu’am chirix naq nokokam)

Li k’utuk jo’ li Kolonel

Li Kolonel kixk’eheb’ lix tzolom chi k’oxlak chi us rik’ineb’ li patz’om kixye reheb’. Chi anchal xch’ool kiraj xnawb’al k’a’ru neke’xk’oxla. K’a’ru naru taapatz’ reheb’ li saaj re xtenq’ankileb’ chi k’oxlak chi us chirix lix k’uub’anb’il na’leb’ li Dios? (Chi’ilmanq Li k’utuk jo’ li Kolonel [2016], 33–34.)