25 julio

K’a’ut naq us xpaab’ankil lix taqlahom li Dios?

Tzolʼlebʼ ut Sumwank 81–83

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ru naru taqab’aanu re xjunajinkileb’ li saaj? K’a’ruheb’ li meta taqaj xk’ojob’ankil sa’ komonil?

• Li k’a’ru teneb’anb’il sa’ qab’een. K’a’ru yooko chixb’aanunkil re xwotzb’al li evangelio? Ma wan ani sa’ qayanq li naru tixseraq’i junaq na’leb’ li xk’ul chaq sa’ xb’aanunkil li k’anjel re li santil ochoch ut re li qaxe’ qatoon?

• Sa’ li qayu’am. B’ar ak xqil li ruq’ li Qaawa’ sa’ li qayu’am? K’a’ru xwaklesi qach’ool naq xqatzoleb’ li loq’laj hu chiru li xamaan a’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Maare wan naq naqak’oxla naq lix taqlahom li Dios naxram ru xtaql li qach’ool. A’b’an li yaal, a’an naq lix taqlahom li Dios nokorach’ab’. Sa’ Tzol’leb’ ut Sumwank 82:8–10 naqatzol naq eb’ li taqlahom nokohe’xtenq’a chixtawb’al ru li rajom li Dios, ut naq wi te’qapaab’, li qab’aanuhom “taasutq’isimanq qe choq’ qakolb’al.” Relik chi yaal, naq noko’ab’in chiru li Dios, a’an “wan chi teneb’anb’il” chixk’eeb’al qe chixjunil li osob’tesink kixyeechi’i (eb’ li raqal 9–10). Chan ru ak xatrosob’tesi laa Choxahil Yuwa’ naq xapaab’ lix taqlahom? Re xkawresinkil li tzolok, naru taawil li raatin li Elder Dale G. Renlund “Naab’al li osob’tesink” (Jolomil ch’utub’aj-ib’ re abril 2010), malaj taak’oxla li na’leb’ sa’ “Obediencia” sa’ Temas del Evangelio (topics.ChurchofJesusChrist.org).

Li esil chirixeb’ lix moos li Dios sa’ najter kutan naru tooxmusiq’a chi paab’ank sa’ li kutan a’in.

Tzolok sa’ komonil

Maare wankeb’ li saaj sa’ laa tzoleb’aal li neke’ch’a’ajko’ sa’ xpaab’ankileb’ li taqlahom. Naru te’waklesiiq xch’ool wi nakatenq’aheb’ chixtawb’al ru k’a’ut naq aajel ru li ab’ink chiru li Dios. Tz’iib’a xk’ab’a’ li tzolok a’in chiru li pizarron, ut patz’ reheb’ li saaj naq te’xsume. Naru taapatz’ reheb’ naq te’xsik’ xkomon chik lix na’leb’ sa’ Tzol’leb’ ut Sumwank 82:8–10, li maare xe’ril chiru li xamaan a’in. Chirix a’an, sik’ wiib’ oxib’ reheb’ li na’leb’ a’in re xtenq’ankileb’ chixtawb’al ru k’a’ut naq aajel ru li ab’ink chiru li Dios, us ta ch’a’aj xb’aanunkil.

• Wan naq ink’a’ chik mas ch’a’aj xpaab’ankileb’ li taqlahom wi naqataw ru k’a’ruheb’ aj-e. Re xtzolb’al k’a’ut naq li Dios naxk’eheb’ li taqlahom, eb’ li saaj naru te’rileb’ li raqal re loq’laj hu sa’ “Xkomon chik li tenq’ ” (malaj jalaneb’ chik li xak’oxla). Chan ru nokohe’xtenq’a li raqal a’in naq ch’a’aj chiqu xpaab’ankil jun li taqlahom? Sa’ aatinak chirix a’in, naru teeril sa’ komonil li raqal “Cuarto, no olviden el “porqué” del Evangelio” sa’ li raatin li Awa’b’ej Dieter F. Uchtdorf “No me olvides” (Liahona, noviembre 2011, 122).

• Naq eb’ li saaj neke’xk’e reetal chan ru li ab’ink kixb’aanu li Kolonel, naru te’waklesiiq xch’ool re naq te’raj ab’ink chiru li Dios. Jo’q’e ki’ab’in li Jesukristo chiru lix Yuwa’, us ta ch’a’aj li wan wi’? (chi’ilmanq Mateo 4:1–11; Lukas 22:39–44). Natawman resileb’ li winq ut ixq li ke’ab’in chiru li Dios sa’ Hebreos 11. Eb’ li saaj naru te’xsik’ ru jun reheb’ a’an—malaj ani chik li neke’xnaw ru, maare sa’ xjunkab’aleb’—ut te’xwotz li k’a’ru nawulak chiruheb’ chirix li kristiaan a’an. K’a’ut naq xe’raj ab’ink chiru li Qaawa’? Chan ru nokoxtenq’a li Kolonel naq noko’ab’in chiru?

• Re xtenq’ankileb’ li saaj chirilb’aleb’ li taqlahom jo’ jun li usilal, ink’a’ jo’ kawil iiq, naru taawotz li raatin li Elder D. Todd Christofferson sa’ “Xkomon chik li tenq’.” Naru taak’ut malaj taayiib’ xjalam-uuch jun li eeb’, ut taapatz’ reheb’ li saaj naq chixk’atq junjunqeb’ lix taqleb’ te’xtz’iib’a jun taqlahom li ch’a’aj tana’ choq’ reheb’ li saaj. Chan ru naq li raatin li Elder Christofferson tixtenq’a li ani nach’a’ajko’ sa’ xpaab’ankileb’ li taqlahom?

• Wankeb’ li video chirix li ab’ink chiru li Dios sa’ ChurchofJesusChrist.org ut sa’ li aplicacion Bibolioteca del Evangelio (chi’ilmanq “Xkomon chik li tenq’ ”). Naru taapatz’ reheb’ li saaj naq te’ril jun reheb’ li video chiru li xamaan, ut naq te’xkawresi rib’ re te’xwotz li xe’xtzol chirix li ab’ink chiru li Dios. Eb’ li saaj naru te’xyiib’ jun li video chirix xpaab’ankileb’ lix taqlahom li Dios. Naru te’xk’uub’ jo’q’e te’xyiib’ li video toja’ naq te’xwotz sa’ internet.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• 1 Nefi 17:3; Mosiah 2:41; Tzol’leb’ ut Sumwank 130:20–21 (Noko’osob’tesiik naq naqapaab’eb’ li taqlahom)

• Deuteronomio 10:12–13; Jwan 14:15; 1 Jwan 5:1–3 (Naqapaab’ lix taqlahom li Dios xb’aan naq naqara li Dios)

• Tzol’leb’ ut Sumwank 93:20 (Rik’in ab’ink chiru li Dios naru taqak’ul xkomon lix tz’aqalil ru)

• “Obediencia,” sa’ li ch’ol 3 re Predicad Mi Evangelio (2019), 74

• Li Elder D. Todd Christofferson kixye: “Wankeb’ li neke’ril ka’ajwi’ li mayejak ut li ramok-u sa’ xpaab’ankileb’ li taqlahom re li ak’ ut junelikil sumwank, a’b’an eb’ li neke’xyu’ami li taqlahom—li neke’xq’axtesi rib’ chi ink’a’ minb’ileb’ ru ut chi anchaleb’ xch’ool re xpaab’ankileb’ li sumwank—neke’xtaw rach’ab’ankileb’ ut xsahileb’ xch’ool. Naq chi yaal naqataw ru, naqasik’ xkomoneb’ chik li taqlahom. Chixjunileb’ li chaq’rab’ ut taqlahom naqatzol ut naqayu’ami, a’an chanchan li eeb’ li nokoxtenq’a chi taqe’k. Relik chi yaal naq li yu’am sa’ li evangelio, a’an li chaab’il yu’am” (“El poder de los convenios,” Liahona, mayo 2009, 23).

• “El aguijón del escorpión,” “Mantente dentro de los límites,” “Un anclaje seguro,” “Lluvia de bendiciones celestiales,” “Benditos y felices son aquellos que guardan los mandamientos de Dios,” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixb’oqeb’ lix tzolom chixch’olob’ankil li yaal, ut naq ke’xb’aanu, li Musiq’ej kixtoch’ xch’ooleb’. Naq nakatk’utuk, patz’ reheb’ li saaj naq te’xch’olob’ xyaalal naq aajel ru xpaab’ankileb’ li taqlahom.