C. C. A. Christensen (1831–1912), Eb’ laj santil paab’anel neke’isiik chaq sa’ li Condado Jackson, Missouri, c. 1878, tempera en muselina, 77 ¼ × 113 pulgadas. Museo de Arte, Universidad de Brigham Young, jun maatan k’eeb’il xb’aaneb’ li ri laj C. C. A. Christensen, 1970

12 septiembre

Chan ru taqanumsi rik’in paab’aal li qach’a’ajkilal?

Tzolʼlebʼ ut Sumwank 98–101

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Ani taaraj ru qatenq’ ut qatij? K’a’ru naru taqab’aanu re xtenq’ankil? Ani raj taqab’oq sa’ jun ch’ina k’anjel qik’in?

• Li k’a’ru teneb’anb’il sa’ qab’een. K’a’ru lee k’anjel ak xechoy xb’aanunkil? K’a’ru k’anjel toj tento teeb’aanu? Chan ru ak xqab’oqeb’ jalan chi chalk rik’in li Kristo, ut chan ru toj taqab’oqeb’ jalan chik?

• Sa’ li qayu’am. K’a’ru toje’ xqanumsi li xkawob’resi lix nawom qach’ool? K’a’ru yooko chixk’ulb’al sa’ li qayu’am, ut chan ru taqatenq’a qib’ chiqib’il qib’?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li raatin li Dios sa’ Tzol’leb’ ut Sumwank 98 ut 101 kixk’ojob’ xch’ooleb’ laj santil paab’anel li ke’xk’ul nimla ch’a’ajkilal sa’ Missouri sa’ xkutankileb’ li 1830. Us ta laa’o ink’a’ naqak’ul li ch’a’ajkilal li neke’xk’ul sa’ xtiklajik li Iglees, wan qach’a’ajkilal chiqajunilo sa’ li yu’am a’in, ut xk’ulb’al li ch’a’ajkilal rik’in paab’aal naru tooxtenq’a chi k’iik sa’ musiq’ej ut chi wulak jo’ li Jesukristo.

Chan ru naq xsik’b’al li Qaawa’ sa’eb’ laa ch’a’ajkilal xatxkawob’resi ut xatxtenq’a chixnawb’al ru li Jesukristo? K’a’ru li ch’a’ajkilal ut li yale’k-ix li yookeb’ chixnumsinkil li saaj, ut chan ru taatenq’aheb’ chixtawb’al xmetz’eweb’ rik’in li Kolonel? Re xkawresinkil li tzolok chirix li ch’a’ajkilal, naru taawil li raatin li Elder Neil L. Andersen “Eb’ li rahob’tesinb’il” (Jolomil ch’utub’aj-ib’ re octubre 2018) ut “Adversidad” sa’ Leales a la Fe ([2004], 12–15).

Naru taqataw tuqtuukilal sa’eb’ li qach’a’ajkilal wi taqasik’ li Kolonel.

Tzolok sa’ komonil

Wan xch’a’ajkilal li saaj sa’ li tzoleb’aal chixjunjunqaleb’. K’a’ru nakak’oxla naq te’xtaw sa’ Tzol’leb’ ut Smwank 98:1–3 li tixk’ojob’ xch’ooleb’? Naru xb’aanunkil a’in re xtenq’ankileb’ chixnawb’al chan ru te’xnumsi li ch’a’ajkilal rik’in paab’aal chirix li Qaawa’.

• Wan resileb’ k’iila kristiaan sa’eb’ li loq’laj hu li ke’xkuy li yale’k-ix rik’in paab’aal. Eb’ li saaj naru te’xtzol xkuyb’al li ch’a’ajkilal rik’in paab’aal naq te’ril resileb’ li kristiaan a’an (wan resileb’ sa’ “Xkomon chik li tenq’ ”). Naru te’xsik’ ru jun raqal re loq’laj hu ut te’xye resil chi k’osb’il ru chiruheb’ li rech saajil. Ma naxk’utb’esi k’a’ru aj-e li ch’a’ajkilal? K’a’ru naxk’utb’esi chirix xnumsinkil li ch’a’ajkilal rik’in paab’aal? Patz’ reheb’ li saaj naq te’xtz’iib’a jun yale’k-ix li neke’xnumsi a’an malaj lix komoneb’, ut naq te’xk’oxla chan ru te’roksi lix wankilal li Kolonel re xtenq’ankileb’ sa’ lix yalb’aleb’ rix.

• Re xtzolb’al b’ar nachal chaq li ch’a’ajkilal ut li k’a’ru naru taqatzol sa’ lix yalb’al qix, naru teeril sa’ komonil li xb’een ut xkab’ raqal re Adversidad” sa’ Leales a la Fe (12). Patz’ reheb’ li saaj naq te’xwotz li xe’xtzol. Toja’ naq te’ril lix tz’aqob’ li aatin sa’ “Adversidad” ut te’xkawresi rib’ chixk’utb’al li xe’xtzol, jo’ ajwi’ chan ru nokoxtenq’a li Kolonel sa’ lix yalb’al qix. Wi te’raj li saaj, tenq’aheb’ chixyeeb’al chan ru ak xe’xk’ul sa’ xyu’am li k’a’ru ch’olob’anb’il sa’ li hu.

• Re aatinak chirix li ch’a’ajkilal, naru taayiib’ jun tiikil juch’ chiru xyijach li pizarron ut taatz’iib’a K’a’ut naq wan li ch’a’ajkilal? sa’ jun pak’al, ut Chan ru taqakuy li ch’a’ajkilal rik’in paab’aal? sa’ li jun pak’al chik. Eb’ li saaj naru te’ril jun tasal re li raatin li Elder Neil L. Andersen, “Eb’ li rahob’tesinb’il,” ut te’xsik’ xsumenkileb’ li patz’om a’an. K’a’ru naqatzol chirix li Kolonel sa’ li raatin li Elder Andersen?

• Li Elder Stanley G. Ellis ki’aatinak chirixeb’ li kok’ kaxlan ut li peepem re qatzolb’al chirix li ch’a’ajkilal sa’ “Ma naqakanab’ qib’ chiru? Us li k’a’ru ch’a’aj” (Jolomil ch’utub’aj-ib’ re octubre 2017). Naru taak’ut xjalam-uuch jun ch’ina kaxlan naq na’el chaq sa’ li mol malaj jun peepem naq na’el chaq sa’ li rix, ut tex’aatinaq chirix li raatin li Elder Ellis. Eb’ li saaj naru te’ril li raatin li Elder Ellis sa’ ka’kab’il. Li junq sumal naru tixsik’ chixjunil li kixye re xch’olob’ankil k’a’ru aj-e li ch’a’ajkilal ut chan ru xnumsinkil chi us. Chan ru naq xnumsinkil li ch’a’ajkilal rik’in paab’aal nokoxtenq’a chi nach’ok rik’in li Kolonel?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• 1 Samuel 1; 1 Reyes 17; Lukas 23:33–34; 1 Nefi 5:1–9; Mosiah 24:8–17; 3 Nefi 1:4–21; Moroni 1; K’utul Raqal reheb’ li Loq’laj Hu, “Rut” ut “Ester,” (Resileb’ li ani ke’xk’ul xch’a’ajkilal)

• Jwan 14:18; Romanos 8:28, 35–39; Alma 36:3 (Li Kolonel naru tooxtenq’a sa’eb’ li qach’a’ajkilal)

• “Dios nos apoyará,” “La voluntad de Dios,” (eb’ li video), ChurchofJesusChrist.org

Li k’utuk jo’ li Kolonel

Li Kristo kixnaweb’ ru lix tzolom—ut kixnaw chan raj ru toj te’wanq. Naq ke’wan xch’a’ajkilal, ink’a’ kixkanab’eb’; kixraheb’ b’an. K’a’ruheb’ lix ch’a’ajkilaleb’ li saaj? Chan ru taaraheb’ ut taatenq’aheb’?