26 ni Sepiteba

Cava na Vuna e Bibi kina ni Tiko na iDola ni Matabete e Vuravura Nikua?

Vunau kei na Veiyalayalati 106–108

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na ka sa veivosakitaki (rawa ni o navuca ena dua na soqoni ni mataveiliutaki na veika me veivosakitaki):

• Noda kuoramu se kalasi. Na cava eda rawa ni cakava me taraicake kina na duavata vei ira na lewe ni kuoramu se kalasi? Na takete cava so eda na via cakava vata?

• Noda itavi se icolacola. Na cava eda sa cakava tiko me wasei kina na kosipeli? Na cava so eda sa sotakaya ena vakayacori ni cakacaka ni valetabu kei na tuva kawa?

• Noda bula. Eda sa raica vakacava na liga ni Turaga ena noda bula? Na cava e sa vakauqeti keda ena vuli ivolanikalou ena macawa oqo?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na “iDola ni matabete,” a vakavulica o Elder Gary E. Stevenson, sa “tadolava na veivakalougatataki, isolisoli, kei na kaukauwa eso vakalomalagi kivei [keda]” (“Era tiko iVei na iDola kei na Dodonu ni Lewa ni Matabete?” Liaona, Me 2016, 32). E taura tu o Jisu Karisito na idola taucoko ni matabete, ka sa vakadonuya na lewa vei ira na italai vakalomalagi mera vakatauca na idola ni matabete vei Josefa Simici. Era sa taura tu nikua na lewe ni Mataveiliutaki Taumada kei na Kuoramu ni iApositolo Le Tinikarua na idola vataga oqo (raica na Vunau kei na Veiyalayalati 90:3–4, 6; 107:35; 132: 7). Na idola eso oqo sai koya na dodonu ni lewa esa solia na Kalou vei ira na iliuliu ni matabete mera tutaka kina na vakayagataki ni Nona matabete e vuravura.

Ni o wilika na Vunau kei na Veiyalayalati 107 ena macawa oqo, vakasamataka na sala e rawa ni vakalougatataki iko kina na Kalou kei ira o vakavulica mai na Nona matabete. Na cava o raica ena wase oqo esa ka bibi mera kila na lewe ni kuoramu se kalasi? Ni ko vakarau tu mo veivakavulici, sa rawa ni o railesuva na itukutuku i Elder Gary E. Stevenson e koto e cake kei na “iDola ni Matabete” ena Tudei ena Vakabauta ([2004], 126–27).

Sa vakarautaki tu vei keda na veivakalougatataki levu vakayalo mai na idola ni matabete eso.

Vulica Vata

NaVunau kei na Veiyalayalati 107 sa rawa ni veivuke ni saumi na taro “Na veivakalougatataki cava soti eda ciqoma mai na matabete kei na nodra veiqaravi na iliuliu ni matabete?” Sa rawa ni vakaraica na lewe ni kalasi eso na isaunitaro ena tikina e18–23, 85–89. Me vukei ira ni kila vakamatata cake na sala e vakalougatataka kina na noda bula na matabete kei ira na iliuliu ni matabete, vakayagataka e dua se sivia na itaviqaravi oqo.

• Sa rawa ni o tekivuna e dua na veivosaki me baleta na idola ni matabete ena sureti ni dua na lewe ni kuoramu se kalasi me vakavakarau mai ni wasea na italanoa ni veisiko nei Peresitedi Spencer W. Kimball ki na dua na valenilotu e Denmark, ka a tukuna o Peresitedi Boyd K. Packer ena nona vosa “Na Le Tinikarua” (Liaona, Me 2008, 83–87; raica talega na vidio “The Restoration of Priesthood Keys” [ChurchofJesusChrist.org]). O rawa talega ni kerea na nomu kuoramu se kalasi mera wilika vata na wase “iDola ni Matabete” ena Tudei ena Vakabauta (tabana e 126–27). Solia vei ira na gauna mera vakavulica vakai ira ena veisa se cava mada na idola ni matabete, ka yavutaki ena ka era sa vulica. Na veivakalougatataki cava so sa basika mai vei keda ena nodra veiqaravi na taura tu na idola ni matabete?

• O na vinakata beka ni wasea na italanoa i Elder Gary E. Stevenson me baleta na yali ni nona idola mai na matai ni ono na parakaravu ni nona vosa “Era Vei na iDola kei na Dodonu ni Lewa ni Matabete?” (se vakaraitaka na vidio “Where Are the Keys?” [ChurchofJesusChrist.org]) O rawa ni vakaraitaka eso na idola ka sureta na nomu kuoramu se kalasi mera wasea na sala e tautauvata kina na idola oya ki na idola ni matabete. O ira o vakavulica sa rawa ni railesuva ka veivosakitaka na ivolanikalou a tukuna o Elder Stevenson (Josefa Simici—Ai Tukutuku 1:68–72; Vunau kei na Veiyalayalati 110:11–16), e vakamacalataka na vakatikori ni idola ni matabete ki vuravura. O na via sureta na kuoramu se kalasi mera digitaka yadua e dua na ivolanikalou oqo ka wasea vakalekaleka e dua na yatuvosa ni ka era sa vulica me baleta na kaukauwa kei na veivakalougatataki eda ciqoma mai na idola ni matabete eso: Maciu 16:18–19; Vunau kei na Veiyalayalati 27:12; 65: 2; 84:19–20. Cava na vuna sa bibi kina me tiko na idola ni matabete e vuravura nikua?

• O rawa ni solia ki na lewe ni nomu kuoramu se kalasi yadua e dua na idola pepa ka lesia na tamata yadua me wilika na iwasewase II, III, IVseV ni tukutuku i Peresitedi Dallin H. Oaks “Na iDola kei na Dodonu ni Lewa ni Matabete” (Liaona, Me 2014, 49–52). Sureta mera vola ena idola na ka era sa vulica me baleta na matabete ka qai wasea na ka era sa vola. E vakayarayarataka vakacava na veidina oqo na ivakarau eda nanumi ira kina na noda iliuliu ni kuoramu se kalasi kei na ilesilesi eso eda ciqoma mai vei ira?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Russell M. Nelson, “iYau Vakayalo Eso,” Liaona, Nove. 2019, 76–79

• “iDola ni Matabete,” ena iVoladusidusi Raraba: Veiqaravi Tiko ena Lotu i Jisu Karisito ni Yalododonu Edaidai, 3.4.1

• Vidio “Learn Your Duty,” “The Priesthood, an Opportunity to Serve,” ChurchofJesusChrist.org

Veivakavulici ena iVakarau ni iVakabula

A kacivi ka tabaki ira na iliuliu na iVakabula mera tutaka ka liutaka na Nona Lotu (raica na Maciu 10:1–5). E rawa vakacava ni o vukei ira o vakavulica mera yalo vakavinavinakataki ira ka sa kacivi mera qaravi ka vukei ira?

Raica talega na vidio “Asking Follow-up Questions” (ChurchofJesusChrist.org).