26 septiembre

K’a’ut naq na’ajman lix laawil li tijonelil sa’ ruchich’och’ anajwan?

Tzolʼlebʼ ut Sumwank 106–108

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ru naru taqab’aanu re xjunajinkileb’ li saaj? K’a’ruheb’ li meta taqaj xk’ojob’ankil sa’ komonil?

• Li k’a’ru teneb’anb’il sa’ qab’een. K’a’ru yooko chixb’aanunkil re xwotzb’al li evangelio? Ma wan ani sa’ qayanq li naru tixseraq’i junaq na’leb’ li xk’ul chaq sa’ xb’aanunkil li k’anjel re li santil ochoch ut re li qaxe’ qatoon?

• Sa’ li qayu’am. B’ar ak xqil li ruq’ li Qaawa’ sa’ li qayu’am? K’a’ru xwaklesi qach’ool naq xqatzoleb’ li loq’laj hu chiru li xamaan a’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

“Eb’ lix laawil li tijonelil,” chan li Elder Gary E. Stevenson, “te’xte li osob’tesink, li maatan, ut lix wankilal li choxa chiqu” (“B’ar wankeb’ xlaawil ut xwankilal li tijonelil?” Jolomil ch’utub’aj-ib’ re abril 2016). Wan rik’in li Jesukristo chixjunileb’ li laaw re li tijonelil, ut a’an kixk’e xwankileb’ li choxahil taql chixk’ojob’ankileb’ sa’ xb’een laj Jose Smith. Sa’ li kutan a’in, eb’ li komon sa’ li Xb’eenil Awa’b’ejil ut lix Molameb’ li Kab’laju chi Apostol neke’k’amok reheb’ li laaw a’an (chi’ilmanq Tzol’leb’ ut Sumwank 90:3–4, 6; 107:35; 132:7). Eb’ li laaw, a’an li wankilal k’eeb’il xb’aan li Dios reheb’ laj jolominel sa’ li tijonelil re te’xb’eresi chan ru na’oksiman lix tijonelil sa’ ruchich’och’.

Naq nakawil Tzol’leb’ ut Sumwank 107 chiru li xamaan a’in, k’oxla chan ru naq li Dios nakatrosob’tesi laa’at ut narosob’tesiheb’ li saaj rik’in lix tijonelil. K’a’ru nakataw sa’ li tasal a’in li aajel ru choq’ reheb’ li saaj? Re xkawresinkil li tzolok, naru taawil li raatin li Elder Gary E. Stevenson li ak xyehe’ resil, ut “Llaves del sacerdocio” sa’ Leales a la Fe ([2004], 166–167).

Naru taqak’ul li ninqi musiq’ejil osob’tesink rik’ineb’ lix laawil li tijonelil.

Tzolok sa’ komonil

Tzol’leb’ ut Sumwank 107 naru tooxtenq’a chixsumenkil li patz’om “K’a’ruheb’ li osob’tesink li naru taqak’ul rik’in li tijonelil ut lix k’anjeleb’ laj jolominel sa’ li tijonelil?” Eb’ li saaj naru te’xsik’ xsumenkil a’an sa’eb’ li raqal 18–23, 85–89. Naru xb’aanunkil a’in re xtenq’ankileb’ chixtawb’al ru chan ru naq li tijonelil ut eb’ laj jolominel sa’ li tijonelil neke’rosob’tesi li qayu’am.

• Re aatinak chirixeb’ li laaw re li tijonelil, naru taapatz’ re jun li saaj naq tixkawresi rib’ chixyeeb’al li seraq’ chirix li Awa’b’ej Spencer W. Kimball naq kiwulak sa’ jun iglees sa’ Dinamarca, jo’ yeeb’il xb’aan li Awa’b’ej Boyd K. Packer sa’ li raatin “Los Doce” (Liahona, mayo 2008, 83–87; chi’ilmanq ajwi’ li video “La restauración de las llaves del sacerdocio” [ChurchofJesusChrist.org]). Naru ajwi’ taapatz’ reheb’ li saaj naq te’ril “Llaves del sacerdocio” sa’ Leales a la Fe (166–167). Kanab’eb’ sa’ ka’kab’il chixch’olob’ankil k’a’ru lix laawil li tijonelil, jo’ chanru li xe’ril sa’ li hu. Chan ru ak xoo’osob’tesiik sa’ qayu’am xb’aan lix k’anjeleb’ li neke’k’amok re li tijonelil?

• Naru taawotz lix seraq’ li Elder Gary E. Stevenson naq kixsach lix laaw, li natawman sa’ xtiklajik li raatin “B’ar wankeb’ xlaawil ut xwankilal li tijonelil?” (malaj taak’ut li video “¿Dónde están las llaves?” [ChurchofJesusChrist.org]). Naru taak’ut junqaqeb’ laa laaw chiruheb’ li saaj ut taapatz’ reheb’ naq te’xye chan ru naq chanchaneb’ li laaw re li tijonelil. Eb’ li saaj naru te’rileb’ li raqal re loq’laj hu li kixye li Elder Stevenson (Jose Smith—Resilal 1:68–72; Tzol’leb’ ut Sumwank 110:11–16), li neke’xye resil lix k’ojob’ankileb’ li laaw re li tijonelil sa’ ruchich’och’. Naru taapatz’ reheb’ li saaj naq te’xsik’ ru jun reheb’ li raqal a’in, ut naq te’xye chi k’osb’il ru li xe’xtzol chirix li wankil ut li osob’tesink naqak’ul rik’ineb’ li laaw re li tijonelil: Mateo 16:18–19; Tzol’leb’ ut Sumwank 27:12; 65:2; 84:19–20. K’a’ut naq nim xwankil naq wankeb’ li laaw re li tijonelil sa’ li ruchich’och’ anajwan?

• Naru taak’e reheb’ li saaj junqaqeb’ li laaw li xayiib’ yal chi huhil, ut taapatz’ reheb’ naq te’ril li tasal II, III, IV, malaj V re li raatin li Awa’b’ej Dallin H. Oaks “Eb’ li laaw ut wankilal re li tijonelil” (Jolomil ch’utub’aj-ib’ re abril 2014). Patz’ reheb’ naq te’xtz’iib’a chiru li laaw li k’a’ru xe’xtzol chirix li tijonelil, toja’ naq te’xye k’a’ru xe’xtz’iib’a. K’a’ru neke’xk’e li na’leb’ a’in chiqak’oxla chirixeb’ laj jolominel sa’ li qamolam malaj li qatzoleb’aal, jo’ ajwi’ li k’anjel li nokohe’xb’oq chixb’aanunkil?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Russell M. Nelson, “Li musiq’ejil b’ihomal,” Jolomil ch’utub’aj-ib’ re octubre 2019

• “Aprendan su deber,” “Las llaves del sacerdocio: El sacerdocio es una oportunidad de servir,” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixb’oqeb’ ut kixk’ojob’eb’ li ani te’xb’eresi ut te’xjolomi lix Iglees (chi’ilmanq Mateo 10:1–5). Chan ru taatenq’aheb’ li saaj chixb’antioxinkileb’ li b’oqb’ileb’ chi k’anjelak chiruheb’?

Chi’ilmanq ajwi’ li video “Hacer preguntas de vericación” (ChurchofJesusChrist.org).