10 octubre

Chan ru taajalaaq inch’ool chi tz’aqal chiru li Qaawa’?

Tzolʼlebʼ ut Sumwank 111–114

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Rochb’een li aatinak chirix li na’ajman sa’ lee molam malaj tzoleb’aal, naru tex’aatinaq chirix li xeril ut xerab’i sa’ li jolomil ch’utub’aj-ib’. Naru roksinkileb’ li patz’om a’in.

• Ma wankeb’ li na’leb’ malaj esil li xe’xtoch’ qach’ool?

• K’a’ru nokomusiq’aak chixb’aanunkil xb’aan li k’a’ru xqatzol malaj xqeek’a?

• K’a’ru tento taqab’aanu sa’ komonil re xk’anjelankil li xqab’i sa’ li jolomil ch’utub’aj-ib?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Re taajale’q qach’ool chi tz’aqal chiru li Jesukristo, tento taqapaab’ a’an jo’ ajwi’ lix taqlahom—us ta li ch’a’ajkilal tixyal rix li qapaab’aal. Sa’ 1837, ke’wan li komon re li Iglees, jo’ ajwi’ junjunqeb’ sa’ lix Molameb’ li Kab’laju chi Apostol, li ke’sach xpaab’aal ut ke’xpo’resi xch’ool chirix li profeet aj Jose Smith. Laj Thomas B. Marsh, a’an chaq li Awaʼbʼej re lix Molamebʼ li Kabʼlaju sa’ li kutan a’an. Naq nakawil Tzol’leb’ ut Sumwank 112 rochb’een laa junkab’al chiru li xamaan a’in, naru taak’e reetal li na’leb’ kixk’e li Qaawa’ re laj Thomas B. Marsh re xkawob’resinkil sa’ lix paab’aal (che’ilmanq li raqal 10–26). K’a’ru naxk’ut li na’leb’ a’in chirix xjalb’al li qach’ool chiru li Kolonel?

Chan ru taatenq’aheb’ li saaj chixk’ulb’al lix yeechi’ihom li Kolonel naq “te’jale’q xch’ool, ut laa’in teb’ink’irtesi”? Tzol’leb’ ut Sumwank 112:13). Ma wan k’a’ru xak’ul sa’ laa yu’am li naru xyeeb’al resil? Naq yookat chixk’oxlankileb’ li patz’om a’in, naru taawil li raatin li Awa’b’ej Bonnie H. Cordon “Kanab’ aawib’ chiru li Qaawa’ ut maawanab’ aawib’ ” (Jolomil ch’utub’aj-ib’ re abril 2017) ut “Conversión” sa’ Leales a la Fe ([2004], 51–54).

Eb’ li loq’laj hu neke’xk’e qametz’ew naq yooko chixsik’b’al lix jalb’al qach’ool.

Tzolok sa’ komonil

Ma neke’xnaw li saaj k’a’ru naraj naxye li jalok ch’oolej choq’ re li Jesukristo? Ma neke’xnaw chan ru te’jale’q xch’ool chi jwal tz’aqal wi’chik? Ye reheb’ naq te’xk’oxlaheb’ li patz’om a’in naq te’ril Tzol’leb’ ut Sumwank 112:10–26. Chan ru tookanaaq chi jalb’il li qach’ool choq’ re li Jesukristo, us ta ch’a’aj li wanko wi’? Naru xb’aanunkil a’in re xtenq’ankileb’ li saaj chixjalb’aleb’ xch’ool choq’ re li Kolonel.

• Alma 32:27–43 naru tixtenq’aheb’ li saaj chixnawb’al chan ru te’xkawob’resi lix paab’aaleb’ ut te’xjal xch’ooleb’ chi jwal tz’aqal wi’chik choq’ re lix evangelio li Jesukristo. Naru taak’eheb’ li saaj sa’ kok’ ch’uut, ut taapatz’ reheb’ naq te’rileb’ li raqal a’in ut te’aatinaq chirix li nak’utman chirix li paab’aal ut li jalok ch’oolej. Patz’ reheb’ naq te’xye k’a’ru xe’xtzol. Naru taayeheb’ li patz’om a’in re xtenq’ankileb’ li saaj chi aatinak: K’a’ut naq jun li iyaj li naniman choq’ jun xtoonal li che’ naxk’ut chi chaab’il k’a’ru li jalok ch’oolej? K’a’ru naraj naxye “xyalb’al rix li raatin [li Dios]? (raqal 27). K’a’ru naraj naxye “xch’olaninkil li che’ ”? (raqal 41). K’a’ru taqanaw wi’ naq li iyaj re jalok ch’oolej yoo chi siipook, chi moqk, ut chi nimank sa’ qach’ool? (raqal 30). K’eheb’ xhoonal li saaj chixk’oxlankil li k’a’ru tento te’xb’aanu re xch’olaninkil li jalaak sa’ xch’ooleb’ chiru li Jesukristo.

• Wankeb’ k’iila wankilal sa’ li ruchich’och’ li neke’raj xramb’al ru li qach’ool re naq ink’a’ taajale’q chiru li Jesukristo. Maare Helaman 5:12 naru tixk’ut chiruheb’ li saaj chan ru te’kanaaq chi kaw us ta neke’yale’ rix. K’a’ru naraj naxye “xk’eeb’al eek’ojob’ankil” sa’ xb’een li saqoonaq re li Jesukristo? Naru taaye reheb’ li saaj naq te’ril li raatin li Elder Quentin L. Cook “Xk’ojleb’aal li paab’aal” (Jolomil ch’utub’aj-ib’ re abril 2017), ut taapatz’ reheb’ naq te’xsik’ li na’leb’ aran li taatenq’anq reheb’ chixk’eeb’al xk’ojleb’aaleb’ sa’ xb’een li Kolonel.

• Ma wan k’a’ru naru taab’aanu re xk’utb’esinkil li na’leb’ kixk’ut li Awa’b’ej Bonnie H. Cordon sa’ li raatin “Kanab’ aawib’ chiru li Qaawa’ ut maakanab’ aawib’ ”? Naru taak’eheb’ li saaj sa’ kok’ ch’uut, ut taapatz’ reheb’ naq te’roksiheb’ li bloque re xkab’lankil jun najt xteramil kab’l sa’ xb’een junaq li salso. Chirix a’an, teetz’il rix chan ru naq a’an nareetali li raatin li Awa’b’ej Cordon Toja’ naq eb’ li saaj naru te’xsik’ li na’leb’ sa’ raatin li Awa’b’ej Cordon li naxk’ut chan ru xk’ojob’ankil li Kristo jo’ xch’oolil li qayu’am. Ma naru xyeeb’al resil k’a’ru li xqak’ul xmaak xpaab’ankil qana’leb’ qajunes qib’, malaj ut k’a’ru li xqak’ul naq xqapaab’ xna’leb’ li Kolonel?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Alma 5 (Laj Alma nak’utuk chirix li jalok ch’oolej)

• David A. Bednar, “Convertidos al Señor,” Liahona, noviembre 2012, 106–109

• Richard J. Maynes, “Li sahil ch’oolejil naq li Jesukristo wan xb’een wa sa’ qayu’am,” Jolomil ch’utub’aj-ib’ re octubre 2015

• Becky Craven, “Li k’eeb’il reetal chi us ut li ink’a’ k’eeb’il reetal,” Jolomil ch’utub’aj-ib’ re abril 2019

Li k’utuk jo’ li Kolonel

Li Kolonel kixye, “Li k’a’ru nink’ut laa’in moko we ta, re b’an li kitaqlank chaq we” (Jwan 7:16). A’an kixk’ut li na’leb’ li kixtzol rik’in lix Yuwa’. Chan ru taak’e reetal naq yookat chixk’utb’al li na’leb’ tz’aqal yaal? (Chi’ilmanq Li k’utuk jo’ li Kolonel [2016], 20–21.)