24 ni Okotova

Au na Rawata Vakacava “na Kaukauwa Vakalomalagi” ena Noqu Bula?

Vunau kei na Veiyalayalati 121–123

Veivakasalataki Vata

Liutaki mai e dua na lewe mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e vou tu ki na noda tabanalevu, ka da na veivuke vakacava mera vakataukeitaki? Na cava eda sa cakava tiko me vakaibalebale kina na noda gauna ena kuoramu se kalasi?

• Noda itavi se icolacola. Na cava na itavi kei na icolacola eso e tiko vei keda vaka cauravou kei na goneyalewa? E rawa vakacava ni da vakataucokotaki ira vinaka?

• Noda bula. Na cava eda sa cakava tiko meda vakataki Jisu Karisito vakalevu cake ka ciqoma na Nona kaukauwa ena noda bula? Na cava eda sa cakava tiko me vukea na noda matavuvale me lako mai ki Vua?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

E sega ni tautauvata na dodonu ni lewa kei na kaukauwa ni matabete. E rawa ki na dua na tamata me ciqoma na dodonu ni lewa ni matabete mai na veitabaki ni liga—era sa rawa ni vakatikori na turaga ki na dua na itutu ni matabete, ka rawa ni ra tabaki na turaga kei na marama ki na dua na veikacivi. Ia na kaukauwa ni matabete—na kaukauwa ni Kalou, se “na kaukauwa vakalomalagi”—sa rawa ni vakayagataki “ena ivakavuvuli duadua ga ni bula dodonu” (Vunau kei na Veiyalayalati 121:36), ka rawa ni vakayagataka ruarua na turaga kei na marama na kaukauwa oqo. Kevaka eda vinakata na noda veiqaravi vei ira na tani me qaqa ka veisautaki-bula, sa gadrevi me kilikili na noda bula ni masuta tu na kaukauwa vakalomalagi.

Era sa kila tu li na lewe ni nomu kuoramu se kalasi na sala mera rawata kina na kaukauwa ni matabete? Ena rawa ni duatani vakacava na nodra bula kei na veiqaravi kevaka era a kila deivaki tu oya? Vakasamataka vagumatua na veitaro oqo ni ko vulica na Vunau kei na Veiyalayalati 121. Ena vinaka talega mo vulica e rua na itukutuku mai vei Peresitedi Russell M. Nelson. E dua e vakau vei ira na tauri matabete—“Na iSau ni Kaukauwa Vakamatabete” (Liaona, Me 2016, 66–69). Na kenai karua e vakau vei ira na marama — “iYau Vakayalo” (Liaona, Nove. 2019, 76–79).

Sa yaco na kaukauwa vakamatabete mai na bula dodonu.

Vulica Vata

Me tekivutaki e dua na veivosaki me baleta na kaukauwa vakamatabete, sa rawa ni o taroga na lewe ni kuoramu se kalasi mera wasea e dua na ka era sa vulica me baleta na kaukauwa oqo ena nodra wilika na Vunau kei na Veiyalayalati 121 ena macawa oqo. Kevaka e veivuke, sa rawa ni o vakatura mera dikeva na tikina e 34–46 , mera raica na vanua kecega e vakayagataki kina na vosa kaukauwa ka qai wasea na ka era sa vulica. Sa rawa ni o vakayagataka na itaviqaravi eso oqo me vukea na lewe ni nomu kuoramu se kalasi ni kila vakamatata cake na sala era rawa ni rawata kina na kaukauwa vakamatabete ni Kalou ena nodra bula.

• Ena rawa ni yaga me veidutaitaki na sala a tomani kina na “kaukauwa” kei na “veivakayarayarataki” ena vuravura kei na ka a vakavulica na Turaga ena Wase 121 ena sala e tomani kina na kaukauwa vakamatabete. O rawa ni cakava e dua na jati yatu-rua ena papa kei na ulutaga Kaukauwa Vakavuravura kei na Kaukauwa Vakalomalagi. Sa rawa ni vakatawana ena jati na lewe ni kuoramu se kalasi na vosa kei na malanivosa eso mai na Vunau kei na Veiyalayalati 121:34–46. E rawa vakacava na sala eda saga ni vakayarayarataki ira kina vakaoti na tani na kilai vakamatata ni veitikina oqo, oka kina ira noda itokani, lewe ni matavuvale, kei ira eda qarava ka vukea? Mai na veitikina oqo, e rawa ni vukei keda vakacava na Yalo Tabu ni vakayarayarataki ira vakadodonu na tani?

• Me vukea nodra vulica na tauri matabete i Eroni na sala mera rawa kaukauwa kina ena nodra veiqaravi vakamatabete, sa rawa ni o vakaraitaka na veimataqali yaya ka kerea na lewe ni kuoramu me vakilakila se vakacava tu na yaga ni yaya vakayadua. Cava na vuna e yaga vakalevu kina eso na iyaya mai na kena vo? Na cava so sa yaga vakalevu sara ki na noda bula, kei na isau cava sa dodonu meda “voli” ira kina? Sa rawa ni ra qai vaqara na lewe ni kuoramu na itukutuku i Peresitedi Russell M. Nelson “Na iSau ni Kaukauwa Vakamatabete,” ni vakaraici na isau e kaya o koya meda na sauma me ciqomi kina na kaukauwa vakamatabete. E sa rawai vakacava na noda bula kei ira na tani ni da veiqaravi tu ena kaukauwa levu ni iVakabula?

• Me vukea nodra kila vakamatata na goneyalewa na sala mera rawata kina na kaukauwa vakamatabete, sa rawa ni o kerei ira ni vakasamataka na gauna eso era a vakila kina na kaukauwa ni Kalou ena nodra bula. Vakamacalataka ni kaukauwa vakamatabete esa kaukauwa va-Kalou. Sa rawa ni ra vakaraica na itukutuku i Peresitedi Russell M. Nelson “iYau Vakayalo” me baleta na dina eso ni marama kei na kaukauwa ni matabete. Na cava a kerea o Peresitedi Nelson mera cakava na marama ena Lotu me rawa ni ra “dre vakadodonu mai na kaukauwa ni iVakabula”? (tabana e 77; raica vakabibi na va na parakaravu ka tekivu e “Na marama yadua kei na turaga yadua”). Na gauna cava eda sa bau dreta kina na kaukauwa oqo me vakalougatataka na noda bula kei na nodra bula na tani? Na cava e vakavulica vei keda na Vunau kei na Veiyalayalati 121:39–43 ena sala meda cakacakataka kina na kaukauwa ni Turaga ki na noda bula?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Russell M. Nelson, “Vagoleya Mai na Mana nei Jisu Karisito ki na Noda Bula,” Liaona, Me 2017, 39–42

• David A. Bednar, “Na Kaukauwa Vakalomalagi,” Liaona, Me 2012, 48–51

Veivakavulici ena iVakarau ni iVakabula

Ni ko saga mo muria na ivakaraitaki i Jisu Karisito ka bula kilikili tu mo rawata na Nona kaukauwa, sa na rawa vei iko mo veivakatavulici ena kaukauwa kei na dodonu ni lewa.