14 noviembre

K’a’ut naq aajel ru li sumlaak chi junelik?

Tzolʼlebʼ ut Sumwank 129–132

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Ani taaraj ru qatenq’ ut qatij? K’a’ru naru taqab’aanu re xtenq’ankil? Ani raj taqab’oq sa’ jun ch’ina k’anjel qik’in?

• Li k’a’ru teneb’anb’il sa’ qab’een. K’a’ru lee k’anjel ak xqachoy xb’aanunkil? K’a’ru k’anjel toj tento taqab’aanu? Chan ru ak xqab’oqeb’ jalan chi chalk rik’in li Kristo, ut chan ru toj taqab’oqeb’ jalan chik?

• Sa’ li qayu’am. K’a’ru toje’ xqanumsi li xkawob’resi lix nawom qach’ool? K’a’ru yooko chixk’ulb’al sa’ li qayu’am, ut chan ru taqatenq’a qib’ chiqib’il qib’?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Wi natoche’ xch’ooleb’ laa tzolom naq toj saajeb’ chixnawb’al xyaalalil li sumlaak sa’ li santil ochoch, k’a’jo’ wi’chik naq te’raj xk’ulb’al ut xkawresinkil rib’ choq’ re li nimla osob’tesink a’an. Sa’ li na’leb’ kixk’uub’ li qaChoxahil Yuwa’ choq’ re xsahil qach’ool, lix taqsinkil qaloq’al naraj naq too’ok sa’ li junelikil sumwank re li sumlaak (chi’ilmanq Tzol’leb’ ut Sumwank 131:1–4). A’b’anan li sumlaak sa’ li santil ochoch ink’a’ yal nokorosob’tesi sa’ li yu’am chalel—nokorosob’tesi aj b’an wi’ sa’ li yu’am a’in. Li ok sa’ loq’laj sumwank rik’in li Dios naru tixtenq’aheb’ li b’eelomej ut li ixaqilb’ej sa’ xsumlajikeb’. Jun winq ut jun ixq li neke’tz’ape’ sa’ junajil chi junelik naru te’xnaw naq lix sumlajikeb’ naru taakanaaq chi junelik wi tiikaqeb’ chixpaab’ankileb’ lix sumwank, b’antiox re li Jesukristo.

Chan ru taatenq’aheb’ li saaj re naq te’raj li loq’laj k’anjel re tz’ape’k sa’ junajil? Re xkawresinkil aawib’ chixtzolb’aleb’ chirix li santil ochoch, naru taawil “Sobre el sellamiento en el templo” sa’ temples.ChurchofJesusChrist.org malaj “ Matrimonio” sa’ Leales a la Fe ([2004], 113–116).

Li junkab’al naru taatz’ape’q sa’ junajil chi junelik rik’in li k’ojob’anb’il k’anjel re li santil ochoch.

Tzolok sa’ komonil

Re xtenq’ankileb’ li saaj chixwotzb’al xna’leb’eb’ chirix li xe’xtzol sa’eb’ li loq’laj hu chiru li xamaan a’in, naru taatz’iib’a li patz’om a’in chiru li pizarron: K’a’ut naq aajel ru li junelikil sumlaak sa’ lix santil ochoch li Dios? Toja’ naq te’xtaw jun raqal sa’ Tzol’leb’ ut Sumwank 129–132 li naru tixtenq’aheb’ chixsumenkil li patz’om a’an, ut te’xtz’iib’a rajlil li raqal chixk’atq li patz’om sa’ li pizarron. (Wi neke’raj xtenq’, ye reheb’ naq te’ril Tzol’leb’ ut Sumwank 131:1–4; 132:13–19.) Ilomaqeb’ li raqal xe’xtz’iib’a, ut aatinaqex chirix li neke’xye. Naru xb’aanunkil a’in re xtenq’ankileb’ li saaj chixtawb’al ru naq aajel ru li sumlaak sa’ li santil ochoch.

• Xb’aan naq li junelikil sumlaak ka’ajwi’ sa’ li evangelio li k’ojob’anb’il wi’chik natawman, eb’ li saaj maare tento te’xch’olob’ k’a’ru a’an chiruheb’ li ani ink’a’ neke’xnaw. Re xtenq’ankileb’ chixb’aanunkil a’an, naru taaye reheb’ naq te’xk’oxla naq wan jun ramiiweb’ li naxpatz’ k’a’ut naq eb’ laj Santil Paab’anel sa’ Roso’jikeb’ li Kutan neke’xpaab’ naq aajel ru li sumlaak sa’ li santil ochoch. Patz’ reheb’ naq te’rileb’ li raqal re loq’laj hu sa’ “Xkomon chik li tenq’,” “Li Junkab’al: Jun Jek’inb’il Aatin choq’ re li Ruchich’och” (ChurchofJesusChrist.org), malaj eb’ li perel 113–114 sa’ Leales a la Fe. Naru te’xsik’ junqaq aatin ut na’leb’ re xtz’iib’ankil sa’ jun li hu choq’ re li ramiiw, li tixch’olob’ k’a’ut naq aajel ru li sumlaak sa’ li santil ochoch. Naru ajwi’ te’ril “Por qué el matrimonio es sagrado para el Padre Celestial?” sa’ li video “Cara a Cara con el élder y la hermana Renlund” ([video choq’ reheb’ li saaj], 5 agosto, 2017, FacetoFace.ChurchofJesusChrist.org). Naru taak’e xhoonaleb’ chixtz’iib’ankil jun li hu, toja’ naq te’xye k’a’ru xe’xtz’iib’a.

• Rilb’al jun li chaab’il sumal naru tixtenq’aheb’ li saaj chixsik’b’al li osob’tesink a’an sa’ xyu’ameb’. Naru teeril jun raqal re li raatin li Elder L. Whitney Clayton “El matrimonio: Observen y aprendan” (Liahona, mayo 2013, 83–85). K’a’ru neke’xtzol li saaj sa’ li raatin li Elder Clayton chirix li naru nab’aanuman re naq sahaq li sumlaak? Naru te’ril ajwi’ li na’leb’ sa’ “Cómo lograr un matrimonio feliz” sa’ Leales a la Fe (115–116). Naru ajwi’ te’ril “¿Cómo se conocieron el élder y la hermana Bednar?” sa’ li video “Cara a Cara con el élder y la hermana Bednar” ([video choq’ reheb’ li saaj], 12 mayo, 2015, FacetoFace.ChurchofJesusChrist.org).

• Patz’ reheb’ naq te’xk’oxla li k’a’ru tixram ruheb’ chi tz’ape’k sa’ junajil sa’ li santil ochoch. K’a’ru naru taqab’aanu anajwan re toonumtaaq sa’ xb’een a’an? Toja’ naq naru te’ril “El matrimonio eterno” sa’ li ch’ol 3 re Predicad Mi Evangelio ([2019], 89) re te’xtaw li na’leb’ li naxtenq’aheb’ chi saho’k sa’ li sumlaak ut li junkab’al). Naru te’xye k’a’ru yookeb’ chixb’aanunkil anajwan re xkawresinkil rib’ choq’ re li junelikil sumlaak. K’a’ru naxb’aanu li Kolonel re qatenq’ankil chixkawresinkil qib’ ut chixk’ulb’al li junelikil sumlaak?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’ li neke’raj xjayalinkil sa’ xyu’ameb’? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Tzol’leb’ ut Sumwank 49:16–17; 131:1–4; 132:13–19 (Aajel ru li junelikil sumlaak sa’ li na’leb’ kixk’uub’ li Dios)

• Temas del Evangelio, “Matrimonio,” topics.ChurchofJesusChrist.org

• “¿Cómo es una boda mormona?” (video), temples.ChurchofJesusChrist.org

• Li Elder D. Todd Christofferson kixye: “Xjultikankil li tz’aqal yaal chirix li sumlaak ut li junkab’al ink’a’ naxkub’si xwankil li mayejak ut li usaak neke’xb’aanu li ani toj maji’ neke’xtaw a’in sa’ xyu’am. … Naab’al li k’a’ru chaab’il ut aajel ru—maare yal jo’ k’ihal li na’ajman anajwan—naru taab’anumanq b’ar wi’ moko tz’aqalo ta. … Chi anchal qach’ool naqach’olob’ naq lix Tojb’al rix li Maak xb’aan li Kristo ak naxk’e reetal, ut sa’ xraqik tixk’e reeqaj chixjunil li k’a’ru xsachman chiruheb’ lix tzolom” (“K’a’ru aj-e li sumlaak, k’a’ru aj-e li junkab’al,” Jolomil ch’utub’aj-ib’ re abril 2015).

Li k’utuk jo’ li Kolonel

Yeheb’patz’om li te’xtenq’aheb’ li saaj chixk’oxlankil li junelik sumlaak chi us ut chirajb’al xyalb’aleb’ xq’e re naq te’xk’ul. Ab’i chi us li k’a’ru neke’xye, ut sumeheb’ rik’in chaab’ilal a’ yaal jo’ b’eresinb’ilat xb’aan li Musiq’ej.