Pāpode 13

Ewi Wāween Ad M̧ool Wōt n̄an Rilo̧mo̧o̧r eo ilo juon Laļ eo Ejerawiwi?

Jenesis 12–17; Ebream 1–2

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an jerbali ta eo kom̧ kar kōnono kake.

• Mour kōn gospel eo. Ewi wāween ad epaakeļo̧k Rilo̧mo̧o̧r eo? Ewi wāween ad kajjieon̄ eromļo̧k āinwōt E?

• Kea kōn ro rej pād ilo aikuj. Wōn eo eļakkar pād ilo ļōmņak ko ami? Ewi wāween ad maron̄ jipan̄ armej rein kajjojo?

• Karuwaineneik aolep n̄an bōk gospel eo. Ewi wāween ad uwaake kajjitōk ko an ro m̧ōttad kōn Kabun̄ in ilo juon wāween eo me enaaj kōkajoorļo̧k tōmak ko aer ilo Rilo̧mo̧o̧r eo?

• Kobaik baam̧le ko n̄an indeeo. Ta jet iaan wāween ko emaron̄ em̧m̧anļo̧k ad ekkejel ippān ro uwaan baam̧le eo, ro āinwōt ro jibūd im jim̧m̧aad im ro rilikiid?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Mour ilo jim̧we ilo juon laļ eo ejerawiwi ejjan̄in de kar pidodo. N̄an Ebream, kapo ko n̄an oktakļo̧k jān Anij ekar jab itok wōt jān likin, barāinwōt jemān Ebream—barāinwōt jemān Ebream ekar kajejjet tokjen Irooj (lale Ebream 1:5–12; 2:5). Ebream im Sara rekar jelm̧ae men ko reppen, jekdo̧o̧n ak ekar lōke kallim̧ur ko an Irooj, “a raar loi jān etoļo̧k, im yokyokwe er, im kwaļo̧k kōn aer ruwamāejet im riito-itak ioon laļ” (Hibru 11:13).

Ewi wāween am̧ jipan̄ ro uwaan kūlaaj eo ak doulul eo tiljek wōt n̄e rej en̄jake āinwōt er “ruwamāejet im riito-itak ioon laļ” ilo laļ in kōnke rej mour ilo jon̄ak eo an Irooj? Ewi wāween am̧ im̧we er n̄an peran ilo aer m̧ool n̄an Irooj? Ilo am̧ kōppopo n̄an katakin, ļōmņak in etale Jon 15:18–20 im ennaan eo an Elder Neil L. Andersen “Anjo̧ jān Laļ” (Liaona, Māe 2017, 58–62).

Rikaļoor ro an Jisōs Kraist remaron̄ lo aenōm̧m̧an ilo aer mour jim̧we jekdo̧o̧n jum̧ae ko.

Ekkatak Ippān Doon

Ro uwaan kūlaaj eo ak doulul eo remaron̄ en̄jake im̧we jān waanjon̄ak eo an Ebream ilo wiik in ilo aer kar ekkatak Jenesis 12–17 im Ebream 1–2. Kwomaron̄ karuwaineneik er n̄an etale Ebream 1:1–19 im kwaļo̧k ta eo ej im̧we er kōn waanjon̄ak eo an Ebream. Ta men ko reinļo̧k wōt juon jej loi ikōtaan apan̄ ko Ebream ekar jelm̧aeiki im apan̄ ko jej jelm̧aeiki rainin? Kālet juon ak elōn̄ļo̧k m̧akūtkūt ko ilaļ n̄an kapilōk n̄an kōm̧m̧an ekōnono kōn wāween ad maron̄ tiljek n̄an Jisōs Kraist ilo aolep jekjek ko.

• Irooj im rikanaan ro An rekōn emakijkij aer libijerjer ro raar katakin n̄an mour tiljek kejekdo̧o̧n nana eo ej jepool er. Ta jet iaan wāween ko me Setan ej kapoiki rūm̧m̧an ded n̄an kakkure kien ko an Anij ilo raan kein? Ro kwoj katakin er remaron̄ riiti jet iaan eoon ko kar kōlaajraki ilo “Supporting Resources.” Kajjitōk ippāer n̄an ekōnono kōn ta eo rej ekkatak kōn m̧ool wōt n̄an Kraist n̄e laļ in ej kapoik kōj n̄an kōm̧m̧ane eo ta eo eoktak ak kajirere kake kōj. Remaron̄ barāinwōt kwaļo̧k ta eo em̧ōj aer loe n̄an mour tiljek n̄e ro jet rejjab. N̄āāt eo jekar ak ro jet jejeļā kake remaron̄ kōm̧m̧an menin? Komaron̄ barāinwōt kwaļo̧k juon ak elōn̄ļo̧k pija in alooj ko loi ilo “Supporting Resources.”

• N̄an jipan̄ kūlaaj eo ak doulul eo meļeļe kōn wāween n̄an anjo̧ jān laļ im bōk kōjeraam̧m̧an ko me rej itok jān aer kōm̧m̧ane āindein, je ioon bo̧o̧t eo Anjo̧ jān laļ in ej … im Anjo̧ jān men ko an laļ in … Innām kwomaron̄ kajjitōk ippān jodikdik ro n̄an etale ennaan eo an Elder Neil L. Andersen “Anjo̧ jān Laļ.” Karuwaineneik er n̄an kappukot wāween ko n̄an kadedeikļo̧k jentōj kein, je ta eo rej ekkatak ioon bo̧o̧t eo. Ekōnono kōn ta eo rej loe. Karuwaineneik juon armej m̧oktaļo̧k bwe en itok ilo an pojak n̄an kwaļo̧k juon bwebwenato ej kwaļo̧k kōn wāween an Jisōs Kraist m̧ool wōt n̄an Jemān jekdo̧o̧n jum̧ae (lale, n̄an waanjon̄ak, Matu 4:1–11; Luk 22:39–44). Ta waanjon̄ak ko rej jipan̄ kōj meļeļe kōn anjo̧ jān laļ in? (lale Jon 16:33).

• Rikaļoor ro an Jisōs Kraist rej aikuj pād “ilo laļ ak jab an laļ in.” Pād “ilo laļ in” emaron̄ meļeļein bwe jej jelm̧ae jum̧ae n̄e jej mour kōn jon̄an ko ad. Ak ej barāinwōt meļeļein bwe jemaron̄ im̧we ro jet n̄an em̧m̧an. N̄an katakin pedped in katak in, kwomaron̄ kajjitōk ippān juon armej n̄an itok n̄an kūlaaj ilo aer pojak n̄an kwaļo̧k juon ak elōn̄ ļo̧k bwebenato ko ilo ennaan eo an Būreejtōn Bonnie H. Cordon “Bwe Ren Maron̄ Loe” (Liaona, Māe 2020, 78–80). Ta eo jej ekkatak jān bwebwenato kein ilo ad kōjerbal meram ko ad n̄an jipan̄ ro jet epaakeļo̧k Jisōs Kraist? Karuwaineneik kūlaaj eo ak doulul eo n̄an kappukot ennaan eo an Būreejtōn Cordon kōn jentōj ko me rej im̧we er n̄an erom̧ juon meram n̄an ro jet ilo juon laļ eobrak kōn jerawiwi. Karuwaineneik er n̄an riiti jentōj ko aer ilo aer kōļap ainikier im kwaļo̧k ta eo rej en̄jake me ej im̧we er n̄an kōmmane.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Matu 5:14–16; 1 Nipai 15:23–25; Hilamōn 5:12; Katak im Bujen Ko 10:5; 27:15–18; 87:8 (Ewi wāween ad m̧ool wōt n̄an Jisōs Kraist ilo juon laļ eo ejerawiwi)

• “Stand Ye in Holy Places—Bloom Where You’re Planted,” “195 Dresses,” “Guided Safely Home” (pija in alooj ko), ChurchofJesusChrist.org

Teaching in the Savior’s Way

Rilo̧mo̧o̧r eo ekar karuwaineneik Piter n̄an kam̧ool kōn kajjitōk, “Wōn N̄a ilo ami ba?” (Mattu 16:15). Ke Piter ekar uwaak, naan in kam̧ool eo an ekar kajoorļo̧k. Ta kajjitōk ko renaaj karuwaineneik ro kwoj katakin n̄an kam̧ol bwe Jetōb eo en maron̄ kōkajoorļok naan in kam̧ool ko aer?