M̧aaj 13

Ewi Wāween Aō Jelm̧ae Apan̄ ko kōn Tōmak?

Jenesis 37–41

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk n̄an jerblaki aitia ko kar ekōnono kaki.

• Mour kōn gospel eo. Ekōjkan ad en̄jake pein Irooj ilo mour ko ad?

• Kea kōn ro rej pād ilo aikuj. Ewi wāween ad rie doon ilo men ko jej jelm̧aeiki?

• Karuwaineneik aolep n̄an bōk gospel eo. Ewi wāween an em̧m̧anļo̧k ad kōjerbal technology āinwōt juon kein jerbal n̄an kwaļo̧k gospel eo?

• Kobaik baam̧le ko n̄an indeeo. Ta eo jej kōm̧m̧ane n̄an jipan̄ baam̧le ko ad itok n̄an Kraist?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Āinwōt juon likao, Josep eo ilo Ijipt ekar ioon elōn̄ apan̄ ko. Ekar jelm̧ae jum̧ae ilo baam̧le eo an im ekar nana an ļōmaro jein kōm̧m̧an n̄an e. Ekar jelm̧ae kapo n̄an kakkure kien erreo. Ijello̧kin aer kautiej e kōn an m̧ool, kar kadeļo̧n̄ e ilo kalbuuji. Membōr ro ilo kūlaaj eo ak doulul eo remaron̄ bar jelm̧ae ejja kain mellijon̄ rōt in wōt im elōn̄ ko jet. Ilo am̧ ekkatak kōn en̄jake eo an Josep ilo Jenesis 37–41, ļōmņak kōn ro kwoj katakin er. Kejōkļo̧kjeņ kōn ta katak ko raorōk kōn mour eo an Josep me emaron̄ wōr ippāer (bar lale Ether 12:27; Henry B. Eyring, “Try, Try, Try,” Liaona, Nob. 2018, 90–93). Bwebwenato eo an Josep emaron̄ im̧we ro uwaan kūlaaj eo ak doulul eo n̄an kajjitōk, “Ewi wāween aō maron̄ jelm̧ae apan̄ ko kōn tōmak, im ewi wāween an Anij naaj jipan̄ eō?”

Ilo ad mije tōmak eo ad ilo Jisōs Kraist, jemaron̄ lo kajoor ilo apan̄ ko ad.

Ekkatak Ippān Doon

Ļōmņak in kajjitōk ippān ro uwaan kūlaaj eo ak doulul eo n̄an kōlaajrak ilo boot eo jet iaan men ko rekar kwaļo̧k jān mour eo an Josep ilo Ijipt, āinwōt kōmeļeļeiki ilo Jenesis 37 im 39–41. Kwaļo̧k jet pija, āinwōt ko ilo Itok, Ļoor Eō—N̄an Kajjojo Armej im Baam̧le Ko, me emaron̄ leļo̧k n̄an er meļeļe ko. Ekōjkan an kar mālijjon̄ ko an Josep eier wōt apan̄ ko me jodikdik ro rej jelm̧ai rainin? Eļan̄n̄e Joseph en kar mour rainin, ta kapilōk eo en kar letok n̄an kōj kōn jelm̧ae apan̄ ko? Ta eo emaron̄ in ba kōn wāween an jemjerā eo an ippān Irooj kar jipan̄ e? Kōjerbal m̧akūtkūt ko rej ellaajrak n̄an jipan̄ jodikdik ro ļōmņak kōn wāween aer maron̄ jelm̧ae apan̄ ko aer kōn tōmak ilo Jisōs Kraist.

• Ekkatak wāween an Rilo̧mo̧o̧r kar jelm̧aeiki apan̄ ko emaron̄ jipan̄ kōj jelm̧ae apan̄ ko ad kōn tōmak. Jodikdik ro remaron̄ elmakote jet iaan waanjon̄ak ko kōn ta eo Rilo̧mo̧o̧r ekar jelm̧aeiki im etali ippāer (lale “Supporting Resources” kōn jet itia ko). Ta ko rej im̧we kōj kōn wāween an Rilo̧mo̧o̧r kar jelm̧ae ilo iien Apan̄ ko An? Ewi wāween ad maron̄ ļoor waanjon̄ak eo An ilo ad jelm̧ae apan̄ ko ad make?

• Jet iien epidodo n̄an jelm̧ae apan̄ ko jej kajjieon̄ n̄an kalimjōk ilo wāween an Irooj kalimjōki. N̄an jipan̄ ro kwoj katakin er meļeļe menin, kajjitōk ippāer n̄an kappukot waanjon̄ak ko kōn oktak ko me ad kalimjōke ak ļōmņake emaron̄ kōm̧m̧an ilo an lale ennaan eo an Elder Rafael E. Pino “The Eternal Perspective of the Gospel” (Liaona, May 2015, 117–19). Karuwaineneik er n̄an kwaļo̧k ta eo rekar loi. Ta ko waanjon̄ak kein rej elmakoti kōn wāween ad lale im jelm̧aeiki apan̄ ko ad? Eļan̄n̄e Rilo̧mo̧o̧r emaron̄ kōnono n̄an kōj kōn apan̄ ko ad, ta eo jej ļōmņak Enaaj ba? N̄an jipan̄ uwaake kajjitōk in, jodikdik ro remaron̄ lale eoon ko ilo “Supporting Resources.”

• Ļōmņak in kajjitōk ippān jodikdik ro n̄an kwaļo̧k waanjon̄ak eo kōn juon armej (bolen juon jibūn ak jim̧aan etto) eo ekar im̧we er ilo wāween an kar jelm̧ae juon mellijon̄. Ak kwomaron̄ kwaļo̧k waanjon̄ak ko reim̧we kōn armej ro kwojeļā kake er. Ennaan ko ilo kweilo̧k eo eļap ekkā an koba bwebwenato in armej ro me rekar jelm̧ae apan̄ ko kōn tōmak (lale jet waanjon̄ak ilo “Supporting Resources”). Ļōmņak ta eo kwomaron̄ kwaļo̧k jān kain ennaan kein me remaron̄ ļap tokjeer n̄an ro kwoj katakin er. Ilo am̧ ekōnono kōn waanjon̄ak kein ippān doon, elmakote bwe ro uwaan kūlaaj eo ak doulul eo ren mije wōt wāween an tōmak ilo Jisōs Kraist kar jipan̄ armej ro ilo iien apan̄ ko aer. Kwomaron̄ barāinwōt kwaļo̧k laajrak in kein jipan̄ ko Irooj ekar litok n̄an jipan̄ kōj ilo apan̄ ko ad an Bisop W. Christopher Waddell, loi ilo jem̧ļo̧k in ļo̧k ennaan eo an“Oktakļo̧k n̄an Irooj” (Liaona, Nob. 2017, 94–96).

Jerbal kōn Tōmak

Rōjan̄ ro kūlaaj eo ak doulul eo n̄an kejo̧kļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rekōņaan, remaron̄ kwaļo̧k aitia ko aer make. Karuwainene er n̄an ļōmņak kōn ekōjkan an jerbalki im̧we ko aer naaj kōkajoorļo̧k jemjerāko aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Matu 4:1–11 (Rilo̧mo̧o̧r eo ekar wōr an tōmak ilo iien apan̄ ko)

• Matu 14:10–21; Luk 23:33–34; Jon 19:25–27 (Rilo̧mo̧o̧r eo ekar jerbal n̄an ro jet ilo iien apan̄ ko An)

• Matu 27:45–46; Luk 23:44–46 (Rilo̧mo̧o̧r eo ekar en̄jake ajimakeke ilo iien apan̄ ko an ak ekar lōke Anij)

• Matu 5:38–45; Mosaia 24:8–15; Katak im Bujen Ko 121:1–8; 122:5–9 (Katak ko an Rilo̧mo̧o̧r eo kōn jelm̧ae apan̄)

• Neil L. Andersen, “Ikkinejnej,” Liaona, Nob. 2018, 83–86

• L. Todd Budge, “Lōke eo Ejjejet im Pen,” Liaona, Nob. 2019, 47–49

• Jean B. Bingham, “Bwe Ami Lan̄lōn̄ En Maron̄ Obrak,” Liaona, Nob. 2017, 85–87

Teaching in the Savior’s Way

“N̄e kwoj m̧aanjabpopo, kōm̧m̧an bwe meļeļe eo am̧ kōn armej ro kwoj katakin ren tōl karōk ko am̧” (Teaching in the Savior’s Way, 7). N̄an waanjon̄ak, jar ilo ami kōm̧m̧an m̧akūtkūt ilo ami kōjerbal jeje ko rekwojarjar im kein jipan̄ ko jet me remaron̄ jipan̄ kōn apan̄ ko me ro uwaan kūlaaj eo ak doulul eo rej jelm̧aeiki.