M̧aaj 27

Wōn N̄a, im Wōn eo Anij Ekōņaan Bwe in Erom̧?

Exodus 1–6

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innām tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ekōjkan ad maron̄ lo lan̄lōn̄ im m̧oor Jisōs Kraist?

• Kea kōn ro rej pād ilo aikuj. Wōn ilo ward eo ak jukjuk in pād eo ej aikuji jipan̄ eo ad? Ekōjkan ad maron̄ jipan̄?

• Karuwaineneik aolep n̄an bōk gospel eo. Ewi wāween ad jipan̄ doon kōppopo n̄an jerbal in mijenede?

• Kobaik baam̧le ko n̄an indeeo. Ewi wāween ad maron̄ jipan̄ļo̧k kijejeto ko an ward eo ad n̄an kōm̧m̧ane menmenbwij an baam̧le im jerbal in tampeļ?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–-35 minit ko

Kōpooj Eok Make ilo Jetōb

Juon wōjke eo ej uruur ak ejjab bwil emaron̄ kar kabwilōn̄lōn̄, im ekar kappele Moses. Ak ta eo eļapļo̧k an kar kabwilōn̄lōn̄ ekar ta eo ekar waļo̧k tokālik. Anij ekar kōnono n̄an Moses, im Moses ekar ekkatak n̄an kalimjōk e āinwōt an Anij kalimjōk e. Kōn jeļā in, Moses ekar kōttōprak juon men kōn jipan̄ eo an Irooj me ekar ļōmņak epen: ekar jelm̧ae Pero im lo̧mo̧o̧ren armej ro an Anij.

Jej aolep aikuj en̄jake ko me rej jipan̄ kōj bōk jikin pere ko ad kōn jeļā eo an Anij kōn wōn kōj im wōn eo jemaron̄ erom̧. Rūm̧m̧an ded ro, ilo m̧ool, rej jelm̧aeiki ennaan ko reriab kōn aorōk ko aer make. Im āinwōt Moses, Anij “ekar wōr juon jerbal n̄an [er] n̄an kōm̧m̧ane” (Unin Tōl eo an Doulul eo an Priesthood eo an Aron). Ewōr aer Pero ko make n̄an jelm̧ai im armej ro aer make n̄an lo̧mo̧o̧ren er. Ewi wāween am̧ naaj jipan̄ er keememej bwe rej jiron̄ im likao ro nejin Jemed im Jined Ilan̄ “kōn juon paaktok ekwojarjar im mejen kajjik n̄an indeeo”? (Unin Tōl eo an Doulul eo an Jiron̄ Ro). Kejōkļo̧kjeņ kōn menin ilo am̧ riiti Exodus 1–6. Bar ļōmņak in ekkatak Katak im Bujen Ko 18:10–15 im ennaan eo an Būreejtōn Dieter F. Uchtdorf “Eļap Am̧ Aorōk n̄an E” (Liaona, Nob. 2011, 19–22).

Mour ko ad remaron̄ oktak n̄e jemeļeļe kōn m̧ool in kadkad ko ad āinwōt ajri ro nejin Anij.

Ekkatak Ippān Doon

Ro uwaan kūlaaj ak doulul eo am̧ remaron̄ riiti Exodus 1–6 ilo wiik in. N̄an im̧we er n̄an jeere ta eo rekar ekkatak, kwomaron̄ kajjitōk ippāer kōn wāween an kar Moses en̄jake kōn kūr eo an n̄an karon̄ ajri ro nejin Israel (lale Exodus 3:11). Ta m̧ool ko Irooj ekar katakin Moses n̄an jipan̄ ukot jeļā eo an? (lale Exodus 3:4–15; 4:10–17; bar lale Moses 1:3–11). Ewi wāween an m̧ool kein kar jipan̄ Moses? Ewi wāween aer jipan̄ kōj? Kōjerbal juon m̧akūtkūt āinwōt juon iaan kein rej elaajrak n̄an jipan̄ ro uwaan kūlaaj ak doulul eo jeļā ta eo Anij ekar kwaļo̧k kōn m̧ool in kadkadier, aorōkier, im wōn ro remaron̄ erom̧.

• Būreejtōn Dieter F. Uchtdorf ekar ba, “Irooj ej kōjerbal juon scale lukkuun oktak jān an laļ in lale jon̄an eddoin aorōk in juon jetōb” (“You Matter to Him,” 22). N̄an ekōnono kōn itia in, kwomaron̄ je ioon bo̧o̧t eo Ewi wāween an Anij kwaļo̧k aorōk in juon armej? Karuwaineneik ro kwoj katakin er n̄an elmakote uwaak ko. Eļan̄n̄e jej etale erreo eo ad ilo wāween in, ewi wāween en̄jake kein rej jelōt jokālet ko ad? Innem kwomaron̄ je ioon boot eo Ewi wāween an Anij kwaļo̧k aorōk in juon armej? Āinwōt an jodikdik ro jeere uwaak ko, rōjan̄ er n̄an riiti Jon 3:16; Katak im Bujen Ko18:10–15; Luk 15:3–6, 11–32. Remaron̄ barāinwōt riiti jekjen ko āliktata ilo ennaan eo an Būreejtōn Uchtdorf. Eļan̄n̄e jej etale erreo eo ad ilo wāween in, ewi wāween en̄jake kein rej jelōt jokālet ko ad?

• Et ko ejeļet wāween ad en̄jake kōn im kōm̧m̧an n̄an kōj make im ro jet. N̄an jipan̄ ro uwaan kūlaaj ak doulul eo ļōmņak kōn wāween aer je etaer make, kwomaron̄ leļo̧k kajjojo iaer tag ko me rejjan̄in jeje ioon. Kajjojo tag emaron̄ wōr ie “Iakwe, N̄a …” jeje ilōn̄tata. Karuwaineneik er n̄an ļōmņak kōn jejjo naan ko reoktak ak ennaan ko remaron̄ je ioon tag in et ko. Eļan̄n̄e Jemedwōj Ilan̄ rekar kōm̧m̧an tag in eta ko n̄an kōj, ta eo Enaaj kar je? Ta eo Enaaj kar je eļan̄n̄e tag ko rekar ba “Iakwe, Imaron̄ erom̧ …”? Ro uwaan kūlaaj ak doulul eo remaron̄ kejōkļo̧kjeņ kōn kajjitōk kein ilo aer riiti jet iaan eoon kein rej elaajrak: 1 Jon 3:1–3; Moronai 10:32–33; Katak im Bujen Ko 76:69–70; 84:37–38.

• Ennaan ko ilo kweilo̧k eo eļap ilo “Supporting Resources” epād ie waanjon̄ak ko an armej ro me mour ko aer rekar oktak kōnke rekar ekkatak kōn m̧ool in kadkadier āinwōt ajri ro nejin Anij. Ļōmņak in leļo̧k n̄an kajjojo ro ilo kūlaaj ak doulul eo juon iaan waanjon̄ak kein n̄an kejōkļo̧kjeņ im jeere ippān kurup eo. Kwomaron̄ bar kōnono kōn ewi wāween ilo ad jeļā bwe jej aolep ajri ro nejin Anij rej jelet mour ko ad? Karuwaineneik ro uwaan kūlaaj eo ak doulul eo n̄an ejja āinwōt in.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Joy D. Jones, “Aorōk jān Jabdewōt Jon̄ok,” Liaona, Nob 2017, 13–15

• Brian K. Taylor, “N̄aij ke juon Ajri Nejin Anij?” Liaona, Māe 2018, 12–14

• “Our True Identity,” “How Can I See Myself as God Does?” jān “Face to Face with Elder Rasband, Sister Oscarson, and Brother Owen” (pija in alooj ko), ChurchofJesusChrist.org

• “All About Me” en̄jake eo ilo FamilySearch.org/discovery

Teaching in the Savior’s Way

“Eļan̄n̄e jodikdik ro ej en̄jake bwe kwoj lōke er, aer lōke ilo kōjatdikdik eo aer ekwojarjar naaj eddōkļo̧k, im renaaj kailbōk eok kōn ta eo remaron̄ kōttōprake” (Teaching in the Savior’s Way, 28).