Eprōļ 10

Ewi Wāween Aō Kōkajoorļo̧k Tōmak eo Aō ilo Jisōs Kraist Aolep Raan?

Exodus 14–17

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innm, n̄an kakkobaba n̄an kapilōk doon kōn aikuj ko an doulul ak kūlaaj eo, kwomaron̄ kōņaan kōnono kōn im̧we im unin tōl ko jān kweilo̧k eo eļap. Kajjitōk ko rej ellaajrak remaron̄ jipan̄.

• Ta unin tōl eo ak ennaan ko rekar jiktok ilo kōļmenļo̧kjeņ ko ad? Ta eo ej kōkajoorļo̧k tōmak eo ad ilo Jisōs Kraist?

• Ta eo ej kōkajoorļo̧k naan in kam̧ool eo ad kōn rikanaan ro remour? Ta eo jekar en̄jake im̧we n̄an kōm̧m̧ane kōnke ta eo jekar ekkatak ak en̄jake?

• Ta eo jej aikuji n̄an kōm̧m̧ane āinwōt juon doulul ak kūlaaj n̄an kōm̧m̧an ekkar n̄an kapilōk eo jekar ron̄ ilo kweilo̧k eo eļap?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

N̄an maron̄ mour ilo āne jemaden, ajri ro nejin Israel rekar aikuj n̄an ekkatak n̄an pedped ioon Irooj. Rekar pedped Ioon kōn menin bwilōn̄ ko rekar lo̧mo̧o̧ren armej, āinwōt jepelļo̧k eo an Lomaļo ekilmūr, im barāinwōt menin bwilōn̄ ko rekar kōkajoorļo̧k mour an armej, āinwōt mana jān lan̄. Ejja men in wōt em̧ool n̄an ro kwoj katakin er. Eļan̄n̄e rej n̄an mour ilo iaļ in jetōb in aer ilo āne jem̧aden an mour in, rej aikuj kōmourur tōmak ilo Jisōs Kraist. Im rej aikuj kōmourrur tōmak eo kajjojo raan, ejjab jejjo wōt iien em̧m̧an. Jet iaan ro kwoj katakin er remaron̄ en̄jake bwe tōmak eo aer ekajoor. Kwomaron̄ jipan̄ er lo bwe tōmak eo ej eddōkļo̧k, raan n̄an raan. Naajdiki kōn men ko reddik im reļam waan me ej jejjet aer kōm̧m̧ani aolep raan. Kejōkļo̧kjeņ kōn men kein ilo am̧ ekkatak Exodus 14–17 ilo wiik in. Kwomaron̄ bar ekkatak ennaan eo an Būreejtōn Dallin H. Oaks “Men ko Reddik im Relam Waan” (Liaona, Māe 2018, 89–92).

Jemaron̄ kōkajoorļo̧k tōmak eo aer kajjojo raan ilo wāween eo edik im eļam waan.

Ekkatak Ippān Doon

N̄an jino juon ekōnono, kwomaron̄ kajjitōk ippān jodikdik ro n̄an kwaļo̧k jet iaan imminene ko aer aolep raan me ej jipan̄ er kōm̧m̧ani men ko rem̧m̧an. Men kein remaron̄ koba kōkm̧anm̧anļo̧k ājmour em̧m̧an ak kōkajoorļo̧k naan in kam̧ool ko aer. Ta en kar waļo̧k eļan̄n̄e jejjab dāpij imminene kein? Ewi wāween an kijejeto ko aolep raan n̄an kōm̧m̧ane men ko rem̧m̧an keidi n̄an kōmeļeļe ko me Irooj ekar leļo̧k n̄an riIsrael ro n̄an aiin mana ko? (lale Exodus 16:16–21). Kwomaron̄ jipan̄ kūlaaj ak doulul keidi en̄jake ko an riIsrael ippān kijejeto kijejeto ko n̄an kōkajoorļo̧k tōmak ko ad ilo Jisōs Kraist aolep raan. N̄an waanjon̄ak, ta eo Irooj ej letok n̄an kōj me ej āinwōt mana ko aolep raan me E ekar leļo̧k n̄an RiIsrael ro? Ta eo jemaron̄ kōm̧m̧ane me ej āinwōt aiintok mana ko? N̄an wōnm̧aanļo̧k wōt ilo ekkōnono ko am̧, kōjerbal juon ak elōn̄ m̧akūtkūt ijin ilaļ ak juon am̧ make.

• Riit ippān doon Alma 37:6–7. Āinwōt juon kūlaaj ak doulul, kōlaajrake ioon boot eo jet iaan “men ko reddik im reļam waan” me Irooj ekar karuwaineneik kōj n̄an kōm̧m̧ani kajjojo raan n̄an itok n̄an E. Ro kwoj katakin er remaron̄ etale ennaaan eo an Būreejtōn Dallin H. Oaks “Men ko Reddik im Relam Waan” n̄an kappukot men ko reddik me emaron̄ wōr juon im̧we em̧m̧an im eļap ilo mour ko ad. Ta tōprak eo emaron̄ waļo̧k ilo men kein? Ta eo jekar im̧we er n̄an kōm̧m̧ane men kein bwe en juon m̧ōttan ejejjet ilo mour ko ad aolep raan?

• Etke tōmak ilo Jisōs Kraist ej aikuj bwe ren naajdiki aolep raan? N̄an jipan̄ membōr ro em̧m̧anļo̧k aer meļeļe menin, kwomaron̄ kwaļo̧k juon ak elōn̄ pija in alooj ko me rej pād ilo “Supporting Resources.” Ilo pija in alooj alooj kein, Elder D. Todd Christofferson ekar katakin kōn aikuj eo n̄an kijejeto aolep raan n̄an rejtake tōmak ko ad. Karuwaineneik ro kwoj katakin er n̄an kwaļo̧k men ko me rekar ekkatak kaki me rej im̧we er n̄an kōļapļo̧k tōmak eo aer ilo Jisōs Kraist aolep raan.

• Kajejjet kijejeto ko aolep raan rej wāween eo em̧m̧an tata n̄an kōkajoorļo̧k tōmak ko ad ilo Kraist. N̄an ekōnono kōn ļōmņak in, riiti elmakot eo kein kajilu ilo ennaan eo an Elder David A. Bednar “More Diligent and Concerned at Home” (Liahona, Nov. 2009, 17–20). Ta katak ko jemaron̄ ekkatak jān kōmeļeļe in kōn juon pija jin̄n̄a ilo opiij eo an? Ewi wāween an katak kein iookļo̧k kijejeto ko ad n̄an kalōk tōmak eo ad ilo Jisōs Kraist? Riiti ippān Alma 32:21, 26–43 remaron̄ kobaiki ilo ekkōnono eo am̧. Ta meļeļe eo jej lo kōn wāween n̄an kōkajoorļo̧k tōmak ko ad ilo Jisōs Kraist?

• Ta eo jemaron̄ kōļapļo̧k tōmak eo ad ilo ad kālet n̄an ekkatak jān en̄jake ko me rej idajon̄jon̄ e. Kwomaron̄ kwaļo̧k pija in alooj eo “Spiritual Whirlwinds” (ChurchofJesusChrist.org). Ekōnono ippān doon kōn ta eo jemaron̄ kōm̧m̧ane ilo juon iien idajon̄jon̄ n̄an kōkajoorļo̧k tōmak ko ad. (Bar lale Neil L. Andersen, “An̄jiwiwi ko in Jetōb,” Kweilo̧k eo Eļap, Māe 2014, 18–21.) Kwomaron̄ kajjitōk ippān ro uwaan kūlaaj ak doulul eo n̄an kwaļo̧k iien ko ke rekar en̄jake bwe tōmak eo aer ilo Kraist ekar idajon̄jon̄ e im ta eo rekar kōm̧m̧ane n̄an kōkajoorļo̧k tōmak eo aer ilo iien eo. Kwaļo̧k bwe Exodus 14–17 ej kōmeļeļeiki ikutkut in ellotaan ko, ak aitwerōk kōn riIsrael ro ke rekar en̄jake idajon̄jon̄ ko. Ewi wāween an ellottan ko ilo iien idajon̄jon̄ eo kōmōjņoiki tōmak eo ad? Ta oktak eo ikōtaan ellotaan im kwaļo̧k ad inepata n̄an Jemedwōj Ilan̄ ilo iien ko reppen?

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• “Daily Bread: Pattern,” “Daily Bread: Change,” “Daily Bread: Experience” (pija in alooj ko), ChurchofJesusChrist.org

Teaching in the Savior’s Way

Jipan̄ ro uwaan kūlaaj ak doulul eo meļeļe wāween aer maron̄ karuwaineneik Jetōb n̄an pād ilo iien ekōnono ko. Remaron̄ kōm̧m̧ane menin kōn “m̧wilier … , wāween eo rej kōm̧m̧an n̄an doon, im wāween rej en̄jake kōn gospel eo” (Teaching in the Savior’s Way, 15).