Juun 26

Etke Mour Erreo Eaorōk ilo Karōk eo an Anij?

2 Samuel 5–7; 11–12; 1 Kiin̄ Ro; 8; 11

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innām tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an kōm̧m̧ane ta eo kom̧j kōnono kake.

• Mour kōn gospel eo. Ewi wāween ad kar epaakeļo̧k Rilo̧mo̧o̧r eo? Ewi wāween ad kajjieon̄ eromļo̧k āinwōt E?

• Kea kōn ro rej pād ilo aikuj. Wōn eo eļakkar pād ilo ļōmņak ko ad? Ewi wāween ad maron̄ jipan̄ armej rein kajjojo?

• Karuwaineneik aolep n̄an bōk gospel eo. Ewi wāween ad uwaaki kajjitōk ko an ro m̧ōttad kōn Kabun̄ in ilo juon wāween eo me enaaj kōkajoorļo̧k tōmak ko aer ilo Rilo̧mo̧o̧r eo?

• Kobaik baam̧le ko n̄an indeeo. Ta jet iaan wāween ko emaron̄ em̧m̧anļo̧k ad ekkejel ippān ro uwaan baam̧le eo, ro āinwōt ro jibūd im jim̧m̧aad im ro rilikiid?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Jemedwōj Ilan̄, eo ekōņaan bwe jen m̧ōņōņō, ekar letok n̄an kōj kien erreo. Im Setan, eo ekōņaan bwe jen burom̧ōj, ej katak bwe kakien in ejjab aorōk. Ej kōm̧m̧ane aolep men emaron̄e n̄an kapoiki kōj n̄an kakkure kien erreo. Rūm̧m̧an ded maron̄ kareel kōn pija ko im ennaan ko me rej jum̧ae ta eo Anij ej katakin kōn kien erreo. Kajjojo iaad ej aikuj jeļā kōn kapo ko im kate er n̄an dāpij ļōmņak, naan, im kōm̧m̧an ko ad bwe ren erreo ilo aolep mour ko ad. Jej ekkatak katak in jān en̄jake eo ekaburom̧ōjm̧ōj an Kiin̄ Devid. Ekar juon waanjon̄ak kōn tiljek eļap. Ak ekar deļon̄ ilo kapo im kakkure kien erreo (lale 2 Samuel 11:1–5).

Kwomaron̄ kōppopo n̄an katakin ilo am̧ riiti 2 Samuel 11, ennaan eo an Elder David A. Bednar “Kōmij Tōmak ilo Jetjet” (Liaona, Māe 2013, 41–44), im kein jipan̄ ko jet kōn kien mour erreo. Ta eo ej im̧we ro uwaan kūlaaj ak doulul eo n̄an kalimjōk kien erreo āinwōt an Anij kalimjōk? Ta eo emaron̄ jipan̄ er jum̧ae wāween an Setan kalimjōke?

N̄an pād wōt ilo tiljek n̄an kien mour erreo eo an Anij, jej aikuj kajjieon̄ kate kōj kajjojo raan n̄an dāpij ļōmņak, naan, im m̧akūtkūt ko ad rerreo.

Ekkatak Ippān Doon

En̄in ej juon wāween n̄an kwaļo̧k kadkadin unin kōnono eo kōn kien erreo ilo am̧ jipan̄ ro kwoj katakin er etale ta eo rekar riiti ilo jeje ko rekwojarjar. Je naan ko David im Josep ioon boot eo. Innem etale ippān doon 2 Samuel 11:1–5 im Jenesis 39:7–12. Ewi wāween an Devid im Josep ņa mejļan kapo eo n̄an kōm̧m̧ane jerawiwi in m̧ōm̧ an kanniōk eo? Ta eo jej ekkatak jān waanjon̄ak ko aer? Kōjerbal m̧akūtkūt kein rej ellaajrak ak jet iaan m̧akūtkūt ko am̧ make n̄an im̧we ekkōnono ko reļļapļo̧k kōn etke mour erreo eaorōk ilo karōk an Anij.

• Jodikdik ro kwoj katakin emaron̄ jeraam̧m̧an jān kōmeļeļeik jon̄ak eo an Irooj kōn erreo ilo mour in kanniōk. Karuwainene er n̄an etale “Mour Erreo” ilo N̄an Kōkajoorļo̧k Jodikdik Ro ([bok jidikdik eo, 2011], 35–37) ak pārokūrāāp emen in “Baam̧le Eo: Juon Naan in Kean̄ n̄an Laļ in” (ChurchofJesusChrist.org). Ewi wāween an katak ko an Irooj kōn kanniōk oktak jān ta eo Setan ekōņaan bwe jen tōmake? Jodikdik ro remaron̄ etale “Baam̧le Eo: Juon Naan in Kean̄ n̄an Laļ in,” kappukot ennaan ko me ej kōmeļeļeik etke kien erreo eaorōk n̄an karōk eo an Jemedwōj Ilan̄ ekam̧ōņōņō. Ta eo jej ekkatak jān ennaan ko me rej jipan̄ kōj mour ilo jim̧we ilo laļ in rainin?

• Jet iien ro jet rejjab meļeļe jon̄ak ko ad kōn jon̄ak kōn m̧wil ko rem̧m̧an im rebōd, eļaptata kōnke jon̄ak ko roktak jān ta eo me elōn̄ armej rej tōmak. Ewi wāween ad uwaake kajjitōk ko aer? Ta eo jej ekkatak jān Elder im Sister Renlund ilo pija in alooj eo “Why Is It Important to Live the Law of Chastity?” jān “Face to Face with Elder and Sister Renlund” (ChurchofJesusChrist.org). Jodikdik ro remaron̄ kappukot ilo eoon ko ilo “Supporting Resources” ennaan ko me rej kōmeļeļeik kōjeraam̧m̧an ko an mour erreo. Kwomaron̄ kajjitōk ippāer n̄an kwaļo̧k ļōmņak ko kōn etke rej kālet n̄an pokake jon̄ak eo an Irooj kōn m̧wil ko rem̧m̧an im rebōd kōn kien erreo.

• Manit ko rebun̄bun̄ ekkā aer katakin bwe ejjab menin aikuj n̄an erreo ilo kanniōk. Em̧ool manit eo ej kōjekdo̧o̧n m̧ool ko kōn kōjeraam̧m̧an ko an mour erreo im kauwōtata in mour ko ettoon. N̄an ekkatak kōn m̧ool kein, jodikdik ro remaron̄ ekkatak ennaan ko an Elder David A. Bednar “Kōmij Tōmak ilo Mour Jetjet.” Jet remaron̄ ekkatak jān jekjōn eo “Kōttōpar eo an Rikapo eo,” im ro jet remaron̄ ekkatak “Kōjeraam̧m̧an ko an Jetjet.” Innem remaron̄ jeere ippān doon ta eo rekar ekkatak. Rōjan̄ er n̄an je juon naan jān ennaan in me rekōņaan keememej iien eo tok rej jelm̧ae ennaan ko re riab kōn kien erreo. Kwomaron̄ barāinwōt bōkļo̧k er n̄an jekjōn eo taitōļ in “Pedped eo an Ukwelo̧k.” Ekōnono kōn ewi wāween an Rilo̧mo̧o̧r maron̄ kōmour aolep ro rekōņaan ukweļo̧k jān jerawiwi in kien erreo. Keememej ro kwoj katakin er bwe remaron̄ kōnono ippān pāāren ro aer ak bisop eļan̄n̄e ewōr aer kajjitōk ko ak aikuj n̄an ukweļo̧k.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• 1 Korint 6:19–20 (Ānbwinnid rej tampeļ ko)

• Alma 38:12 (Eļan̄n̄e jej kōjbwebweik itok limo ko ad, jemaron̄ obrak kōn iakew)

• Katak im Bujen Ko 25:2; 121:45–46 (Kōjeraam̧m̧an ko an wānōk)

• “Chastity: What Are the Limits?” “True Confidence,” “I Choose to Be Pure” (pija in alooj ko), ChurchofJesusChrist.org

Teaching in the Savior’s Way

Ilo aolep jekjek ko, Rilo̧mo̧o̧r eo ekar juon waanjon̄ak im rūkaki. Ekar katakin rikaļoor ro An n̄an jar ilo am̧ jar ippāer. E ekr katakin er n̄an iakwe im jerbal ilo wāween eo E ekar iakwe im jerbal n̄an er. E ekar katakin er ewi wāween katakin gospel eo An ilo wāween eo E ekar katakin kake.