O̧kwōj 14

Ewi Wāween Aō Lo Lan̄lōn̄ ilo Aō Ļoor Rilo̧mo̧o̧r?

Sam Ko 1–2; 8; 19–33; 40; 46

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an jerbali ta eo kom̧ kar kōnono kake.

• Mour kōn gospel eo. Ekōjkan ad lo lan̄lōn̄ ilo ļoor Jisōs Kraist?

• Kea kōn ro rej pād ilo aikuj, Wōn eo ilo ward ad ak jukjuk in pād eo ad me ej aikuj jipan̄ ko ad? Ewi wāween ad jipan̄ er?

• Karuwaineneik aolep n̄an bōk gospel eo. Ewi wāween ad jipan̄ doon m̧aanjabpopo n̄an jerbal in mijenede?

• Kobaik baam̧le ko n̄an indeeo. Ewi wāween ad leļo̧k ijo koņaad n̄an kijejeto ko an ward eo ad n̄an menmenbwij ko an baam̧le im jerbal in tampeļ?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Ta ej boktok n̄an eok lan̄lōn̄? Armej remaron̄ ba rej lo lan̄lōn̄ ilo iien ko ippān ro m̧ōttaer im baam̧le eo, juon men eitok limoer kake, ak emaron̄ juon raan ilo an ejjeļo̧k mellijon̄. Būreejtōn Russell M. Nelson ekar ba: “Mōn̄ōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad. N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. E ej unjen aolep m̧ōņōņō” (“Lan̄lōn̄ im Mour ilo Jetōb,” Liaona, Nob. 2016, 82). Elōn̄ iaan Sam Ko rej kōļaaje ejja ennaan in wōt: “Kwonaaj ba kajjien n̄an eō iaļ in mour: Ippam̧ lan̄lōn̄ eļaptata” (Sam Ko 16:11).

Ļōmņak kōn jet apan̄ ko me membōr ro ilo kūlaaj eo am̧ ak doulul eo remaron̄ jelm̧aeiki. Ewi wāween am̧ naaj jipan̄ er meļeļe bwe lan̄lōn̄ eo em̧ool ej itok jān kōjerbal tōmak ilo Rilo̧mo̧o̧r—jekdo̧o̧n ilo iien ko reppen? Kejōkļo̧kjeņ kōn kajjitōk in ilo am̧ kōppopo n̄an katakin. Lale eook ko rej ekkeijel ippān katak in me kwomaron̄ kwaļo̧k n̄an kūlaaj eo ak doulul eo ilo Sam Ko ak ilo ennaan eo an Būreejtōn Nelson “Lan̄lōn̄ im Mour ilo Jetōb.”

Lan̄lōn̄ eo em̧ool ej itok jān kōjerbal tōmak ilo Rilo̧mo̧o̧r eo, jekdo̧o̧ņ ilo iien ko reppen.

Ekkatak Ippān Doon

Ļōmņak in karuwaineneik ro uwaan kūlaaj eo am̧ ak doulul eo n̄an etale jet iaan eoon kein rej elaajrak: Sam Ko 1; 8; 19; 23; 27. Ta eo jemaron̄ katak jān Sam ko kōn ta eo ej boktok n̄an kōj lan̄lōn̄? Innem kwomaron̄ kōjerbal juon ak elōn̄ļo̧k m̧akūtkūt kein rej elaajrak n̄an jipan̄ ro kwoj katakin er em̧m̧an aer meļeļe bwe m̧ool in lan̄lōn̄ rej itok jān ļoor Jisōs Kraist.

• Jej aolep kōņaan kappukot lan̄lōn̄, ak jej aikuj meļeļe bwe ta eo ej bōktok m̧ool in lan̄lōn̄ im ta eo ej lukkuun tōl n̄an būrom̧ōj. Kajjitōk ippān jodikdik ro n̄an kwaļo̧k jet iaan men ko me rej bōktok n̄an er lan̄lōn̄ im etke menin kein rej kōm̧m̧an. Je ioon boot eo “Armej ren, bwe ren maron̄ āinwōt” (2 Nipai 2:25). Innem karuwaineneik jodikdik, āinwōt kajjojo armej ak kurup jiddik ko, n̄an etale juon ak elōn̄ļo̧k eoon ko ilo “Supporting Resources” im kōlaajrak ta eo kwoj kappukot me ej tōl n̄an lan̄lōn̄. Kwomaron̄ bar kwaļo̧k pija in alooj eo “We Can Find Happiness” (ChurchofJesusChrist.org). Ta jet iaan wāween ko armej rej kajjieon̄ kappukot lan̄lōn̄ me ej tōl n̄an būrumōj? Ewi wāween an Rilo̧mo̧o̧r eo kar boktok n̄an kōj lan̄lōn̄?

• Kōj aolep jejeļā bwe armej ro rej jelm̧ae apan̄ ko men̄e rej kajjieon̄ kōm̧m̧ane ijo koņaaer em̧m̧an tata n̄an mour kōn gospel eo. Ewi wāween am̧ jipan̄ ro kwoj katakin er meļeļe bwe jemaron̄ kappukot lan̄lōn̄ men̄e mour ko ad rej jelm̧ae idajon̄jon̄ ko? Remaron̄ bar etale ennaan eo an Būreejtōn Russell M. Nelson “Lan̄lōn̄ im Mour ilo Jetōb” ak ennaan eo an Būreejtōn Steven J. Lund “Pukōt Lan̄lōn̄ ilo Kraist” (Liaona, Nob. 2020, 35–37). Ta waanjon̄ak ko jej loi kōn armej ro rekar lo lan̄lōn̄ ilo Kraist jekdo̧o̧n mellijon̄ ko rekar jelm̧aeiki? Ta eo jej ekkatak jān en̄jake kein? Ta en̄jake ko jemaron̄ kwaļo̧ki?

• Aolep kōj epidodo ad kwaļo̧k ad en̄jake mijak im inepata ilo ad jelm̧ae mellijon̄ ko an mour in. N̄an jet, en̄jake kein rej juon tariņae ilo aolep mour ko aer. Kūlaaj ak doulul eo am̧ remaron̄ jeraam̧m̧an jān ekōnono in kōn mellijon̄ kein im kōn wāween an Rilo̧mo̧o̧r maron̄ jipan̄ ro rej apan̄ kōn mijak im inepata. N̄an jino ekōnono in, kwomaron̄ kajjitōk ippān jodikdik ro n̄an etale ennaan eo an Elder Jeffrey R. Holland “Āinwōt juon Jāpe E Rub,” eļaptata pārokūrāāp ko emān āliktata (Liaona, Nob. 2013, 40–42), ak ennaan eo an Sister Reyna I. Aburto “Buļōn Kōdo̧ im Det, Irooj, Pād wōt Ippa!” (Liaona, Nob. 2019, 57–59). Karuwaineneik ro uwaan kūlaaj ak doulul eo n̄an kappukot m̧ool ko me eļap meļeļeier n̄an er im kwaļo̧k ta eo rej loe. Kapilōk jodikdik ro n̄an kōnono ippān eo jineer ak jemāer me rej lōke ak ritōl ro ak etal n̄an mentalhealth.ChurchofJesusChrist.org eļan̄n̄e rej en̄jake ke rej aikuj jipan̄.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Matu 5:1–12; 1 Piter 4:12–13; 2 Nipai 2:25–27; Mosaia 2:41; 3:3–7; 4:2–3; Alma 36:16–22; 4 Nipai 1:15–16 (Ewi wāween lo lan̄lōn̄)

• D. Todd Christofferson, “Lan̄lōn̄ an Armej ro Rekwojarjar,” Liaona, Nob. 2019, 15–18

• “Suicide Prevention and Ministering,” ChurchofJesusChrist.org

Teaching in the Savior’s Way

Rilo̧mo̧o̧r eo make ekar jeļā kajjien ro Ekar katakin er—im wōn eo renaaj kar erom. N̄e rej apan̄, Ej wōnm̧aanļo̧k wōt n̄an iakwe er. Ewi wāween am̧ kwaļo̧k am̧ iakwe im rie ro kwoj katakin er?