Oktoba 9

Etke Jisōs Kraist Ej Aikuj Bwe En Dilepen Mour eo Aō?

Aiseia 58–66

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; tarrin in 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innem, n̄an kakkobaba n̄an kapilōk doon kōn aikuj ko an doulul ak kūlaaj eo, kwomaron̄ kōņaan kōnono kōn im̧we im unin tōl ko jān kweilo̧k eo eļap. Kajjitōk ko rej ellaajrak remaron̄ jipan̄.

• Ta unin tōl eo ak ennaan ko rekar jiktok ilo kōļmenļo̧kjeņ ko ad? Ta eo ej kōkajoorļo̧k tōmak eo aō ilo Jisōs Kraist?

• Ta eo ej kōkajoorļo̧k naan in kam̧ool eo aō kōn rikanaan ro remour? Ta eo jekar en̄jake im̧we n̄an kōm̧m̧ane kōnke ta eo jekar ekkatak ak en̄jake?

• Ta eo jej aikuji n̄an kōm̧m̧ane āinwōt juon doulul ak kūlaaj n̄an keememej im kōm̧m̧an ekkar n̄an kapilōk ko jej ron̄ ilo kweilo̧k eo eļap?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak dooulul eo kōn karōk im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25-35 minit ko

Kōpooj Eok Make ilo Jetōb

“Inaaj kanooj lan̄lōn̄ ilo Irooj, aō enaaj lan̄lōn̄ ilo aō Anij,” Aiseia ekar ba, “bwe E ar kanuknuk eō kōn nuknuk ko in lo̧mo̧o̧r, Ear kallbubu eō kōn kopā in wānōk” (Aiseia 61:10). Etke kwoj “lan̄lōn̄ ilo Irooj”? Āinwōt Aiseia, ilo ad kile ta eo Irooj ekar kōm̧m̧ane n̄an kōj, jej lan̄lōn̄, im emakijkij ad kōnono kōn “tūriam̧o kake ko an Irooj, im nōbar ko an Irooj” (Aiseia 63:7).

Ewi wāween an ro kwoj katakin er en̄jake kōn Rilo̧mo̧o̧r? Ta eo emaron̄ jipan̄ er en̄jake eļapļo̧k iakwe im kautiej n̄an E? Ta eo emaron̄ jipan̄ er en̄jake iakwe eo An? Ilo ad kejokļo̧kjeņ kōn kajjitōk kein im riiti Aiseia 58–66, kwomaron̄ barāinwōt lale ennaan eo an Elder Matthew S. Holland “Menin Letok eo Eaiboojoj an Nejin” (Liaona, Nob. 2020, 45–47) im ennaan eo an Sister Cristina B. Franco “Kajoor in Kōmour an Pinmuur eo an Jisōs Kraist” (Liaona, Nob. 2020, 60–62).

Ilo ad katak eļapļo̧k kōn Rilo̧mo̧o̧r, jej im̧we n̄an kōm̧m̧an bwe en dilepen mour ko ad.

Ekkatak Ippān Doon

Ilo an ro uwaan kūlaaj ak doulul eo ekkatak kōn mijen eo an Jisōs Kraist me kar jilkintok n̄an kadedeikļo̧k, enaaj ļapļo̧k aer im̧we n̄an kōm̧m̧an bwe Rilo̧mo̧o̧r en dilepen mour ko ad. Bolen remaron̄ etale Aiseia 61:1–3 im kōm̧m̧an juon laajrak ioon boot eo kōn ta eo kar kapit Rilo̧mo̧o̧r eo an kōm̧m̧ane (bar lale Luk 4:16–20). Ewi wāween an kar Rilo̧mo̧o̧r eo kakūrm̧ool m̧ōttan kein ilo mijen eo An? Ewi wāween An kakūrm̧ooli ilo mour ko ad kiiō? Itia ko ilaļ remaron̄ jipan̄ kūlaaj eo ak doulul eo wōnm̧aanļo̧k wōt kōn juon ekkōnono kōn etke Jisōs Kraist ej aikuj bwe en dilepen mour ko ad.

• Kweilo̧k eo Eļap aolep iien ewōr ennaan ko me rej kam̧ool kōn Jisōs Kraist. Kwomaron̄ kūr jejjo ro uwaan kūlaaj eo ak doulul eo n̄an kwaļo̧k juon men me rekar ekkatak kōn Rilo̧mo̧o̧r ilo kweilo̧k eo eļap. Rōjan̄ er n̄an kwaļo̧k ekōjkan aer en̄jake kōn Rilo̧mo̧o̧r eo kōnke kōn ta eo raar ekkatak.

• Jeje ko rekwojarjar remaron̄ jipan̄ jodikdik ro bwe en em̧m̧anļo̧k aer meļeļe etke Rilo̧mo̧o̧r eo ej aikuj bwe en dilepen mour ko aer. Kwomaron̄ je ioon boot eo Etke Jisōs Kraist Ej Aikuj Bwe En Dilepen Mour eo Aō? Kajjitōk ippān jodikdik ro n̄an kwaļo̧k ļōmņak ko aer. Innem kwomaron̄ kajjitōk ippāer (kajjojo ak ilo kurup ko) n̄an etale eoon ko ium̧win “Supporting Resources” n̄an kappukot uwaak ko jet. Karuwaineneik jodikdik ro n̄an kwaļo̧k ta eo rej ekkatak im etke eļap tokjen n̄an er.

• Ļōmņak in kajjitōk ippān ro kwoj katakin er n̄an kōmeļeļeik raan eo eaorōk tata ilo mour ko aer. Raan ta eo emaron̄ lukkuun aorōk tata ilo bwebwenato? Karuwaineneik er n̄an pukot ta eo Elder Dieter F. Uchtdorf ekar ba ej raan eo eaorōk tata ilo aer etale ennaan eo an “Lo Armej eo!” (Liaona, Māe 2018, 107–10). Rōjan̄ jodikdik ro n̄an kappukot kōjeraam̧m̧an ko me Elder Uchtdorf ekar kallim̧ur kaki n̄an ro rej “Lo” Jisōs Kraist. Remaron̄ bar kwaļo̧k ta eo rej kōm̧m̧ane n̄an kōm̧m̧an bwe Rilo̧mo̧o̧r en dilepen mour ko aer aolep raan. Kwomaron̄ rōjan̄ er n̄an ļōmņak ta eo remaron̄ kōm̧m̧an n̄an epaakeļo̧k Jisōs Kraist im kōm̧m̧an juon aer kōttōpar n̄an kōttōprake.

• Eļan̄n̄e jabdewōt ekar kajjitōk etke jej tōmak ilo Jisōs Kraist, ta eo jenaaj ba? Rōjan̄ jodikdik ro n̄an kwaļo̧k ļōmņak ko aer im jei ioon boot eo. Kwomaron̄ bar karuwaineneik er n̄an etale “Kraist Eo Emour: Naan in Kamool An Dri Jilōk ro” (ChurchofJesusChrist.org) or “The Divine Mission of Jesus Christ” ilo jebta 3 ilo Preach My Gospel ([2019], 60–61). Rōjan̄ er n̄an kappukot m̧ool ko reļem waan me renaaj kwaļo̧k n̄an kōmeļeļeiki etke Rilo̧mo̧o̧r eo ej lukkuun aorōk n̄an er. Remaron̄ kobaik m̧ool ko rej loi ilo laajrak eo ioon boot eo im kōnono kōn wāween aer kwaļo̧k m̧ool kein ippān armej ro rejeļā kajjier.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn wāween kōm̧m̧an ekkar n̄an im̧we ko aer enaaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Jon 8:12; 14:6; Rom 8:35–39; 2 Nipai 2:3–9; 9:5–10; Alma 36:3, 27; 3 Nipai 27:14–16, 27; Ether 12:27 (Etke Jisōs Kraist Ej Aikuj Bwe En Dilepen Mour Ko Ad)

• Becky Craven, “Dāpij Oktak eo” (Liaona, Nob. 2020, 58–60)

• “I Believe in Christ,” “Ij Lokjenaō” (Hymns, nō. 134, 14)

• “Why We Need a Savior—A Christmas Message about Our Savior Jesus Christ,” “Because of Him” (pija in alooj ko), ChurchofJesusChrist.org

Teaching in the Savior’s Way

“Kajjojo armej ilo kūlaaj eo am̧ ewōr juon aer naan in kam̧ool, meļeļe ko, im en̄jake ko ilo aer mour kōn gospel eo. Karuwaineneik er n̄an kwaļo̧k im ļōn̄aj doon” (Teaching in the Savior’s Way, 5).