Nobōm̧ba 27

Ewi Wāween Aō Kwaļo̧k Gospepl eo?

Jona; Maika

Ko̧o̧njeļ Ippān Doon

Kar tōl jān uon uwaan būreejtōnji eo an doulul eo ak kūlaaj eo; tarrin in10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn kōn jerbal in lo̧mo̧o̧r im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko ami make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an jerbalki ta eo kom̧ij ekōnono kaki.

• Mour kōn gospel eo. Ewi wāween ad kar epaakļo̧k Rilo̧mo̧o̧r eo? Ewi wāween ad kajjieon̄ erom̧ļo̧k āinwōt E?

• Kea kōn ro rej pād ilo aikuj. Wōn eo ej pād ilo ļōmņak ko ad? Ewi wāween ad jipan̄ armej rein kajjojo?

• Karuwaineneik aolep n̄an bōk gospel eo. Ewi wāween ad uwaaki kajjitōk ko an ro m̧ōttad kōn Kabun̄ in?

• Kobaik baam̧le ko n̄an indeeo. Ta jet iaan wāween ko jemaron̄ epaakeļo̧k ro uwaan baam̧le ko jet ad, āinwōt jibūd im jim̧m̧aad imro jet nej jeid im jatid?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn pedped in katak ko kar katakin.

• Kakeememej ro uwaan kūlaaj eo ak doulul eo kōn karōk ko im kūr ko kar kōm̧m̧ani ilo iien kweilo̧k eo.

Katakin Katak eo

Kar tōl jān juon ritōl rūtto ak jodikdik; tarrin in 25-35 minit ko

Kōpooj Eok Make ilo Jetōb

Emaron̄ wōr membōr ro ilo kūlaaj eo am̧ ak doulul eo am̧ me rej lo wāween ko aolep iien n̄an kwaļo̧k gospel eo. Bōlen kwoj barāinwōt kōm̧m̧ane menin! N̄an elōn̄ armej ro, ijoke, kwaļo̧k gospel eo epen im emaron̄ bar kamijak. Jeram̧m̧an eo, aolep kōj emaron̄ em̧m̧anļo̧k ad kwaļo̧k kōn tōmak eo ad ilo Jisōs Kraist. Kwomaron̄ jab lukkuun ron̄ kōn lo̧jiln̄ūm̧ ainikein Irooj ej kakien eok n̄an kōm̧m̧an juon men āinwōt “ilo̧k n̄an Nineva, jikin kweilo̧k eo eļap, im kwaļo̧k ņae e,” āinwōt kar Jona (Jona 1:2). Ak ainikien eo elur an Jetōb Kwojarjar emaron̄ im̧we eok n̄an “ilo̧k n̄an” ro uwaan baam̧le eo im ro m̧ōttam̧ ro rekar pojak n̄an ron̄jake naan in kam̧ool eo am̧. Kōpeļļo̧k buruōm̧ n̄an ta eo kwomaron̄ ekkatak jān en̄jake eo an Jona ilo am̧ ekkatak ilo wiik in, im kōpooj eok make n̄an kwaļo̧k ta eo kwoj ekkatak ippān ro jet kwoj katakin er. Kwomaron̄ barāinwōt riiti ennaan eo an Elder D. Todd “Kwaļo̧k Ennaan eo an Jepļaaktok eo im Jerkakpeje eo” ilo am̧ kōppopo n̄an katakin (Liaona, Māe 2020, 110–13).

Jetōb Kwojarjar emaron̄ im̧we kōj n̄an kwaļo̧k kōn gospel eo ippān ro me repojak n̄an ron̄jake naan in kam̧ool ko aer.

Ekkatak Ippān Doon

N̄an jipan̄ ro kwoj katakin er n̄an kwaļo̧k im̧we ko jān aer ekkatak jān bok in Jona ilo wiik in, kwomaron̄ kwaļo̧k juon pija in Jona (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko). Karuwaineneik er n̄an kōnono kōn ta eo rekar ekkatak kake kōn en̄jake eo an Jona ke ekar kwaļo̧k gospel eo. Kwomaron̄ kūr er n̄an etale Jona 1 im 3 im kajjitōk: Ta eo jej ekkatak kake kōn kwaļo̧k gospel eo n̄an ro me ilo kalimjōk er rejjab pojak n̄an oktak? Ta eo jej ekkatak kake kōn ikdeleel eo an Anij n̄an jeorļo̧k an ro rej ukweļo̧k bōd? N̄an im̧we membōr ro ilo kūlaaj eo am̧ ak doulul eo am̧ n̄an kwaļo̧k gospel eo, kōjerbal juon ak elōn̄ļo̧k iaan m̧akūtkūt kein rej ellaajrak ak ejaake juon am̧ make.

• N̄an bōk aitia ko kōn wāween kwaļo̧k gospel eo an Rilo̧mo̧o̧r ippān ro jet, kūlaaj ak doulul eo am̧ renaaj etale bwebwenato kein ilo jeje ko rekwojarjar: Jon 4:3–26; Jerbal 16:25–33; Alma 19:14–18, 28–31. Innām kwomaron̄ ekōnono kōn kajjitōk ko āinwōt kein: Ewi wāween an kar armej ro ilo bwebwenato kein kar pojak n̄an ron̄jake ennaa eo an gospel eo? Ta eo kwoj kile kōn wāween an ennaan eo kar waļo̧k? Etke kwoj ļōmņak Jemedwōj Ilan̄ im Jisōs Kraist rej kōņaan bwe jen kwaļo̧k gospel eo? Innem kwomaron̄ ekōnono āinwōt juon kūlaaj ak doulul ta eo bwebwenato kein rej katakin kōj kōn wāween ad maron̄ kwaļo̧k gospel eo rainin.

• Riiti waanjon̄ak ko rim̧we an ro jet kōn aer kwaļo̧k gospel eo emaron̄ kōketak jodikdik ro n̄an kōm̧m̧ane ejja āindein wōt. Elder D. Todd Christofferson ekar kwaļo̧k jet iaan waanjon̄ak ko ilo ennaan eo an “Kwaļo̧k Ennaan eo an Jepļaaktok eo im Jerkakpeje eo.” Ilo ennaan eo an, Elder Christofferson ekar katakin bwe jilu men ko remenin aikuj n̄an kōm̧m̧an bwe en kaitoktoklimo karuwainene ko ad n̄an bōk gospel: ad iakwe, ad waanjon̄ak, im ad kōjerbal Bok in Mormon. Kōnono kōn waanjon̄ak ko kōn kwaļo̧k gospel eo ilo ennaan in, im karuwaineneik ro kwoj katakin er n̄an kwaļo̧k bar jet waanjon̄ak, ekoba en̄jake im imminene ko aer make. Ewi wāween an en̄jake kein kwaļo̧k jilu men ko kar katakin jān Elder Christofferson?

• Ewi wāween am̧ maron̄ jipan̄ ro kwoj katakin er meļeļe bwe kwaļo̧k gospel eo emaron̄ lukkuun peran kake im kōtōnn̄e elukkuun peran ilo an kōm̧m̧an. Kwomaron̄ kwaļo̧k pija in alooj ko rej pād ium̧win “Supporting Resources” im kajjitōk ippān jodikdik ro n̄an ļōmņak kōn wāween aer kwaļo̧k gospel eo ippān juon eo rejeļā kajjien. Ta eo jemaron̄ kōm̧m̧ani n̄an karuwaineneik er n̄an itok im lale? Iien ta ko aer rem̧m̧an n̄an itok im jipan̄? Ewi wāween ad maron̄ jipan̄ er en̄jake juon ikdeleel n̄an itok im pād wōt? Ewi wāween ad maron̄ kōm̧m̧an bwe kwaļo̧k gospel en m̧ōttan ļo̧k mour ko ad aolep raan?

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k aitia ko aer. Karuwainene er n̄an ļōmņak kōn ekōjkankōm̧m̧an ekkar n̄an im̧we ko aer enaaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Carlos A. Godoy, “Ij Tōmak ilo Enjeļ Ro,” Liaona, Nob. 2020, 86–88

• “Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (pija in alooj ko), ChurchofJesusChrist.org; kwomaron̄ loe bok ak kein jipan̄ ko jet ium̧win “Sharing the Gospel,” Gospel Library app eo

Teaching in the Savior’s Way

“Armej ro elukkuun pidodoļo̧k aer kōm̧m̧an oktak ko eļap tokjāer ilo mour ko aer n̄e oktak kein rej itok jān aer kōjerbal anemkwoj in kāālet ko aer make. N̄e kwoj leļo̧k kajjitōk ko n̄an jerbalki, kwon lukkuun lale bwe kwon kautiej anemkwoj eo an ro kwoj katakin er” (Teaching in the Savior’s Way, 35).