ʻI he Veʻe Vaitupú, tā fakatātaaʻi ʻe Crystal Suzanne

12 Fēpueli

Te u Fakatupulaki Fēfē ʻEku Moihū ki he ʻOtuá?

Sione 2–4

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha founga kuo tau ofi ange ai ki he Fakamoʻuí? Ko e hā ha founga ʻoku tau feinga ai ke tau tatau ange mo Iá?

• Tokanga kiate kinautolu ʻoku faingataʻaʻiá. Ko hai ha tokotaha naʻa tau fakakaukau ki ai kimuí ni? Ko e hā ha founga ʻe lava ke tau tokoniʻi ai ʻa e niʻihi fakafoʻituitui ko ʻení?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau tali fēfē ʻa e ngaahi fehuʻi ʻa hotau kaungāmeʻá fekauʻaki mo e Siasí ʻi ha founga ʻe fakamālohia ai ʻenau tui ki he Fakamoʻuí?

• Fakatahaʻi ʻa e ngaahi fāmilí ke taʻengata. Ko e hā ha ngaahi founga ʻe lava ke tau fehokotaki lelei ange ai mo e kāingá, hangē ko e ngaahi kuí mo e ngaahi tokoua ʻakí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Mahalo naʻe faʻa ʻalu ʻa e fefine Samēlia naʻe fakamatalaʻi ʻi he Sione 4 ki he vaitupú ke tou vai. Ka naʻe kehe e taimi ia ko ʻení. Naʻá ne fetaulaki mo ha tangata Siu naʻe kole inu ange meiate ia. Naʻe ngali kehe ia koeʻuhí naʻe ʻikai faʻa feohi ʻa e kau Siú mo e kau Samēliá. Ka naʻe ʻi ai mo ha toe meʻa ʻe taha naʻe makehe fekauʻaki mo e tangatá ni. ʻI heʻene ʻiloʻi kuo pau ko ha palōfita iá, naʻá ne ʻeke ange ha ngaahi fehuʻi fekauʻaki mo e moihū ki he ʻOtuá. Naʻe ngofua nai ke fai ha moihū ki he ʻOtuá ʻi Samēlia? Pe kuo pau ke moihū ʻa e kakaí ʻi Selusalema, ʻo hangē ko e lau ʻa e kau Siú? (vakai, Sione 4:19–20). Naʻe fakamatalaʻi ʻe he tangatá ʻoku ʻikai mahuʻinga tatau ʻa e feituʻu ʻoku tau lotu aí mo e founga ʻo ʻetau lotú: “ʻE hū ki he Tamaí ʻa e kakai hū moʻoni ʻi he laumālié mo e moʻoní: he ʻoku kumi ʻe he Tamaí ʻa e kakai peheé ke hū kiate ia” (Sione 4:23). Pea toki talaange ʻe he tangatá ko hai Ia—ko e Kalaisí Ia, ko e Fakamoʻui ʻo e māmaní (vakai, Sione 4:25–26).

ʻOku mahino nai ki he toʻu tupu ʻokú ke akoʻí ʻa e ʻuhinga ʻo e hū ki he Tamai Hēvaní? Makehe mei he moihū ʻi he lotú (vakai, Tokāteline mo e Ngaahi Fuakava 59:9–10), ko e hā mo ha ngaahi faingamālie kehe ʻoku nau maʻu ke hū ai kiate Ia, kau ai e ngaahi founga mahalo he ʻikai ke nau ʻilo ko ha moihuú? ʻE lava ke tokoni atu e ngaahi maʻuʻanga tokoni ko ʻení ke ke teuteu ke akoʻi kinautolu fekauʻaki mo e founga ke fakatupulaki ʻenau moihū ki he ʻOtuá: Saame 95:1–7; Mātiu 4:8–10; ʻAlamā 32:4–11; Tokāteline mo e Ngaahi Fuakava 20:17–19; 93:19–20, mo e pōpoaki ʻa Pīsope Dean M. Davies “Ko e Ngaahi Tāpuaki ʻo e Mōihuú” (Liahona, Nōvema 2016, 93–95).

Ako Fakataha

Ke kamataʻi ha fealēleaʻaki fekauʻaki mo hono fakatupulaki ʻo e mōihuú, te ke lava ʻo fakaafeʻi e kau mēmipa ʻo e kalasí pe kōlomú ke toe vakaiʻi fakafoʻituitui ʻa e Sione 4:19–26 pea hiki ha ngaahi tali ki ha ngaahi fehuʻi hangē ko ʻení: Ko e hā ʻoku ou moihū ai ki he ʻOtuá? Ko e hā nai ʻa hono ʻuhinga kiate au ʻo e moihū ki he ʻOtuá? ʻE ala tokoni foki ke toe vakaiʻi fakataha e ʻuhinga ʻo e “Huú” ʻi he Fakahinohino ki he Ngaahi Folofolá (scriptures.ChurchofJesusChrist.org). Hili ʻenau maʻu ha taimi ke fakalaulauloto ai ki he ngaahi fehuʻi ko ʻení, fakaafeʻi kinautolu ke vahevahe ʻenau ngaahi fakakaukaú. ʻE lava ke tokoniʻi kinautolu ʻe he ngaahi ʻekitivitī ko ʻení ke nau maʻu e ngaahi ueʻi ʻa e Laumālie Māʻoniʻoní.

• ʻE maʻu ʻe he kau mēmipa ʻo hoʻo kalasí pe kōlomú ha ngaahi fakakaukau mahuʻinga fekauʻaki mo e ʻuhinga ʻo e moihū ki he ʻOtuá. Te ke lava ʻo kole ange ke nau vahevahe ha aʻusia ne nau ongoʻi ai naʻa nau moihū ki he ʻOtuá. ʻE lava ʻe he ngaahi potufolofola hangē ko ʻení ʻo tānaki atu ki heʻenau mahinó mo ʻoange kiate kinautolu ha ngaahi fakakaukau fekauʻaki mo e founga ke ʻai ai ʻenau moihū ki he ʻOtuá ke mahuʻingamālie angé: Saame 95:1–7; Mātiu 4:8–10; ʻAlamā 32:4–11; Tokāteline mo e Ngaahi Fuakava 20:17–19; 93:19–20. ʻE lava foki ke nau aleaʻi e lea ʻa ʻEletā Pulusi R. Makongikī ʻi he “Ngaahi Maʻuʻanga Tokoni Poupoú.”

• Ke tokoni ke fakatupulaki e moihū ʻa e toʻu tupú ki he ʻOtuá, ʻe lava ke ke hiki e ngaahi ʻuluʻi tohi ko ʻení ʻi he palakipoé : Ko Hai, ʻUhingá, Feituʻú, mo e Foungá. Kole ange ke nau toe vakaiʻi e ngaahi potufolofola ʻoku hiki atu ʻi he “Huú” ʻi he Fakahinohino ki he Ngaahi Folofolá (scriptures.ChurchofJesusChrist.org), ʻo kumi e ngaahi veesi ʻe tokoni ke mahino kiate kinautolu ʻa e ko hai, ʻuhinga, feituʻu, mo e founga ʻoku totonu ke tau lotu aí. ʻI heʻenau maʻu ha veesi ʻoku fekauʻaki mo iá, fakaafeʻi ke nau aleaʻi ia mo e kalasí pe kōlomú pea hiki e veesi folofolá ʻi lalo ʻi he ʻuluʻi tohi totonú. Poupouʻi kinautolu ke vahevahe ha ngaahi aʻusia kuo nau ongoʻi ofi ange ai ki he ʻOtuá ʻo fakafou ʻi he lotú.

• ʻOku ʻi he pōpoaki ʻa Pīsope Tiini M. Teivisi “Ko e Ngaahi Tāpuaki ʻo e Mōihuú” ha ngaahi sīpinga ʻo e kakai ʻoku nau moihū ki he ʻOtuá. ʻE lava ke mou lau fakataha ʻa e konga “Ko e Hā ʻa e Mōihū?” ʻE lava leva ke toe vakaiʻi ʻe he tokotaha takitaha ha taha ʻo e ngaahi sīpinga ʻo e moihū ʻa ha kakai ʻoku maʻu ʻi he konga hokohoko ʻe tolu ʻo e pōpoakí. Ko e hā ʻoku akoʻi mai ʻe he sīpinga takitaha fekauʻaki mo e moihū ki he ʻOtuá? Ko e hā ʻoku akoʻi mai ʻe he konga fakaʻosi ʻo e pōpoakí fekauʻaki mo e ngaahi tāpuaki ʻoku maʻu mei he moihū kiate Ia ʻi he mateakí? Ko e hā ʻoku ueʻi kitautolu ke tau fai ke fakatupulaki ai ʻetau moihū ki he ʻOtuá?

ʻOku kau ʻi he mōihuú ʻa e ako folofolá mo e ngaahi founga kehe ʻokú ne fakahaaʻi ʻa e līʻoa mo e ʻofa ki he ʻOtuá.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• “Ko e Ngaahi ʻElemēniti ʻo e Lotú,” Ngaahi Akonaki ʻa e Kau Palesiteni ʻo e Siasí: Tēvita O. Makei (2003), 36–46

• Donald L. Hallstrom, “The Conversion of the Children of God” (Seminaries and Institutes of Religion broadcast, June 13, 2017), broadcasts.ChurchofJesusChrist.org

• Naʻe akoʻi ʻe ʻEletā Pulusi R. Makongikī: “Ko e moihū moʻoni mo haohaoá ʻa e muimui ʻi he ngaahi sīpinga ʻa e ʻAlo ʻo e ʻOtuá; ʻoku kau ai hono tauhi e ngaahi fekaú mo e talangofua ki he finangalo ʻo e Tamaí ʻo aʻu ki he tuʻunga ʻoku tau fakalakalaka ai mei he ʻaloʻofa ki he ʻaloʻofa kae ʻoua kuo tau nāunauʻia ʻia Kalaisi ʻo hangē ko Ia ʻi he Tamaí. ʻOku hulu ia ʻi he lotú, malangá pea mo e hivá. Ko hono moʻui ʻaki ia mo hono fai pea talangofua ki ai. Ko hono faʻifaʻitaki ia e moʻui ʻa e Faʻifaʻitakiʻanga maʻongoʻongá” (“How to Worship,” Ensign, Dec. 1971, 130; capitalization modernized).

Ko e Faiako ʻi he Founga ʻa e Fakamoʻuí

ʻOku maʻu ʻe he tokāteline ʻi he folofolá mo e ngaahi lea ʻa e kau palōfita he ʻaho kimui ní, ha mālohi ke liliu e lotó mo fakatupulaki e tuí. ʻI hoʻo feinga mo e niʻihi ʻokú ke akoʻí ke “ʻahiʻahiʻi ʻa e ivi ʻo e folofola ʻa e ʻOtuá,” te mou ʻiloʻi ai ʻokú ne maʻu ha ivi ke “takiakiʻi ʻa e kakaí ke fai ʻa ia ʻoku totonú” (ʻAlamā 31:5).