8 Oktòb

Kijan Levanjil Jezikri a Ka Ede M Ranfòse Fanmi M?

Efezyen

Fè Konsèy

Sou direksyon yon manm prezidans kowòm lan oswa klas la; apeprè 10–20 minit

Nan kòmansman reyinyon an, repete ansanm Tèm Jènfi an oswa Tèm Kowòm Pretriz Aawon an. Apre sa, anplis de fè konsèy sou afè espesifik klas la oswa kowòm nan oswa klas la, ou ta gen dwa diskite sou enpresyon ak tèm ki soti nan konferans jeneral la. Kesyon sa yo ka ede:

• Ki tèm oubyen mesaj ki te enpresyone nou? Kisa ki ranfòse lafwa nou nan Jezikri?

• Kisa ki ranfòse temwayaj nou konsènan pwofèt vivan yo? Kisa nou te santi nou pouse pou nou fè akoz de sa nou te aprann oswa sa nou te santi yo.

• Kisa nou bezwen fè antanke kowòm oswa klas pou nou sonje ak aplike konsèy nou te tande nan konferans jeneral yo?

Nan fen leson an, si sa apwopriye, fè bagay sa yo:

• Temwaye konsènan prensip ki te anseye yo.

• Fè manm klas la oubyen kowòm nan sonje plan ak envitasyon yo te fè pandan reyinyon an.

Anseye Doktrin nan

Sou direksyon yon dirijan adilt oubyen yon jèn; apeprè 25–35 minit

Prepare W Espirityèlman

Kèk moun nan klas ou a oubyen nan kowòm ou an ka gen fanmi djanm ki emab ki nouri lafwa ak espirityalite. Gen lòt ki kapab pou kont yo nan efò yo pou yo viv levanjil la, epi gen kèk ki ka rankontre kontansyon ak chagren lakay yo. Men okenn moun nan klas ou a oubyen kowòm ou an pa gen yon fanmi ki pafè, ki san difikilte. Epi tout moun gen aksè a pouvwa Jezikri, sa ki ka geri ak ranfòse fanmi yo.

Sovè a vle beni fanmi yo. Kèkfwa, fason Li fè sa se atravè lanmou ak egzanp yon jèn ki ap fè efò pou l suiv Li ak viv levanjil Li a. Pandan w ap prepare w pou anseye jèn yo sou pouvwa ki disponib pou yo avèk fanmi yo atravè Jezikri, medite sou prensip nan Efezyen yo ki ka ede nou ranfòse relasyon familyal yo. Ou ta kapab etidye tou “Fanmi: Yon Pwoklamasyon pou Mond lan” (ChurchofJesusChrist.org).

Aprann Ansanm

Apre w fin bay manm klas la oubyen kowòm nan yon chans pou yo pataje sa Lespri a anseye yo semèn sa a pandan y ap etidye Efezyen an, chèche fason pou w entwodui sijè sou fason Jezikri ka ede nou ranfòse fanmi nou yo. Pa egzanp, ou ta ka envite jèn yo pou yo chèche ak pataje pasaj nan Efezyen an ki gen prensip nou ka itilize pou ranfòse relasyon familyal. Kèk egzanp ta ka enkli Efezyen 2:19–22; 3:14–19; 4:1–3, 25–26, 29–32; 5:1–2; 6:1–4. Kijan konsèy ki nan vèsè sa yo ta ka beni yon fanmi? Kijan Sovè a ak levanjil Li a se yon benediksyon nan fwaye nou? Men kèk ide pou aktivite adisyonèl ki gen rapò avèk sijè sa a.

• Si w ta renmen diskite kòmandman pou “onore papa ou ak manman w” lan (Efezyen 6:2), ou ta ka kòmanse mande manm klas la oubyen kowòm nan kisa mo onore a vle di. Petèt, yon moun ta ka pataje definisyon yo jwenn nan diksyonè oubyen nan Gid Ekriti yo (scriptures.ChurchofJesusChrist.org). Envite jèn yo pale sou fason yo ta ka aplike kòmandman sa a nan lavi pa yo. Sa ta ka enspire tou pou eksplore fason Jezikri te onore Papa L ki nan syèl la, ak manman L, Mari, (gade pa egzanp nan, Lik 2:41–52; Tradiksyon Joseph Smith, Jan 2:4 [nan Jan 2:4, referans a]; Jan 8:29; 19:25–27). Kisa nou ka aprann nan egzanp Jezi a ki ka ranfòse relasyon nou avèk paran nou?

• Sa ta ka ede pou w ta pale de materyèl ki nesesè pou bati yon kay solid. Ki bagay ki nesesè pou bati yon fanmi solid? Kòm yon pati nan diskisyon an, ou ta ka pataje deklarasyon sa a ke Èldè L. Whitney Clayton te fè: “Sa ki enpòtan se desen andedan nanm moun, non pa estrikti a limenm” (“Pi Bèl Kay yo,” Lyawona, Me 2020, 107–9). Ou ta ka diskite sou kat sigjesyon Èldè Clayton te bay nan mesaj li a sou fason pou bati “pi bèl kay yo.”

• “Fanmi an: Yon Pwoklamasyon pou Mond lan” enkli pwomès sa a: “Bonè nan lavi familyal kapab akonpli pi souvan lè l fonde sou ansèyman Senyè a, Jezikri.” Kijan ansèyman Sovè a kreye fondasyon pou yon fanmi ki gen kè kontan? Pwoklamasyon sou fanmi an ak ekriti ki anba seksyon “Resous pou Sipò” a bay kèk egzanp. Kijan youn ka ede lòt nan yon fanmi pou yo ka viv ansèyman sa yo?

• Petèt, manm klas la ta kapab gade videyo “Atravè Ti Bagay,” la kote twa frè ak sè pale de aksepte envitasyon evèk yo pou yo panse a fason pou yo fè fwaye yo vin tounen yon kote ki pi sen. Kijan fanmi ki nan videyo a te beni akozde aksyon jèn sa yo? Kisa ki ka fè yon fwaye nou vin yon kote ki sen? Panse pou w envite jèn yo pou yo aksepte menm envitasyon ke evèk la te fè a. Pou ede yo konsidere sa yo ta kapab fè, ou ta kapab diskite kesyon yo poze nan videyo a: “Kisa w dispoze pou w fè pou w ka gen Lespri a nan fwaye w?”

Ansèyman Jezikri yo se fondasyon pou bonè nan lavi familyal.

Aji avèk Lafwa

Ankouraje manm klas la oubyen kowòm nan pou yo medite epi ekri sa yo pral fè pou yo aplike enpresyon yo te resevwa yo jodi a? Si yo ta vle, yo ta ka pataje ide yo. Envite yo pou yo reflechi sou kijan aplike enpresyon yo ap ranfòse relasyon yo avèk Papa nou ki nan Syèl la ak Jezikri.

Resous pou Sipò

• Matye 5:21–24, 38–42; 6:14; 7:1–5; 22:36–39; 3 Nefi 18:21; Mowoni 7:33; Doktrin ak Alyans 18:10–13

• Henry B. Eyring, “Yon Fwaye Kote Lespri a Rete,” Lyawona, Me 2019, 22–25

• “Lanmou nan Fwaye,” “Home Can Be a Heaven on Earth,” Hymns, nimewo. 294, 298

Anseye nan Fason Sovè a

Si jèn yo santi ou kwè nan yo, konfyans yo nan potansyèl divin yo ap grandi, epi w ap etone wè sa yo ka akonpli. Ede yo wè yon vizyon sou sa Pè Selès la konnen yo ka devni.