« ការប្រែចិត្តជឿគឺជាគោលដៅរបស់យើង » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )
« ការប្រែចិត្តជឿគឺជាគោលដៅរបស់យើង » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤
ការប្រែចិត្តជឿគឺជាគោលដៅរបស់យើង
គោលបំណងនៃការរៀនសូត្រ និងការបង្រៀនដំណឹងល្អទាំងអស់ គឺដើម្បីធ្វើឲ្យការប្រែចិត្តជឿរបស់យើងមានកាន់តែខ្លាំងឡើង ហើយជួយយើងឲ្យកាន់តែប្រែក្លាយដូចជាព្រះយេស៊ូវគ្រីស្ទ ។ ដោយមូលហេតុនេះហើយ នៅពេលយើងសិក្សាដំណឹងល្អ យើងមិនគ្រាន់តែរកមើលព័ត៌មានថ្មីប៉ុណ្ណោះទេ តែយើងចង់ប្រែក្លាយទៅជាអ្នក « កើតជាថ្មី » ( កូរិនថូស ទី២ ៥:១៧ ) ។ នេះមានន័យថាការពឹងផ្អែកទៅលើព្រះវរបិតាសួគ៌ និងព្រះយេស៊ូវគ្រីស្ទដើម្បីជួយផ្លាស់ប្ដូរដួងចិត្តរបស់យើង ទស្សនៈរបស់យើង សកម្មភាពរបស់យើង និងនិស្ស័យរបស់យើង ។
ប៉ុន្តែប្រភេទនៃការរៀនសូត្រដំណឹងល្អដែលពង្រឹងដល់សេចក្ដីជំនឿរបស់យើង ហើយដឹកនាំយើងទៅរកអព្ភូតហេតុនៃការប្រែចិត្តជឿនោះពុំកើតឡើងតែម្តងក្នុងពេលតែមួយនោះទេ ។ វាបន្តមាននៅក្រៅថ្នាក់រៀនចូលទៅក្នុងដួងចិត្ត និងគេហដ្ឋានរបស់បុគ្គលម្នាក់ៗ ។ វាតម្រូវឲ្យមានការខិតខំដ៏ខ្ជាប់ខ្ជួន និងជាប្រចាំថ្ងៃ ដើម្បីយល់ ហើយរស់នៅតាមដំណឹងល្អ ។ ការប្រែចិត្តជឿពិតប្រាកដតម្រូវឲ្យមានឥទ្ធិពលពីព្រះវិញ្ញាណបរិសុទ្ធ ។
ព្រះវិញ្ញាណបរិសុទ្ធដឹកនាំយើងទៅរកសេចក្ដីពិត ហើយថ្លែងជាសាក្សីអំពីសេចក្ដីពិតនោះ ( សូមមើល យ៉ូហាន ១៦:១៣ ) ។ ទ្រង់បំភ្លឺគំនិតរបស់យើង ដាស់ការយល់ដឹងរបស់យើង ហើយប៉ះដួងចិត្តរបស់យើងដោយវិវរណៈមកពីព្រះ ដែលជាប្រភពនៃគ្រប់សេចក្ដីពិតទាំងអស់ ។ ព្រះវិញ្ញាណបរិសុទ្ធធ្វើឲ្យដួងចិត្តរបស់យើងបរិសុទ្ធ ។ ទ្រង់បំផុសបំណងប្រាថ្នាក្នុងខ្លួនយើងឲ្យរស់នៅតាមសេចក្ដីពិត ហើយទ្រង់ខ្សឹបប្រាប់យើងពីរបៀបដើម្បីធ្វើដូចនេះ ។ ពិតណាស់ « ព្រះវិញ្ញាណបរិសុទ្ធ … នឹងបង្រៀន [ យើង ] ពីគ្រប់សេចក្ដីទាំងអស់ » ( យ៉ូហាន ១៤:២៦ ) ។
នៅក្នុងការខិតខំរបស់យើងដើម្បីរស់នៅតាម រៀនសូត្រ និងបង្រៀនដំណឹងល្អ មូលហេតុទាំងអស់នេះហើយដែលយើងគួរតែស្វែងរកភាពជាដៃគូពីព្រះវិញ្ញាណជាមុនសិន ។ គោលដៅនេះគួរតែគ្រប់គ្រងទៅលើការជ្រើសរើស និងដឹកនាំគំនិត និងសកម្មភាពទាំងឡាយរបស់យើង ។ យើងគួរតែស្វែងរកអ្វីៗដែលអញ្ជើញឲ្យមានឥទ្ធិពលនៃព្រះវិញ្ញាណ ហើយបដិសេធអ្វីៗដែលបណ្ដេញឥទ្ធិពលនោះចេញ—ដ្បិតយើងដឹងថា ប្រសិនបើយើងអាចមានភាពស័ក្ដិសមនឹងវត្តមាននៃព្រះវិញ្ញាណបរិសុទ្ធ នោះយើងក៏អាចមានភាពស័ក្ដិសមដើម្បីរស់នៅក្នុងវត្តមាននៃព្រះវរបិតាសួគ៌ និងព្រះរាជបុត្រាទ្រង់គឺព្រះយេស៊ូវគ្រីស្ទបានផងដែរ ។