O Le Liua o La Tatou Sini Lea

O le faamoemoega atoa o le aoao mai ma le aoao atu o le talalelei o le faalolotoina lea o lo tatou liua ma fesoasoani ai ia te i tatou ia avea atili e faapei o Iesu Keriso. Ona o lea mafuaaga, pe a tatou suesue i le talalelei, e le na ona tatou vaavaai mo faamatalaga fou, ae tatou te mananao e avea o se “tagata fou” (2 Korinito 5:17). O lona uiga o le faalagolago lea i le Tama Faalelagi ma Iesu Keriso e fesoasoani e suia ai o tatou loto, a tatou vaaiga, o a tatou faatinoga, ma o tatou lava natura.

Ae o le ituaiga aoaoina o le talalelei lea e faamalolosia ai lo tatou faatuatua ma taitai atu ai i le vavega o le liua e le tupu i se taimi e tasi. E oo atu i tua atu o se potuaoga i le loto o se tagata ma le aiga. E moomia ai taumafaiga faifaipea, i aso taitasi ia malamalama ma ola ai i le talalelei. O le liua moni e moomia ai le faatosinaga a le Agaga Paia.

O le Agaga Paia e taialaina i tatou i le upumoni ma molimau mai i lena upumoni (tagai Ioane 16:13). Na te faamalamalamaina o tatou mafaufau, segia lo tatou malamalama, ma pa’i mai i o tatou loto i faaaliga mai le Atua, o le faapogai o upumoni uma. O le Agaga Paia e faamamaina o tatou loto. Na te musuia i totonu o i tatou se naunau e ola i le upumoni, ma Na te musumusu mai ia i tatou i auala e faia ai. E moni, “o le Agaga Paia … na te aoao ia te i [tatou] i mea uma lava” (Ioane 14:26).

Ona o nei mafuaaga, i a tatou taumafaiga e ola ai, aoao mai, ma aoao atu le talalelei, e tatau ona tatou muamua ma faataua le sailia o le mafutaga a le Agaga. O lenei sini e tatau ona pulea ai a tatou filifiliga ma taiala ai o tatou mafaufauga ma faatinoga. E tatau ona tatou saili i soo se mea e valaaulia ai le faatosinaga a le Agaga ma teena ai soo se mea e tataiese atu ai lena faatosinaga—aua ua tatou iloa afai e mafai ona tatou agavaa mo le mafutaga a le Agaga Paia, e mafai foi ona tatou agavaa e nonofo i le afio‘aga o le Tama Faalelagi ma Lona Alo o Iesu Keriso.